དེ་རིང་དགུ་བཅུ་གསུམ་ལས་འགུལ་ཚོགས་པ་དང་ཚོགས་པའི་དྲུང་ཆེ་ཟུར་པ་རྨེའུ་དཀོན་རྒྱམ་ལགས་བཅས་ཀྱིས། ཟླ་འདིའི་ཚེས་ ༣ ཉིན་རྔ་པ་རྫོང་མི་དམངས་ཁྲིམས་ཁང་གིས་རྔ་པ་རྨེའུ་ཡི་བོད་མི་ ༣ ལ་མི་བསད་པའི་ནག་ཉེས་གཡོགས་ཏེ་ལོ་གཉིས་གསུམ་གྱི་ཁྲིམས་ཐག་བཅད་ཡོད་པའི་སྐོར་ལ་གསར་འགོད་གསལ་བསྒྲགས་ཤིག་སྤེལ་སོང་།
དེ་རིང་སྔ་དྲོའི་ཆུ་ཚོད་ ༡༡ སྟེང་དྷ་རམ་ས་ལའི་བོད་ཀྱི་དགུ་བཅུ་གསུམ་ལས་འགུལ་ཚོགས་པའི་འགྲེམས་སྟོན་ཁང་དུ། དགུ་བཅུ་གསུམ་ལས་འགུལ་ཚོགས་པའི་ཚོགས་གཙོ་པ་སངས་ཚེ་རིང་ལགས་དང་ཚོགས་གཞོན་ལྷ་རྒྱ་རི་རྣམ་རྒྱལ་སྒྲོལ་དཀར་ལགས། དྲུང་ཆེ་ཟུར་པ་རྨེའུ་དཀོན་རྒྱམ་ལགས་གསུམ་གྱིས། ཟླ་འདིའི་ཚེས་ ༣ ཉིན་རྔ་པ་རྫོང་མི་དམངས་ཁྲིམས་ཁང་གིས་རྔ་པ་རྫོང་རྨེའུ་རུ་མའི་རུ་ཆེན་གསུམ་པའི་དགེ་རིག་ཚང་གི་སྒྲོལ་མ་མཚོ་ལགས་དང་རྨེའུ་རུ་མའི་རུ་ཆེན་གཉིས་པའི་གོ་ཚེ་ཚང་གི་དཀོན་མེ་ལགས། རྨེའུ་རུ་མའི་རུ་ཆེན་བཞི་པའི་མར་ལི་ཚང་གི་དགེ་འཕེལ་ལགས་བཅས་ལ་མི་བསད་པའི་ནག་ཉེས་གཡོགས་ཏེ་ལོ་གཉིས་གསུམ་གྱི་་ཁྲིམས་བཅད་པ་མ་ཟད་ཆབ་སྲིད་ཁེ་དབང་འཕྲོག་རྒྱུའི་ཐག་གཅོད་བྱས་པའི་སྐོར་ལ་གསར་འགོད་གསལ་བསྒྲགས་ཤིག་སྤེལ་སོང་།
ཚོགས་གཙོ་པ་སངས་ཚེ་རིང་ལགས་ཀྱིས་གསར་འགོད་སྒྲོག་སྦྱངས་གནང་དོན། ༢༠༡༤ ལོའི་ ༡༡ ཚེས་ ༣ ཉིན་གྱི་བོད་ནང་གི་ཞོགས་པའི་ཆུ་ཚོད་དགུ་དང་ཕྱེད་ཀའི་ཐོག་རྔ་པ་རྫོང་མི་དམངས་ཁྲིམས་ཁང་ཟེར་བ་ནས་བོད་མི་གསུམ་ལ་མི་བསད་པའི་ནག་ཉེས་གཡོགས་ཏེ་ཁྲིམས་ཐག་བཅད་ཡོད་ཅིང་། དེ་ཡང་རྨེའུ་རུ་མའི་རུ་ཆེན་གསུམ་པའི་དགེ་རིག་ཚང་གི་སྒྲོལ་མ་མཚོ་ལགས་ལ་དུས་བཀག་བཙོན་འཇུག་ལོ་གསུམ་དང་། རྨེའུ་རུ་མའི་རུ་ཆེན་གཉིས་པའི་གོ་ཚེ་ཚང་གི་དཀོན་མེ་ལགས་ལ་ལོ་གསུམ་གྱི་དུས་བཀག་བཙོན་འཇུག