ལོ་རྗེས་མར་༧གོང་ས་མཆོག་དགུང་གྲངས་བརྒྱད་ཅུར་ཕེབས་པ་དང་བསྟུན་ཏེ། བོད་མིའི་སྒྲིག་འཛུགས་དང་དགེ་ལྡན་ལྷན་ཚོགས། མདོ་སྨད་ཆོལ་ཁ་གསུམ་མཉམ་འབྲེལ་ཐོག་སྐུའི་གྱ་སྟོན་དང་འབྲེལ་ནས་༧གོང་ས་མཆོག་ལ་བརྟན་བཞུགས་བསྟར་འབུལ་ཞུ་རྒྱུ་ཡིན་འདུག
དེ་རིང་སྔ་དྲོའི་ཆུ་ཚོད་ ༡༠།༠༠ ཐོག་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ལྷག་པ་ཚེ་རིང་ཚོགས་ཁང་དུ། བོད་མིའི་སྒྲིག་འཛུགས་དང་རྒྱལ་སྤྱིའི་དགེ་ལྡན་ལྷན་ཚོགས། མདོ་སྨད་ཆོལ་ཁ་བཅས་ཐུན་མོང་ཐོག ལོ་རྗེས་མར་༧གོང་ས་མཆོག་དགུང་གྲངས་ ༨༠ ཞེས་སྐབས་སྐུའི་གྱ་སྟོན་བརྟན་བཞུགས་འབུལ་ཕྱོགས་སྐོར་ལ་གསར་འགོད་གསལ་བསྒྲགས་ཤིག་བསྐྱངས་སོང་། གསར་འགོད་ལྷན་ཚོགས་ཐོག་བརྟན་བཞུགས་གོ་སྒྲིག་ཚོགས་ཆུང་གི་ཚོགས་མི་ཆོས་རིག་དྲུང་ཆེ་དོན་འགྲུབ་རྡོ་རྗེ་ལགས་དང་། རྣམ་རྒྱལ་གྲྭ་ཚང་གི་མཁན་པོ་ཁྲོམ་ཐོག་རིན་པོ་ཆེ་མཆོག མདོ་སྨད་དབུས་སྤྱི་ཁྱབ་རྒྱུན་ལས་ཚོགས་གཙོ་བསྟན་པའི་དངོས་གྲུབ་ལགས་བཅས་ལྷན་བཞུགས་ཐོག སྐུའི་གྱ་སྟོན་སྲུང་གཙི་ཞུ་ཕྱོགས་ཀྱི་རྒྱབ་ལྗོངས་གནས་ཚུལ་སྐོར་ལ་ཆོས་རིག་དྲུང་ཆེ་དོན་འགྲུབ་རྡོ་རྗེ་ལགས་ཀྱིས་བརྗོད་དོན། ༢༠༡༥ ལོར་༧གོང་ས་མཆོག་ཕྱི་ལུགས་ལྟར་དགུང་གྲངས་བརྒྱད་ཅུར་ཕེབས་ཀྱི་ཡོད་སྟབས། ང་ཚོས་དེ་དང་བསྟུན་ཏེ་སྐུའི་འཁྲུངས་སྐར་ཉིན་མོར་བོད་མིའི་སྒྲིག་འཛུགས་ཀྱི་གཞུང་མང་གཉིས་ནས་བརྟན་བཞུགས་ཤིག་འབུལ་རྒྱུ་སྙན་སེང་ཞུས་པ་དང་ཆབས་ཅིག་རྒྱལ་སྤྱིའི་དགེ་ལྡན་ལྷན་ཚོགས་སམ་དགེ་ལུགས་སྤྱི་ཐོག་ནས་ཀྱང་དེ་ལྟར་གསོལ་འདེབས་ཞུས་འདུག
