ད་བར་ཧ་མ་སི་དྲག་སྤྱོད་ཤོག་ཁག་དང་ཨི་ཛི་རལ་བར་གྱི་དམག་འཐབ་ཁྲོད་པ་ལི་སི་ཐན་གྱི་མི་ ༡༥༩༢ དང་ཨི་ཛི་རལ་གྱི་དམག་མི་ ༦༣ དང་ཉེས་མེད་མི་སེར་ ༣ བཅས་ཀྱི་ཚེ་སྲོག་ཤོར་ཡོད་འདུག
ཉེ་ལམ་ཨི་ཇིབ་རྒྱལ་ས་ཁའེ་རོ་རུ་མཉམ་འབྲེལ་རྒྱལ་ཚོགས་ཀྱི་དྲུང་ཆེ་བྷན་ཁེ་མོན་དང་ཨ་རིའི་ཕྱི་སྲིད་དྲུང་ཆེ་ཇོན་ཀེ་རེ་རྣམ་གཉིས་ཀྱིས་གྲོས་མོལ་བྱས་ཏེ། དཀྱིལ་ཤར་ཡུལ་གྲུའི་རྙོག་ཟིང་ཆེ་ཤོས་ཨི་ཛི་རལ་དང་པ་ལི་སི་ཐན་ཧ་མ་སི་དྲག་སྤྱོད་ཤོག་ཁག་བར་གྱི་དམག་འཁྲུག་ཞི་འཇགས་ཡོང་རྒྱུར་བར་འདུམ་བྱས་པ་བརྒྱུད་ཕྱོགས་གཉིས་ཀས་ཟླ་འདིའི་ཚེས་ ༡ ནས་བཟུང་དུས་ཡུན་ཆུ་ཚོད་ ༧༢ རིང་དམག་མཚམས་འཇོག་རྒྱུ་བྱས་ཡོད་ཀྱང་། ཉིན་དེར་ཧ་མ་སི་ཤོག་ཁག་གིས་ཨི་ཛི་རལ་གྱི་ལྡིང་དཔོན་གཞོན་པ་ཧ་དྷར་ (Hadar Goldin) གྷ་ཛ་ལུང་གཤོང་ནས་བཙན་ཁྲིད་བྱས་ཏེ་གར་སོང་ཆ་མེད་ཆགས་ཡོད་སྟབས། ཉིན་དེའི་དགོང་མོ་ཨི་ཛི་རལ་གྱི་མཁའ་དམག་གིས་མཁའ་ཐོག་ནས་དྲག་རྒོལ་བྱས་ཏེ། པ་ལི་སི་ཐན་གྱི་གྷ་ཛ་གྲོང་རྡལ་རའ་ཧྥ་ (Rafah) ཡི་མི་ ༣༥ བསད་ཡོད་པ་མ་ཟད། ཁ་སང་སྔ་དྲོར་སླར་ཡང་གྷ་ཛ་ལུང་གཤོང་ནང་དམག་འཐབ་བྱས་ཏེ་པ་ལི་སི་ཐན་གྱི་མི་ ༡༠༧ ལྷག་བསད་པ་དང་མི་ ༣༥༠ ལྷག་ལ་རྨས་སྐྱོན་བཟོས་ཡོད་འདུག
འདིའི་ཐད་ཨི་ཛི་རལ་གྱི་སྲིད་བློན་བྷེན་ཇཱ་མིན་ (Benjamin Netanyahu)གྱིས། “དམག་འཁྲུག་དེའི་འགན་ཡོངས་རྗོགས་ཧ་མ་སི་དྲག་སྤྱོད་ཤོག་ཁག་དང་། འབྲེལ་ཡོད་དྲག་སྤྱོད་ཤོག་ཁག་ཚོས་འཁུར་དགོས།” ཞེས་དང་། དེ་བཞིན་ཨི་ཛི་རལ་ཁྲིམས་འཛིན་བློན་ཆེན་ཛི་པི་ (Tzipi Livni)ཡིས་ཀྱང་། “ཨི་ཛི་རལ་གྱི་ལྡིང་དཔོན་གཞོན་པ་བཙན་ཁྲིད་བྱས་པའི་འགན་དེ་ཧ་མ་སི་ཤོག་ཁག་གིས་འཁུར་དགོས།” ཞེས་སོགས་བརྗོད་འདུག