རྨེའུ་རུ་མའི་རུ་ཆེན་བཞི་པའི་མར་ལི་ཚང་གི་དགེ་འཕེལ་ལགས་ལ་ལོ་གཉིས་ཀྱི་དུས་བཀག་བཙོན་འཇུག་གི་ཁྲིམས་ཐག་བཅད་ཡོད་པ་མ་ཟད། ཁོང་ཚོའི་ཆབ་སྲིད་དབང་ཆ་འཕྲོག་རྒྱུའི་ཐག་གཅོད་བྱས་ཡོད་འདུག ཅེས་བརྗོད་སོང་།
ཁོང་གིས་མུ་མཐུད་དུ། རྔ་པ་རྫོང་མི་དམངས་ཁྲིམས་ཁང་གིས་ཁོང་གསུམ་ལ་ཁྲིམས་ཐག་གཅོད་དགོས་པའི་རྒྱབ་ལྗོངས་སྐོར་ལ། ཐེངས་འདིའི་ཉེས་འཛུགས་ཀྱི་རྒྱུ་རྐྱེན་ཡང་སྒྲོལ་མ་མཚོ་ལགས་ཀྱིས། ༢༠༡༣ ལོའི་ཟླ་ ༡༢ ཚེས་ ༣ ཉིན་རྔ་པ་རྫོང་རྨེའུ་རུ་མའི་ཡུལ་ཚོའི་གསེར་སྡེ་ནས་དཀོན་མཆོག་ཚེ་བརྟན་ལགས་ཀྱིས་རྒྱ་ནག་གཞུང་གི་སྲིད་ཇུས་ལ་ངོ་རྒོལ་བྱེད་ཆེད་རང་ལུས་མེར་བསྲེགས་གནང་སྐབས་སྒྲོལ་མ་མཚོ་ལགས་ཀྱིས་སྐུ་ཕུང་རླངས་འཁོར་ནང་འཇོག་རོགས་བྱས་པ་སོགས་ཀྱིས་དོགས་གཞིའི་འོག་འཇུ་བཟུང་གིས་ཟླ་བ་བཅུ་གཅིག་རིང་བཀག་ཉར་བྱས་ཏེ་མི་བསད་པའི་ནག་ཉེས་ཁས་ལེན་དང་། རོགས་པ་སུ་ཡོད་བརྗོད་དགོས་པའི་འདྲི་གཅོད་བྱེད་སྐབས་གཅར་རྡུང་དང་མནར་གཅོད་སྣ་རྒུ་བཏང་ཡོད་ལ། གོང་ཚེས་ཁྲིམས་ཐག་གཅོད་ཉིན་ཀྱང་ཁྲིམས་རྭ་ནས་ཁོང་མོར་ནག་ཉེས་ཁས་ལེན་དགོས་པའི་བཙན་སྐུལ་བྱས་ཤིང་། དེ་ཉིན་ཁྲིམས་ཁང་ནས་གོང་གསལ་མི་གསུམ་ལ་ནག་མེད་ནག་འགེལ་གྱིས་ཁྲིམས་ཐག་བཅད་ཡོད་ལ། རྨེའུ་རུ་མའི་རུ་ཆེན་གཉིས་པའི་སྒྲོལ་མཚོ་ཚང་གི་བུ་རྔ་པ་ཀིརྟི་དགོན་པའི་དགེ་འདུན་བསྟན་པ་ལགས་དང་། རྨེའུ་རུ་མའི་རུ་ཆེན་གཉིས་པའི་ཞེ་ཆུང་ཚང་གི་བུ་རྔ་པ་ཀིརྟི་དགོན་པའི་དགེ་འདུན་བློ་བཟང་རྒྱ་མཚོ་གཉིས་ལ་རྒྱུ་མཚན་འདི་ཡིན་གསལ་ཁ་མེད་པར་ད་དུང་ཁྲིམས་ཐག་མ་བཅད་པར་བཀག་ཉར་འོག་ཡོད་པ་དང་། དེ་དང་མཉམ་དུ་རྨེའུ་རུ་མ་ཡིན་པ་ཙམ་ལས་སྐྱ་སེར་གང་ཡིན་དང་ཁྱིམ་ཚང་། རུ་སྡེ་སོགས་མི་ཤེས་པའི་བོད་མི་ལྔ་བཙོན་འཇུག་འོག་གནས་ཡོད་ཅེས་བརྗོད་སོང་།
