ཁ་སང་བྷར་ཛིལ་རྒྱལ་ཡོངས་སྲིད་འཛིན་འོས་བསྡུའི་ཁྲོད་ད་ལྟའི་སྲིད་འཛིན་ལྕམ་རོབ་སི་ཧྥི་ལགས་སུ་སླར་ཡང་སྐབས་གཉིས་པའི་སྲིད་འཛིན་གྱི་རྒྱལ་ཁ་ཐོབ་ཡོད་འདུག
ཁ་སང་ཕྱི་ཚེས་ ༢༦ ཉིན་བྷར་ཛིལ་རྒྱལ་ཡོངས་སྲིད་འཛིན་འོས་བསྡུ་གནང་བའི་ཁྲོད། ད་ལྟའི་གཞུང་འཛིན་ངལ་རྩོལ་ཚོགས་པའི་སྲིད་འཛིན་ལྕམ་རོབ་སི་ཧྥི་ (Dilma Rousseff)ལགས་སུ་འོས་གྲངས་བརྒྱ་ཆ་ ༥༡.༦ དང་། ཁ་གཏད་ཚོགས་པ་བྷར་ཛིལ་སྤྱི་ཚོགས་རིང་ལུགས་དམངས་གཙོ་ཚོགས་པ་(PSDB)ཡི་སྲིད་འཛིན་འོས་མི་དཔལ་འབྱོར་རིག་པ་བ་སྐུ་ཞབས་ནེ་བེ་སི་ (Aecio Neves) ལགས་སུ་འོས་གྲངས་བརྒྱ་ཆ་ ༤༨.༦ བཅས་ཐོབ་སྟེ། ད་ལྟའི་སྲིད་འཛིན་ལྕམ་རོབ་སི་ཧྥི་ལགས་སུ་རྒྱལ་ཁ་ཐེངས་གཉིས་པ་ཐོབ་ཡོད་འདུག
ཁོང་མོར་རྒྱལ་ཁ་ཐོབ་རྗེས་མང་ཚོགས་ལ་གཏམ་བཤད་གནང་སྐབས། ཁོང་མོས་སྲིད་འཛིན་གྱི་དུས་ཡུན་རིང་སྲིད་འཛིན་ཡག་ཤོས་ཤིག་བྱས་ཏེ། བྷར་ཛིལ་མང་ཚོགས་ཀྱི་མངོན་འདོད་ལྟར་དཔལ་འབྱོར་ཉམས་རྒུད་བསྐྱར་གསོ་དང་། ལས་མེད་དང་དབུལ་ཕོངས། འགྲིམ་འགྲུལ་སོགས་ཀྱི་དཀའ་ངལ་སེལ་ཐུབ་བྱ་རྒྱུ་ཡིན་པ་དང་། ལྷག་པར་དུ་རྒྱལ་ཁབ་ནང་དཀའ་ངལ་འཕྲད་བཞིན་པའི་སྲིད་དོན་ཚོགས་པའི་བར་གྱི་དཀའ་རྙོག་ཁག་གྲོས་མོལ་བརྒྱུད་སེལ་ཐུབ་བྱ་རྒྱུ་ཡིན་སྐོར་སོགས་བརྗོད་འདུག
ཁོང་མོས་མུ་མཐུད་དུ། ཐེངས་འདིའི་འོས་བསྡུས་རྒྱལ་ཁབ་ཤོག་ཁག་གཉིས་སུ་བགོས་པར་ཡིད་ཆེས་བྱེད་ཀྱི་མེད་པ་མ་ཟད། མི་མང་ཁྲོད་ཕན་ཚུན་ཕྱོགས་འགལ་གྱི་ལྟ་ཚུལ་དང་སེམས་ཚོར་ཡོད་པར་བསམ་ཤེས་བྱེད་ཐུབ། དེ་དག་ཚང་མ་རྒྱལ་ཁབ་འཛུགས་སྐྲུན་དང་མི་དམངས་ཀྱི་འཚོ་བ་ཡར་རྒྱས་ཆེད་ཡིན་སྟབས། ང་ཚོས་མཉམ་རུབ་ཀྱི་ཐོག་ནས་རྨང་གཞི་སྲ་བརྟན་པའི་རྒྱལ་ཁབ་གསར་འཛུགས་བྱེད་དགོས། ཞེས་བརྗོད་འདུག
