དེ་ཡང་༸སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་རླབས་ཆེན་དགོངས་བཞེད་འོག་རང་ཅག་རབ་བྱུང་འདུས་སྡེ་དགོན་པ་གྲྭ་ཚང་ཁག་གི་ནང་གཞུང་ཆེན་ཁག་གི་ནང་དོན་ཤེས་རྟོགས་ཡོང་སླད། མཚན་ཉིད་རིག་པའི་ལམ་ནས་སྦྱང་བ་བྱེད་དགོས་པ་གལ་ཆེན་ཡིན་པ་ལྟར། འདི་ག་བལ་ཡུལ་ཁུལ་དུ་ཡང་དོལ་རྒྱལ་བསྟེན་གསོལ་དང་འབྲེལ་བ་གཏན་ནས་མེད་པའི་བལ་ཡུལ་དགེ་ལྡན་ལྷན་ཚོགས་ཀྱི་གོ་སྒྲིག་འོག་ལོ་ལྟར་འཇང་དགུན་ཆོས་ཀྱི་ཆོས་ཐོག་ཆེན་མོ་འདི་བཞིན་ཚོགས་དང་འཚོགས་བཞིན་པ་ཡིན། འདི་ལོ་ཡང་འཇང་དགུན་ཆོས་ཀྱི་ཆོས་ཐོག་ཆེན་མོ་ཐེངས་ལྔ་པ་འདི་ཉིད་ཕྱི་ལོ་ ༢༠༡༤ བོད་ཟླ་ ༨ ཚེས་ ༡༢ ཉིན་ནས་བདུན་ཕྲག་གཉིས་ཀྱི་རིང་གནས་མཆོག་འཕགས་པ་ཤིང་ཀུན་སློོབ་དཔོན་དབྱིག་གཉེན་གྱི་སྐུ་གདུང་མཆོད་རྟེན་རིན་པོ་ཆེའི་ཉེ་འདབས་དགའ་ལྡན་བྱམས་མགོན་གླིང་གྲྭ་ཚང་དུ་དགེ་ལྡན་བསྟན་པའི་གསལ་བྱེད་༸སྐྱབས་རྗེ་གསེར་ཀོང་རྡོ་རྗེ་འཆང་གི་ཡང་སྲིད་མཆོག་སྤྲུལ་རིན་པོ་ཆེ་མཆོག་གི་གཙོས་ལས་བྱེད་ཡོངས་ཀྱི་མཐུན་འགྱུར་རོགས་རམ་ལ་བརྟེན་ནས་གྲ་སྒྲིག་གཟབ་རྒྱས་ངང་ཚོགས་ཐུབ་པ་བྱུང་ཡོད། དེ་ཡང་འཇང་དགུན་ཆོས་ལ་ཕེབས་མཁན་སློབ་གཉེར་བ་ནི། གཞུང་དགོན་བསམ་གཏན་གླིང་གྲྭ་ཚང་གི་སློབ་གཉེར་བ། ཀོ་པཎ་འོག་མིན་བྱང་ཆུབ་ཆོས་གླིང་གྲྭ་ཚང་གི་སློབ་གཉེར་བ། ཤེལ་དཀར་ཆོས་སྡེ་དགེ་ལྡན་ལེགས་བཤད་གླིང་གྲྭ་ཚང་གི་སློབ་གཉེར་བ། ཤྲཱི་ཆུ་བཟང་བསམ་གཏན་ཡང་རྩེ་གྲྭ་ཚང་གི་སློབ་གཉེར་བ།ཆུ་དབར་འགྲོ་ཕན་གླིང་གྲྭ་ཚང་གི་སློབ་གཉེར་བ། སྒོ་སོག་ཕུན་ཚོགས་ཆོས་གླིང་གྲྭ་ཚང་གི་སློབ་གཉེར་བ།གྲུབ་དགོན་ཐུགས་རྗེ་ཆོས་གླིང་གྲྭ་ཚང་གི་སློབ་གཉེར་བ། དགའ་ལྡན་བྱམས་མགོན་གླིང་གྲྭ་ཚང་གི་སློབ་གཉེར་བ།བོ་དོང་ཆོས་བརྒྱུད་སྤོ་རོང་དཔལ་མོ་ཆོས་སྡིངས་གྲྭ་ཚང་གི་སློབ་གཉེར་བ། འབྲི་གུང་བཀའ་བརྒྱུད་རིན་ཆེན་གླིང་གི་སློབ་གཉེར་བ་བཅས་ཁྱོན་བསྡོམས་སློབ་གཉེར་བ་གྲངས་ ༤༥༠ ལྷག་མཉམ་འཛོམས་ཐུབ་པ་བྱུང། དེ་ཡང་ཉིན་དང་པོའི་དབུ་འབྱེད་མཛད་སྒོའི་སྐུ་མགྲོན་གཙོ་བོ་བལ་ཡུལ་གཞུང་གི་དགོན་པ་ལྟ་རྟོག་དང་ཡར་རྒྱས་ལྷན་ཚོགས་ཀྱི་ཚོགས་གཙོ་མཁན་པོ་ཀརྨ་ལེགས་བཤད་དང་བལ་ཡུལ་བོད་མིའི་འབྲེལ་མཐུད་སྐུ་ཚབ་མཆོག་བལ་ཡུལ་ནང་པའི་ཚོགས་ཆེན་གྱི་དྲུང་ཆེ་ཨཱཅཱརྱ་ནོར་བུ་ཤར་པ་མཆོགཤྲཱི་ཆུ་བཟང་གྲྭ་ཚང་གི་སྐྱབས་རྗེ་ཤྲཱི་ཆུ་བཟང་རིན་པོ་ཆེ་ལ་སོགས་པའི་ཁྱབ་ཁོངས་དགོན་པ་ཁག་གི་མཁན་རིན་པོ་ཆེ་དང་འགན་འཛིན་ཕྱག་མཛོད་རྣམ་པ། དགེ་བསྐོས། ཤེས་ཡོན་འགན་འཛིན། དཔེ་ཁྲིད་རྒན་ལགས།རིས་མེད་ཆོས་བརྒྱུད་ཁག་གི་སྐུ་ཚབ། སློབ་གྲྭ་ཁག་གི་སློབ་སྤྱི་རྣམ་པ།འབྲེལ་ཡོད་བསྟན་པའི་སྦྱིན་བདག་ཁག་དང་འཇང་དགུན་ཆོས་ཀྱི་སློབ་གཉེར་བ་བཅས་ཚོགས་ཞུགས་པ་གྲངས་ཆིག་སྟོང་ལྷག་ལྷན་འཛོམས་ཐོག་ཐོག་མར་༸སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་དཔར་མཐོང་གྲོལ་རིན་པོ་ཆེར་མཆོད་སྤྲིན་སྤོས་སྣེས་སྔོན་བསུས་ཏེ་བཞུགས་ཁྲིར་བཞུགས་སུ་གསོལ་བ་དང། དགའ་ལྡན་བྱམས་མགོན་གླིང་གྲྭ་ཚང་གི་དབུ་མཛད་མཆོག་ནས་ཡན་ལག་བདུན་པ་མནྜལ་བཅས་དབུ་སྐུལ་གནང་བ་དང་དགེ་ལྡན་ལྷན་ཚོགས་ཀྱི་ཚོགས་གཙོ་དང་སྐུ་མགྲོན་གཙོ་བོ་བཅས་ནས་༸རྒྱལ་བའི་སྐུ་དཔར་མཐོང་གྲོལ་རིན་པོ་ཆེར་མནྜལ་རྟེན་གསུམ་འདེགས་འབུལ་ཞུས་རྗེས་སྐུ་མགྲོན་དང་འདུས་མང་ཡོངས་ལ་གསོལ་ཇ་འབྲས་བསིལ་འདེགས་འབུལ་ཞུས། དེ་རྗེས་དགེ་ལྡན་ལྷན་ཚོགས་ཀྱི་ཚོགས་གཙོ་མཆོག་ནས་འཇང་དགུན་ཆོས་ཀྱི་ཆོས་ཐོག་ཆེན་མོ་འདི་ཉིད་འཚོགས་དགོས་པའི་དམིགས་ཡུལ་སོགས་ངོ་སྤྲོད་གནང་། དེ་ནས་དམིགས་བསལ་སྐུ་མགྲོན་བལ་ཡུལ་ནང་པའི་ཚོགས་ཆེན་གྱི་དྲུང་ཆེ་ཨཱཅཱརྱ་ནོར་བུ་ཤར་པ་མཆོག་ནས་བསྔགས་བརྗོད་ཀྱི་བཀའ་སློབ་གནང་། དེ་རྗེས་སྐུ་མགྲོན་གཙོ་བོ་བལ་ཡུལ་གཞུང་གི་དགོན་པ་ལྟ་རྟོག་དང་ཡར་རྒྱས་ལྷན་ཚོགས་ཀྱི་ཚོགས་གཙོ་མཁན་པོ་ཀརྨ་ལེགས་བཤད་མཆོག་ནས་བཀའ་སློབ་གནང་གྲུབ་མཚམས་མཛད་སྒོའི་དབུ་བཞུགས་གཙོ་བོ་དགེ་ལྡན་བསྟན་པའི་གསལ་བྱེད་༸སྐྱབས་རྗེ་གསེར་ཀོང་རྡོ་རྗེ་འཆང་མཆོག་ནས་དོལ་རྒྱལ་བསྟེན་གསོལ་དང་འབྲེལ་བ་གཏན་ནས་མེད་པའི་བཀའ་སློབ་དང་རྒྱབ་སྐྱོར་བསྔགས་བརྗོད་བཅས་གནང་། དེ་རྗེས་ལྷན་ཚོགས་ཀྱི་དྲུང་ཆེ་ཨཱཅཱརྱ་ངག་དབང་མཐར་ཕྱིན་ནས་ཐུགས་རྗེ་ཆེའི་གསུང་བཤད་གནང་རྗེས་སྐུ་མགྲོན་དང་འདུས་མང་ཡོངས་ལ་ཉིན་གུང་གསོལ་ཚིགས་གཟབ་རྒྱས་ཕུལ་ནས་མཛད་སྒོ་མཇུག་སྒྲིལ་གནང་། དེ་བཞིན་ཉིན་གྲངས་བཅུ་བཞིའི་རིང་སློབ་གཉེར་བ་ཡོངས་ནས་རྩོད་པ་དང་འཛིན་གྲྭ་རྩོད་པ། དམ་བཅའ་ཆེན་མོ་བཅས་ལ་ཉིན་ལྟར་རྩོད་པ་ལ་འབད་བརྩོན་ལྷོད་མེད་ངང་དྭོགས་གཅོད་ཀྱི་རྩོད་པ་ལྷུག་པོར་གནང་བ་དང་། དམ་བཅའ་ཆེན་མོའི་སྐབས་གྲྭ་ཚང་ཕན་ཚུན་རྩོད་པ་གཏུག་བཤེར་ནན་པོའི་ངང་སློབ་གཉེར་བ་རྣམས་མཚན་ཉིད་ཀྱི་རྩོད་པ་ལ་སྤྲོ་བ་དང་འབད་བརྩོན་སྔར་ལས་ལྷག་པར་འཕེལ་བའི་ཐབས་ལམ་ཞུ་ཐུབ་པ་བྱུང་། མཚམས་རེར་སློབ་གྲྭ་ཁག་གི་སློབ་ཕྲུག་རྣམས་ཀྱང་ཆོས་རར་ཕེབས་ཏེ་རྩོད་པར་མཉམ་ཞུགས་གནང་བ་སོགས་བྱུང་ཡོད། ཆོས་ཐོག་འདིའི་སྐབས་དཔེ་ཁྲིད་རྒན་བཅུ་བཞི་དང་ཆོས་ཐོག་རྒན་པ་བཅུ། དགའ་ལྡན་བྱམས་མགོན་གླིང་དགོན་གྱི་དགེ་བསྐོས་དང་ཆོས་ཐོག་རྒན་པ་བཅས་ནས་རྩོད་པ་གཟིགས་རྟོག་ནན་པོར་གནང་བ་སོགས་འཇང་དགུན་ཆོས་