པད་ནོར་རིན་པོ་ཆེའི་ཡང་སྲིད་ཁྲི་འདོན་གནང་།

དེ་རིང་སྐྱབས་རྗེ་༸གྲུབ་དབང་པད་ནོར་རིན་པོ་ཆེའི་ཆུང་སྲིད་པདྨ་རྡོ་རྗེ་མཆོག་དཔལ་ཡུལ་མ་དགོན་གྱི་གཙོས་རྒྱལ་ཕྱི་ནང་གི་རྙིང་མའི་དགོན་ཚོགས་ཁག་གིས་ཁྲི་འདོན་མངའ་གསོལ་གྱི་མཛད་སྒོ་ཚོཊ་ཡོད་འདུག

དེ་རིང་སྔ་དྲོར་དཀར་མཛེས་ཁུལ་དཔལ་ཡུལ་མ་དགོན་དུ། སྐྱབས་རྗེ་༸གྲུབ་དབང་པད་ནོར་རིན་པོ་ཆེའི་ཆུང་སྲིད་པདྨ་རྡོ་རྗེ་མཆོག་ཁྲི་འདོན་མངའ་གསོལ་གྱི་མཛད་སྒོ་ཚོགས་ཡོད་པ་དང་། མཛད་སྒོའི་སྟེང་དཔལ་ཡུལ་མ་དགོན་གྱི་སྤྲུལ་སྐུ་ཐུབ་བཟང་རིན་པོ་ཆེ་ཡིས་ཁྲི་འདོན་མངའ་གསོལ་གྱི་དབུ་བླ་གནང་བའི་ཐོགབྱེས་ཀྱི་གདན་ས་རྣམ་གྲོལ་གླིང་གི་མཁན་ཆེན་རྣམ་གསུམ་དང་མཆོག་སྤྲུལ་རྣམ་གཉིས།དེ་བཞིན་ཁྲི་འདོན་ཚོགས་ཆུང་གི་ཚོགས་མི་བཅས་ཆེད་བཅར་ཞུས་ཡོད་པ་མ་ཟད། དར་ཐང་དགོན་དང་ཡ་ཆེན་དགོན། གསེར་རྟ་བླ་རུང་སྒར་སོགས་རིས་སུ་མ་ཆད་པའི་དགོན་སྡེ་ཁག་གི་མཁན་སྤྲུལ་དང་སྐུ་ཚབ་སོགས་ཀྱིས་མནྜལ་རྟེན་གསུམ་འདེགས་འབུལ་བཅས་ཞུས་ཡོད་འདུག

དེ་རིང་སྔ་དྲོའི་ཆུ་ཚོད་ ༩།༣༠ ཐོག བྱེས་ཀྱི་གདན་ས་རྣམ་གྲོལ་གླིང་དུའང་ཡང་སྲིད་མཆོག་གི་སྐུ་པར་ཁྲི་འདོན་གྱི་མཛད་སྒོ་ཚོགས་ཡོད་པ་དང་། མཛད་སྒོའི་ཐོག་བླ་སྤྱི་དང་བཅས་པའི་གདན་ས་སེ་ར་བྱེས་སྨད་གཉིས་ཀྱི་མཁན་པོ་དགེ་བཤེས་རྣམ་པའི་དབུས་བཀའ་བརྒྱུད་དང་ས་སྐྱ་བཅས་དགོན་སྡེ་ཁག་གི་སྐུ་ཚབ། དེ་བཞིན། ས་གནས་གཞིས་མགོ་རྣམ་པའི་གཙོས་གཞུང་འབྲེལ་དང་གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ་རྣམ་པ་དང་། ས་གནས་སེར་སྐྱ་མི་མང་བཅས་འདུ་འཛོམས་ཐོག མཆོག་སྤྲུལ་ཀླུ་ཕུག་རིན་པོ་ཆེའི་དབུས་སྐུ་མགྲོན་རྣམ་པས་མནྜལ་རྟེན་གསུམ་འདེགས་འབུལ་ཞུས་ཡོད་པ་དང་། གཞན་ཡང་། ལྡེ་ར་ལྡུན་ཨོ་རྒྱན་སྨིན་གྲོལ་གླིང་དགོན་པ་དང་ཀོ་ལི་གྷར་རྫོགས་ཆེན་དགོན་པ། སྦིར་མགོ་དགོན་སོགས་རྒྱ་བལ་འབྲུག་གསུམ་གྱི་གཙོས་ཨ་རི་དང་ཁ་ན་ཌ། ཐའེ་ཝན། ཧོང་ཀོང་སོགས་ཕྱིའི་རྒྱལ་ཁབ་ཁག་ ༡༠ ཙམ་གྱི་ནང་ཡོད་པའི་དགོན་པ་དང་ཆོས་ཚོགས་ཁག་ནས་སྐུ་པར་ཁྲི་འདོན་གྱི་མཛད་སྒོ་སྤེལ་ཡོད་འདུག

ཆུང་སྲིད་རིན་པོ་ཆེ་པདྨ་རྡོ་རྗེ་མཆོག་ནི། ཕྱི་ལོ་ ༢༠༡༡ ཟླ་ ༡༢ ཚེས་ ༣༡ ཉིན་ལྷོ་ཁ་ས་ཁུལ་དྭགས་པོ་རྒྱ་ཚ་རྫོང་དུ། ཡབ་ནོར་བུ་དང་ཡུམ་ཕུར་བུ་སྒྲོལ་མ་གཉིས་ཀྱི་སྲས་སུ་སྐུ་འཁྲུངས་ཤིང་། ༢༠༡༣ ལོར་༸བྱ་བྲལ་རིན་པོ་ཆེ་མཆོག་གིས་སྐྱབས་རྗེ་པད་ནོར་རིན་པོ་ཆེ་སྐུ་ཕྲེང་བཅུ་གཅིག་པའི་ཡང་སྲིད་འཁྲུལ་མེད་དུ་ངོས་འཛིན་མཛད་དེ། འདས་ལོའི་ཕྱི་ཟླ་ ༡༢ ཚེས་ ༥ ཉིན་གདན་ས་རྣམ་གྲོལ་གླིང་འདུས་སྤྱིའི་ངོས་ནས་ཡང་སྲིད་ངོས་འཛིན་གྲུབ་པ་དང་། ཁྲི་འདོན་གྱི་མཛད་རིམ་བཅས་ཀྱི་ཡོངས་ཁྱབ་གསལ་བསྒྲགས་གནང་ཡོད་པ་རེད།

གསར་འགོད་པ། པདྨ་མཚོ།