དེ་བཞིན། ཁ་གཏད་ཚོགས་པའི་སྲིད་འཛིན་འོས་མི་སྐུ་ཞབས་ནེ་བེ་སི་ལགས་ཀྱིས་འོས་བསྡུའི་རྒྱལ་ཁ་ཤོར་བ་ངོས་ལེན་དང་འབྲེལ་ཏེ། སྲིད་འཛིན་ལྕམ་རོབ་སི་ཧྥི་མཆོག་ལ་ཁ་པར་བརྒྱུད་འཚམས་འདྲི་ཞུས་ཏེ། “འབྱུང་འགྱུར་སྲིད་གཞུང་གིས་ང་ཚོའི་དགོས་འདོད་ལྟར་མི་དམངས་ལ་ཆེ་མཐོང་ལྡན་པའི་ཐོག་ནས་བྷར་ཛེལ་རྒྱལ་ཁབ་ཆིག་སྒྲིལ་ཡོང་བར་འབད་བརྩོན་བྱེད་པའི་ཡིད་ཆེས་ཡོད་”ཅེས་འབོད་སྐུལ་བྱས་ཡོད་འདུག
ལྕམ་རོབ་སི་ཧྥི་སྲིད་གཞུང་གིས་ ༢༠༡༤ ལོའི་འཛམ་གླིང་རྐང་རྩེད་སྤོ་ལོའི་འགྲན་བསྡུར་གོ་སྒྲིག་བྱེད་སྐབས། མང་ཚོགས་ཁྲོད་གཞུང་གི་དཔོན་ངན་ཚོས་རྐང་རྩེད་སྤོལ་ལོའི་རྩེད་ཐང་འཛུགས་སྐྲུན་གྱི་མ་དངུལ་ལྐོག་ཟ་བྱེད་ཀྱིན་ཡོད་པ་དང་། གཞུང་གིས་གྲོང་ཁྱེར་ནང་གི་སྤྱི་སྤྱོད་རླངས་འཁོར་དང་མེ་འཁོར་གླ་ཆ་དང་ཟས་སོང་སྤར་བ། འཕྲོད་བསྟེན་ཞབས་ཞུ་ཉམས་ཆག་ཕྱིན་པ་སོགས་ཀྱི་སྐྱོན་བརྗོད་བྱས་ཏེ། འཛམ་གླིང་རྐང་སྤོལ་འགྲན་བསྡུར་གོ་སྒྲིག་ཕྱིར་འཐེན་བྱེད་དགོས་པ་དང་། སྲིད་འཛིན་ལྕམ་རོབ་སི་ཧྥི་ཡིས་དགོངས་པ་ཞུ་དགོས་པ་སོགས་ཀྱི་ངོ་རྒོལ་སྐད་འབོད་བྱས་ཡོད་ཀྱང་། རྐང་རྩེད་སྤོ་ལོ་རྩེད་འགྲན་མཇུག་སྒྲིལ་རྗེས་གཞུང་གིས་ལྐོག་ཟ་རུལ་སུངས་དག་ཐེར་དང་འགྲིམ་འགྲུལ་གླ་ཆ་ཆགས་ཡང་། འཕྲོད་བསྟེན་བཅས་ཀྱི་གནད་དོན་སེལ་ཐབས་ལ་འབད་བརྩོན་བྱས་ཡོད་འདུག