ཧ་མ་སི་དྲག་སྤྱོད་ཤོག་ཁག་གི་དམག་སྡེ་ (Ezzedine al-Qassam Brigade) ཡིས། “ཨི་ཛི་རལ་གྱི་ལྡིང་དཔོན་གར་སོང་ཆ་མེད་ཕྱིན་པ་དེ་ང་ཚོར་འབྲེལ་བ་མེད་པ་མ་ཟད། ང་ཚོ་དང་གྷ་ཛ་ཐང་གཤོང་ནང་དམག་འཐབ་བྱེད་བཞིན་ཡོད་པའི་དམག་སྡེ་བར་འབྲེལ་བ་ཆད་དེ་ཡུན་རིང་ཕྱིན་སྟབས། ང་ཚོའི་དམག་སྡེ་དང་ཨི་ཛི་རལ་གྱི་ལྡིང་དཔོན་དམག་འཐབ་ཁྲོད་རྐྱེན་ལམ་དུ་ཕྱིན་ཡོད་སྲིད།” ཅེས་བརྗོད་འདུག
ཟླ་ ༧ ཚེས་ ༨ ཉིན་པ་ལི་སི་ཐན་ཧ་མ་སི་དྲག་སྤྱོད་ཤོག་ཁག་གིས་གྷ་ཛ་ལུང་གཤོང་ནས་ཨི་ཛི་རལ་ལ་མེ་ཤུགས་འཕུར་མདེལ་ ༡༠༠ ལྷག་འཕངས་ཏེ་གཏོར་རྒོལ་བྱེད་མགོ་བཙུགས་ཡོད་པ་ལྟར། ཨི་ཛི་རལ་གྱི་དམག་དཔུང་གིས་གནམ་ས་གཉིས་ནས་ཧ་མ་སི་དྲག་སྤྱོད་ཤོག་ཁག་གི་རྟེན་གཞི་ཁག་ལ་རྒོལ་ལན་སློག་སྟེ། པ་ལི་སི་ཐན་གྱི་མི་ ༢༣༠ ལྷག་བསད་པ་དང་མི་བརྒྱ་ཕྲག་མང་པོར་རྨས་སྐྱོན་བཟོས་པ་མ་ཟད། མང་ཚོགས་ཀྱི་སྡོད་ཁང་གཏོར་བཤིག་བཏང་བ་དང་། ཟླ་ ༧ ཚེས་ ༡༧ ཉིན་ཨི་ཛི་རལ་མཁའ་དམག་གིས་ཧ་མ་སི་དྲག་སྤྱོད་ཤོག་ཁག་གི་རྟེན་གཞི་ ༣༧ ལ་གཏོར་རྒོལ་དང་། ཧ་མ་སི་ཤོག་ཁག་གིས་ཨི་ཛི་རལ་ཕྱོགས་སུ་མེ་ཤུགས་འཕུར་མདེལ་ ༡༥ ཙམ་འཕངས་ཏེ་གཏོར་རྒོལ་ཤུགས་ཆེན་བྱས་ཡོད་སྟབས། ཨི་ཛི་རལ་གྱི་རྐང་དམག་དང་ལྕགས་འཁྲབ་འཁོར་ལོ། མེ་སྒྱོགས་དཔུང་སྡེ་བཅས་ཀྱིས་ས་ཐོག་ནས་པ་ལི་སི་ཐན་གྱི་རང་སྐྱོང་ས་ཁུལ་གྷ་ཛ་ལུང་གཤོང་ནང་དྲག་རྒོལ་བྱས་ཏེ། ཟླ་ ༧ ཚེས་ ༡༨ ཉིན་པ་ལི་སི་ཐན་པ་ ༢༣ དང་ཨི་ཛི་རལ་དམག་མི་ ༡ བཅས་རྐྱེན་ལམ་དུ་ཕྱིན་ཡོད་འདུག
ཟླ་ ༧ ཚེས་ ༢༠ ཉིན་ཇོར་ཌན་རྒྱལ་ཁབ་ཀྱིས་སྙན་ཞུ་ཕུལ་བར་བརྟེན་མཉམ་འབྲེལ་རྒྱལ་ཚོགས་བདེ་འཇགས་ལྷན་ཚོགས་ཀྱི་ཚོགས་མིའི་རྒྱལ་ཁབ་ ༡༥ ཡིས་གྷ་ཛ་ལུང་གཤོང་གི་ཧ་མ་སི་ཤོག་ཁག་དང་ཨི་ཛི་རལ་བར་གྱི་དམག་འཁྲུག་ཞི་འཇགས་ཡོང་ཆེད་ཚོགས་འདུ་ཚོགས་ཡོད་ཅིང་། ཚེས་ ༢༡ ཉིན་ཨ་རིའི་ཕྱི་སྲིད་དྲུང་ཆེ་ཇོན་ཀེ་རེ་དང་རྒྱལ་ཚོགས་དྲུང་ཆེ་བྷན་ཁེ་མོན་རྣམ་གཉིས་ཨི་ཇིབ་རྒྱལ་ས་ཁའེ་རོ་ (Cairo) རུ་ཕེབས་ཏེ་གྷ་ཛ་ལུང་གཤོང་གི་དམག་འཁྲུག་ཞི་འཇགས་སྐོར་ལ་གྲོས་མོལ་དང་། ཚེས་ ༢༧ ཉིན་མཉམ་འབྲེལ་རྒྱལ་ཚོགས་བདེ་འཇགས་ལྷན་ཚོགས་ཀྱི་ཚོགས་མིའི་རྒྱལ་ཁབ་ཁག་གི་བར་གྲོས་འཆམ་བྱུང་སྟེ། ཆ་རྐྱེན་གང་ཡང་མེད་པའི་ཐོག་གྷ་ཛ་ལུང་གཤོང་གི་དམག་འཁྲུག་ཞི་འཇགས་བྱེད་དགོས་སྐོར་བསྒྲགས་ཡོད་ཀྱང་། ཨི་ཛི་རལ་དང་ཧ་མ་སི་ཤོག་ཁག་གིས་ངོས་ལེན་བྱས་མེད།
ཟླ་ ༧ ཚེས་ ༢༨ ཉིན་ཨི་ཛ་རལ་གྱིས་གྷ་ཛ་ལུང་གཤོང་ནང་མེ་ཤུགས་འཕུར་མདེལ་ ༦༠ ཙམ་འཕངས་ཏེ། ས་ཁུལ་ནང་ཡོད་པའི་གློག་ཁང་གཏོར་རྒོལ་བཏང་ཡོད་པ་མ་ཟད། ཧ་མ་སི་དྲག་སྤྱོད་ཤོག་ཁག་གི་མགོ་ཁྲིད་སྡོད་ཁང་སོགས་གཏོར་ཏེ་མི་ ༡༡༤ ལྷག་བསད་པ་དང་། ཚེས་ ༣༠ ཉིན་པ་ལི་སི་ཐན་གྱི་མི་སེར་ཉེན་ཡོལ་དུ་འགྲོ་སའི་རྒྱལ་ཚོགས་ཀྱི་སློབ་གྲྭ་ཞིག་ལ་ཨི་ཛི་རལ་གྱིས་གཏོར་རྒོལ་བྱས་ཏེ་མི་ ༡༥ བསད་པ་དང་མི་ ༩༧ ཙམ་ལ་རྨས་སྐྱོན་བཏང་ཡོད་འདུག
ད་བར་ཧ་མ་སི་དྲག་སྤྱོད་ཤོག་ཁག་དང་ཨི་ཛི་རལ་བར་གྱི་དམག་འཁྲུག་ཁྲོད་པ་ལི་སི་ཐན་གྱི་མི་ ༡༥༩༢ དང་། ཨི་ཛི་རལ་གྱི་དམག་མི་ ༦༣ དང་ཉེས་མེད་མི་སེར་ ༣ བཅས་ཀྱི་ཚེ་སྲོག་ཤོར་ཡོད་པ་དང་། མི་འབུམ་ ༣ ལྷག་སྐྱབས་བཅོལ་འགྲོ་དགོས་བྱུང་ཞིང་། གྷ་ཛ་ལུང་གཤོང་ནང་འཚོ་བ་སྐྱེལ་བཞིན་པའི་པ་ལི་སི་ཐན་གྱི་ཡུལ་མི་ས་ཡ་ ༡ དང་ཁྲི་ ༨༠ ལྷག་གི་ཚེ་སྲོག་དང་ཟས་གོས་གནས་མལ་གཙོས། འགྲོ་འདུག་སྤྱོད་གསུམ་སོགས་ལ་དཀའ་ངལ་ཤུགས་ཆེན་འཕྲད་བཞིན་ཡོད་འདུག
ཨ་རིའི་སྲིད་འཛིན་ཨོ་བྷ་མས། “ཧ་མ་སི་དྲག་སྤྱོད་ཤོག་ཁག་གིས་དམག་མཚམས་འཇོག་རྒྱུའི་གྲོས་མོལ་ལ་ཁས་ལེན་མ་ བྱས་བར། རྒྱལ་སྤྱིའི་སྒྲིག་འཛུགས་དང་ཨི་ཛི་རལ་གཞུང་གིས་ངོས་ལེན་བྱ་ཐབས་མེད་སྟབས། ཧ་མ་སི་དྲག་སྤྱོད་ཤོག་ཁག་གིས་བཙན་ཁྲིད་བྱས་པའི་ཨི་ཛི་རལ་གྱི་ལྡིང་དཔོན་ཀློད་གྲོལ་བཏང་སྟེ། རྒྱལ་སྤྱིའི་ངོས་ལེན་ཐོབ་ཐབས་བྱ་དགོས།” ཞེས་དང་། མཉམ་འབྲེལ་རྒྱལ་ཚོགས་ཀྱི་དྲུང་ཆེ་བྷན་ཁེ་མོན་གྱིས། “ཧ་མ་སི་དྲག་སྤྱོད་ཤོག་ཁག་གི་བྱ་སྤྱོད་དེས་གྷ་ཛ་དང་ཨི་ཛི་རལ། དེ་མིན་ས་ཁུལ་ཁག་ལ་མཇུག་འབྲས་སྡུག་པོ་འཐོན་རྒྱུ་ཡིན་སྟབས། ཨི་ཇི་རལ་གཞུང་དང་གྲོས་མོལ་བྱས་ཏེ་འཕྲལ་དུ་དམག་མཚམས་འཇོག་ཐབས་བྱ་དགོས།” ཞེས་བརྗོད་འདུག
གཟའ་པ་སངས་ཉིན་པ་ལི་སི་ཐན་གྱི་ཝོ་སེ་བྷེང་ཁཱ་ (West Bank) གཞུང་ལམ་སྟེང་པ་ལི་སི་ཐན་གྱི་མང་ཚོགས་སྟོང་ཕྲག་གཉིས་ལྷག་འདུ་འཛོམས་བྱས་ཏེ། ཨི་ཛི་རལ་གྱིས་གྷ་ཛ་ལུང་གཤོང་ནང་དམག་རྒྱག་བཞིན་པར་ངོ་རྒོལ་བྱས་ཡོད་པ་མ་ཟད། མི་ཁག་ཅིག་ངོ་རྒོལ་ཁྲོད་རྐྱེན་འདས་དང་། ཨ་རིའི་གྲོས་ཚོགས་ཀྱིས་ཨི་ཛི་རལ་གཞུང་ལ་མཁའ་དམག་གི་(Iron Dome) ཞེས་པའི་ལས་འཆར་ཆེད་ཛ་དྲག་རོགས་དངུལ་ཨ་སྒོར་ས་ཡ་ ༢༢༥ སྤྲོད་རྒྱུའི་ཐག་གཅོད་བཅས་བྱས་ཡོད་འདུག
ཨི་ཛི་རལ་གྱི་སྲིད་བློན་བྷེན་ཇཱ་མིན་མཆོག་གིས། “ཨི་ཛི་རལ་གྱི་མི་མང་སྲུང་སྐྱོབ་བྱེད་རྒྱུར་གྷ་ཛ་ལུང་གཤོང་ནང་དྲག་ཟིང་དོན་རྐྱེན་མེད་པའི་ས་གནས་ཤིག་བཟོ་དགོས་པ་མ་ཟད། གྷ་ཛ་ལུང་གཤོང་ནང་ཡོད་པའི་ཧ་མ་སི་དྲག་སྤྱོད་ཤོག་ཁག་གིས་ཨི་ཛི་རལ་གྱི་མི་རིགས་རྩ་མེད་བཟོ་རྒྱུར་དམིགས་ཏེ། ས་འོག་ཕུག་ལམ་བཟོས་པ་དེ་དག་གཏོར་བཤིག་མ་བཏང་བར་གཏོར་རྒོལ་ལས་འགུལ་ཁག་མུ་མཐུད་སྤེལ་རྒྱུ་ཡིན།” ཞེས་བརྗོད་འདུག
ཆབ་སྲིད་དབྱེ་ཞིབ་པ་ཚོས། ཧ་མ་སི་དྲག་སྤྱོད་ཤོག་ཁག་དང་ཨི་ཛི་རལ་བར་གྱི་དམག་འཁྲུག་ཞི་འཇགས་མ་བྱུང་བར། པ་ལི་སི་ཐན་དང་ཨི་ཛི་རལ་གྱི་མང་ཚོགས་ཚོར་བདེ་བ་ཐོབ་རྒྱུ་ཁག་པོ་ཆགས་ཡོད་སྟབས། མཉམ་འབྲེལ་རྒྱལ་ཚོགས་དང་རྒྱལ་སྤྱིའི་སྒྲིག་འཛུགས་ཁག་གིས་དམག་དཔུང་བཏང་སྟེ། དམག་འཁྲུག་དེར་ཐེ་ཇུས་དང་འབྲེལ་ཞི་འགྲིག་ཡོང་ཐབས་བྱ་དགོས་སྐོར་སོགས་བརྗོད་འདུག
