ཉེ་སྔོན་འཛམ་གླིང་མཉམ་འབྲེལ་རྒྱལ་ཚོགས་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་གཙོ་གསར་པ་ཛི་ཌི་ར་ཌི་ལགས་ཀྱིས་བོད་ནང་རྟོག་ཞིབ་ཏུ་ཕེབས་འདོད་ཡོད་སྐོར་གསུངས་པ་ལྟར། དུས་བབ་ཀྱིས་བོད་ཀྱི་གཞུང་འབྲེལ་མིན་པའི་ཚོགས་པ་ཁག་ལ་དགོངས་འཆར་བསྡུས།
ཟླ་འདིའི་ཕྱི་ཚེས་ ༡༦ ཉིན་སུད་སིའི་གྲོང་ཁྱེར་ཇི་ནི་ཝ་རུ། འཛམ་གླིང་མཉམ་འབྲེལ་རྒྱལ་ཚོགས་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་གཙོ་གསར་པ་ཛི་ཌི་ར་ (Zeid Ra’ad Al Hussein) ལགས་ཀྱིས་ལས་འཁུར་ཞུས་རྗེས་ཀྱི་གསར་འགོད་ལྷན་ཚོགས་ཐེངས་དང་པོའི་སྟེང་། ཁོང་བོད་ནང་དུ་གཟིགས་ཞིབ་གནང་བར་ཕེབས་འདོད་ཡོད་པ་ལྟར་ད་ལྟ་དེའི་སྐོར་ལ་རྒྱ་ནག་གཞུང་གི་དཔོན་རིགས་ཚོ་དང་གྲོས་མོལ་བྱེད་བཞིན་ཡོད་སྐོར་བསྒྲགས་ཡོད་པ་དང་། ཕྱི་ཚེས་ ༢༤ ཉིན་རྒྱ་ནག་གི་ཕྱི་འབྲེལ་མགྲིན་ཚབ་མ་ཧྭ་ཁྲིན་ཡེན་གྱིས་གསར་འགོད་ལྷན་ཚོགས་ཤིག་གི་ཐོག རྒྱ་ནག་གཞུང་ནས་མཉམ་འབྲེལ་རྒྱལ་ཚོགས་འགྲོ་བ་མིའི་ཐོབ་ཐང་ལྷན་ཚོགས་མཉམ་དུ་འདྲ་མཉམ་དང་ཕན་ཚུན་བརྩི་བཀུར་གྱི་རྨང་གཞིའི་ཐོག་ནས་མཉམ་འབྲེལ་བྱེད་པར་མོས་མཐུན་ཡོད་ལ། དྲང་བདེན་དང་དངོས་ཡོད་ཀྱི་ཐོག་ནས་ལས་འགན་ལག་བསྟར་བྱེད་པའི་རེ་བའང་ཡོད། ཅེས་སོགས་བརྗོད་འདུག གནས་ཚུལ་དེ་དང་འབྲེལ་ནས་འདི་གའི་གསར་འགོད་པས་དྷ་རམ་ས་ལའི་གཞུང་འབྲེལ་མིན་པའི་ཚོགས་པ་ཁག་ཅིག་ལ། རྒྱལ་ཚོགས་འགྲོ་བ་མིའི་ཐོབ་ཐང་ལྷན་ཚོགས་ཀྱི་སྐུ་ཚབ་བོད་ནང་གཟིགས་སྐོར་གནང་ཕྱོགས་ཐོག་དགོངས་འཆར་དྲིས་ཡོད།
