ཁ་སང་ཨ་རི་དང་ཨུ་རུ་སུ་གཉིས་བར་ཁ་ཆེ་འཇིགས་སྐུལ་དྲག་སྤྱོད་པ་རྩ་མེད་གཏོང་ཕྱོགས་སྐོར་ལ་གྲོས་མཐུན་བྱུང་ཡོད་འདུག
ཁ་སང་ཕྱི་ཚེས་ ༡༤ ཉིན་ཧྥ་རན་སིའི་རྒྱལ་སར་ཨ་རིའི་རྒྱལ་དོན་དྲུང་ཆེ་ཇོན་ཁད་རེ་དང་ཨུ་རུ་སུའི་ཕྱི་སྲིད་བློན་ཆེན་ལཱ་བེ་རོབ་བེ་ (Sergei lavrov)གཉིས་ཐུག་འཕྲད་བྱས་ཏེ། དེང་དུས་འཛམ་གླིང་གི་བདེ་འཇགས་ལ་འཕྲད་བཞིན་པའི་དཀའ་ངལ་ཨི་རག་དང་སེ་རི་ཡའི་ནང་ཁ་ཆེ་སུ་ནེ་ཆོས་ལུགས་ཀྱི་རྗེས་འབྲང་འཇིགས་སྐུལ་དྲག་སྤྱོད་ཚོགས་པ་ (ISIS) དང་ཡུའུ་ཁུ་རེན་གྱི་དཀའ་རྙོག་བཅས་ལ་གྲོས་མོལ་བྱས་པ་དང་འབྲེལ་ཏེ། ཨ་རི་དང་ཨུ་རུ་སུ་གཉིས་ཀྱིས་ཡུའུ་ཁུ་རེན་གྱི་གནད་དོན་ཐོག་གྲོས་མོལ་ཇི་བྱུང་ཁ་གསལ་མེད་ཀྱང་། འཇིགས་སྐུལ་དྲག་སྤྱོད་པ་རྩ་མེད་གཏོང་བ་དང་ཁོ་ཚོའི་གསང་བའི་གནས་ཚུལ་ཕན་ཚུན་མཁོ་སྤྲོད་བྱེད་པར་གྲོས་མཐུན་བྱུང་ཡོད་འདུག
ཐེངས་འདིའི་ཚོགས་འདུའི་སྟེང་གཙོ་བོ་དཀྱིལ་ཤར་ཨེ་ཤ་ཡའི་ནང་ཡོད་པའི་འཇིགས་སྐུལ་ཚོགས་པའི་སྐོར་ལ་གྲོས་མོལ་བྱས་ཡོད་སྟབས། ཨ་རི་དང་ཨུ་རུ་སུ་གཉིས་ཀྱིས་དུས་རབས་ཉེར་གཅིག་ནང་ཨི་རག་དང་སུ་རུ་ཡའི་ནང་ཡོད་པའི་ཁ་ཆེ་སུ་ནེ་ཆོས་ལུགས་ཀྱི་འཇིགས་སྐུལ་དྲག་སྤྱོད་ཚོགས་པ་ལ་འཚོ་གནས་བྱེད་ཡུལ་ལག་མཐིལ་ཙམ་ཡང་མེད་པར་རྩ་མེད་གཏོང་རྒྱུར་གྲོས་མཐུན་བྱུང་ཡོད་འདུག ཨ་རིའི་རྒྱལ་དོན་དྲུང་ཆེ་ཇོན་ཁད་རེ་ལགས་ཀྱིས། འཇིགས་སྐུལ་དྲག་སྤྱོད་པར་ཁ་གཏད་གཅོག་པར་རྒྱལ་ཁབ་གང་ཡང་གཡོལ་ཐབས་མེད་པར་འགན་འཁུར་དང་བླངས་ཀྱིས་རྒྱབ་སྐྱོར་བྱེད་དགོས་ཅེས་བརྗོད་པ་དང་། ཨུ་རུ་སུའི་ཕྱི་སྲིད་བློན་ཆེན་ལཱ་བེ་རོབ་བེ་ལགས་ཀྱིས་ཨུ་རུ་སུས་ཨི་རག་དམག་དཔུང་ལ་མཚོན་ཆ་སོགས་ཀྱི་རོགས་སྐྱོར་གང་མགྱོགས་བྱ་རྒྱུ་ཡིན་ཚུལ་བརྗོད་འདུག