དེ་རྗེས་དགུ་བཅུ་གསུམ་ལས་འགུལ་ཚོགས་པའི་དྲུང་ཆེ་ཟུར་པ་རྨེའུ་དཀོན་རྒྱམ་ལགས་ཀྱིས་ཁོ་རང་གི་ཕ་མ་གཅིག་པའི་སྲིང་མོ་སྒྲོལ་མ་མཚོ་ལགས་ལ་རྒྱ་གཞུང་གིས་མ་ཉེས་ཁ་གཡོགས་ཀྱིས་ཁྲིམས་ཐག་ལོ་གསུམ་བཅད་པ་དང་འབྲེལ། ཁོ་རང་གི་ནང་མིའི་འཐབ་རྩོད་དང་འབྲེལ་བའི་སྐོར་ལ་བརྗོད་དོན། ཟླ་འདིའི་ཚེས་ ༣ ཉིན་རྔ་པ་རྫོང་རྨེའུ་རུ་མའི་རུ་ཆེན་གསུམ་པའི་དགེ་རིག་ཚང་གི་སྒྲོལ་མ་མཚོར་རྒྱ་གཞུང་གིས་མི་བསད་པའི་ནག་ཉེས་བཙུགས་ནས་ལོ་གསུམ་ལ་ཁྲིམས་ཐག་གཅོད་བྱེད་དོན་གཙོ་བོ། ༢༠༡༣ ལོའི་ཟླ་ ༡༢ ཚེས་ ༣ ཉིན་རྔ་པ་རྫོང་རྨེའུ་རུ་མའི་ཡུལ་ཚོ་གསེར་སྡེ་ནས་དཀོན་མཆོག་ཚེ་བརྟན་ལགས་ཀྱིས་རང་ལུས་མེར་བསྲེགས་གནང་སྐབས། སྒྲོལ་མ་མཚོས་ཁོང་གི་སྐུ་ཕུང་རླངས་འཁོར་ནང་དུ་འཇོག་རོགས་བྱས་པ་སོགས་ཀྱི་དོགས་གཞིའི་འོག་བཙན་བཟུང་བྱས་ནས་ཟླ་བ་བཅུ་གཅིག་ལ་བཀག་ཉར་འོག་ནས་གཅར་རྡུང་དང་མནར་གཅོད་སྣ་ཚོགས་མྱངས་དགོས་བྱུང་འདུག ཁོ་མོར་ཁྲིམས་ཐག་གཅོད་མཁན་རྣམས་ཀྱིས་མི་བསད་པའི་ནག་ཉེས་ཁས་ལེན་གཙང་མ་བྱས་ན། ཁྲིམས་ཐག་ཇེ་ཉུང་དང་མ་འོངས་པར་འགྲོ་འདུག་སྤྱོད་གསུམ་ཐད་ལ་སྟངས་འཛིན་བྱེད་ཕྱོགས་ཇེ་ལེགས་སུ་གཏོང་ངེས་ཡིན་སྐོར་ཟེར་སྐབས། ཁོ་མོས་ཁྲོམ་རྭ་རང་ནས་སྐད་ཤུགས་མཐོན་པོའི་སྒོ་ནས་ངས་དཀོན་མཆོག་ཚེ་བརྟན་ལགས་ ཀྱི་སྐུ་ཕུང་ལ་ལག་པ་འཆང་དུས་སྐུ་ལུས་མེར་སྲེག་བཏང་ནས་སྐུ་གྲོངས་ཟིན་འདུག སྐུ་ཕུང་རླངས་འཁོར་ནང་དུ་བཞག་པ་ལས་མི་བསད་པའི་ནག་ཉེས་སོགས་གཞན་གང་ཡང་བྱས་ མྱོང་མེད་ལ། སྐབས་དེར་ང་རང་གཅིག་པུ་མ་གཏོགས་གཞན་མི་སུ་ཡང་མེད། ཁྱོད་ཚོས་ང་ལ་ཟླ་བ་མང་པོའི་རིང་དབང་ཤེད་བཙན་པོས་ཁྲིམས་བཤེར་བཤད་པ་ལྟར་འགྱུར་བ་གང་ཡང་མེད་ཅེས་བཤད་འདུག ད་སྐབས་མོའི་ཁྱིམ་ཚང་ཤུལ་དུ་བཟའ་ཟླ་དབང་འདུས་ལགས་དང་བུ་མོ་ལོ་ ༡༢ ཡིན་པའི་ཚུལ་ཁྲིམས་སྒྲོལ་མ་གཉིས་ལྷག་ཡོད་ཅེས་བརྗོད་སོང་།
ཁོང་གིས་མུ་མཐུད་དུ། ༢༠༡༣ ཟླ་ ༡༢ ཚེས་ ༣ ཉིན་སྒྲོལ་མ་མཚོ་དང་མཉམ་དུ་རྔ་པ་རྫོང་རྨེའུ་རུ་མའི་ཡུལ་མི་ ༢༠ ལྷག་འཛིན་བཟུང་བྱས་ཏེ་ཉིན་གྲངས་བཅུ་དང་ཉི་ཤུའི་བར་ནས་ཁག་ཅིག་གློད་གྲོལ་བཏང་འདུག་ཀྱང་། དེའི་ནང་ནས་མི་བཅུ་ནག་ཉེས་ཆེ་ཤོས་ཅན་ལ་བརྩིས་ཏེ་ད་ལྟའི་བར་ཟླ་བ་བཅུ་གཅིག་གི་རིང་བཀག་ཉར་ཁང་ནས་གཅར་རྡུང་བཙོན་འཇུག་བྱས་འདུག་པའི་ཁོངས་ནས། ཟླ་འདིའི་ཚེས་ ༣ ཉིན་རྨེའུ་རུ་མའི་རུ་ཆེན་གཉིས་པའི་གོ་ཚེ་ཚང་གི་དཀོན་མེ་ལ་མི་བསད་པའི་ནག་ཉེས་གཡོགས་ཏེ་ལོ་གསུམ་གྱི་ཁྲིམས་ཐག་བཅད་པ་དང་། དེ་བཞིན་རྨེའུ་རུ་མའི་རུ་ཆེན་བཞི་བའི་མར་ལི་ཚང་གི་དགེ་འཕེལ་ལ་མི་བསད་པའི་ནག་ཉེས་བཙན་འགེལ་བྱས་ནས་ལོ་གཉིས་ཀྱི་ཁྲིམས་ཐག་བཅད་འདུག གཞན་ཡང་རྨེའུ་རུ་མའི་རུ་ཆེན་གཉིས་པའི་སྒྲོལ་མཚོ་ཚང་གི་ཡིན་ཞིང་རྔ་པ་ཀིརྟི་དགོན་པའི་གྲྭ་བསྟན་པ་དང་། ཡང་རྨེའུ་རུ་མའི་རུ་ཆེན་གཉིས་པའི་ཞི་ཆུང་ཚང་གི་ཡིན་པའི་རྔ་བ་ཀིརྟི་དགོན་ པའི་གྲྭ་བློ་བཟང་རྒྱ་མཚོ་གཉིས་ལ་ད་དུང་ཁྲིམས་ཐག་བཅད་མེད་པའི་རྒྱུ་མཚན་གང་ ཡང་གསལ་འདོན་བྱས་མི་འདུག གནས་ཚུལ་དེ་དང་འབྲེལ་བ་ཡོད་པའི་རྨེའུ་རུ་མ་ནས་ཡིན་པ་ཙམ་ལས་སེར་སྐྱ་སུ་ཡིན་ དང་མིང་། ཁྱིམ་ཚང་དང་རུ་སྡེ་སོགས་མི་ཤེས་པའི་མི་ལྔ་ད་དུང་བཙོན་འཇུག་བྱས་ཡོད་འདུག ཅེས་བརྗོད་སོང་།
