གནམ་གཤིས་འགྱུར་ལྡོག་གི་ཞེད་སྣང་།

ཨོ་སི་ཊོ་ལི་ཡའི་འཛམ་གླིང་སྟོབས་ཆེན་རྒྱལ་ཁབ་ཉི་ཤུའི་ལྷན་ཚོགས་སྟེང་གོ་ལའི་ཚ་དྲོད་དང་འཇིགས་སྐུལ་དྲག་སྤྱོད་པ། དེ་བཞིན་ཨི་བྷོ་ལ་ནད་ཡམས་བཅས་ཀྱི་སྐོར་ལ་གྲོས་མོལ་བྱས་འདུག

ཟླ་འདིའི་ཚེས་ ༡༥ དང་ ༡༦ ཉིན་གཉིས་རིང་ཨོ་སི་ཊོ་ལི་ཡའི་བྷེར་སི་བྷན་(BRISBANE)གྲོང་ཁྱེར་ནང་འཛམ་གླིང་ཐོག་སྟོབས་ཆེན་རྒྱལ་ཁབ་ ༢༠ ཡི་བཞུགས་མོལ་ཚོགས་འདུ་ཚོགས་ཏེ། རྒྱལ་སྤྱིའི་དཔལ་འབྱོར་འཕེལ་ཚད་ཇེ་མགྱོགས་སུ་བཏང་སྟེ་མང་ཚོགས་ཀྱི་འཚོ་བའི་གནས་སྟངས་ཇེ་ལེགས་སུ་གཏོང་རྒྱུ། ཚོགས་མིའི་རྒྱལ་ཁབ་ཁག་གི་བར་ཚོང་ཁྲལ་ཇེ་ཡང་དུ་བཏང་སྟེ། ༢༠༡༨ ལོའི་ནང་ཚུད་དུ་ཚོགས་མིའི་རྒྱལ་ཁབ་ཁག་གི་ལོ་རེའི་ཡོང་འབབ་བརྒྱ་ཆ་ ༢ འཕར་ཐུབ་པ་བྱ་རྒྱུ། ༢༠༢༥ ལོའི་ནང་ཚུད་དུ་སྐྱེས་པ་དང་བུད་མེད་ལས་རིགས་ཁག་ནང་འཛུལ་བཞུགས་བྱེད་ཚད་ཀྱི་བར་ཁྱད་བརྒྱ་ཆ་ ༢༥ ཉུང་དུ་གཏོང་ཐུབ་བྱ་རྒྱུ། གཞོན་སྐྱེས་ལས་མེད་ཀྱི་དཀའ་ངལ་སེལ་རྒྱུ། ཟས་རིགས་ཐོན་སྐྱེད་བྱེད་ཤུགས་ཆེ་རུ་བཏང་སྟེ་དབུལ་ཕོངས་ཀྱི་དཀའ་ངལ་སེལ་རྒྱུ་སོགས་ལ་གྲོས་བསྡུར་གནང་ཡོད་འདུག

ཐེངས་འདིའི་ཚོགས་ཐོག་ཏུ་ཁ་ཆེ་འཇིགས་སྐུལ་དྲག་སྤྱོད་པར་གདོང་ལེན་བྱེད་ཕྱོགས་ལ་གོ་བསྡུར་གནང་ཡོད་པ་མ་ཟད། ཨ་རི་དང་འཇར་མན། ཧྥ་རན་སི་སོགས་ཀྱིས་གཅིག་རྗེས་གཉིས་མཐུད་དུ་ཡུའུ་ཁུ་རེན་གྱི་གནད་དོན་དང་འབྲེལ་ཏེ། ཨུ་རུ་སུའི་སྲིད་འཛིན་པུའུ་ཊིན་ལ་སྐྱོན་བརྗོད་ཤུགས་ཆེན་བྱས་ཡོད་འདུག དེ་མིན། འཛམ་གླིང་གནམ་གཤིས་འགྱུར་ལྡོག་གི་གནད་དོན་དང་ཨི་བྷོ་ལ་ནད་ཡམས་སོགས་ལ་གྲོས་བསྡུར་ཐག་གཅོད་བྱས་ཡོད་ཅིང་། ཉི་ཧོང་གཞུང་གིས་མཉམ་འབྲེལ་རྒྱལ་ཚོགས་སྔོ་ལྗང་ཁོར་ཡུག་སྲུང་སྐྱོབ་ཐེབས་རྩར་ཨ་སྒོར་ཐེར་འབུམ་ ༡།༥ དང་། ཨ་རིས་ཨ་སྒོར་ཐེར་འབུམ་ ༣། ཧྥ་རན་སི་དང་འཇར་མན་གཞུང་གིས་ཨ་སྒོར་ཐེར་འབུམ་ ༡ བཅས་ཀྱི་རོགས་དངུལ་སྤྲོད་རྒྱུའི་ཁས་ལེན་བྱས་ཏེ། གོ་ལའི་ཚ་དྲོད་ཇེ་ཆུང་དུ་གཏོང་ཐབས་ལ་མཉམ་རུབ་ཀྱི་ནུས་པ་འདོན་རྒྱུའི་ཐག་གཅོད་བྱས་ཡོད་འདུག

