ཉེ་ལམ་རྒྱ་གཞུང་གིས་རྒྱལ་གཅེས་དཔའ་བོ་ཐུབ་དབང་སྐྱབས་ལཊ་ཀྱི་མེར་བསྲེཊ་དང་འབྲེལ་བ་ཡོད་པའི་ཉེས་མིང་འོག་འཛིན་བཟུང་བྱས་པའི་བོད་མི་གཉིས་གསང་བའི་སྒོ་ནས་ཀློད་གྲོལ་བཏང་ཡོད་འདུག
བོད་ནས་འབྲེལ་ཡོད་མི་སྣ་ཞིག་གིས་གསར་ལམ་དུ་གནས་ཚུལ་མཁོ་སྤྲོད་བྱས་པ་ལྟར་ན། རྒྱ་གཞུང་གིས་ཕྱི་ལོ་ ༢༠༡༢ ཟླ་ ༡༠ ཚེས་ ༢༦ ཉིན་ཀན་ལྷོ་བོད་རིགས་རང་སྐྱོང་ཁུལ་བླ་བྲང་བསང་ཆུ་རྫོང་བསང་ཁོག་ཞང་གསེར་ཁྲི་སྡེ་བའི་རང་ལོ་ ༢༣ ཡིན་པའི་ཐུབ་དབང་སྐྱབས་ལགས་ཀྱིས། བསང་ཁོག་ཞང་དུ་རང་ལུས་མེར་བསྲེཊ་ཀྱིས་རྒྱ་གཞུང་ལ་ངོ་རྒོལ་བྱས་ཏེ་སྐུ་གྲོངས་རྗེས་སྐུ་ཕུང་བདག་པོ་རྒྱག་མཁན་དང་རང་སྲེག་ངན་སྐུལ་བྱེད་མཁན་ཡིན་པའི་ཉེས་མིང་འོག བསང་ཁོག་ཀོའུ་སྡེ་ནས་ཡིན་པའི་བོད་མི་རྡོ་རྗེ་བཀྲ་ཤིས་དང་སྦྱིན་པ། གསེར་ཁྲི་སྡེ་བ་ཞོལ་མ་ནས་ཡིན་པའི་རྡོ་རྗེ་རྣམ་རྒྱལ་བཅས་མི་གསུམ་འཛིན་བྱས་ཏེ། རྡོ་རྗེ་བཀྲ་ཤིས་དང་སྦྱིན་པ་གཉིས་ལོ་གཅིག་ཙམ་གྱི་རིང་བཀག་ཉར་བྱས་རྗེས་སོ་སོར་ལོ་ ༡ དང་ཟླ་ ༦ རེའི་བཙོན་འཇུག་ཁྲིམས་ཐག་དང་། རྡོ་རྗེ་རྣམ་རྒྱལ་ལ་ལོ་ ༢ བཙོན་འཇུག་ཁྲིམས་ཐག་བཅད་དེ་ཀན་སུའུ་ཞིང་ཆེན་ལན་ཀྲུའུ་གྲོང་ཁྱེར་ཉེ་ཁུལ་གྱི་བཙོན་ཁང་ཁག་ཅིག་ཏུ་བཙོན་འཇུག་བཀག་ཉར་བྱས་ཡོད་འདུག
ཉེ་ལམ་རྡོ་རྗེ་བཀྲ་ཤིས་དང་སྦྱིན་པ་གཉིས་ཀྱི་ནང་མིས་ཁོང་གཉིས་བཙོན་གྲོལ་གཏོང་རྒྱུའི་གནས་ཚུལ་གོ་རྗེས་རླངས་འཁོར་གྲྭ་སྒྲིག་བྱས་ཏེ་བསུ་མ་བྱེད་དུ་འགྲོ་རྩིས་བྱས་ཡོད་ཀྱང་། བསང་ཆུ་རྫོང་ཉེན་རྟོག་པས་ཁོང་ཚོ་བསུ་རུ་འགྲོ་གི་ཡིན། ཁྱེད་རང་ཚོ་འགྲོ་ཆོག་གི་མ་རེད་ཅེས་བཀའ་བཏང་ཡོད་འདུག ཕྱི་ཚེས་ ༡༨ ཉིན་ནང་མི་ཉེ་འབྲེལ་ཚོས་ཁོང་གཉིས་རང་ཁྱིམ་དུ་ལོག་པར་གྲ་སྒྲིག་བྱས་ཡོད་ཀྱང་བཙོན་གྲོལ་བཏང་མེད་པར། ཕྱི་ཚེས་ ༡༩ ཉིན་གྱི་བོད་ནང་གི་དགོང་མོའི་ཆུ་ཚོད་ ༡༢།༠༠ ཙམ་ལ་རྫོང་ཉེན་རྟོག་པས་ཁོང་གཉིས་སོ་སོའི་ཁྱིམ་དུ་བསྐྱལ་ཡོད་འདུག ད་ཆར་ཁོང་གཉིས་ཀྱི་གཟུགས་པོའི་གནས་སྟངས་གང་འདྲ་ཆགས་ཡོད་མེད་སོགས་ཞིབ་ཕྲའི་གནས་ཚུལ་མ་ཤེས་པར་ལྷག་ཡོད་འདུག
དེ་སྔོན་ཁོང་གཉིས་དང་མཉམ་དུ་འཛིན་བཟུང་བྱས་པའི་གསེར་ཁྲི་སྡེ་བ་ཞོལ་མའི་བོད་མི་རྡོ་རྗེ་རྣམ་རྒྱལ་ད་ཆར་ཡང་ལན་ཀྲུའུ་གྲོང་ཁྱེར་ཉེ་འཁྲིས་ཀྱི་བཙོན་ཁང་ཞིག་ཏུ་བཀག་ཉར་བྱས་ཡོད་འདུག
གསར་འགོད་པ། དོན་གོ
