པད་ནོར་རིན་པོ་ཆེའི་ཡང་སྲིད་པདྨ་རྡོ་རྗེ་མཆོག་ཁྲི་འདོན་སྟ་གོན།

ཁ་སང་ཕྱི་ཚེས་ ༢༨ ཉིན་སྔ་འགྱུར་རྙིང་མའི་དབུ་འཛིན་ཁྲི་རབས་གསུམ་པ་གྲུབ་དབང་པདྨ་ནོར་བུ་མཆོག་གི་ཡང་སྲིད་པདྨ་རྡོ་རྗེ་མཆོག་སེར་སྐྱ་མི་མང་སྟོང་ཕྲག་མང་པོའི་ཕེབས་སུ་དང་བཅས་བོད་ནང་གི་གདན་ས་དཔལ་ཡུལ་མ་དགོན་བྱང་ཆུབ་ཆོས་གླིང་དུ་ཞབས་སོར་འཁོད་དེ་གསེར་ཁྲིར་མངའ་གསོལ་གྱི་སྟ་གོན་གནང་ཡོད་འདུག

སྔར་ལོའི་ཕྱི་ཟླ་ ༡༢ པའི་ཚེས་ ༥ ཉིན་རྒྱ་གར་ལྷོ་ཕྱོགས་སྦེལ་ཀོབ་དུ་ཡོད་པའི་ཐེག་མཆོག་རྣམ་གྲོལ་བཤད་སྒྲུབ་དར་རྒྱས་གླིང་ནས་གསལ་བསྒྲགས་སྤེལ་བའི་ནང་། ཕྱི་ལོ་ ༢༠༡༤ ལོའི་ཕྱི་ཟླ་ ༧ པའི་ཚེས་ ༣༡ ཉིན་ཆོས་འཁོར་དུས་ཆེན་ཉིན་བསྟུན་ཏེ། པད་ནོར་རིན་པོ་ཆེའི་ཡང་སྲིད་པདྨ་རྡོ་རྗེ་མཆོག་བོད་ནང་གི་དཔལ་ཡུལ་མ་དགོན་དུ་ཁྲི་འདོན་མངལ་གསོལ་གནང་རྒྱུ་ཡིན་སྐོར་བསྒྲགས་ཡོད།

གྲུབ་དབང་པདྨ་ནོར་བུ་རིན་པོ་མཆོག་ ༢༠༠༩ ཕྱི་ཟླ་ ༣ ཚེས་ ༢༧ ཉིན། རྒྱ་གར་ལྷོ་ཕྱོགས་རྣམ་གྲོལ་གླིང་གདན་ས་ཆེན་མོ་རུ་སྐུ་གྲོངས་ཡོད་པ་རེད།

༢༠༡༣ ཟླ་ ༡༢ ཚེས་ ༥ ཉིན་རྣམ་གྲོལ་གླིང་ཆོས་སྒར་ནས་གསལ་བསྒྲགས་སྤེལ་བར། བྱ་བྲལ་སངས་རྒྱས་རྡོ་རྗེ་འཆང་གི་ལུང་བསྟན་ནང་། སྙིང་ཐིག་ཡ་བཞིའི་གཏེར་གནས་ལེ་ལེན་ཁྲ་མོ་བྲག་གི་ཉེ་འདབས་སུ། ཞིང་གཤེགས་དམ་པ་གྲུབ་དབང་པདྨ་ནོར་བུ་རིན་པོ་ཆེ་མཆོག་གི་ཡང་སྲིད་འཁྲུལ་བྲལ་ཞེས་གསུངས་པའི་ཐོག དཔལ་ཡུལ་རྣམ་རྒྱལ་བྱང་ཆུབ་ཆོས་གླིང་གི་སྤྲུལ་སྐུ་ཐུབ་བསྟན་དཔལ་བཟང་རིན་པོ་ཆེས་ཉམས་སྣང་གཙོ་བོར་མཛད་ནས། བོད་དབུས་ཕྱོགས་དྭགས་པོའི་ཡུལ་དུ་རྙེད་སོན་བྱུང་བ་ངོས་འཛིན་ཐག་གཅོད་བྱུང་ཡོད། ཅེས་གྲུབ་དབང་པདྨ་ནོར་རིན་པོ་ཆེ་མཆོག་གི་ཡང་སྲིད་ངོས་འཛིན་གནང་བ་གསལ་བསྒྲགས་སྤེལ་ཡོད།

གྲུབ་དབང་པད་ནོར་རིན་པོ་ཆེ་མཆོག་གི་ལོ་རྒྱུས་མདོ་བསྡུས་འདི་ག་དུས་བབ་ཟིན་བྲིས་པ་འཆམ་ར་དྲི་མེད་རྒྱལ་མཚན་ལགས་ཀྱིས་ཟིན་ཐོར་འཁོད་པའི་ནང་། ༧སྐྱབས་རྗེ་གྲུབ་དབང་པད་ནོར་རིན་པོ་ཆེ་མཆོག་ནི། ཕྱི་ལོ་ ༡༩༣༢ ལོར་མདོ་ཁམས་སྤོ་བོ་སྟོད་དུ་སྐུ་བལྟམས་ཤིང་། རྫོགས་ཆེན་ལྔ་བ་ཐུབ་བསྟན་ཆོས་ཀྱི་རྡོ་རྗེས་གྲུབ་དབང་གོང་མའི་ཡང་སྲིད་དུ་ངོས་འཛིན་མཛད། ༡༩༣༦ ལོར་དཔལ་ཡུལ་དགོན་དུ་གདན་འདྲེན་ཞུས་ཏེ་སྐུ་གོང་མའི་གསེར་ཁྲིར་མངའ་གསོལ། མཆོག་སྤྲུལ་ཐུབ་བསྟན་ཆོས་ཀྱི་ཟླ་བ་རིན་པོ་ཆེ་ལས་རབ་བྱུང་དང་བསྙེན་རྫོགས་ཀྱི་སྡོམ་པ་མནོས་ཏེ་སྔ་ཕྱི་བར་གསུམ་དུ་མཉེས་པ་གསུམ་གྱིས་བསྟེན་པས་གཙོས་དགེ་བའི་བཤེས་གཉེན་དུ་མའི་མདུན་ནས་བཀའ་གཏེར་མདོ་སྔགས་རིག་གནས་དང་བཅས་པར་གསན་བསམ་མཐར་ཕྱིན་གནང་།

༡༩༥༥ ལོར་དབུས་ཕྱོགས་སུ་ཕེབས་ཏེ་༧གོང་ས་རྒྱལ་བའི་དབང་པོའི་ཞབས་ལ་བཏུགས་ནས་ཚེ་དབང་ཞུས། སེ་འབྲས་དགེ་གསུམ་གྱིས་གཙོས་རིས་མེད་དགོན་སྡེ་ཁག་ལ་མཆོད་མཇལ་དང་ཆོ་འཕྲུལ་སྨོན་ལམ་ཆེན་མོར་འགྱེད་མང་ཇའི་བསྙེན་བཀུར་ཞུས། ༡༩༥༩ ལོར་བོད་བསྟན་སྲིད་མི་རིགས་དང་བཅས་པའི་དོན་དུ་རྒྱ་གར་དུ་བཙན་བྱོལ་ལ་ཕེབས། ༡༩༦༣ ལོར་དགུང་གྲངས་ ༣༢ ཐོག་ཧིན་སྒོར་སུམ་བརྒྱས་མ་རྩ་གནང་སྟེ་ཐེག་མཆོག་རྣམ་གྲོལ་བཤད་སྒྲུབ་དར་རྒྱས་གླིང་གི་ཆོས་སྡེ་འདི་གསར་དུ་བཞེངས་མགོ་བརྩམས། སྐབས་དེར་༧ གོང་ས་མཆོག་ཞབས་ཀྱིས་བཅགས་ཏེ་བྱིན་གྱིས་རླབས་ནས་རྣམ་གྲོལ་གླིང་ཅེས་པའི་མཚན་འདི་གནང་། ཁོང་རང་ཉིད་ཀྱང་ཨར་ལས་ལ་ཞུགས་གནང་སྟེ་ཕྱག་འཛུམ་རྩེ་ནས་ཁྲག་དང་ཆུ་སེར་རྡོལ་བཞིན་ཐོག་མའི་ཐུགས་བསྐྱེད་རླབས་པོ་ཆེ་ལྟར་རྟེན་དང་བརྟེན་པ་བཅས་ལེགས་གྲུབ་ཐོག་རྒྱལ་བསྟན་བཤད་སྒྲུབ་ལས་གསུམ་གྱིས་ད་ལྟའི་བར་བསྐྱངས།

