ཚན་རིག་གི་ཟབ་སྦྱོང་།

བོད་མིའི་སྒྲིག་འཛུགས་ཆོས་རིག་ལས་ཁུངས་དང་དྷ་ས་བོད་ཀྱི་དཔེ་མཛོད་ཁང་གཉིས་ཀྱིས་སྦིར་ཤེས་རབ་གླིང་དུ་དགེ་འདུན་པ་དང་བཙུན་མ་ཚོར་ཚན་རིག་གི་ཟབ་སྦྱོང་ཞིག་སྤྲོད་ཀྱི་ཡོད་འདུག

ཟླ་འདིའི་ཚེས་ ༡༦ ཉིན་ནས་བཟུང་བོད་མིའི་སྒྲིག་འཛུགས་ཆོས་རིག་ལས་ཁུངས་དང་དྷ་ས་བོད་ཀྱི་དཔེ་མཛོད་ཁང་ཟུང་འབྲེལ་ཐོག སྦིར་ཤེས་རབ་གླིང་དུ་དགེ་འདུན་པ་བཙུན་མ་ཚོར་དེང་དུས་ཚན་རིག་གི་ཟབ་སྦྱོང་ཞིག་དབུ་འཛུགས་གནང་གི་ཡོད་འདུག་ལ། ཟབ་སྦྱོང་གི་དབུ་འབྱེད་མཛད་སྒོར་ཏཱའི་སི་ཏུ་རིན་པོ་ཆེ་མཆོག་དང་། ཆོས་རིག་དྲུང་ཆེ་རྒྱལ་གླིང་དོན་གྲུབ་རྡོ་རྗེ་ལགས་དང་། དྷ་ས་བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས་བཅས་ཆེད་ཕེབས་ཀྱི་བཀའ་སློབ་གསུང་བཤད་གནང་ཡོད་འདུག

ཐེངས་འདིའི་ཟབ་སྦྱོང་འདི་ནི། ༸གོང་ས་མཆོག་གི་བཀའ་དགོངས་བསྒྲུབ་ཐབས་དང་། ༢༠༡༣ ལོར་རྒྱུད་སྟོད་གྲྭ་ཚང་དུ་ཚོགས་པའི་བོད་བརྒྱུད་ནང་བསྟན་བཤད་སྒྲུབ་བསྟན་པ་གོང་འཕེལ་ལྷན་ཚོགས་ཀྱི་གྲོས་ཆོད་ལག་བསྟར་གནང་ཆེད་གོ་སྒྲིག་གནང་བ་ཞིག་ཡིན་འདུག་ལ། ཟབ་སྦྱོང་ཐོག་རིས་སུ་མ་ཆད་པའི་ཆོས་སྡེ་ཁག་གི་དགོན་ཁག་ ༢༣ གྱི་དབུ་མའི་བསླབ་པ་མཐར་ཕྱིན་པའམ་ཉུང་མཐར་ལོ་ ༡༠ ལྷག་སློབ་གཉེར་གནང་མྱོང་མཁན་དགེ་འདུན་པ་ ༡༩ དང་། བཙུན་མ་ ༦ མཉམ་བཅས་མཉམ་ཞུགས་གནང་འདུག

ཟབ་སྦྱོང་གི་སློབ་ཚན་གཙོ་བོ། དངོས་ཁམས་རིག་པ་དང་། སྐྱེ་དངོས་རིག་པ། དབང་རྩའི་ཚན་རིག ཨང་རྩིས་བཅས་ཡིན་འདུག དེ་རིང་དགེ་བཤེས་ལྷག་རྡོར་ལགས་ཀྱིས་ནང་ཆོས་དང་ཚན་རིག་ཅེས་པའི་བརྗོད་གཞིའི་ཐོག་གཏམ་བཤད་གནང་གི་ཡོད་པ་དང་། ཟླ་འདིའི་ཚེས་ ༣༠ ཉིན་མཇུག་བསྒྲིལ་གནང་གི་ཡོད་འདུག

གསར་འགོད་པ། དོན་གོ