བོད་ཀྱི་གཞོན་ནུ་ལྷན་ཚོགས་ཀྱི་དྲུང་ཆེ་བཀྲ་ཤིས་ལམ་བཟང་ལགས་ཀྱིས། འགྲོ་བ་མིའི་ཐོབ་ཐང་ལྷན་ཚོགས་ཀྱི་འགན་འཛིན་གྱིས་འགན་བཞེས་མ་ཐག་བོད་ནང་ཕེབས་འདོད་ཡོད་ལུགས་གསུངས་བ་དེ་དངོས་སུ་ཕེབས་ཐུབ་མིན་ལ་མ་ལྟོས་པར། རྒྱལ་སྤྱིའི་སྡིངས་ཆའི་ཐོག་བོད་ནང་གི་གནས་སྟངས་ལ་དོ་འཁུར་གྱི་གནས་ཚུལ་ཡག་པོ་ཞིག་རེད་བསམ་གྱི་འདུག སྤྱིར་བཏང་ཁོང་གལ་སྲིད་བོད་ནང་ཕེབས་ཐུབ་པ་བྱུང་ནའང་རྒྱ་ནག་གཞུང་གི་བཀག་འགོག་དང་གོ་སྒྲིག་འོག བོད་ནང་གི་དངོས་ཡོད་གནས་སྟངས་མཐོང་ཐུབ་རྒྱུ་ཁག་པོ་རེད། གལ་སྲིད་ཁོ་རང་དབང་ལྡན་པའི་ཐོག་ནས་ཕེབས་ཐུབ་པ་ཡིན་ན། དེས་བོད་ཀྱི་གནད་དོན་དང་ལྷག་པར་དུ་བོད་ཀྱི་འགྲོ་བ་མིའི་ཐོབ་ཐང་གི་ཛ་དྲག་གནས་སྟངས་རྒྱལ་སྤྱིའི་སྡིངས་ཆའི་ཐོག་ཁ་གསལ་དུ་འགྲོ་བ་དང་། ཁྱབ་བསྒྲགས་ཤུགས་ཆེ་རུ་འགྲོ་བར་ཕན་ཐོགས་ཆེན་པོ་ཡོང་གི་རེད། ད་རེས་ཁོང་བོད་ནང་དུ་འགྲོ་གཏན་འཁེལ་བ་ཡིན་ན། ང་ཚོ་བོད་ཀྱི་གཞོན་ནུ་ལྷན་ཚོགས་ཀྱི་ངོས་ནས་གཟིགས་སྐོར་སྐབས་ཁོང་གིས་ངེས་པར་དུ་ཐུགས་ཞིབ་གནང་དགོས་པའི་གནད་དོན་ཁག་ཅིག་འབུལ་འཆར་ཡོད། ཅེས་བརྗོད་སོང་།
བོད་ཀྱི་བུད་མེད་ལྷན་ཚོགས་ཀྱི་ཚོགས་གཙོ་བཀྲ་ཤིས་སྒྲོལ་མ་ལགས་ཀྱིས། ད་རེས་ཁོང་ཕེབས་ཐུབ་པ་ཡིན་ན་རང་བཞིན་གྱིས་རྒྱ་ནག་ལ་གནོན་ཤུགས་འདྲ་བོ་ཞིག་སླེབ་ཀྱི་ཡོད་པ་རེད་བསམ་གྱི་འདུག ང་ཚོ་བུད་མེད་ལྷན་ཚོགས་ཀྱི་ངོས་ནས་ག་རེ་ཞུ་འདོད་བྱུང་ཟེར་ན། ཁོང་དང་ཁོང་གི་ཕྱག་རོགས་རྣམ་པས་རང་དབང་གི་ཐོག་ནས་ས་གནས་ས་ཐོག་ཏུ་གཟིགས་ཞིབ་གནང་རྒྱུ་གལ་ཆེན་པོ་རེད། ད་ལྟའི་བར་བོད་མི་སེར་སྐྱ་ ༡༣༠ ལྷག་གིས་རང་ལུས་མེར་བསྲེགས་གནང་ཡོད་སྟབས། ཁོང་ཚོས་རང་ལུས་མེར་བསྲེགས་གནང་དགོས་པའི་རྒྱུ་རྐྱེན་གང་ལ་ཐུག་ཡོད་མེད་ཐོག་ཞིབ་འཇུག་མཐིལ་ཕྱིན་པ་ཞིག་གནང་རྒྱུར་འབོད་སྐུལ་ཞུ་འདོད་བྱུང་། ཁོང་ཚོ་རང་དབང་གི་ཐོག་ནས་བོད་མི་སུ་དང་ཐུག་པ་ཡིན་ནའང་། བོད་མི་དེ་ཚོའི་བདེ་འཇགས་ལ་ངེས་པར་དུ་འགན་འཁུར་བའི་ཐོག