ཉེ་ལམ་ཕྱི་ཟླ་ ༤ ཚེས་ ༧ ཉིན་དགའ་ལྡན་ཕོ་བྲང་ནས་བཀའ་ཡིག་ཕེབས་པའི་ནང་། བོད་མིའི་སྒྲིག་འཛུགས་ཀྱིས་བརྟན་བཞུགས་འབུལ་རྒྱུའི་སྙན་སེང་བསྒྲོན་པ་དེ། ༧གོང་ས་མཆོག་འཆར་ལོའི་འཁྲུངས་སྐར་སྐབས་དྷ་སར་བཞུགས་འཇགས་གནང་གི་མེད་པ་དང་། འཁྲུངས་སྐར་དེ་ཨ་རིར་ཐུགས་གཏན་འཁེལ་ཡོད་སྟབས། བོད་མིའི་སྒྲིག་འཛུགས་ཀྱི་བརྟན་བཞུགས་དང་། མདོ་སྨད་ཆོལ་ཁའི་སྐུའི་གྱ་སྟོན་གྱི་བརྟན་བཞུགས། རྒྱལ་སྤྱིའི་དགེ་ལྡན་ལྷན་ཚོགས་ཀྱི་བརྟན་བཞུགས་རེ་རེ་བཞིན་མི་དགོས་པར་ཐུན་མོང་ཐོག་བསྟར་འབུལ་ཞུས་ན་ལེགས་བཀའ་ཁྲོལ་ཐོབ་པ་ལྟར། ཟླ་འདིའི་ཚེས་ ༢༣ ཉིན་རྒྱལ་སྤྱིའི་དགེ་ལྡན་ཚོགས་པའི་མཁན་རིན་པོ་ཆེ་དབུས་པའི་ཆོས་འཕེལ་བཟོད་པ་ལགས་དང་ཚོགས་མི་གཞན་ཞིག་བཅས་འཐུས་མི་གསུམ་དང་། ཆོས་རིག་ལས་ཁུངས་ཀྱི་དྲུང་ཆེ་ཆུང་དང་ཟུང་དྲུང་། དེ་བཞིན་མདོ་སྨད་ཆོལ་ཁའི་ཚོགས་གཙོ་དབུས་པའི་ཚོགས་མི་གཉིས་བཅས་ཀྱིས་གྲོས་བསྡུར་བརྒྱུད་གསར་འགོད་གསལ་བསྒྲགས་འདི་སྤེལ་རྒྱུ་ཐག་གཅོད་བྱས་པ་ཡིན། ཞེས་བརྗོད་སོང་།
ཆོས་རིག་ལས་ཁུངས་ཀྱིས་བརྟན་བཞུགས་འབུལ་ཕྱོགས་སྐོར་ལ། ང་ཚོ་ཆོས་རིག་ལས་ཁུངས་ལ་མཚོན་ན། བརྟན་བཞུགས་འདི་སྔོན་མ་ནས་ཐུགས་གཏན་འཁེལ་བ་ཞིག་ཆགས་ཡོད་པ་མ་ཟད། བརྟན་བཞུགས་བསྟར་འབུལ་ཞུ་རྒྱུའི་ཐད་ ༢༠༡༤ ལོའི་ཟླ་ ༦ ཚེས་ ༢༤ ཉིན་རྒྱ་བལ་འབྲུག་གསུམ་གཙོས་པའི་ཕྱི་རྒྱལ་ཡུལ་གྲུ་ཁག་ནང་གསལ་བསྒྲགས་ཤིག་སྤེལ་ཏེ། བོད་མི་ཡིན་ནོ་ཅོག་གིས་སོ་སོ་ག་པར་གནས་ཡོད་ཀྱང་། རྒྱལ་ཁབ་དང་ཡུལ་ལུང་དེའི་དངུལ་སྒོར་ ༣ རེ་ཞལ་འདེབས་འབུལ་ལམ་ཞུ་དགོས་པ་དང་། དེའི་སྒང་ལ་དང་འབུལ་ཞུ་མཁན་ཡོད་ཚེ་ང་ཚོས་ཞུ་གི་ཡིན་ཟེར་ནས་གསལ་བསྒྲགས་བཏང་ཟིན་ཡང་། རྗེས་སུ་བརྟན་བཞུགས་འདི་ང་ཚོ་ཐུན་མོང་ཐོག་འབུལ་རྒྱུའི་ངོ་བོར་གྱུར་ཡོད་སྟབས། ང་ཚོས་གོ་སྡུར་བརྒྱུད་ཐེངས་དང་པོ་ཚོགས་ཆུང་ཞིག་བཙུགས་ནས་མང་ཚོགས་ཚོར་མཁྱེན་རྟོགས་ཡོང་ཆེད་གསལ་བསྒྲགས་འདི་ཞུས་པ་ཞིག་ཡིན། ཞེས་སོགས་བརྗོད་སོང་།
