རང་རྟོཊ་ཀྱི་སེམས་ཤུགས་དགོས།

བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༦༣༤ སྟེང་གི་རྩོམ་སྒྲིག་པའི་གཏམ།

རྩ་དོན་འཐབ་རྩོད་བྱེད་མཁན་ཞིག་གི་ངོས་ནས་བཤད་ན། མི་མང་གི་ཤེས་ཡོན་དང་སེམས་ཤུགས་དེ་ཧ་ཅང་གལ་ཆེན་ཡིན། ལྷག་པར་དུ་འཐབ་རྩོད་ལས་འགུལ་སྣེ་འཁྲིད་པའི་ཤེས་ཡོན་དང་གདེང་སྤོབས་དེ་ད་ལྟའི་དུས་འདིར་འཐབ་རྩོད་པའི་མི་འབོར་དང་མཚོན་ཆ་ལས་ཀྱང་གལ་ཆེན་ཡིན། ཤེས་ཡོན་དང་སེམས་ཤུགས་གཉིས་ལ་གཙོ་ཕལ་མེད། ཤེས་ཡོན་ཡོད་ཀྱང་སེམས་ཤུགས་མེད་ན་འཐབ་རྩོད་ལ་ཁ་ཕྱོགས་མེད་ལ། སེམས་ཤུགས་ཡོད་ཀྱང་ཤེས་ཡོན་མེད་ན་འཐབ་རྩོད་ལ་རྣོ་ངར་མེད།

བོད་པའི་འཐབ་རྩོད་ཐད་ནས་གླེང་ན། ང་ཚོས་ནམ་རྒྱུན་བོད་གཞིས་བྱེས་རྒྱ་ཆེའི་མི་མང་ལ་སེམས་ཤུགས་ཆེན་པོ་ཡོད་རབས་རྗོད་ཀྱིན་ཡོད་མོད། དོན་དངོས་ཐོག་བོད་པར་ད་དུང་སེམས་ཤུགས་དང་ཤེས་ཡོན་གཉིས་ཀས་ལོང་གི་མེད། ལྷག་པར་དུ་འཐབ་རྩོད་སྣེ་འཁྲིད་པར་ཤེས་ཡོན་ཀྱིས་འཕོངས་ཡོད་ལ། མི་རིགས་ཀྱི་མངོན་འདོད་བསྒྲུབ་པའི་བློས་གཏོང་དང་ཆོད་སེམས་ཀྱིས་ཀྱང་འདང་གི་མེད། ཐ་ན་ལས་འགུལ་སྣེ་འཁྲིད་པ་ཚོས་སོ་སོ་རང་ཉིད་ཀྱི་ལས་འགུལ་ལའང་ཡིད་ཆེས་མེད།

རྩོད་སྒྲུབ་རིག་པའི་རགས་བཤད་བྱས་ན། སེམས་ཤུགས་ལ་ལྟོས་བཅས་གཞན་བརྟེན་གྱི་སེམས་ཤུགས་དང་། ལྟོས་མེད་རང་རྟོགས་ཀྱི་སེམས་ཤུགས་གཉིས་ཡོད་པ་ལས། བོད་པའི་འཐབ་རྩོད་ཀྱི་བརྒྱུད་རིམ་ལས་མངོན་པ་ནི། གཞིས་བཞུགས་རྒྱ་ཆེའི་མི་མང་གི་སེམས་ཤུགས་དེ་དད་འདུན་དང་འབྲེལ་བའི་རང་རྟོགས་ཀྱི་སེམས་ཤུགས་ཉི་ཚེ་བ་ཞིག་དང་། བྱེས་གྱར་བོད་མིའི་སེམས་ཤུགས་དེ་སྐབས་བསྟུན་བབ་སྤྱོད་ཀྱི་སེམས་ཤུགས་འཕྲལ་འཕྲལ་གཞན་བརྟེན་པ་ཞིག་རེད།

