བཀའ་ཟུར་ཨ་ལཊ་འཇིཊ་མེད་རིན་པོ་ཆེའི་ལོ་རྒྱུས།

དེ་རིང་སྔ་དྲོར་ཀིརྟིའི་དགེ་རྩ་ཚོགས་པའི་ཚོགས་ཁང་དུ། རྡོ་རྗེ་དབང་ཕྱུག་ལགས་ཀྱིས་རྩོམ་སྒྲིག་གནང་བའི་བཀའ་ཟུར་ཨ་ལགས་འཇིགས་མེད་རིན་པོ་ཆེའི་ལོ་རྒྱུས་དེབ་གཉིས་དབུ་འབྱེད་གནང་སོང་།

དེ་རིང་སྔ་དྲོའི་ཆུ་ཚོད་ ༩།༣༠ ཙམ་ལ། ཀིརྟིའི་དགེ་རྩ་ཚོགས་པའི་ཚོགས་ཁང་དུ། ནོར་གླིང་བོད་ཀྱི་རིག་གཞུང་ཉམས་ཞིབ་ཁང་གི་འགན་འཛིན་རྡོ་རྗེ་དབང་ཕྱུག་ལགས་ཀྱིས་རྩོམ་སྒྲིག་གནང་བའི་༼བཀའ་ཟུར་ཨ་ལགས་འཇིགས་མེད་རིན་པོ་ཆེའི་སྐུ་ཚེའི་བྱུང་བ་བརྗོད་པ་ཆོས་སྲིད་གཏམ་གྱི་ཐེམ་སྐས༽་ཟེར་བའི་ལོ་རྒྱུས་དེབ་སྟོད་སྨད་གཉིས་དབུ་འབྱེད་གནང་སོང་བ་དང་། མཛད་སྒོའི་ཐོག་བཀའ་ཟུར་ཀིརྟི་རིན་པོ་ཆེ་མཆོག་གི་དབུས་ཀིརྟིའི་བྱེས་པ་གྲྭ་ཁང་གི་དགེ་བཤེས་རྣམ་པ་དང་། བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གི་གཙོས་མདོ་སྨད་ཀྱི་སྤྱི་འཐུས་ཁག་ཅིག དེ་བཞིན་མདོ་སྨད་དབུས་རྒྱུན་ཚོགས་གཙོ་བསྟན་པའི་དངོས་གྲུབ་ལགས་དང་རྒྱུན་ལས། དེ་བཞིན་རྩོམ་པ་པོ་སོགས་མི་གྲངས་ ༡༠༠ མ་ཟིན་ཙམ་འདུ་འཛོམས་གནང་འདུག

དབུ་འབྱེད་ཐོག་བཀའ་ཟུར་ཀིརྟི་རིན་པོ་ཆེ་མཆོག་གིས་དེབ་དང་འབྲེལ་བའི་གསུང་བཤད་གནང་དོན། ཨ་ལགས་ཀྱི་སྐོར་ལ་མང་པོ་ཞུ་དགོས་པ་མ་རེད། བོད་ཕྱི་ནང་གཉིས་ཀྱི་མི་ཚང་མར་རྒྱུས་མངའ་ཡོད་པ་རེད། ཁོང་སྐུ་བཞུགས་པའི་སྐབས་ཀྱི་མཛད་པ་འཕྲིན་ལས་དེ་ཚོའང་མི་ཚང་མའི་བློ་ལ་ངེས་པ་ཞིག་རེད། ཡིན་ནའང་། ཁོང་གི་བྱས་རྗེས་རྣམས་ཡིག་ཐོག་ཏུ་འགོད་རྒྱུ་ཧ་ཅང་གལ་ཆེན་པོ་ཡིན་སྟབས། རྩོམ་སྒྲིག་གནང་སྟེ་ཡིག་ཐོག་ཏུ་བཀོད་ཐུབ་པ་བྱུང་བ་དེ་ཕན་ཐོགས་ཆེན་པོ་ཞིག་དང་། མ་འོངས་པར་ཨ་ལགས་ཀྱི་སྐོར་ལ་ཤེས་རྟོགས་དང་འདྲི་དོགས་ཡོད་མཁན་ཚོར། ཤེས་རྟོགས་བྱུང་བདེ་པོ་ཞིག་ཡོང་འདུག་པས་ཞེ་དྲགས་ཡག་པོ་རེད། རྡོ་རྗེ་དབང་ཕྱུག་ལགས་ཀྱིས་དཀའ་ལས་ཞེ་དྲག་བརྒྱབ་སྟེ་དེབ་འདི་ལེགས་འགྲུབ་བྱུང་ཡོད་པ་མ་ཟད། མ་འོངས་པར་ཡང་ཨ་ལགས་སྐོར་གྱི་ལོ་རྒྱུས་གང་ཐུབ་ཐུབ་ཀྱིས་རྩོམ་སྒྲིག་གནང་བའི་དགོངས་པ་བཞེས་ཀྱི་ཡོད་ས་རེད། དེབ་འདི་གཉིས་ཀྱི་ནང་མ་གསལ་བའི་ཨ་ལགས་ཀྱི་ལོ་རྒྱུས་ཞེ་དྲགས་མང་པོ་ལྷག་ཡོད་པ་རེད་བསམ་གྱི་འདུག་པས། མ་འོངས་པར་དེ་ཚོར་ཡང་རིམ་གྱིས་ཞིབ་འཇུག་གནང་སྟེ་རྩོམ་སྒྲིག་བྱེད་པར་ཐབས་ཤེས་གནང་གི་ཡོད་པ་དེ་ཞེ་དྲགས་ཡག་པོ་ཡིན་པས་མུ་མཐུད་ནས་གནང་རོགས་ཞུ་རྒྱུ་ཡིན། ཞེས་དང་།

མཇུག་ཏུ་ཁོང་གིས། ཨ་ལགས་ཀྱིས་བོད་སྤྱི་པའི་ཆེད་ཕྱག་ལས་གནང་བའི་མཛད་རྗེས་རྣམས་ལ་རྗེས་སུ་ཡི་རང་ཡོད་ལ། ༧གོང་ས་མཆོག་གིས་ཐུགས་སྨོན་སྐྱབས་འཇུག་གནང་བ་ལྟར། སྐུ་ཕྲེང་རྗེས་མ་དེའང་བསླབ་པ་སློབ་གཉེར་མཐར་ཕྱིན་པ་གནང་ཐུབ་མཁན་དང་། སྐུ་གོང་མ་ལྟར་བོད་བསྟན་སྲིད་ལ་ཕན་ཐོགས་ཡོད་པ་ཞིག་ཕེབས་པར་རེ་བ་རྒྱག་བཞིན་ཡོད། ཨ་ལགས་ཀྱིས་སྐུ་ཚེ་ཧྲིལ་པོར་ལྷག་བསམ་རྣམ་དག་གིས་བོད་སྤྱི་པའི་དོན་དུ་ཕྱག་ལས་གནང་ཡོད་སྟབས། སྐུ་ཕྲེང་རྗེས་མའང་བོད་བསྟན་སྲིད་ཐོག་ཕན་ཐོགས་ཡོད་པ་ཞིག་ཕེབས་ཐུབ་ངེས་རེད་བསམ་གྱི་འདུག ཅེས་གསུངས་སོང་།

