དབུལ་ཕོངས་ང་ཚོ་སོ་སོའི་རྐང་པའི་སྟེང་ལངས་ཐུབ་པ་ཞིག་བཟོས་པ་ཐུཊ་རྗེ་ཆེ།

གཏོང་ལེན་དགེ་རྩ་ཚོགས་པ་དབུ་འཛུགས་གནང་ནས་ལོ་ ༡༠ འཁོར་བའི་མཛད་སྒོའི་སྟེང་། བཀའ་བློན་ཁྲི་ཟུར་ཟམ་གདོང་རིན་པོ་མཆོག་གིས་སློབ་ཕྲུག་ཚོས་མི་ཚེ་སྐྱིད་པོ་སྐྱེལ་པ་ལ་གཟུགས་པོ་བདེ་བོ་དང་བསམ་བློ་ཡག་པོ། འཚོ་ཐབས་ཡང་དག ནང་མིའི་མཐུན་སྒྲིག་བཅས་ཡོད་པའི་སྒང་ལ་ནང་དོན་རིག་པར་ཉམས་ལེན་བྱས་ན་ཚེ་འདི་ཕྱི་གཉིས་ཀ་དོན་དང་ལྡན་པ་ཡོང་གི་རེད་ཅེས་གསུངས་སོང་།

དེ་རིང་སྔ་དྲོའི་ཆུ་ཚོད་ ༡༡ སྟེང་སཱ་ར་མཐོ་སློབ་ཉེ་འཁྲིས་སུ་རྟེན་གཞི་བྱས་པའི་གཏོང་ལེན་དགེ་རྩ་ཚོགས་པའི་མདུན་ཐང་དུ། དགེ་རྩ་ཚོགས་པ་དབུས་བརྙེས་ཏེ་ ༡༠ འཁོར་བའི་དུས་དྲན་མཛད་སྒོ་ཚོགས་སོང་། སྐུ་མགྲོན་གཙོ་བོར་བཀའ་བློན་ཁྲི་ཟུར་ཟམ་གདོང་རིན་པོ་མཆོག་གཙོས། རྒྱ་གར་སྤྱི་ཚོགས་ལས་འགུལ་པ་དགེ་རྒན་ཆེན་མོ་སྐུ་ཞབས་ཨཱ་ཇེད་ (Ajay Shrivastava)ལགས་དང་དབྱིན་ཡུལ་གྱི་གཏོང་ལེན་དགེ་རྩ་ཚོགས་པའི་འགན་འཛིན་ཨན་ནཱ་ (Anna Owen) ལགས། གཞན། ཕྱི་རྒྱལ་ཁབ་ཁག་ནས་ཕེབས་པའི་སྦྱིན་བདག་རྣམ་པ་དང་དྷ་རམ་ས་ལ་ཁུལ་གྱི་རྒྱ་གར་དང་བོད་པའི་གཞུང་འབྲེལ་མིན་པའི་ཚོགས་པ་དང་སློབ་གྲྭ་ཁག་གི་འགན་འཛིན། དགེ་རྩ་ཚོགས་པའི་འགན་འཛིན་དང་ལས་བྱེད་བཅས་ཁྱོན་མི་ ༢༠༠ ལྷག་འཛོམས་སོང་།