ལྷན་ཚོགས་ཀྱི་གསར་འགོད་གསལ་བསྒྲགས་ནང་། “ད་རེབ་ལྷན་ཚོགས་ཐོག་ཚོགས་མིའི་རྒྱལ་ཁབ་ཀྱི་མགོ་ཁྲིད་རྣམ་པས་གནམ་གཤིས་ཚ་དྲོད་འཕེལ་ཏེ་འཛམ་གླིང་ནང་དཀའ་ངལ་མང་དག་ཅིག་འཕྲད་བཞིན་ཡོད་པའི་སྐོར་ལ་གོ་བསྡུར་བྱས་ཡོད་སྟབས། མ་འོངས་པར་ང་ཚོས་མི་རྒྱུ་གཉིས་ཀྱི་འགྲོ་གྲོན་བཏང་ནས་གནམ་གཤིས་འགྱུར་ལྡོག་གྱི་དཀའ་ངལ་སེལ་ཐབས་བྱ་རྒྱུ་དང་། ཁོར་ཡུག་འབགས་བཙོག་བཟོ་མཁན་གྱི་རྒྱལ་ཁབ་ཁག་ལ་ཆད་པ་ནན་མོ་གཅོད་རྒྱུའི་ཐག་གཅོད་བྱས་ཡོད།”ཅེས་བརྗོད་འདུག

ཐེངས་འདིའི་ལྷན་ཚོགས་ཀྱི་མགྲོན་བདག་ཨོ་སི་ཊོ་ལི་ཡའི་སྲིད་བློན་ཀྲོ་ཎི་ (Tony Abbott) ཡིས། “ འཛམ་གླིང་གནམ་གཤིས་འགྱུར་ལྡོག་གི་དཀའ་ངལ་དེ་དོན་དངོས་ཤིག་ཡིན་སྟབས། གནད་དོན་འདི་སེལ་རྒྱུར་ཨང་དང་པོ་ཁོར་ཡུག་འབགས་བཙོག་བཟོ་མཁན་ཚོར་ཁ་གཏད་གཅོག་དགོས་པ་ཞིག་ཆགས་ཡོད། ང་ཚོས་དེ་ལྟར་ལས་དོན་བསྒྲུབ་ན་འཛམ་གླིང་དཔལ་འབྱོར་འཕེལ་ཚད་བརྟན་པོ་ཡོང་ཐུབ་པ་མ་ཟད། ཚོང་ལས་དང་མ་འཇོག་བྱེད་ཚད་ཀྱང་མང་དུ་འགྲོ་ངེས་ཡིན” ཞེས་སོགས་བརྗོད་འདུག

ཐེངས་འདིར་སྟོབས་ཆེན་རྒྱལ་ཁབ་ཉི་ཤུའི་ལྷན་ཚོགས་དང་བསྟུན་ཏེ། ཚེས་ ༡༥ ཉིན་ཨོ་སི་ཊོ་ལི་ཡར་ཡོད་པའི་བོད་པ་དང་བོད་དོན་རྒྱབ་སྐྱོར་བ། དེ་བཞིན་བོད་རང་བཙན་སློབ་ཕྲུག་ཚོགས་པ་བཅས་ཀྱིས་ལྷན་ཚོགས་ཚོགས་ཡུལ་གྱི་གཡས་གཡོན་དུ་བརྗོད་ཚིག་འདྲ་མིན་འཁོད་པའི་འཕྲེད་དར་བཟུང་སྟེ། རྒྱལ་སྤྱིའི་མགོ་ཁྲིད་ཚོས་ལྷན་ཚོགས་སུ་ཞི་ཅིན་ཕིན་ལ་བོད་དོན་གླེང་སློང་བྱ་དགོས་པའི་འབོད་སྐུལ་དང་། གཞུང་ལམ་ཐོག་ཉལ་ནས་ངོ་རྒོལ་སྐད་འབོད་ཤུགས་ཆེན་བྱས་ཡོད་པ་དང་། དེ་མིན་རྒྱ་གར་དྷ་རམ་ས་ལ་དང་རྒྱལ་ཁབ་གཞན་ནང་དུའང་བོད་པ་དང་བོད་དོན་རྒྱབ་སྐྱོར་བ་ཚོས་ལས་འགུལ་འདྲ་མིན་སྤེལ་ཡོད་འདུག

