སྲིད་སྐྱོང་བློ་བཟང་སེང་གེ་མཆོག་གིས་རྡོར་གླིང་ཁུལ་གྱི་བོད་མི་ཚོར་འཚམས་གཟིགས་གནང་ཡོད་པ་དང་། དེའི་རྗེས་ཀ་སྦུག་གཏན་སློབ་ལོ་ལྔ་བཅུ་འཁོར་བའི་དུས་དྲན་སྟེང་ཕེབས་ཡོད་འདུག
རྡོ་རྗེ་རིན་ཆེན་ལགས་ཀྱིས་ས་གནས་ནས་གནས་ཚུལ་བཏང་འབྱོར་བྱུང་བ་ལྟར་ན། ཕྱི་ཚེས་ ༦ ཉིན་གྱི་སྔ་དྲོའི་ཆུ་ཚོད་ ༡༠ སྟེང་། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་རྡོར་གླིང་དབུས་བོད་མིའི་གཏན་སློབ་ཏུ་ཕེབས་ཏེ། རྡོར་གླིང་དོན་གཅོད་མཆོག་གིས་ལས་བསྡོམས་སྙན་སེང་དང་རྡོར་གླིང་གཏན་སློབ་ཀྱི་དགེ་ཆེ་ནས་གཏན་སློབ་ཀྱི་ལས་བསྡོམས་སྙན་སྒྲོན་ཞུ་རྗེས། སྲིད་སྐྱོང་མཆོག་གིས་རྡོར་གླིང་ཁུལ་གྱི་གཉུགས་མར་གནས་པའི་བོད་མི་དང་། རྡོར་གླིང་ཁྱབ་ཁོངས་སོ་ན་དྷ། གུམ། སྤོག་རེ་སྦོང་། ཁར་ཤང་། རྡོར་གླིང་དབུས་བོད་མིའི་གཏན་སློབ་ཀྱི་དགེ་ལས་སློབ་ཕྲུག་བཅས་ལ་གསུང་བཤད་གནང་ཡོད་འདུག
སྐབས་དེར་སྲིད་སྐྱོང་མཆོག་གིས་གསུངས་བར། གཏན་སློབ་ཁག་ནང་སྤྱི་ཡོངས་བརྒྱ་ཆ་ ༥༠ ཡན་ལོན་མཁན་ཉུང་བས་དམིགས་བསལ་གཏན་སློབ་ཁག་གིས་ཤེས་ཡོན་ཐོག་ཤུགས་སྣོན་དགོས་པ་དང་། ཇུའུ་མི་རིགས་ས་ཡ་ ༡༣ ལྷག་ལས་མེད་ཀྱང་ནོ་བྷེལ་ཞི་བདེ་གཟེངས་རྟགས་བཞེས་མཁན་གྱི་བརྒྱ་ ༢༠ ཙམ་ཇུའི་མི་རིགས་ཡིན་པ། ཨ་རིའི་ནང་ལ་མཚོན་ན། སྨན་པ་ཆེད་མཁས་གསུམ་གྱི་ནང་གི་གཅིག་ཇུའུ་མི་རིགས་ཡིན་ཞིང་། དེ་བཞིན་དངུལ་ཁང་དང་། གསར་ལམ་ཁག་གི་རྩོམ་སྒྲིག་པ་སོགས་ཀྱང་ཇུའུའི་མི་རིགས་ཧ་མང་པོ་ཡོད།
ང་ཚོས་ཤེས་ཡོན་ཐོག་དེ་དག་ལ་མིག་དཔེ་བལྟ་དགོས་པ་གལ་ཆེན་པོ་དང་། དམིགས་བསལ་བཀའ་ཤག་སྐབས་འདིས་ཤེས་ཡོན་ཐད་ཤུགས་སྣོན་བྱེད་ཀྱི་ཡོད་སྟབས་ཤེས་ཡོན་ཐོག་ཤུགས་རྒྱག་རྒྱུ་དེ་སློབ་ཕྲུག་དང་ཕ་མ་གཉིས་ཀར་སྐུལ་མ་བྱེད་ཀྱི་ཡོད་ཅེས་དང་། ཉེ་ཆར་ཡང་བོད་ནས་བོད་མི་གཉིས་ཀྱིས་རང་ལུས་མེར་བསྲེགས་གནང་ཡོད་པ་སོགས་མདོ་དོན་ཚང་མའི་དགོས་འདུན་དེ་བོད་མི་ཚང་མ་ཆིག་སྒྲིལ་དང་། ཁོང་ཚོའི་རེ་བ་བསྒྲུབ་པར་ཤེས་ཡོན་ཐོག་ཤུགས་རྒྱག་རྒྱུ་དེ་ཤིན་ཏུ་ནས་གལ་ཆེ་ཚུལ་སོགས་གསུང་བཤད་ཀྱི་མཇུག་ཏུ་དྲི་བ་དྲིས་ལན་ཡང་བྱས་ཡོད་པ་རེད།
སྲིད་སྐྱོང་མཆོག་གིས་འཚམས་གཟིགས་མཛད་སྒོ་དངོས་གཞི་གྲུབ་རྗེས། ཉིན་རྒྱབ་ཀ་སྦུག་ཁུལ་གྱི་གདན་ཞུ་མི་སྣས་ཕེབས་བསུ་དང་བཅས། ཀ་སྦུག་དབུས་བོད་མིའི་གཏན་སློབ་ཚུགས་ནས་ལོ་ངོ་ ༥༠ འཁོར་བའི་ལྔ་བཅུའི་དུས་དྲན་མཛད་སྒོར་ཕེབས་ཡོད་འདུག