༡༩༩༣ ལོར་སྔ་འགྱུར་བའི་བླ་ཆེན་ཁག་དང་འདུས་པ་སྤྱི་ནས་གསོལ་བ་བཏབ་པ་ལྟར། སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གིས་སྔ་འགྱུར་བསྟན་པ་ཡོངས་རྫོགས་ཀྱི་དབུ་འཛིན་དུ་མངའ་གསོལ་གྱིས་ལོ་བཅུ་ཕྲག་གཅིག་ལྷག་ཐུགས་འགན་བཞེས་ཏེ། རྒྱལ་བསྟན་སྤྱི་དང་བྱེ་བྲག་སྔ་འགྱུར་བའི་བསྟན་པ་ལ་ཕྱག་རྗེས་བླ་མེད་འཇོག་གནང་མཛད། ཁོང་གིས་བོད་དང་འབྲུག་འབྲས་ལྗོངས་བལ་ཡུལ་སོགས་ཀྱི་དགོན་པ་མང་པོར་གཟིགས་སྐྱོང་གནང་ཡོད་ཅིང་། ལྷོ་ཕྱོགས་སྦེལ་ཀོབ་བོད་ཀྱི་གཞིས་སྒར་གྱི་གཙོས་རྒྱ་གར་ཡུལ་མི་དག་ལའང་ལམ་དང་ཟམ་པ་སོགས། ཉམ་ཐག་དུ་མ་ལ་རོགས་རམ་གནང་བར་བརྟེན་ ༢༠༠༥ ལོར་ཀ་ན་ཏྲ་ཀའི་མངའ་སྡེ་གཞུང་གིས་སྤྱི་ཚོགས་ཞབས་ཞུའི་གཟེངས་རྟགས་འབུལ་གཞེས་གནང་ཡོད།

ལོ་འགའི་སྔོན་ནས་ཁོང་གིས་སྐུའི་འབྱུང་ཁམས་མི་བདེ་བའི་ཚུལ་བསྟན་ཅིང་། ལྷག་པར་དུ་ ༢༠༠༩ ལོའི་ཕྱི་ཟླ་ ༣ པའི་ཚེས་ ༢༤ ཉིན་སྐུའི་སྙུང་གཞི་ལྕི་རུ་སོང་སྟེ་རྒྱ་གར་ལྷོ་ཕྱོགས་ཀ་ན་ཏྲ་ཀ་མངའ་སྡེའི་རྒྱལ་ས་བྷེང་ལོར་སྨན་ཁང་དུ་ཕེབས་ཤིང་། ཕྱི་ཚེས་ ༢༧ ཉིན་རྙིང་མའི་བླ་ཆེན་ཁག་སྨན་ཁང་དེར་ལྷན་འཛོམ་གྱིས་རྒྱལ་ཡོངས་སྔ་འགྱུར་རྙིང་མའི་ངོས་ནས་བརྟན་བཞུགས་ཕུལ་ཡོད་ཅིང་། བོད་མིའི་སྒྲིག་འཛུགས་དང་འབྲུག་གཞུང་གིས་གཙོས་གནད་ཡོད་མི་སྣ་ཁག་མཇལ་བཅར་ཞུས། ཉིན་དེའི་ཕྱི་དྲོར་སྨན་ཁང་ནས་གདན་ས་རྣམ་གྲོལ་གླིང་དུ་གདན་འདྲེན་ཞུས་ཏེ་དགོན་པའི་མཁན་པོ་བླ་སྤྲུལ་ལས་བྱེད་ཡོངས་ཀྱིས་མཇལ་བཅར་ཞུས་རྗེས་དགོང་མོའི་ཆུ་ཚོད་ ༨ །༢༠ ཐོག་དགོངས་པ་ཆོས་དབྱིངས་སུ་ཐིམ་ཡོད་འདུག ཅེས་འཁོད་ཡོད་པ་ཟིན་བྲིས་ལས་བསྡུ་སྒྲིག་བྱས།