གཞན་བརྟེན་གྱི་སེམས་ཤུགས་དེ་འཕྲལ་སེལ་དགོས་མཁོ་དང་འབྲེལ་ནས་ཡོད་ཅིང་། རང་རྟོགས་ཀྱིས་སེམས་ཤུགས་དེ་བསམ་བློའི་སྙིང་སྟོབས་ཤིག་དང་འབྲེལ་ནས་ཡོད། རང་རྟོགས་ཀྱི་སེམས་ཤུགས་དེ་ལའང་དད་འདུན་དང་འབྲེལ་བའི་ཡིད་ཆེས་རང་རྟོགས་ཀྱི་སེམས་ཤུགས་ཤིག་དང་། ཤེས་རབ་དང་འབྲེལ་བའི་གཏན་ཚིགས་རང་རྟོགས་ཀྱི་སེམས་ཤུགས་གཉིས་ཡོད་པ་ལས་བོད་པའི་འཐབ་རྩོད་ལ་མཁོ་བ་ནི་གཏན་ཚིགས་རང་རྟོགས་ཀྱི་སེམས་ཤུགས་དེ་ཡིན།

སྔོན་ཆད་རྒྱ་གར་གྱི་འཐབ་རྩོད་པ་ཞིག་གིས་རྒྱ་གར་མི་མང་ལ། ཁྱོད་ཚོས་ང་ལ་ཁྲག་སྦྱིན་དང་། ངས་ཁྱོད་ཚོར་རང་བཙན་སྤྲོད། ཅེས་བརྗོད་པ་ལྟར། དེང་གི་དུས་སུ་མི་འབོར་དང་མེ་ཤུགས་འཕུར་མདའ་སོགས་ལས་ཀྱང་མི་མང་གི་སྙིང་སྟོབས་ལ་འདྲེས་པའི་རང་རྟོགས་ཀྱི་སེམས་ཤུགས་དེ་གལ་ཆེན་ཡིན་ཞིང་། རང་རྟོཊ་ཀྱི་སེམས་ཤུགས་དེ་ཤེས་ཡོན་སློབ་གསོ་དང་། ཡང་ན། དོན་རྐྱེན་ཞིག་དང་འབྲེལ་ནས་མི་རེ་རེའི་སེམས་པའི་གཏིང་དང་། རུས་བའི་གསེང་དུ་ཀུན་གཞིའི་ངོ་བོར་སྲ་བརྟན་དུ་ཆགས་ཡོད་པའི་སྙིང་སྟོབས་ཤིག་ཡིན།

ང་ཚོའི་མི་མང་ལ་རང་རྟོགས་ཀྱི་སེམས་ཤུགས་སམ། ལྟོས་མེད་ཀྱི་འཐབ་རྩོད་སྙིང་སྟོབས་ཤིག་བསྐྱེད་དགོས་ན། ཐོག་མར་ལས་འགུལ་སྣེ་འཁྲིད་པ་ཚོར་ཤེས་ཡོན་དང་བསམ་བློའི་གནས་ཚད་ངེས་ཅན་དགོས་པ་མ་ཟད། མང་ཚོགས་ལའང་མ་མཐར་ཤེས་ཡོན་གྱི་རིན་ཐང་འདུ་ཤེས་དང་། དྲང་བདེན་གྱི་རིན་ཐང་འདུ་ཤེས། མིའི་རིན་ཐང་གི་འདུ་ཤེས། འགན་འཁུར་གྱི་རིན་ཐང་འདུ་ཤེས་སོགས་བཅོས་མ་མ་ཡིན་པ་ཞིག་ཡོད་དགོས། དེ་ལྟར་བྱས་ན་ད་གཟོད་བོད་པའི་འཐབ་རྩོད་ལ་མི་འབོར་དགོས་དོན་མེད་ལ་དེང་དུས་ཀྱི་མཚོན་ཆའང་དགོས་དོན་མེད། ཐ་ན་དཔལ་འབྱོར་དང་རྒྱལ་ཁབ་གཞན་གྱི་རྒྱབ་སྐྱོར་ཡང་དེ་ཙམ་གལ་ཆེན་མིན།