རྒྱ་གཞུང་གིས་འདན་མ་ཤུག་པ་སྡེ་བའི་བོད་མི་ ༣ ལ་རྡུང་རྡེག་བཏང་སྟེ་བསད་པ་སོགས་ཁུལ་དེའི་གནས་སྟངས་ཧ་ཅང་ཛ་དྲག་ཆགས་ཡོད་པའི་ཐད། དེ་རིང་བོད་མི་མང་སྤྱི་འཐུས་ལྷན་ཚོགས་ནས་བསྒྲགས་གཏམ་ཞིག་སྤེལ་འདུག
ཟླ་འདིའི་ཕྱི་ཚེས་ ༡༢ ཙམ་ནས་བཟུང་རྒྱ་གཞུང་གིས་སེར་ཤུལ་རྫོང་འདན་མ་ཁུལ་དུ་བོད་མི་མང་པོ་འཛིན་བཟུང་དྲག་གནོན་བྱས་ཏེ་གནས་སྟངས་ཛ་དྲག་ཆགས་ཡོད་པ་ལྟར། ཉེ་སྔོན་དྲག་གནོན་འོག་རྨས་སྐྱོན་ཕོག་པའི་སྡེ་དཔོན་དབང་གྲགས་ཀྱི་ཨ་ཞང་རང་ལོ་ ༦༠ ཡིན་པ་ཚེ་དབང་མགོན་པོ་དང་། དབང་གྲགས་ཀྱི་སྤུན་མཆེད་རང་ལོ་ ༤༢ ཡིན་པ་ཡེ་ཤེས། དབང་གྲགས་ཚང་གི་མག་པ་རང་ལོ་ ༡༨ ཡིན་པ་སྤྱིན་པ་མཐར་ཕྱིན་བཅས་ལ། ལོ་ཕྱུག་བཙོན་ཁང་དུ་རྡུང་རྡེག་དྲག་པོ་བཏང་ནས་དམར་གསོད་བཏང་སྟེ། ཁ་སང་ཕྱི་ཚེས་ ༡༨ ཉིན་ཁོང་ཚོའི་ཕུང་པོ་རང་ཁྱིམ་དུ་བསྐྱལ་ཡོད་པ་དང་། ཉིན་དེར་རྒྱ་གཞུང་གིས་ལོ་ཕྱུག་ས་ཁུལ་དྲན་འཁོང་གྲོང་ཚོའི་ཡུལ་མི་ཚོར་ཚོགས་འདུ་བསྡུས་ཏེ། སྡེ་དཔོན་དབང་གྲགས་ལགས་ཀྱིས་སྤྱི་རྒྱུ་ལྐོག་ཟ་བྱས་རྐྱེན་འཛིན་བཟུང་བྱས་པ་ལས། སྡེ་བའི་རྟ་རྒྱུགས་དང་བསང་གསོལ་སོགས་ཀྱི་གནས་ཚུལ་དང་འབྲེལ་བ་མེད་ལུགས་བརྗོད་ཡོད་པ་མ་ཟད། ཡུལ་མི་ཚོས་ཀྱང་གཞན་ལ་དེ་ལྟར་འགྲེལ་བརྗོད་བྱེད་དགོས་པའི་བཀའ་རྒྱ་བཏང་ཡོད་ཀྱང་། ཚོགས་འདུའི་ཐོག་བོད་མི་ཁག་ཅིག་མ་གཏོགས་འདུ་འཛོམས་བྱས་མེད་སྟབས། དེ་རིང་ཡང་བསྐྱར་ཚོགས་འདུ་བསྡུ་རྒྱུ་ཡིན་པས་མི་མང་པོ་ངེས་པར་དུ་མཉམ་ཞུགས་དགོས་པའི་བཙན་བཀའ་བསྒྲགས་ཡོད་འདུག
འདན་མ་ཁུལ་གྱི་གནས་སྟངས་ཧ་ཅང་ཛ་དྲག་ཆགས་ཡོད་པའི་ཐད། དེ་རིང་བོད་མི་མང་སྤྱི་འཐུས་ལྷན་ཚོགས་ནས་བསྒྲགས་གཏམ་ཞིག་སྤེལ་བའི་ནང་། དམིགས་བསལ་ད་ལན་སྡེ་དགེ་འདན་མ་ཤུག་པ་ཡུལ་ཚོའི་སྡེ་དཔོན་དབང་གྲགས་ལགས་རྒྱུ་མཚན་ཁ་གསལ་གང་ཡང་མེད་པའི་ཐོག་འཛིན་བཟུང་བཀག་ཉར་བྱས་པ་དང་། དེ་འབྲེལ་བདེན་རྒྱབ་དཔུང་རོགས་གནང་མཁན་ཞི་བའི་མི་མང་ཁྲོད་དེང་རབས་ཀྱི་མཚོན་ཆ་བེད་སྤྱོད་བཏང་སྟེ། མི་སྤྱོད་ལས་འདས་པའི་དྲག་གནོན་གྱིས་བོད་མི་མང་པོར་ཆེས་ཚབས་ཆེའི་རྨས་སྐྱོན་བཟོས་པའི་མ་ཚད། འཛིན་བཟུང་བཀག་བསྐྱིལ་འོག་མནར་གཅོད་ཚད་མེད་བཏང་སྟེ་དམར་གསོད་བཏང་ཡོད་པ་དང་། རྨས་མར་སྨན་བཅོས་དུས་ཐོག་མ་སྤྲད་པར་འདས་གྲོངས་སུ་གྱུར་པ་སོགས་ཆེས་ཐབས་སྐྱོའི་རང་བཞིན་གྱི་གནས་སྟངས་ངང་ལྷུང་དགོས་ཐུག་པར། བོད་མི་མང་སྤྱི་འཐུས་ལྷན་ཚོགས་ནས་ཡུལ་སྡེ་ནང་མི་ལྟོས་བཅས་རྣམས་ལ་གདུང་སེམས་མཉམ་སྐྱེད་ཞུ་རྒྱུ་དང་ཆབས་ཅིག དེ་དག་གི་ངན་ཁག་ཡོངས་རྫོགས་རྒྱ་གཞུང་ནས་ཁུར་དགོས་པའི་དྲན་སྐུལ་ནན་པོ་བྱེད་རྒྱུ་ཡིན། ཞེས་དང་།
ཡང་མུ་མཐུད། ད་ལན་རྒྱུ་རྐྱེན་ཁ་གསལ་གང་ཡང་མེད་པའི་ཐོག རྒྱ་གཞུང་གིས་ཉེས་མེད་བོད་མི་འཛིན་བཟུང་བྱས་པ་རྣམས་འཕྲལ་དུ་གློད་བཀྲོལ་གཏོང་དགོས་པ་དང་། རྨས་སྐྱོན་བཏང་བ་རྣམས་ལ་སྨན་བཅོས་ཀྱི་མཐུན་རྐྱེན་ཚད་ལྡན་སྤྲོད་དགོས། དུས་མིན་རྐྱེན་འདས་སུ་བཏང་བའི་ནང་མིར་གུན་གསབ་དང་འབྲེལ་རྒྱ་གཞུང་གི་དཔོན་ རིགས་ཚོས་ཤུག་པ་སྡེ་པའི་རྒྱ་ཆེའི་མང་ཚོགས་རྣམས་ལ་དགོངས་དག་ཐུགས་བདེན་ཞུ་ དགོས། ད་སྐབས་རྒྱ་གཞུང་གི་དཔོན་རིགས་ཚོས་ལྐོག་ཟ་རུལ་སུངས་རྩ་མེད་བཟོས་ཏེ་རྒྱ་ཆེའི་མང་ཚོགས་ཀྱི་ཁེ་ཕན་བསྒྲུབ་རྒྱུ་ཡིན་སྐོར་བཤད་བཞིན་ཡོད་པ་ལྟར་དོན་མེད་མི་སེར་ལ་དྲག་གནོན་དང་། ཆབ་སྲིད་ཀྱི་ཁེ་དབང་གང་ཡང་མེད་པ་བཟོས་དང་བཟོ་བཞིན་པ་འདི་རྣམས་ནི་ལྐོག་ཟ་རུལ་སུངས་ལས་ཀྱང་ཆེས་ཉེན་ཚབས་ཆེ་བར་ངོས་ཟིན་པའི་ཐོག་འདི་རིགས་ངེས་པར་དུ་མཚམས་འཇོག་བྱ་དགོས།༽ཞེས་བཀོད་འདུག
བསྒྲགས་གཏམ་གྱི་མཇུག་ཏུ། རྒྱལ་སྤྱིའི་འགྲོ་བ་མི་ཡི་ཐོབ་ཐང་སྡེ་ཚན་གཙོས་ཞི་བདེ་དང་དྲང་བདེན་ལ་དགའ་བའི་གཞུང་དང་གྲོས་ཚོགས། སྤྱི་སྒེར་ཚོགས་སྡེ་ཡོངས་ནས་བདེན་རྒྱབ་དཔུང་རོགས་དང་འབྲེལ། རྒྱ་གཞུང་གིས་བོད་མིར་དྲག་གནོན་བྱས་དང་བྱེད་བཞིན་པའི་ཆེས་ཛ་དྲག་གི་གནས་སྟངས་འདི་རྣམས་ལ་བདག་སྐྱོང་གནང་སྟེ་འཕྲལ་དུ་མཚམས་འཇོག་ཡོང་ཐབས་ཀྱི་ཐུགས་འགན་ཆེ་བཞེས་དང་། བོད་ནང་གི་དངོས་ཡོད་གནས་ཚུལ་མཁྱེན་རྟོགས་ཆེད་གསར་འགོད་པ་དང་། རྟོག་ཞིབ་ཚོགས་པ་སོགས་བོད་ནང་འཕྲལ་གཏོང་ཡོང་ཐབས་ཀྱི་ཐུགས་ཁུར་ཆེ་བཞེས་ཡོང་བ་ཞུ་རྒྱུ།༽ཞེས་བཀོད་འདུག
གསར་འགོད་པ། པདྨ་མཚོ།