ཐེངས་འདིར་སྲིད་འཛིན་འོས་བསྡུའི་ལས་རིམ་ཁྱབ་བསྒྲགས་སྐབས། སྲིད་འཛིན་འོས་མི་སྐུ་ཞབས་ནེ་བེ་སི་ལགས་གཙོས་ཁ་གཏད་ཚོགས་པས་སྲིད་འཛིན་ལྕམ་རོབ་སི་ཧྥི་དང་ཁོ་མོའི་ཆབ་སྲིད་ཚོགས་པས་གཞུང་གི་རྡོ་སྣུམ་ལྐོག་ཟ་དང་འཛིན་སྐྱོང་ཚགས་ཚུད་མེད་པ་བཅས་ལ་བརྟེན་ཏེ། རྒྱལ་ཁབ་ཀྱི་དཔལ་འབྱོར་ཉེན་ཁར་ཐུག་ཡོད་ཚུལ་སོགས་ཀྱི་སྐྱོན་བརྗོད་དང་། གལ་སྲིད་ཁོ་ཚོར་འོས་འཐོབ་པ་ཡིན་ན་རྒྱལ་ཁབ་ཀྱི་དཔལ་འབྱོར་བསྐྱར་གསོ་ཨང་དང་པོར་འཛིན་རྒྱུ་ཡིན་ཚུལ་སོགས་བརྗོད་དེ་མི་སེར་དཀྱུས་མའི་རྒྱབ་སྐྱོར་ཐོབ་ཐབས་བྱས་ཡོད་ཀྱང་། ལྕམ་རོབ་སི་ཧྥི་ཡིས་སྲིད་གཞུང་བཟུང་ནས་ད་བར་ཉམ་ཐག་མི་སེར་ས་ཡ་ ༤༠ ལྷག་གི་འཚོ་བ་ཡར་རྒྱས་དང་ལས་མེད་ཉུང་དུ་བཏང་བ། མ་འོངས་པར་མི་སེར་ཉམ་ཐག་གི་འཕྲོད་བསྟེན་དང་ཤེས་ཡོན། འཛུགས་སྐྲུན་སོགས་ཡར་རྒྱས་གཏོང་རྒྱུ་ཡིན་སྐོར་ཁྱབ་བསྒྲགས་བྱས་ཡོད་འདུག
སྲིད་དོན་དབྱེ་ཞིབ་པ་ཚོས། ཐེངས་འདིར་ལྕམ་རོབ་སི་ཧྥི་ལ་སྲིད་འཛིན་རྒྱལ་ཁ་ཐོབ་པ་དེས་མང་ཚོགས་ཀྱིས་ཁོང་དང་ཁོང་གི་སྲིད་བྱུས་ལ་རྒྱབ་སྐྱོར་ཡོད་པ་མཚོན་པ་མ་ཟད། ཟླ་འགའི་ནང་མང་ཚོགས་ཀྱིས་ཁོ་མོས་སྲིད་འཛིན་ལས་དགོངས་པ་ཞུ་དགོས་པ་དང་གཞུང་ལ་ངོ་རྒོལ་ཆེན་པོ་བྱས་ཡོད་པ་སོགས་སྲིད་དོན་ཚོགས་པ་གཞན་གྱིས་ངན་སྐུལ་བྱས་པ་ཞིག་ཡིན་པ་ར་སྤྲོད་བྱས་ཡོད་ཚུལ་སོགས་བརྗོད་འདུག
ལྕམ་རོབ་སི་ཧྥི་མཆོག་ནི་ད་ལྟ་རང་ལོ་ ༦༦ ཡིན་པ་དང་། ༡༩༨༠ ལོ་ནས་བཟུང་སྲིད་དོན་ཚོགས་པའི་ནང་ཞུགས་ཏེ་སྲིད་གཞུང་གི་གནས་རིམ་འདྲ་དང་གྲོས་ཚོགས་འཐུས་མི་སོགས་གནང་ཡོད་འདུག ༢༠༡༡ ལོར་སྲིད་འཛིན་འོས་མིའི་ནང་ཞུགས་ཏེ་བྷར་ཛིལ་གྱི་བུད་མེད་སྲིད་འཛིན་ཐོག་མ་ཆགས་ཡོད་འདུག