་ནས་གྲོང་གསེབ་དང་འབྲོག་ས་སོགས་ཀྱི་གནས་སྟངས་ལའང་རྟོག་ཞིབ་ཅིག་གནང་རོགས་ཞུ་རྒྱུ་ཡིན། མ་འོངས་པར་རྟོག་ཞིབ་ཚོགས་པ་བོད་ནང་དུ་ཕེབས་པའི་ཟླ་ཚེས་བཅས་གཏན་འཁེལ་བ་ཡིན་ན། ང་ཚོ་བུད་མེད་ལྷན་ཚོགས་ཀྱི་ངོས་ནས་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་སྐོར་གྱི་ཞིབ་འཇུག་སྙན་ཐོ་ཞིག་འབུལ་འཆར་ཡོད། ཅེས་བརྗོད་བྱུང་།
བོད་ཀྱི་དགུ་བཅུ་གསུམ་ལས་འགུལ་ཚོགས་པའི་ཚོགས་གཙོ་པ་སངས་ཚེ་རིང་ལགས་ཀྱིས། འགྲོ་བ་མིའི་ཐོབ་ཐང་གི་མི་སྣ་བོད་ནང་གཟིགས་ཞིབ་ཏུ་ཕེབས་འཆར་ཡོད་པའི་གནས་ཚུལ་ཐོན་པ་དེ་ཕྱོགས་གཅིག་ནས་ཡག་པོ་རེད་བསམ་གྱི་འདུག ཡིན་ནའང་། རྒྱ་ནག་གཞུང་གི་དཔོན་རིགས་ཚོར་ཐུག་སྟེ་བོད་ནང་གི་བོད་མིའི་གནས་སྟངས་སྐོར་ལ་བཀའ་མོལ་གནང་བ་ཙམ་གྱིས་མཇུག་འབྲས་དམིགས་བསལ་ཞིག་འཐོན་ཐུབ་རྒྱུ་རེད་དྲན་གྱི་མེད། གལ་སྲིད་རང་དབང་གི་ཐོག་ནས་གཟིགས་ཞིབ་གནང་རྒྱུ་བྱུང་བ་ཡིན་ན། བོད་ནང་གི་གནས་སྟངས་མང་པོ་ཞིག་རྒྱུས་ལོན་ཐུབ་པའི་རེ་བ་ཡོད་པ་རེད། ཡིན་ནའང་ཉེན་ཁ་ཆེ་ཤོས་དེ་གཟིགས་སྐོར་ས་གནས་རྒྱ་ནག་གཞུང་གི་བཀོལ་ཇུས་ལྟར་འགྲོ་དགོས་པ་ཆགས་ན། ས་ཆ་གང་བཟང་བཟང་དང་། གང་ཡག་ཡག་དག་ལ་འཁྲིད་འགྲོ་བ་མ་གཏོགས་དངོས་གནས་དཀའ་ངལ་ཡོད་པའི་ཞིང་འབྲོག་ཁུལ་གྱི་གནས་སྟངས་མཐོང་ཐུབ་རྒྱུ་ཁག་པོ་རེད། ཡིན་ནའང་གཟིགས་ཞིབ་ཚོགས་པ་ཕེབས་ཏེ་རྒྱ་ནག་གཞུང་གི་དཔོན་རིགས་ཚོར་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཐོག་བཀའ་མོལ་བྱུང་བ་ཡིན་ན། རང་བཞིན་གྱིས་རྒྱལ་སྤྱིའི་ཐོག་གི་བོད་དོན་གནས་སྟངས་ཐད་དགེ་མཚན་ཡོང་གི་རེད། ཅེས་བརྗོད་བྱུང་།