དེའི་རྗེས་ཁྲོམ་ཐོག་རིན་པོ་ཆེ་མཆོག་གིས། ཐོག་མར་བརྟན་བཞུགས་འདི་གལ་ཆེན་དོན་ཆེན་དུ་གཟིགས་ཏེ་སྙན་སེང་ཞུ་མཁན་དེ་མདོ་སྨད་ཆོལ་ཁ་རེད། མདོ་སྨད་ཆོལ་ཁས་སྔ་ས་ནས་སྙན་སེང་ཞུས་ཏེ་བཀའ་བཞེས་ཟབ་མོ་ཐོབ་པ་མ་ཟད། ཁོང་རྣམ་པས་འཕྱར་བ་གྲུ་འདེགས་ཐོག་ནས་གྲ་སྒྲིག་འཐུས་ཚང་གནང་འདུག དངོས་གནས་རྗེས་སུ་ཡི་རངས་ཞུ་དགོས་པ་ཆགས་འདུག རྒྱལ་སྤྱིའི་དགེ་ལྡན་ལྷན་ཚོགས་ལ་གྲྭ་ཚང་ ༡༡ ཡོད་ཁོངས་སུ་རྣམ་རྒྱལ་གྲྭ་ཚང་ཡོད་སྟབས་ངས་ཁོང་རྣམ་པའི་ཚབ་བྱེད་རོགས་ཞེས་བཀའ་མངགས་གནང་བ་ལྟར་ཚབ་བྱས་ཏེ་ཞུ་གི་ཡོད།
ལོ་སྔོན་མའི་ལམ་རིམ་གསུང་ཆོས་སྐབས་སྐྱབས་རྗེ་ཁྲི་རིན་པོ་ཆེ་མཆོག་དང་ཤར་བྱང་ཆོས་རྗེ་རྣམ་གཉིས་གཙོས་གྲྭ་ཚང་ ༡༡ གི་མཁན་ལས་ཟུར་རྣམ་པ་ཚང་མ་མཇལ་ཁར་བཅར་ཏེ། ༧གོང་ས་མཆོག་དགུང་གྲངས་བརྒྱད་བཅུར་ཕེབས་པའི་དུས་སྟོན་དང་འབྲེལ་ནས་བརྟན་བཞུགས་ཤིག་འབུལ་རྒྱུའི་གསོལ་འདེབས་ཞུས་དོན་ལྟར་༧གོང་ས་མཆོག་གིས་འགྲིག་གི་རེད་གསུངས་ནས་ཞལ་བཞེས་ཟབ་མོ་ཐོབ་སྟབས། བརྟན་བཞུགས་ཀྱི་བྱེད་སྒོ་རྣམ་གསུམ་ཕྱི་ཟླ་ ༩ ནང་རྒྱལ་སྤྱིའི་དགེ་ལྡན་ལྷན་ཚོགས་ཀྱི་ཚོགས་འདུ་ཞིག་ཚོགས་འཆར་ཡོད་པའི་ཐོག་གཏན་འབེབས་ཞུ་རྒྱུ་ཡིན། བརྟན་བཞུགས་འབུལ་རྒྱུ་དེ་ཆུ་ཚོད་གཉིས་གསུམ་རིང་ཞལ་འདོན་གནང་རྒྱུ་ཙམ་མིན་པར། ལོ་གཅིག་རིང་རྒྱལ་སྤྱིའི་དགེ་ལྡན་ལྷན་ཚོགས་ཀྱི་ཁྱབ་ཁོངས་སུ་ཡོད་པའི་དགེ་ལུགས་པ་སྤྱི་ཡོངས་ཀྱིས་༧གོང་ས་མཆོག་གི་ཐུགས་དགྱེས་པའི་མཆོད་སྤྲིན་ཆེད་ཤེས་ཡོན་དང་ཆོས་ཕྱོགས་སོགས་ལ་བགྲོ་གླེང་བཅས་ཀྱི་མཛད་རིམ་མང་པོ་ཞིག་སྒྲིག་གི་ཡོད། དེ་ཚོ་ཟླ་ ༩ པའི་རྗེས་ལ་གསལ་བསྒྲགས་ཞུ་རྒྱུ་ཡིན། ཞེས་སོགས་བརྗོད་གནང་སོང་།