ཁོས་མི་ཐོག་གསུམ་གྱི་གནས་བབ་སྐོར་ལ། ངའི་ཁྱིམ་ཚང་ནི་རྔ་པ་རྫོང་གི་འབྲོག་སྡེ་རྨེའུ་རུ་མའི་རུ་ཆེན་གསུམ་པའི་དགེ་ཚང་ཟེར་ཞིང་། ངའི་སྤོ་སྤོ་དགེ་པད་ལི་ལ་རྒྱ་གཞུང་གིས་ལོ་དགུའི་ཁྲིམས་ཐག་བཅད་ནས་བཙོན་ཁང་ དུ་གྲོངས་པ་དང་། རྨོ་རྨོ་བསོད་ནམས་སྐྱིད་ལའང་ནག་ཉེས་ཆེ་བའི་ཞྭ་མོ་ཅན་གོན་ནས་གཅར་རྡུང་དྲག་ པོའི་ཁྲོད་གྲོངས་ཡོད། དེ་བཞིན། ༡༩༩༨ ལོ་ཟླ་ ༣ ཚེས་ ༡༢ ཉིན་རྒྱ་གཞུང་གིས་རྒྱལ་གཅེས་ཆོས་གཅེས་ཟེར་བའི་ལས་འགུལ་སྤེལ་སྐབས་ངའི་ཨ་ཕ་དགེ་རིག་ལ་བོད་དོན་དང་འབྲེལ་བའི་ཡི་གེ་སྦྱར་འགྲེམས་བྱས་པའི་ཉེས་མིང་འོག་ཟླ་བ་གཅིག་ལྷག་རིང་གཅར་རྡུང་བཙོན་འཇུག་ཐེངས་དང་པོ་བྱས་ཡོད། ༢༠༠༨ ལོ་ཟླ་ ༣ ཚེས་ ༡༧ ཉིན་ཨ་ཕ་ལགས་ཀྱིས་བོད་ནང་གི་གནས་ཚུལ་ཕྱིར་བསྒྲགས་བྱས་པའི་ཉེས་མིང་འོག་བཙོན་འཇུག་གཅར་རྡུང་ཐེངས་གཉིས་པ་བྱས་ཡོད། ༢༠༡༡ ལོའི་ཟླ་ ༣ ཚེས་ ༡༩ ཉིན་རྔ་པ་ཀིརྟི་དགོན་གྱི་གྲྭ་བློ་བཟང་ཕུན་ཚོགས་ལགས་ཀྱིས་སྐུ་ལུས་མེར་བསྲེགས་བཏང་བའི་སྐོར་གྱི་གནས་ཚུལ་ཨ་ཕས་ཕྱིར་བསྒྲགས་བྱས་པའི་ཉེས་མིང་འོག་ལོ་གཅིག་རིང་གཅར་རྡུང་བཙོན་འཇུག་ཐེངས་གསུམ་པ་བྱས་ཡོད། སྐབས་དེར་ངའི་ཨ་མ་དོན་ཁོ་ལ་ཉིན་ཤས་རིང་གཅར་རྡུང་དང་བཀག་ཉར་བྱས་པ་མ་ཟད། ངའི་སྲིང་མོ་མེ་ཏོག་འཛིན་བཟུང་བཀག་ཉར་དང་གཅར་རྡུང་བྱས་ཏེ་ཀླད་པ་སྐྱོན་ཅན་བཟོས་ཡོད་སྟབས། ངའི་ནང་མིའི་ཉེ་འབྲེལ་གྱི་སྐྱ་སེར་མང་པོ་ཞིག་བྲོས་བྱོལ་དང་ཉེན་ཡོལ་དུ་འགྲོ་དགོས་པའི་དཀའ་ངལ་མང་པོ་བྱུང་ཡོད། དེ་དག་ནི་རྒྱ་གཞུང་གིས་ཁྱིམ་ཚང་གཅིག་ལ་བཟོས་པའི་མི་ཐོག་གསུམ་གྱི་རྨ་ཁ་ཡིན་ལ། ཁྱིམ་ཚང་གཅིག་གི་གནས་བབ་ཀྱིས་ས་ཁུལ་དེ་ལ་བྱུང་བའི་ཡ་ང་བའི་ལོ་རྒྱུས་མཚོན་ཐུབ་ཀྱི་ཡོད་ཅེས་སོགས་བརྗོད་སོང་།