རྒྱལ་ཡོངས་མང་གཙོ་ཚོགས་པའི་དྲུང་ཆེ་བསྟན་འཛིན་ཕུན་ཚོགས་ལགས་ཀྱིས། ང་ཚོས་འདི་ནས་སྐད་བརྒྱབ་བསྡད་པ་ལས་འགྲོ་བ་མིའི་ཐོབ་ཐང་རྟོག་ཞིབ་ཚོགས་པ་ཞིག་དངོས་སུ་ཕེབས་ཐུབ་པ་ཡིན་ན་ཕན་ཐོགས་ཆེ་བ་ཡོད་པ་རེད། གང་ཡིན་ཟེར་ན། རྟོག་ཞིབ་བྱེད་མཁན་དེ་བོད་པ་དང་རྒྱ་མི་མ་ཡིན་པར་ཕྱི་མི་ཞིག་ཡིན་སྟབས། དངོས་ཡོད་གནས་ཚུལ་ཡག་སྡུག་གང་ཡིན་ཡང་མངོན་གསལ་དོད་པོ་ཞིག་ཆགས་ཀྱི་རེད་དྲན་གྱི་འདུག རྟོག་ཞིབ་ཚོགས་པ་དེ་ཕེབས་སའི་ས་ཆ་ལའང་ཁྱད་པར་ཆེན་པོ་ཡོད་པ་རེད། དཔེར་ན་རྒྱུན་དུ་དཀའ་ངལ་འཕྲད་བཞིན་པའི་རྔ་པ་དང་དཀར་མཛེས་ཕྱོགས་ཀྱི་རྙོག་དྲ་མང་པོ་ཡོད་པའི་ས་ཆ་ཁག་ཏུ་བསྐྱོད་ཐུབ་ན་གནས་སྟངས་མང་པོ་ཞིག་ཧ་གོ་གི་རེད། ད་རེས་ཁོ་རང་ཚོས་བོད་ནང་གི་ཆབ་སྲིད་བཙོན་པའི་གནས་སྟངས་སྐོར་ལ་རྒྱུས་ལོན་ཞིག་ངེས་པར་དུ་བྱ་ཐུབ་དགོས་པ་རེད་བསམ་གྱི་འདུག ལྷ་སའི་ཉེ་འཁོར་གྱི་བཙོན་ཁང་ཁག་ཏུ་ཁྲིམས་ཐག་མ་བཅད་པའི་བཙོན་པ་མང་པོ་ཡོད་པ་རེད། དེ་བཞིན་ས་གནས་གཞན་དག་ཏུའང་ཆབ་སྲིད་བཙོན་པ་མང་པོ་ཡོད་པ་རེད། ཅེས་བརྗོད་བྱུང་།
བོད་རང་བཙན་སློབ་ཕྲུག་ཚོགས་པའི་ཚོགས་གཙོ་རྡོ་རྗེ་ཚེ་བརྟན་ལགས་ཀྱིས། ད་ལྟའི་ཆར་བོད་ནང་བཙོན་ཁང་ལྟ་བུ་ཞིག་ཏུ་བསྒྱུར་ནས་དཀའ་ངལ་ཆེན་པོ་འཕྲད་བཞིན་ཡོད་ཀྱང་། རྒྱ་གཞུང་གིས་བོད་ནང་ཕྱིའི་གསར་འགོད་པ་དང་འགྲོ་བ་མིའི་ཐོབ་ཐང་རྟོག་ཞིབ་ཚོགས་པ་སོགས་གཏོང་གི་མེད་པའི་རྐྱེན་གྱིས་གནས་ཚུལ་མང་པོ་ཞིག་ཕྱི་ལོགས་སུ་བསླེབ་ཐུབ་ཀྱི་ཡོད་པ་མ་རེད། ད་ལན་འགྲོ་བ་མིའི་ཐོབ་ཐང་ལྷན་ཚོགས་ཀྱི་རྟོག་ཞིབ་ཚོགས་པ་ཞིག་བོད་ནང་དུ་ཕེབས་ཐུབ་པ་ཡིན་ན་གལ་གནད་ཆེན་པོ་ཆགས་ཡོད། བོད་ནང་གི་གནས་སྟངས་ཐད་ཏན་ཏན་དགེ་མཚན་ཞིག་བཟོ་ཡི་རེད་བསམ་གྱི་འདུག ཁོང་ཚོ་ཕེབས་པ་དེ་ཡང་རྒྱ་ནག་གཞུང་གིས་ག་པར་ཁྲིད་ཁྲིད་ཙམ་མ་ཡིན་པར་དངོས་ཡོད་ཀྱི་གནས་སྟངས་ཤིག་མཐོང་ཐུབ་པ་བྱ་རྒྱུ་དེ། ཁོང་ཚོ་འཛམ་གླིང་གི་འགྲོ་བ་མིའི་ཐོབ་ཐང་སྲུང་སྐྱོབ་ཐད་ཀྱི་མི་སྣ་གལ་གནད་ཆེ་ཤོས་ཤིག་ཡིན་པའི་ཆ་ནས་ལས་འགན་ཞིག་ཆགས་ཡོད་པ་རེད། ཅེས་བརྗོད་བྱུང་།
