ཟླ་འདིའི་ཚེས་ ༢༠ ཉིན་རྒྱ་གར་དབུས་ནང་སྲིད་ལས་ཁུངས་ཀྱི་ཟུང་དྲུང་སྐུ་ཞབས་ཀེ་ཀེ་(Mr K. K. Pathak)ལགས་ཀྱིས། བོད་མིའི་སྒྲིག་འཛུགས་ནང་སྲིད་བཀའ་བློན་རྒྱ་རི་སྒྲོལ་མ་མཆོག་ལ། ‘བཙན་བྱོལ་བོད་མིར་མཐུན་རྐྱེན་སྤྲོད་ཕྱོགས་ཀྱི་སྲིད་བྱུས་ ༢༠༡༤ (Tibetan Rehabilitation Policy 2014)’ ཞེས་པའི་གཏན་འབེབས་ཡིག་ཆ་ཞིག་གནང་ཡོད་འདུག
ཡིག་ཆ་དེའི་ནང་སྐྱབས་བཅོལ་བོད་མི་ཚོས་ས་ཞིང་བོགས་གཏོང་འཕར་འགྱངས་བྱེད་ཕྱོགས་དང་། དབུས་དང་མངའ་སྡེ་གཞུང་ནས་ཐོབ་ཐང་གཞན་ཅི་ཡོད། དེ་བཞིན་བོད་མི་ཚོས་དགོས་ངེས་ཀྱི་ཚོང་ལས་གང་ཞིག་གཉེར་ཡང་གཞུང་གིས་ཆོག་མཆན་སྤྲད་དེ་ཡིག་ཆ་དང་ལག་འཁྱེར་སོགས་ཀྱི་མཐུན་འགྱུར་གནང་རྒྱུ་སོགས་འཁོད་ཡོད་འདུག
དེ་བཞིན། བོད་མི་ཚོས་སྨན་ཞབས་(nursing) དང་། དགེ་རྒན་(teaching)། དབང་ཚད་ཅན་གྱི་རྩིས་པ།(Chartered Accountancy) སྨན་དང་འབྲེལ་བའི་ལས་རིགས་(medicine)། བཟོ་སྐྲུན་ལས་རིགས་(engineering) སོགས་ལས་དོན་གང་ཞིག་གནང་ཡང་ཆོག་མཆན་སྤྲོད་རྒྱུ་ཡིན་པ་སོགས་འཁོད་ཡོད་འདུག
ཡིག་ཆ་དེར་ཤོག་ངོས་ ༧ དང་ཟུར་སྣོན་ཡིག་ཆ་ཤོག་ངོས་ ༤ བཅས་བསྡོམས་པའི་ཤོག་ངོས་ ༡༣ ཡོད་པ་དང་། ཡིག་ཆ་འདི་སྐྱབས་བཅོལ་བོད་མི་གནས་སྡོད་མངའ་སྡེའི་ལས་ཁུངས་ཁག་ནང་གཏོང་རྒྱུ་དང་། ངོ་བཤུས་རེ་བོད་མིའི་ས་གནས་མགོ་འཛིན་ཁག་ཏུ་གཏོང་འཆར་ཡོད་འདུག