ཐེངས་ལྔ་པ་འདི་ཉིད་སྒྲིག་འཛུགས་དང་ལྡན་པའི་ངང་ཚོགས་ཐུབ་པ་བྱུང་བ་དང་། ཉིན་མཐའ་མར་ཀུན་མཁྱེན་གཉིས་པ་སློབ་དཔོན་དབྱིག་གཉེན་གྱི་སྐུ་གདུང་མཆོད་རྟེན་རིན་པོ་ཆེའི་མདུན་དུ་གང་ཉིད་ཀྱིས་མཛད་པའི་ཆོས་མངོན་པ་མཛོད་ཀྱི་རྩ་བ་ཆ་ཚང་འུར་འདོན་དང་འབྲེལ་མཆོད་འབུལ་རྒྱ་ཆེར་ཞུས།མཇུག་བསྡོམས་མཛད་སྒོའི་ཐོག་དབུ་བཞུགས་༸སྐྱབས་རྗེ་གསེར་ཀོང་རྡོ་རྗེ་འཆང་དང་༸སྐྱབས་རྗེ་ཤྲཱི་ཆུ་བཟང་རིན་པོ་ཆེ་རྣམ་གཉིས་ནས་བཀའ་སློབ་ལམ་སྟོན་གནང་བ་དང་། དགའ་ལྡན་བྱམས་མགོན་གླིང་དགོན་གྱི་ཕྱག་མཛོད་རྒན་དཔལ་འབྱོར་མཆོག་ནས་ཀྱང་འཇང་དགུན་ཆོས་ཀྱི་རྩིས་ཁྲ་ཁམས་དྭངས་སྙན་སྒྲོན་ཞུས་པ་དང་། དམ་བཅའ་ཆེན་མོའི་དམ་བཅའ་བ་གྲངས་ཉེར་བརྒྱད་ལ་གཟེངས་བསྟོད་ལེགས་འབུལ་གནང་བ་དང་དེ་རྗེས་ལྷན་ཚོགས་ཀྱི་ཚོགས་གཙོ་མཆོག་ནས་རྒྱུན་ལས་ཡོངས་ཀྱི་ཚབ་བྱས་ཏེ་ཐུགས་རྗེ་ཆེ་ཞུས་རྗེས་རིས་མེད་བསྟན་པ་རྒྱས་པའི་སྨོན་ལམ་དང་བཀྲ་ཤིས་ཚིགས་བཅད་འུར་འདོན་ངང་གསུངས་ནས་ཆོས་ཐོག་ལེགས་པར་མཇུག་སྒྲིལ་གནང་།
སྤྱིར་བལ་ཡུལ་དགེ་ལྡན་ལྷན་ཚོགས་ནས་རང་ཁོངས་དགོན་པ་ཁག་གི་ནང་གཞུང་ཆེན་སློབ་གཉེར་ཡར་རྒྱས་སྲ་བརྟན་ཡོང་སླད་ལོ་ལྟར་གཞུང་ཆེན་བཀའ་པོད་ལྔའི་རབ་འབྱམས་པའི་རྒྱུགས་སྤྲོད་ཆེན་མོ་གོ་སྒྲིག་ཞུ་བཞིན་ཡོད་པ་དང་དེ་བཞིན་སློབ་མ་རྩེ་ཕུད་རྣམས་དང་རྒྱུགས་སྤྲོད་ཐོན་པ་རྣམས་ལ་ཆོ་འཕྲུལ་སྨོན་ལམ་ཆེན་མོའི་དབུས་སུ་ལེགས་འབུལ་བྱ་དགའ་དང་ཕྱག་འཁྱེར་འབུལ་བ། དེ་བཞིན་མི་མང་ལ་ནང་ཆོས་ངོ་སྤྲོད་ཀྱི་གོ་སྒྲིག་དང་།འཇང་དགུན་ཆོས་ལོ་ལྟར་གོ་སྒྲིག་བྱེད་པ་བཅས་ཀྱི་ལས་འཁུར་ཞུ་བཞིན་ཡོད་པ་བཅས་སོ།།
བལ་ཡུལ་དགེ་ལྡན་ལྷན་ཚོགས་ནས་ཕྱི་ལོ་ ༢༠༡༤ བོད་ཟླ་ ༨ ཚེས་ ༢༦ ཉིན་ལ།