རྒྱལ་སྤྱིའི་བོད་དོན་འབྲེལ་མཐུད་ཁང་གི་རྒྱལ་སྤྱིའི་འབྲེལ་མཐུད་པ་འཇིགས་བྲལ་ལགས་ཀྱིས། ད་ལོའི་ཕྱི་ཟླ་ ༩ ཚེས་ ༡ ཉིན་ང་ཚོ་རྒྱལ་སྤྱིའི་བོད་དོན་འབྲེལ་མཐུད་ཁང་གི་ངོས་ནས་འགྲོ་བ་མིའི་ཐོབ་ཐང་ལྷན་ཚོགས་ལ་སྙན་ཞུ་ཞིག་ཕུལ་ཏེ། འདས་པའི་མི་ལོ་ ༦༠ རིང་རྒྱ་གཞུང་གིས་ལག་བསྟར་བྱས་པའི་བོད་ནང་གི་སྲིད་བྱུས་དང་། བོད་མི་ ༡༣༠ ལྷག་གིས་རང་ལུས་མེར་བསྲེགས་བྱས་པའི་ཞིབ་ཕྲའི་གནས་ཚུལ་ཕུལ་ཏེ། བོད་ནང་གི་དཀའ་ངལ་སེལ་ཆེད་རྒྱ་ནག་གཞུང་ལ་བསྒྲགས་གཏམ་ནན་པོ་ཞིག་སྤེལ་དགོས་པའི་འབོད་སྐུལ་ཞུས་ཡིན། དམིགས་བསལ་གྱིས་ག་རེ་ཞུས་ཡོད་ཟེར་ན། དེ་སྔོན་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་གཙོ་ཟུར་པ་མཱ་རི་རོ་བྷིན་སོན་(Mary Robinson)མཆོག་གིས། རྒྱ་གཞུང་གི་དཔོན་རིགས་ཚོར་བོད་ནང་ཕེབས་པའི་མངོན་འདོད་ཤུགས་ཆེན་པོ་བཏོན་ཡོད་ཀྱང་སྐབས་དེར་ཕེབས་ཐུབ་མེད་སྟབས། ཁོ་མོའི་མངོན་འདོད་དེ་མཇུག་སྐྱོང་ཐུབ་པར་འབད་བརྩོན་གནང་དགོས་རོགས་ཞུས་ཡོད། ཕྱིས་སུ་ང་ཚོར་ཡིག་ལན་འབྱོར་ཏེ་འགན་དེར་མུ་མཐུད་འབད་བརྩོན་གནང་རྒྱུ་ཡིན་སྐོར་གསུངས་བྱུང་། ད་ལན་ཛི་ཌི་ར་ལགས་ཀྱིས་འགན་བཞེས་མ་ཐག་ཏུ་བོད་དུ་ཕེབས་འདོད་ཡོད་སྐོར་གསུངས་པ་དེ་གནད་འགག་ཅིག་རེད་བསམ་གྱི་འདུག
བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་འགན་འཛིན་ཚེ་རིང་མཚོ་མོ་ལགས་ཀྱིས། གཟིགས་སྐོར་དུ་ཕེབས་པ་ཙམ་ལ་རེ་བ་ཆེན་པོ་རྒྱག་རྒྱུ་ཡོད་པ་མ་རེད་བསམ་གྱི་འདུག ཡིན་ནའང་། ཕེབས་ཐུབ་པ་ཡིན་ན་ག་རེ་གལ་ཆེན་པོ་རེད་ཟེར་ན། ད་ལྟའི་བར་དུ་རྒྱ་ནག་གཞུང་གིས་རྒྱལ་སྤྱིའི་ཐོག་ནས་རྒྱ་ནག་གི་ནང་སྲིད་ལ་ཐེ་བྱུས་བྱེད་ཆོག་གི་མེད་ཅེས་ལབ་ཀྱི་ཡོད་པ་རེད། ད་ལན་ཕྱི་ལོགས་ནས་རྒྱ་ནག་ནང་རྟོག་ཞིབ་བྱེད་དུ་ཕེབས་ཆོག་ལབ་དུས་རྣམ་པ་ཤུགས་ཆེན་པོ་ཞིག་སྟོན་ཐུབ་ཀྱི་ཡོད་པ་རེད་བསམ་གྱི་འདུག དཔེར་ན། འགྲོ་བ་མིའི་ཐོབ་ཐང་གི་གནད་དོན་ཟེར་དུས་རྒྱལ་ཁབ་ཅིག་གི་ནང་ཁུལ་གྱི་གནད་དོན་ཙམ་མ་ཡིན་པར་མཉམ་འབྲེལ་རྒྱལ་ཚོགས་ཀྱི་ངོས་ནས་སེམས་འཚབ་བྱེད་དགོས་པ་དང་། གནད་དོན་དེ་ཚོ་བཟང་ཕྱོགས་སུ་འགྱུར་བ་གཏོང་བར་ཕྱག་ལས་མང་པོ་ཞིག་གནང་དགོས་པའི་རྣམ་པ་ཤུགས་ཆེན་པོ་ཞིག་ཆགས་ཀྱི་ཡོད་པ་མ་ཟད། ད་རེས་ཕེབས་ཐུབ་པ་ཡིན་ན། རྒྱ་ནག་གཞུང་གིས་རྒྱུན་དུ་འགྲོ་བ་མིའི་ཐོབ་ཐང་གི་གནད་དོན་དེ་ནང་ཁུལ་གྱི་གནད་དོན་ཞིག་ཡིན་ལུགས་ཀྱི་གཡོ་སྒྱུའི་སྐད་ཆ་དེ་ཚོ་ཤུགས་ཆུང་དུ་འགྲོ་བར་ཕན་ཐོགས་ཏན་ཏན་ཡོང་ངེས་རེད་བསམ་གྱི་འདུག
གསར་འགོད་པ། པདྨ་མཚོ།
བསྟན་འཛིན་ཕུན་ཚོགས་དང་ཚེ་རིང་མཚོ་མོ་རྣམ་གཉིས་ཀྱིས་རྒྱུ་མཚན་ལྡན་པ་གསུངས་འདུག གཞན་དག་ཚོ་དེ་ཙམ་རེད། སྤྱི་ལོ་ཉིས་སྟོང་བདུན་བརྒྱད་སྐབས་ཀྱི་སྟོང་གཏམ་དག་གི་རྣམ་པ་ཡོང་གྲབས་བྱེད་ཀྱིན་འདུག རྒྱུན་ལས་གསར་པ་རེད་རྐྱང་རྐྱང་རེད། འཆར་གཞི་གསར་པ་དང་བསམ་བློ་གསར་པ། སྐད་ཆ་བཤད་སྟངས་གསར་པ་བསམ་བློ་གཏོང་སྟངས་གསར་པ་དགོས་པ་རེད།
འཛམ་གླིང་མཉམ་འབྲེལ་རྒྱལ་ཚོགས་ཀྱི་སྐུ་ཚབ་བོད་ནང་ཕེབས་རྒྱུ་དེ་ཧ་ཅང་གཏམ་བཟང་ཞིག་རེད། ཡིན་ནའང་པེ་ཅིན་དང་ལྷ་སར་སྐོར་བ་ཞིག་བརྒྱབ་ནས་ཕྱིར་ལོག་ན་དོན་དག་གང་ཡང་ཡོད་མ་རེད། བོད་རང་སྐྱོང་ལྗོངས་འོག་གི་ནག་ཆུ་སོག་རྫོང་དང་། ཁམས་རྟའུ་དཀར་མཛེས། ཡུལ་ཤུལ། མི་ཉག ཨ་མདོ་རྔ་པ་དང་བླ་བྲང་། རེབ་གོང་སོགས་ལ་ངེས་པར་དུ་ཕེབས་དགོས་པརེད།