མདོ་སྨད་དབུས་རྒྱུན་ཚོགས་གཙོ་བསྟན་པའི་དངོས་གྲུབ་ལགས་ཀྱིས། གྱ་སྟོན་འཚོགས་རྒྱུ་དེ་མདོ་སྨད་ཆོལ་ཁ་གཅིག་པུ་མིན་པར་དམིགས་བསལ་ཚོགས་ཆེན་མ་སྐོང་སྔོན་ལ་ཆོལ་ཁ་གཞན་ཚོར་སོ་སོས་འབྲེལ་བ་བྱས་ཏེ། སྐད་ཆ་དེ་འདྲ་དྲིས་པ་ཡིན། སྐབས་དེར་ཁོ་ཚོར་གྱ་སྟོན་ཟེར་བའི་ལམ་ལུགས་སྲོལ་དེ་འདྲ་གསལ་པོ་མེད་པའི་རྣམ་པ་ཞིག་མཐོང་སོང་། ཡིན་ཡང་། མདོ་སྨད་ཆོལ་ཁ་ལ་དམིགས་བསལ་གྱིས་སོ་སོའི་ཕ་མ་དང་བླ་མ་ཡན་ཆད་ལ་བཀའ་དྲིན་གསོ་ཆེད་དམིགས་བསལ་ལུགས་སྲོལ་ཞིག་ཡོད་སྟབས། ༢༠༡༢ ལོའི་ཟླ་ ༣ ཚེས་ ༡༥ ཉིན་ཚོགས་ཆེན་ཐོག་མདོ་སྨད་ཆོལ་ཁའི་ངོས་ནས་སྐུའི་གྱ་སྟོན་གོ་སྒྲིག་ཞུ་དགོས་ཀྱི་འདུག་ཅེས་ཐུགས་གཏན་འཁེལ་ཡོད་པ་ལྟར། ༢༠༡༢ ལོའི་ཟླ་ ༣ ནང་༧གོང་ས་མཆོག་ལ་སྙན་སེང་ཞུས་ཏེ། ༢༠༡༢ ལོའི་ཟླ་ ༤ ཚེས་ ༨ ཉིན་ཞལ་བཟང་བསྐལ་བ་ཐོབ་ཡོད་པ་རེད། དེ་བཞིན། ༢༠༡༣ ལོའི་ཟླ་ ༣ ཚེས་ ༡༥ དང་ ༡༦ ཉིན་གཉིས་རིང་གྱ་སྟོན་གོ་སྒྲིག་ཚོགས་ཆུང་གི་དམིགས་བསལ་ཚོགས་ཆེན་ཞིག་སྐོང་ཚོགས་བྱས་ཏེ། ཚོགས་ཆུང་ཞིག་གསར་འཛུགས་བྱས་ཏེ་ལས་རིམ་ཚང་མ་གཏན་འབེབས་བྱས་པ་རེད། ༧གོང་ས་མཆོག་གི་སྐུའི་གྱ་སྟོན་ཟེར་སྐབས་གལ་ཆེན་པོ་ཞིག་དང་ལས་ཀ་རྒྱ་ཆེན་པོ་ཞིག་ཡིན་སྟབས། ང་ཚོས་ད་རེབ་གྱ་སྟོན་འདི་བཙན་བྱོལ་ནང་ཡོད་པའི་མདོ་སྨད་གཅིག་པུ་མིན་པར། བོད་ཕྱི་ནང་གཉིས་དང་འཛམ་གླིང་གི་ས་ཕྱོགས་གང་སར་ཡོད་པའི་བོད་མི་ཡོད་དོ་ཅོག་ལ་མ་གོ་མ་ཐོས་མེད་པ་ཞིག་བཟོས་ཡོད།
༢༠༡༤ ལོའི་ཟླ་ ༤ ཚེས་ ༧ ཉིན་དགའ་ལྡན་ཕོ་བྲང་ནས་བཀའ་ཡིག་ཟབ་མོ་ཕེབས་ཏེ། སྔ་ལོར་མདོ་སྨད་ཆོལ་ཁས་གསོལ་བ་བཏབས་པ་བཞིན་དེ་ལ་ཐུགས་གཏན་འཁེལ་ཡོད་པ་དང་། དབུས་བོད་མིའི་སྒྲིག་འཛུགས་དང་དགེ་ལུགས་སྤྱི་ཐོག་ནས་ཀྱང་དེ་བསྟུན་གནང་ན་ཞེས་བཀའ་ཡིག་ཕེབས་པ་ལྟར། ང་ཚོ་གྱ་སྟོན་གོ་སྒྲིག་ཚོགས་ཆུང་གི་ཚོགས་མི་ཚང་མས་ཡིག་ཆུང་དེ་དང་འབྲེལ་བའི་ཐོག་ལ་ཚོགས་འདུ་ཚོགས་ཏེ་མདོ་སྨད་ཆོལ་ཁ་དང་བོད་མིའི་སྒྲིག་འཛུགས། དགེ་ལུགས་སྤྱི་ཐོག་གསུམ་མཉམ་འབྲེལ་བྱེད་རྒྱུའི་ཐག་གཅོད་བྱུང་བ་རེད། བོད་གཞུང་དང་མདོ་སྨད་ཆོལ་ཁ་མཉམ་དུ་བྱས་པ་དེ་གཟི་བརྗིད་ཅིག་རེད་བསམ་གྱི་ཡོད། མཉམ་རུབ་བྱེད་སྐབས་མང་ཚོགས་ཚོར་བྱུང་རིམ་དེ་གསལ་གསལ་ཐིང་ཐིང་ཞིག་བཟོ་དགོས་ཀྱི་འདུག ཅེས་གསར་འགོད་གསལ་བསྒྲགས་འདི་སྤེལ་བ་རེད། ཅེས་སོགས་བརྗོད་སོང་།
དབུས་བོད་མིའི་སྒྲིག་འཛུགས་དང་མདོ་སྨད་ཆོལ་ཁ། རྒྱལ་སྤྱིའི་དགེ་ལྡན་ལྷན་ཚོགས་ཐུན་མོང་གི་བརྟན་བཞུགས་འདི། ༢༠༡༥ ལོའི་ཟླ་ ༦ ཚེས་ ༢༡ དང་། བོད་ལུགས་རྩིས་ན་བོད་ཟླ་ ༥ པའི་ཚེས་ ༥ ཉིན་བསྟར་འབུལ་ཞུ་རྒྱུ་ཡིན་འདུག
གསར་འགོད་པ། དོན་གྲུབ།
༸སྤྱི་ཚོགས་ནང་༸གོང་ས་མཆོག་གི་མཚན་བེད་སྤྱོད་དང་འབྲེལ་བའི་དུས་དྲན་སོགས་བརྗོད་དུས་མི་མང་པོ་ཞིག་ནས་ཞལ་འདེབས་རང་བཞིན་གྱིས་འབུལ་གྱི་ཡོད། འོན་ཀྱང་དེ་དག་གང་དུ་བཏང་གི་ཡོད་གསལ་པོ་མཁྱེན་དགོས།
ལྷག་པར་བརྟན་བཞུགས་འབུལ་མཁན་དག་གིས་ཞལ་འདེབས་ཆ་ཤས་ཞིག་ཆོས་ཕྱོགས་ཀྱི་བྱེད་སྒོར་འགྲོ་གི་ཡོད་ནའང་། བཀའ་བཞིན་སྒྲུབ་པ་མཆོད་པས་མཉེས་པར་བྱེད་དགོས་ཞེས་པ་ལྟར། སྤྱི་ཚོགས་ཕན་བདེ་སོགས་དཀའ་ངལ་ཅན་ཚོར་བཏང་ཐུབ་ན་ཧ་ཅང་ལེགས་ཞུ་རྒྱུ་ཡིན།།
སྐེ་མདུད་ཅན་དེ་མདོ་སྨད་མི་མང་གི་ནང་ན་ཡོད་ལ་མེད་ལ་དེ་ཡིན་པའི་སྐད་ཆ་རེད། དེའི་བཟོ་ལྟའང་བློར་མ་བབས་ན་འདི་ལས་ལྷག་ཅིག་མདོ་སྨད་ལ་མེད་པ་འདྲ། ཨ་རོགས། ཇོ་རུ། ཕོ་གསར་རྫིག་པོ་འདུག་ད།
གནས་ཚང་། ཉི་ཤུ་རྩ། སུམ་ཅུ་སོ། བཞི་བཅུ་ཞེ། བརྒྱད་ཅུ་གྱ་ཟེར་གི་རེད་ལོ། རྗེས་མ་ནས་ཏག་ཏག་ལབ་ཐུབ་བ་བྱོས་ཤོག་ལོ།
ཝེ། གནས་ཚང་། བརྒྱད་ཅུ་ལ་གྱ་མི་ཟེར་ན་ཅི་ཟེར་གི་རེད། བརྒྱད་ཅུ་གྱ་གཅིག་ལ་བརྒྱད་ཅུ་གཅིག་གི་ཟེར་གི་རེད་དམ། ཡར་མར་མི་ཤེས་ནའང་བཙུམ་མི་ཤེས་སམ།
བརྒྱད་ཅུ་ལ་ཟེར་གྱི་ཡོད་ན། ཅུ་སྟོན་ལབ་ན་ལེམ་པོ་མི་འདུག་གམ། མག་པ་དང་མནའ་མའམ་བག་མ་ཟེར་བའི་རྗེས་སུ་སྟོན་སྦྱར་ན་ཧ་གོ་སླ་ཡང་། བརྒྱད་ཅུ་ལ་གྱ་ཟེར་བ་ཞིག་བོད་སྐད་ནང་འདུག་གམ།
བརྒྱད་ཅུའི་གྱ་སྟོན་རྒྱ་མིའི་སྐད་འདྲ་བོ་ཡོད་ན། བག་མའི་བག་སྟོན། མག་པའི་མག་སྟོན་ཡང་རྒྱ་མིའི་སྐད་འདྲ་བོར་ཡོད་དགོས་པར་ཐལ། ཉོག་གཏམ་རང་རེད། འོན་ཀྱང་། མདོ་སྨད་དབུས་རྒྱུན་ཚོགས་གཙོས་སྐུའི་བརྟན་བཞུགས་ཀྱི་གསར་འགོད་གསལ་བསྒྲགས་སྐབས། བོད་ལྭ་ཞིག་ཀྱང་མི་གྱོན་པར་ཕྱི་ལྭ་གྱོན་ནས་སྐེ་མདུད་རྒྱག་ཚུལ་བལྟས་ནས་མཉམ་འབྲེལ་རྒྱལ་ཚོགས་ཀྱི་ཚོགས་ཁང་དུ་སླེབས་པ་ཨེ་རེད། གསར་འགོད་གསལ་བསྒྲགས་འདི་བོད་མི་མང་ལ་སྒྲོག་དགོས་པ་ལས་ཕྱི་རྒྱལ་ལ་སྒྲོག་དགོས་པ་མ་རེད། བཟོ་ལྟ་དེ་འདྲ་ཆོ་མེད་པ་བསྟན་ན་ལེགས་པོ་མི་འདུག
མགོ་ཉོག་པོའི་གནས་ཚུལ་མང་པོ་ཞིག་ཆགས་སོང་། སྔོན་མ་མདོ་སྨད་བསྟན་བཞུགས་གོ་སྒྲིག་ཚོགས་ཆུང་གིས་སྐུའི་གྱ་སྟོན་དང་བརྟེན་བཞུགས་ཆེད་བོད་ཕྱི་ནང་གཉིས་ཀྱི་མདོ་སྨད་མི་མང་ལ་ཞལ་འདེབས་མང་པོ་ཞིག་བསྡུས་པ་རེད། ད་ལྟ་བོད་གཞུང་དང་དགེ་ལུགས་སྤྱི་ཡོངས་ཀྱིས་བརྟེན་བཞུགས་འབུལ་རྒྱུ་ཡིན་སྐོར་ཞིག་ཤོད་བཞིན་འདུག
མགོ་ཉོག་གཞན་གཅིག་དེ་ག་རེ་རེད་ཟེར་ན། སྔོན་མ་ཤོད་སྟངས་བྱས་ན་སྐུའི་གྱ་སྟོན་སྐབས་བརྟེན་བཞུགས་མ་ཡིན་པའི་མཛད་རིམ་མང་པོ་ཞིག་ཡོད་སྐོར་ཁྱབ་བསྒྲགས་བྱས་པ་རེད། ད་རེས་ལས་རིམ་དེ་དག་སྐོར་ལ་ཁ་གསལ་གང་ཡང་བཤད་མི་འདུག གང་ལྟར་ད་དུང་གསལ་བཤད་ཡག་པོ་ཞིག་མ་བཟོས་པ་ཡིན་ན་མང་ཚོགས་མགོ་འཐོམ་གཞི་ཆེན་པོ་ཞིག་ཆགས་འདུག
གྱ་སྟོན་ལབ་ན་རྒྱ་མིའི་སྐད་འདྲ་བོ་ཞིག་འདུག་ག