ད་རེབ་ལྷན་ཚོགས་ཐོག་མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་དྲུང་ཆེ་བྷན་ཁེ་མུན་མཆོག་གིས་རྒྱལ་སྤྱིའི་གནམ་གཤིས་འགྱུར་ལྡོག་ནི་ང་ཚོའི་དུས་སྐབས་ཀྱི་དཀའ་ངལ་ཆེ་ཤོས་ཤིག་ཆགས་ཡོད་སྟབས། ད་རེབ་ལྷན་ཚོགས་ཐོག་ཐག་གཅོད་ཡག་པོ་ཞིག་བྱ་དགོས་སྐོར་དང་། ཨ་རིའི་སྲིད་འཛིན་ཨོ་བྷ་མས་ཀྱང་ང་ཚོས་གོ་ལའི་ཚ་དྲོད་ལ་ཚོད་འཛིན་བྱེད་མ་ཐུབ་ཚེ་མ་འོངས་མི་རབས་གསར་པ་ཚོར་ཇི་ལྟར་རྩིས་སྤྲོད་བྱེད་དགོས་སམ་ཞེས་དོན་ནན་ཆེན་པོ་བརྗོད་ཡོད།

ཆབ་སྲིད་དབྱེ་ཞིབ་པ་ཚོས། དུས་རྒྱུན་ལྷན་ཚོགས་ག་རེ་ཚོགས་ཀྱང་དཔལ་འབྱོར་མཉམ་ལས་དང་ཚོང་འབྲེལ་སྐོར་སོགས་རྒྱལ་ཁབ་ཀྱི་ཁེ་ཕན་གཙོ་བོར་བྱས་ནས་གྲོས་ཆོད་འཇོག་གི་ཡོད་ཀྱང་། ད་རེབ་ལྷན་ཚོགས་ཐོག་རྒྱལ་སྤྱིའི་གནམ་གཤིས་འགྱུར་ལྡོག་སྐོར་ལ་གྲོས་ཆོད་བཞག་པ་དེ་ནི་སྔར་མེད་ཀྱི་གསར་གཏོད་ཅིག་ཆགས་ཡོད་སྐོར་བརྗོད་འདུག

འཛམ་གླིང་ཐོག་གི་སྟོབས་འབྱོར་ཆེ་ཤོས་གྲས་ཀྱི་རྒྱལ་ཁབ་ ༢༠ ཡི་ལྷན་ཚོགས་འདི་ནི། ༡༩༩༩ ལོར་དབུ་འཛུགས་བྱས་ཤིང་། དམིགས་ཡུལ་གཙོ་བོ་མཉམ་ལས་གོང་སྤེལ་དང་རྒྱལ་སྤྱིའི་དཀའ་ངལ་རིགས་སེལ་ཆེད་ཡིན་འདུག ད་རེབ་ལྷན་ཚོགས་ཐོག་ཨ་རི་དང་བྷར་ཛལ། རྒྱ་ནག་དང་ཧྥ་རན་སི། ཨིན་ཛུ་ནི་ཤི་ཡ་སོགས་ཀྱི་སྲིད་འཛིན་དང་། རྒྱ་གར་དང་ཨོ་སི་ཊི་ལི་ཡ། འཇར་མན་སོགས་ཀྱི་སྲིད་བློན། དེ་བཞིན་རྒྱལ་སྤྱིའི་ཚོགས་སྡེ་ཁག་གི་སྐུ་ཚབ་དང་གསར་འགོད་པ་བཅས་མི་ ༦༠༠༠ ལྷག་འཛོམས་ཡོད་འདུག