ཚོགས་གཙོ་པ་སངས་ལགས་ཀྱིས་རྒྱ་ནག་གི་མགོ་ཁྲིད་ཞི་ཅིན་ཕིན་དང་རྒྱལ་སྤྱིའི་ཚོགས་སྡེ་ཁག་ལ་འབོད་སྐུལ་ཞུ་དོན། དགུ་བཅུ་གསུམ་ངོས་ནས་རྒྱ་ནག་སྲིད་འཛིན་ཞི་ཅིན་ཕིན་གྱིས་མགོ་འཁྲིད་པའི་ད་ལྟའི་རྒྱ་ནག་གཞུང་གི་དབང་འཛིན་པ་ཚོས་དུས་རྟག་བསྒྲགས་དང་སྒྲོག་བཞིན་པའི་སྤྱི་ཚོགས་བརྟན་ལྷིང་དང་། མི་རིགས་མཐུན་སྒྲིལ། ཉེ་ཆར་པེ་ཅིན་དུ་སྐོང་ཚོགས་བྱས་པའི་ཚང་འཛོམས་གྲོས་ཚོགས་ཐེངས་བཞི་པའི་ཐོག་གཏན་འཁེལ་བྱས་པའི་ཁྲིམས་སྐྱོང་རྒྱལ་ཁབ་ཅིག་འཛུགས་རྒྱུ་ཡིན་ལུགས་བརྗོད་པ་དག་ཁ་ཞེ་གཉིས་མཚུངས་ཤིག་གནང་འདོད་ཡོད་ཚེ། བོད་མི་ཉེས་མེད་ཉེས་བཀལ་བྱས་པའི་སྒྲོལ་མ་མཚོ་ལགས་དང་དཀོན་མེ་ལགས། དགེ་འཕེལ་ལགས་ཀྱིས་གཙོས་རྒྱ་ནག་སྲིད་གཞུང་གི་བཙོན་བཅུག་འོག་ཡོད་པའི་བོད་རིགས་ཆབ་སྲིད་བཙོན་པ་རྣམས་ཆ་རྐྱེན་གང་ཡང་མེད་པའི་སྒོ་ནས་འཕྲལ་དུ་ཀློད་གྲོལ་དང་ཁོང་ཚོར་འགྲོ་འདུག་སྤྱོད་གསུམ་གྱི་རང་དབང་ཆ་ཚང་སྤྲོད་དགོས་པའི་དགོས་འདུན་འདོན་གྱི་ཡོད་ལ། འཛམ་གླིང་གི་རྒྱལ་ཁབ་དང་འགྲོ་བ་མིའི་ཐོབ་ཐང་གི་ཚོགས་སྡེ་ཁག རྒྱ་ནག་དང་བོད་ནང་ཕེབས་འཆར་ཡོད་པའི་འཛམ་གླིང་མཉམ་འབྲེལ་རྒྱལ་ཚོགས་གཙོས་སྲིད་གཞུང་ཁག་གི་དཔོན་རིགས་སུ་ཞིག་ཡིན་རུང་ཉེས་མེད་བོད་མི་ཆབ་སྲིད་བཙོན་པ་རྣམས་ཀློད་གྲོལ་དང་། བོད་མི་ཚོ་ལའང་འགྲོ་འདུག་སྤྱོད་གསུམ་མཚོན་པའི་འགྲོ་བ་ཐོབ་ཐང་ཆ་ཚང་བ་ཞིག་སྤྲོད་དགོས་པའི་སྔོན་འགྲོའི་ཆ་རྐྱེན་གྱི་དགོས་འདུན་འདོན་དགོས་པའི་འབོད་སྐུལ་བསྐྱར་ནན་ཞུ་རྒྱུ་ཞེས་བརྗོད་སོང་།
གསར་འགོད་པ། ལྷ་སྐྱབས་རྒྱལ།
