བོད་མི་ ༤༠ ལྷག་འཛིན་བཟུང་།

མགོ་ལོག་དར་ལག་རྫོང་དུ་ས་གནས་ཉེན་རྟོག་པ་དང་དྲག་ཆས་དམག་མི། བོད་མི་བཅས་ཀྱི་བར་འཁྲུག་འཛིང་ཤོར་ཏེ་བོད་མི་ ༤༠ ལྷག་འཛིན་བཟུང་བྱས་ཡོད་འདུག

གནས་ཚུལ་འབྱོར་གསལ་ལྟར་ན། ཟླ་འདིའི་ཚེས་ ༢༣ ཉིན་མཚོ་སྔོན་ཞིང་ཆེན་མགོ་ལོག་བོད་རིགས་རང་སྐྱོང་ཁུལ་དར་ལག་རྫོང་གི་བོད་མི་བསོད་བྷེ་ཞུ་བ་ཞིག་ལ། རྒྱ་རིགས་ཞིག་གི་རླངས་འཁོར་གྱིས་བརྒྱབ་སྟེ་ཉིན་དེར་འདས་གྲོངས་སུ་ཕྱིན་ཡོད་འདུག ཕྱིས་སུ་འདས་པོའི་ནང་མིས་རྒྱ་རིགས་རླངས་འཁོར་ཁ་ལོ་བ་ས་གནས་ཉེན་རྟོག་ལས་ཁུངས་ལ་འཁྲིད་དེ། ཉེན་རྟོག་པས་འདུམ་སྒྲིག་འོག་རྒྱ་རིགས་རླངས་འཁོར་ཁ་ལོ་བས་མི་བསད་པའི་གྱོད་དོན་ཐད་རྒྱ་སྒོར་ཁྲི་ ༤༠ སྟོང་མཇལ་ཏེ་གནད་དོན་ཐག་གཅོད་བྱ་རྒྱུའི་ཁས་ལེན་བྱས་ཡོད་ཀྱང་། འདས་པོའི་ནང་མི་ཉེ་འབྲེལ་ཚོ་ཉེན་རྟོག་ཁང་ནས་ཕྱིར་རང་ཁྱིམ་དུ་ལོག་རྗེས། རྒྱ་རིགས་ཁ་ལོ་བས་དེ་སྔོན་གྱི་ཐག་གཅོད་ལ་ཁ་ལེན་མ་བྱས་པར་མི་གསོད་གྱོད་དོན་ལ་རྒྱ་སྒོར་ཁྲི་ ༥ སྟོང་མཇལ་རྒྱུ་དང་། སྒོར་མོ་དེ་ཡང་འདས་པོའི་བྱིས་པའི་ལོ་ ༡༨ བར་གྱི་འཚོ་སྣོན་ཡིན་ཚུལ་བཤད་ཡོད་པར་མ་ཟད། ཉེན་རྟོག་པས་ཀྱང་རྒྱ་རིགས་རླངས་འཁོར་ཁ་ལོ་བ་ཀློད་གྲོལ་བཏང་ཡོད་འདུག

ཕྱི་ཚེས་ ༢༥ ཉིན་འདས་པོའི་ནང་མི་དང་ཉེ་འབྲེལ། གྲོགས་པོ་བཅས་ཉེན་རྟོག་ཁང་དུ་སོང་སྟེ་ཉེན་རྟོག་ཁང་གིས་གནས་ཚུལ་ཐག་གཅོད་གང་ཡང་མ་བྱས་པར་རྒྱ་རིགས་རླངས་འཁོར་ཁ་ལོ་བ་ཀློད་གྲོལ་གཏོང་དོན་ཐོག་གསལ་བཤད་གནང་དགོས་པའི་རེ་སྐུལ་ལ་ཡ་ལན་མ་བྱས་སྟབས། ས་གནས་ཉེན་རྟོག་པ་དང་དྲག་ཆས་དམག་མི། མི་མང་བར་འཁྲུག་འཛིང་ཤོར་སྟེ་དམག་མི་ཁག་ཅིག་ལ་རྨས་སྐྱོན་བྱུང་ཡོད་འདུག རྗེས་སུ་དམག་མི་མང་པོ་ཡོང་སྟེ་བོད་མི་ ༤༠ ལྷག་གཅར་རྡུང་འཛིན་བཟུང་བྱས་ཡོད་པ་དང་། འདས་པོའི་ནང་མི་ཉེ་འབྲེལ་ཁག་ཅིག་ལ་རྨས་སྐྱོན་ཚབས་ཆེན་བྱུང་ཡོད་འདུག

ཉེ་ལམ་རྒྱ་གཞུང་གིས་སྐབས་དེར་འཛིན་བཟུང་བྱས་པའི་བོད་མི་ ༢༠ ལྷག་ཀློད་གྲོལ་བཏང་ཡོད་ཀྱང་། ད་ཆར་བོད་མི་ཚང་མ་སྨན་ཁང་དུ་བསྐྱལ་ཏེ་སྨན་བཅོས་བྱེད་ཀྱི་ཡོད་འདུག་ལ། དར་ལག་རྫོང་སྲིད་གཞུང་གིས་ས་གནས་སུ་དམག་མི་ཉེན་རྟོག་པ་མང་པོ་འགྲེམས་འཇོག་གིས་ཡུལ་མི་ཚོར་དམ་དྲག་དང་ལྟ་རྟོག་ནན་མོ་བྱེད་ཀྱི་ཡོད་འདུག

གསར་འགོད་པ། དོན་གོ