ཚོགས་འདུའི་སྟེང་ཨ་རི་དང་ཡུ་རོབ་མཐུན་ཚོགས་གཉིས་ཀྱིས་ཡུའུ་ཁུ་རེན་གྱི་དཀའ་རྙོག་ཐོག་ནས་ཨུ་སུ་རུར་དཔལ་འབྱོར་ཉེས་ཆད་བཏང་ཡོད་པར་ཕྱིར་འཐེན་བྱ་འཆར་ཡོད་མེད་སྐོར་ལ། ཨ་རིའི་རྒྱལ་དོན་དྲུང་ཆེ་ཇོན་ཁད་རེ་ལགས་ཀྱིས། “ ཨུ་རུ་སུའི་རྣམ་འགྱུར་ལ་རག་ལས་ཡོད། ཨུ་རུ་སུས་ཡུའུ་ཁུ་རེན་གྱི་ས་མཚམས་སུ་ཡོད་པའི་དམག་དཔུང་ཕྱིར་འཐེན་དང་གྱེན་ལོག་ཚོགས་པར་མཚོན་ཆའི་རོགས་སྐྱོར་མཚམས་འཇོག གྱེན་ལོག་ཚོགས་པས་འཛིན་བཟུང་བྱས་པའི་མི་སེར་ཀློད་གྲོལ་གཏོང་བ་བཅས་ནི་དཔལ་འབྱོར་ཉེས་ཆད་ཕྱིར་འཐེན་བྱེད་པའི་སྔོན་འགྲོ་ཆ་རྐྱེན་ཡིན་”ཞེས་བརྗོད་ཡོད་འདུག ཨུ་རུ་སུའི་ཕྱི་སྲིད་བློན་ཆེན་ལཱ་བེ་རོབ་བེ་ལགས་ཀྱིས་ཨུ་རུ་སུའི་དཔལ་འབྱོར་ ཉམས་རྒུད་འགྲོ་བཞིན་ཡོད་པར་ཁས་ལེན་བྱས་མེད་ཀྱང་། ཁོང་གིས་“ ང་ཚོས་ད་རུང་ཨུ་རུ་སུ་དང་ཡོ་རོབ་མཐུན་ཚོགས་སུ་ཞིག་ལ་དཔལ་འབྱོར་གྱོང་གུན་ཕོག་ཡོད་མེད་ཤེས་ཀྱི་མེད་” ཅེས་བརྗོད་ཡོད་འདུག
ཨ་རིའི་རྒྱལ་དོན་དྲུང་ཆེ་དང་ཨུ་རུ་སུའི་ཕྱི་སྲིད་བློན་ཆེན་གཉིས་གྲོས་མོལ་མ་བྱས་པའི་སྔོན་ཉིན། ཨུ་རུ་སུའི་སྲིད་འཛིན་པུ་ཊིན་གྱིས། ཡུའུ་ཁུ་རེན་གྱི་ས་མཚམས་སུ་ཡོད་པའི་ཨུ་རུ་སུའི་དམག་མི་ ༡༧༦༠༠ ཙམ་དམག་སྒར་སོ་སོར་ཕྱིར་ལོག་བྱེད་དགོས་པའི་བཀའ་ཁྱབ་བཏང་སྟེ། ནུབ་ཕྱོགས་རྒྱལ་ཁབ་ཚོར་རྣམ་འགྱུར་གང་ལེགས་སྟོན་ཁུལ་བྱས་ཡོད་འདུག
གནད་དོན་དབྱེ་ཞིབ་པ་ཁག་ཅིག་གིས། ཨུ་རུ་སུས་ཨ་རིའི་མཉམ་དུ་དཀྱིལ་ཤར་ཨེ་ཤ་ཡའི་ནང་འཇིགས་སྐུལ་དྲག་སྤྱོད་པ་རྩ་མེད་གཏོང་བར་རོགས་འདེགས་དང་། ཨི་རན་དང་བྱང་ཀོ་རི་ཡའི་རྡུལ་ཕྲན་མཚོན་ཆའི་དཀའ་རྙོག་སེལ་བར་རྒྱབ་སྐྱོར་བྱས་ཡོད་ཀྱང་། ཡུའུ་ཁུ་རེན་གྱི་གནད་དོན་མ་སེལ་བར་དུ་རྒྱལ་ཁབ་གཉིས་ཀྱི་ཕྱི་སྲིད་འབྲེལ་ལམ་བསྐྱར་གསོ་བྱེད་ཐབས་མེད་ཚུལ་བརྗོད་འདུག གཞན། ནུབ་ཕྱོགས་རྒྱལ་ཁབ་ཚོས་ཨུ་རུ་སུར་དཔལ་འབྱོར་ཉེས་ཆད་ཐེངས་གསུམ་བཏང་སྟེ་ཨུ་རུ་སུའི་དཔལ་འབྱོར་ལ་ཉམས་རྒུད་ཆེན་པོ་འགྲོ་བཞིན་ཡོད་སྟབས། ཨུ་རུ་སུས་ཡུའུ་ཁུ་རེན་གྱི་གནད་དོན་བློས་གཏོང་བྱེད་པའི་རྣམ་འགྱུར་སྟོན་གྱི་ཡོད་ཚུལ་བརྗོད་འདུག