ལོ་རྒྱུས་རྩོམ་སྒྲིག་པ་རྡོ་རྗེ་དབང་ཕྱུག་ལགས་ཀྱིས་རྩོམ་སྒྲིག་གི་བརྒྱུད་རིམ་སྐོར་བརྗོད་དོན། ཕྱི་ལོ་ ༢༠༠༦ ལོར་དུས་དབང་ཐེངས་སུམ་ཅུ་པའི་སྐབས་རེབ་གོང་རོང་བོ་དགོན་པའི་དགེ་བཤེས་ཁག་ཅིག་རྒྱ་གར་དུ་ཕེབས་ཡོད་པ་དང་། དེ་བཞིན་བོད་ནང་དང་ཕྱི་སྡོད་བོད་མི་གནད་ཡོད་ཚོས་ཨ་ལགས་ལ་མཇལ་ཁ་ཞུ་སྐབས། ཁོང་དགུང་ལོ་ཆུང་དུས་ནས་ལྷ་སར་ཕེབས་ཏེ་སློབ་གཉེར་གནང་ཡོད་པ་དང་། དེ་རྗེས་རྒྱ་གར་ལ་བཙན་བྱོལ་དུ་ཕེབས་ཏེ་བོད་མིའི་སྒྲིག་འཛུགས་ཀྱི་བཀའ་བློན་བར་བོད་སྤྱི་བར་ཕྱག་ལས་གནང་ཡོད་པས་རྣམ་ཐར་ལོ་རྒྱུས་ཤིག་ངེས་པར་དུ་ཡིག་འཇོག་གནང་རོགས། ཁྱེད་ལ་གལ་ཆེན་པོ་མིན་ཡང་ང་ཚོར་ཧ་ཅང་གལ་ཆེན་པོ་ཡིན་ཞེས་གསོལ་འདེབས་རིམ་པར་ཞུས་པ་ལྟར་ཞལ་བཤེས་གནང་སྟེ། ཁོང་ལ་རྒྱུས་ཡོད་པ་དང་ཡུན་རིང་མཉམ་དུ་ལས་ཀ་མང་པོ་བྱས་མྱོང་བའི་ཆ་ནས་ང་ལ་ལས་ཀ་དེ་ཁྱེད་རང་གིས་བྱས་ན་ཞེས་བཀའ་གནང་སྟབས། ཁོང་དང་མཉམ་དུ་ལོ་རྒྱུས་ཀྱི་སྒྲོམ་གཞིའི་ཐད་ཐེངས་ཁ་ཤས་ལ་གྲོས་བསྡུར་བྱས་པ་རེད། ཡིན་ནའང་། ཁོང་ཕྱི་རྒྱལ་ཁག་ཏུ་ཕེབས་རྒྱུ་དང་རྩོམ་སྒྲིག་ཚོགས་ཆུང་གི་ལས་ཀ་སོགས་ཀྱིས་རྒྱུན་དུ་བྲེལ་བ་ཧ་ཅང་ཆེན་པོ་རེད། དེ་འདྲ་ཞིག་གི་བར་ནས་ཁོང་གློ་བུར་དུ་སྐུ་གཤེགས་པ་རེད། ཁོང་འཁྲུངས་པ་ནས་བཟུང་རྒྱ་གར་དུ་སྐྱབས་བཅོལ་ལ་བསླེབས་པའི་བར་གྱི་ལོ་རྒྱུས་རྣམས་ཞིབ་ཕྲ་བཀོད་ཐུབ་ཡོད་པ་རེད། ཡིན་ནའང་། དེའི་རྗེས་ཀྱི་ལོ་རྒྱུས་རྣམས་ཁོང་གི་ཉིན་དེབ་དང་ཡིག་ཚགས་ཁག གསར་འགྱུར་བརྒྱུད་ལམ་གྱི་ཁོང་གི་གསུང་བཤད། དེ་བཞིན་ཁོང་གིས་བསྟེན་མྱོང་བའི་བླ་མ་དང་ཆོས་གྲོགས་ཀྱི་རྣམ་ཐར་ལོ་རྒྱུས་སོགས་ནས་ཁོང་གི་སྐོར་འཚོལ་སྡུད་བྱས་པ་མ་ཟད། གནས་ཚུལ་གསལ་བོ་མེད་པ་དེ་ཚོ་འབྲེལ་ཡོད་ལ་སྐད་ཆ་དྲིས་ནས་རྩོམ་སྒྲིག་བྱས་པ་རེད། གནས་ཚུལ་ཁ་ཤས་ཨ་ལགས་སྐུ་དངོས་སུ་མེད་ནའང་གསལ་ཁ་བཟོ་ཐུབ་པ་དང་། ཡང་ཁ་ཤས་ཁོང་དངོས་སུ་མེད་ན་གསལ་ཁ་བཟོ་ཐབས་མེད་པས། རྩོམ་སྒྲིག་གི་བརྒྱུད་རིམ་ཁྲོད་ནས་བརྐྱང་སྐུམ་དང་ཉུང་འཕྲི་གང་ལ་གང་འཚམ་བྱེད་དགོས་བྱུང་། དེ་ནས་པར་སྐྲུན་མ་བྱས་གོང་སྐུ་སྒེར་ཡིག་ཚང་ལ་ཕུལ་ཏེ་བསྐྱར་ཞིབ་གནང་དུ་བཅུག་ཡོད། གང་ཡིན་ཟེར་ན། ང་ཚོ་བཙན་བྱོལ་ལ་ཕྱིས་སུ་བསླེབས་པ་ཡིན་པས་བཙན་བྱོལ་ནང་གི་གནས་ཚུལ་རིགས་གཅིག་ལ་རྒྱུས་མེད་སྟབས། གནད་དོན་ཁ་ཤས་ལོ་རྒྱུས་ནང་ཐོན་དགོས་པ་དང་མི་དགོས་པ། ཐོན་པ་ཡིན་ན་མ་འོངས་པར་རྙོག་དྲ་ཆགས་འགྲོ་བའི་གནད་དོན་འདུག་དང་མི་འདུག་བཅས་ཀྱི་སྐོར་ལ་བསྐྱར་ཞིབ་གནང་ཡོད་པ་རེད། ཞེས་བརྗོད་སོང་།

