ཁ་སང་ཨ་རུ་ནཱ་ཅལ་མངའ་སྡེའི་ཡུལ་སྐོར་སྤྲོ་འཆམ་བློན་ཆེན་པདྨ་མཁའ་འགྲོ་ལགས་ཀྱིས་ཨེ་ཊ་ནཱ་གྷར་གྲོང་ཁྱེར་འཛུགས་སྐྲུན་བྱེད་སྐབས་མི་མང་གི་འཕྲོད་བསྟེན་དང་ཁོར་ཡུག་ལ་འགན་ལེན་བྱེད་དགོས་སྐོར་བརྗོད་འདུག
ཁ་སང་ཕྱི་ཚེས་ ༦ ཉིན། ཨ་རུ་ནཱ་ཅལ་མངའ་སྡེའི་རྒྱལ་ས་ཨེ་ཊ་ནཱ་གྷར་ (Itanagar) གྱི་ཡུལ་སྐོར་སྤྲོ་འཆམ་ལྷན་ཁང་དུ། མངའ་སྡེའི་ཡུལ་སྐོར་སྤྲོ་འཆམ་བློན་ཆེན་པདྨ་མཁའ་འགྲོ་ལགས་དང་རྒྱ་གར་གྲོས་ཚོགས་ཀྱི་གྲོང་ཁྱེར་འཛུགས་སྐྲུན་དྲུང་ཆེ་ཌེ་ཆེ་ཀཱ་སོ་ (Techi Kaso)རྣམ་གཉིས་ཀྱིས། ཨེ་ཊ་ནཱ་གྷར་བདེ་དོན་ལས་ཁུངས་ཀྱི་འགན་འཛིན་གཙོ་གཞོན་གཉིས་དང་ལས་བྱེད་ཚོ་དང་མཉམ་དུ། མངའ་སྡེའི་རྒྱལ་ས་ཨེ་ཊ་ནཱ་གྷར་གྲོང་ཁྱེར་འཛུགས་སྐྲུན་འཆར་གཞི་དང་ས་ཁང་། གཞུང་ལམ། ཆུ་གློག་སོགས་ཀྱི་དཀའ་ངལ་སྐོར་ལ་བསྐྱར་ཞིབ་ཚོགས་འདུ་ཞིག་བསྐོངས་ཡོད་འདུག
ཚོགས་འདུའི་ཐོག་པདྨ་མཁའ་འགྲོ་ལགས་ཀྱིས། གྲོང་ཁྱེར་འཛུགས་སྐྲུན་འཆར་འགོད་ལས་ཁུངས་དང་ཨེ་ཊ་ནཱ་གྷར་བདེ་དོན་ལས་ཁུངས་གཉིས་ཐུན་མོང་གི་ཚོགས་ཆུང་བཙུགས་ཏེ། མངའ་སྡེའི་ནང་འཛུགས་སྐྲུན་བྱེད་ཕྱོགས་ཀྱི་དཀའ་ངལ་དག་ལ་རྟོག་ཞིབ་དང་དེའི་སྐོར་གྱི་སྙན་ཞུ་ཁོང་གི་མདུན་ཅོག་སྟེང་གང་མགྱོགས་འབྱོར་དགོས་པ་མ་ཟད། དབུས་གཞུང་གིས་གནད་དོན་གང་དག་ཐོག་དམིགས་བསལ་རོགས་སྐྱོར་དགོས་པའི་སྐོར་ལ་བདེ་དོན་ལས་ཁུངས་ཀྱིས་ཁ་གསལ་བྱེད་དགོས་པའི་ལམ་སྟོན་གནང་ཡོད་པ་དང་། མངའ་སྡེ་གཞུང་གིས་བདེ་དོན་ལས་ཁུངས་ལ་གང་ཐུབ་ཀྱིས་རོགས་སྐྱོར་དང་མཉམ་རུབ་བྱེད་འདོད་ཡོད་སྟབས། བདེ་དོན་ལས་ཁུངས་ཀྱིས་མི་མང་གི་བདེ་དོན་ལ་རོགས་སྐྱོར་ལས་གཞི་མགོ་འཛུགས་གནང་དགོས་པ། ལྷག་པར་དུ་གྲོང་ཁྱེར་ནང་གི་འཕྲོད་བསྟེན་དང་གད་སྙིགས་སོགས་ལ་དོ་དམ་དང་འགན་ལན་ཡག་པོ་བྱེད་དགོས་སྐོར་སོགས་ནན་བརྗོད་བྱས་འདུག
ཨེ་ཊ་ནཱ་གྷར་བདེ་དོན་ལས་ཁུངས་ཀྱི་སྤྱི་ཁྱབ་འགན་འཛིན་ཧེ་གྷོ་ཨ་རོ་ནེ་ (Higio Aruni) ལགས་ཀྱིས་གྲོང་ཁྱེར་འཛུགས་སྐྲུན་གྱི་འགྲོ་གྲོན་ཆེན་པོ་ཡིན་པ་མ་ཟད། འཛུགས་སྐྲུན་དང་འབྲེལ་བའི་རྒྱུ་ཆ་ལྕགས་དང་ཨར་འདམ། ལས་ཀ་བྱེད་མཁན་སོགས་ཀྱི་མཐུན་རྐྱེན་འཛོམས་པོ་མེད་པའི་དཀའ་ངལ་ཡོད་འོག མངའ་སྡེ་གཞུང་གི་འཛུགས་སྐྲུན་ལས་འཆར་དོན་ཚན་ ༦ ཅན་གྱི་སྙན་ཞུ་དེ་རྒྱ་གར་དབུས་གཞུང་ལ་ཕུལ་ཏེ། བསམ་ཞིབ་གནང་དགོས་པའི་འབོད་སྐུལ་ཞུས་ཡོད་སྐོར་བརྗོད་ཡོད་འདུག
སྐུ་ཞབས་པདྨ་མཁའ་འགྲོ་ལགས་ནི། དེ་སྔའི་ཨ་རུ་ན་ཅལ་སྤྱི་ཁྱབ་བློན་ཆེན་རྡོ་རྗེ་མཁའ་འགྲོ་ལགས་ཀྱི་བུ་ཆེ་བ་ཡིན་པ་དང་། ༢༠༡༡ ལོར་རྡོ་རྗེ་མཁའ་འགྲོ་གནམ་གྲུའི་བརྡབ་སྐྱོན་ཁྲོད་འདས་གྲོངས་སུ་ཕྱིན་རྗེས། པདྨ་མཁའ་འགྲོ་ལགས་ཀྱིས་ཨ་ཕའི་སྲིད་དོན་ཚོགས་པ་ཀོང་རེ་སིར་ཞུགས་ཏེ། ད་ལོར་རྒྱ་གར་རྒྱལ་ཡོངས་གྲོས་ཚོགས་འོག་མའི་འོས་བསྡུ་ཆེན་མོའི་སྐབས་ཀོང་རེ་སི་ཚོགས་པའི་ས་གནས་འཐུས་མིར་བཞེངས་ཡོད།
༑སྤྲོ་འཆམ་བློན་ཆེན་པདྨ་མཁའ་འགྲོ་ལགས་ལམ་འགྲོ་རྒྱུན་དུ་རྒྱུགས་པའི་སྨོན་འདུན་ཡག་པོ་ཞིག་ཞུ་བཞིན་ཡོད།