ཟླ་འདིའི་ཕྱི་ཚེས་ ༦ ཉིན་༧གོང་ས་མཆོག་གིས་གཟིམ་ཆུང་དུ་ཐོག་མར་ལོ་རྒྱུས་དེབ་དེ་དབུ་འབྱེད་ཀྱིས། ཨ་ལགས་དད་པ་དམ་ཚིག་གཙང་མ་དང་ལྷག་བསམ་རྣམ་དག ཕྱག་ལས་ག་རེ་གནང་བ་ཡིན་ནའང་རྒྱུན་དུ་མདུན་ལ་ཐོན་འདུག་མཁན་ཞིག་ཡིན་ཞེས་བསྔགས་བརྗོད་གནང་ཡོད་པ་ལྟར། དེབ་ཀྱི་བཀའ་ཡིག་ནང་དུ། ངོས་ནས་བོད་ཀྱི་བསྟན་སྲིད་ཀྱི་འགན་ཁུར་སྐབས་ཨ་ལགས་དེ་ཉིད་ནས་སྤྱི་འཐུས་ཀྱི་ཚོགས་གཙོ་རྒན་གཞོན་དང་། སྤྱི་ཁྱབ་རྩིས་ཞིབ་ཀྱི་འགན་འཛིན། བོད་ནང་ལྟ་སྐོར་སྐུ་ཚབ་ཚོགས་པའི་ཚོགས་གཞོན། བདེ་སྲུང་བཀའ་བློན་བཅས་བོད་ཀྱི་བསྟན་སྲིད་དང་འབྲེལ་བའི་གལ་ཆེའི་ལས་གནས་ཐོག་ཚོར་སྣང་སྐྱེན་པོའི་སྒོ་ནས་འགན་འཁུར་བླངས་པར་མ་ཟད། ཕྱི་ནང་གང་སར་འབྲེལ་ལམ་ཡང་བྱེད་མཁས་པ་བཅས་གང་ཅི་ལྷག་བསམ་རྣམ་དག་ངལ་ཁུར་དང་ལེན་གྱིས་ཞབས་འདེགས་མཐའ་འཁྱོངས་ཞུས་པ་བཅས་ཀྱི་མི་སྣ་རྒན་གྲས་ཤིག་ཡིན། དམ་པ་དེ་ཉིད་དང་འབྲེལ་ཡོད་བཅས་ལ་སྐྱབས་སྨོན་ཡོད། ཅེས་གསུངས་འདུག

རྣམ་ཐར་ལོ་རྒྱུས་དེའི་སྟོད་ཆའི་ནང་དུ། སྐུ་ཕྲེང་སྔ་མ་གསུམ་གྱི་ལོ་རྒྱུས་མདོར་བསྡུས་ཤིག་དང་། ཁོང་སྐུ་ཕྲེང་གསུམ་པ་མཆོག་གི་ཡང་སྲིད་དུ་ངོས་འཛིན་དང་ཆོས་སྒོར་ཞུགས་པ། མདོ་སྨད་ནས་དབུས་ཕྱོགས་སུ་ཆིབས་ཕེབས་ཀྱིས་དགའ་ལྡན་དུ་སློབ་གཉེར་གནང་བ་དང་། ༧གོང་ས་མཆོག་ཚོགས་ཕེབས་གདན་ཞུ་དང་ཕར་ཕྱིན་ཚོགས་ལངས་སྐོར། ཕྱི་ལོ་ ༡༩༥༩ ལོར་རྒྱ་གར་ལ་བཙན་བྱོལ་དུ་ཕེབས་ཏེ་སྦག་ས་ཆོས་སྒར་ནས་སློབ་གནང་བའི་སྐོར་སོགས་བཀོད་འདུག་ལ། སྨད་ཆའི་ནང་དུ་ཁོང་དྷ་སར་གཏན་བཞུགས་ཀྱིས་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་གཞོན་དང་སྤྱི་ཁྱབ་རྩིས་ཞིབ་ཀྱི་འགན་འཛིན། དེ་བཞིན། བོད་ནང་ལྟ་སྐོར་སྐུ་ཚབ་ཚོགས་པའི་ཚོགས་གཞོན་གནང་སྟེ་རྒྱ་ནག་དང་བོད་ནང་གཟིགས་སྐོར་གནང་བ། བདེ་སྲུང་བཀའ་བློན་གྱི་ཐུགས་འགན་བཞེས་པའི་སྐོར་དང་། རྒན་ཡོལ་དུ་བཞུགས་ཡུན་རིང་གི་མཛད་འཕྲིན་ཁག་བཅས་བཀོད་འདུག

གསར་འགོད་པ། པདྨ་མཚོ།