མཛད་སྒོའི་སྔོན་དུ་སྐུ་མགྲོན་གཙོ་བོ་མཆོག་གིས་དགེ་རྩ་ཚོགས་པའི་ཚོགས་ཁང་དང་ཉལ་ཁང་། ལས་ཁུངས་བཅས་སུ་གཟིགས་སྐོར་གནང་བ་དང་འབྲེལ། དེ་གའི་སློབ་མ་ནེ་ཤ་ (Nisha) ཡིས་ཁྲི་ཟུར་མཆོག་ལ་ཤེས་ཡོན་དང་རིགས་རུས་དབྱེ་འབྱེད་བཅས་ཀྱི་སྐོར་ལ་དྲི་བ་བཏོན་རྗེས་མཛད་སྒོ་ཐོག་ཕེབས་ནས་དུས་དྲན་དངོས་སུ་མགོ་འཛུགས་གནང་སོང་། སྐབས་དེར་མདོ་འཛིན་སློབ་མ་ནེ་ཤ་ལགས་ཀྱིས་ངོ་སྤྲོད་གནང་དོན། ༢༠༠༤ ལོར་ང་ཚོ་ཉམ་ཐག་བྱིས་པ་ཚོའི་མི་ཚེའི་ནང་བོད་རིགས་གྲྭ་བ་བློ་བཟང་འཇམ་དབྱངས་ལགས་བསླེབས་ཏེ། དྷ་རམ་ས་ལའི་གཡས་གཡོན་གྱི་འགྱིག་གུར་ནང་སྡོད་པའི་དབུལ་གྲོང་ཚོ་དང་བྱིས་པ་ཚོའི་འབྱུང་འགྱུར་གྱི་མི་ཚེའི་ཆེད་དུ་ཤེས་ཡོན་དང་འཕྲོད་བསྟེན། དཔལ་འབྱོར་བཅས་ཀྱི་རོགས་སྐྱོར་གནང་སྟེ། ད་ཆར་རྒྱ་གར་གྱི་མཐོ་སློབ་ཁག་ནང་སྐྱོད་ཐུབ་པ་དང་སྤྱི་ཚོགས་ཀྱི་ལས་སྒོ་འདྲ་མིན་ལ་ཞུགས་ཐུབ་པ། རང་གི་རྐང་པའི་སྒང་ལངས་ཐུབ་མཁན་ཞིག་བཟོས་བར་ཐུགས་རྗེས་ཞུ་རྒྱུ་ཡིན། ལྷག་པར་དུ་གཏོང་ལེན་དགེ་རྩ་ཚོགས་པའི་ཁྱིམ་ཚང་ལ་སྔ་ཕྱི་བར་གསུམ་དུ་སྦྱིན་བདག་གནང་མཁན་རྣམ་པ་ཐུགས་རྗེ་ཆེ། གཏོང་ལེན་དགེ་རྩ་ཚོགས་པས་མུ་མཐུད་དེ་དབུལ་གྲོང་ཁག་ནང་བྱིས་པར་ངལ་རྩོལ་བསྒྱུར་བཀོད་དང་བྱིས་པར་ཆང་ས་རྒྱག་འཇུག་པ། བུད་མེད་ལ་གཅར་རྡུང་ཉེས་བཅོས་བྱེད་པ་སོགས་ཀྱི་གནས་ཚུལ་ཁག་གི་ཐོག་གོ་རྟོགས་སྤེལ་བཞིན་ཡོད། ཅེས་སོགས་བརྗོད་སོང་།

དེ་རྗེས་སྐུ་མགྲོན་གཙོ་བོ་མཆོག་གཙོས་སྤྱི་ཚོགས་ལས་འགུལ་པ་སྐུ་ཞབས་ཨཱ་ཇེད་ལགས་དང་སྐུ་ཞབས་ཨན་ནཱ་ (Anna Owen) ལགས་བཅས་ཀྱིས། ༧གོང་ས་མཆོག་དང་སྐྱེས་མཆོག་དམ་པ་གྷན་དྷི་མཆོག་གཉིས་ཀྱི་སྐུ་འདྲའི་མདུན་དུ་སྣང་སེལ་སྒྲོན་མེ་ཞལ་འབྱེད་གནང་སྟེ། དགེ་རྩ་ཚོགས་པའི་གསོ་སྐྱོང་འོག་པའི་སློབ་མ་ཚོས་༧གོང་ས་མཆོག་ལ་བསྟོད་གཞས་དང་། རྒྱ་གར་གྱི་སྲོལ་རྒྱུན་གླུ་གཞས་དང་ཞབས་བྲོ། གཏམ་བརྗོད་བཅས་ཀྱི་འཁྲབ་སྟོན་གནང་སོང་།

སློབ་ཕྲུག་ཚོའི་མི་ཚེའི་སྐྱེལ་སྟངས་སྐོར་ལ་ཁྲི་ཟུར་ཟམ་གདོང་རིན་པོ་མཆོག་གིས་གསུང་བཤད་གནང་དོན། སློབ་ཕྲུག་ཚོའི་མི་ཚེ་སྐྱིད་པོ་ཞིག་བསྐྱེལ་དགོས་ན་ཆ་རྐྱེན་བཞི་ཚང་དགོས་ཀྱི་ཡོད། དང་པོ། གཟུགས་པོ་བདེ་ཐང་ཡིན་དགོས། དེ་ཡང་དང་པོ་ཟ་སྟངས་འཐུང་སྟངས་འགྲོ་སྟངས་གསུམ་ལ་རག་ལས་ཡོད། གཟུགས་པོ་བདེ་བོ་ཡིན་ན་མི་ཚེ་གང་བོར་ཡག་པོ་ཡོང་གི་ཡོད་ཀྱང་། གཟུགས་པོ་བདེ་བོ་མེད་ན་ཡོན་ཏན་ག་ཚོད་ཡོད་ཀྱང་མི་ཚེ་ཡག་པོ་ཡོང་གི་མ་རེད། གཉིས་པ། གཟུགས་པོ་བདེ་བོ་ཙམ་མ་ཟད་བསམ་བློ་ཡག་པོ་ཞིག་དགོས་ཀྱི་ཡོད། བསམ་བློ་རིག་པའི་རྗེས་འབྲང་བྱས་ཏེ་རང་རང་སོ་སོས་བརྟག་དཔྱད་བྱས་ཏེ་ངེས་ཤེས་སྐྱེ་པ་ཞིག་དགོས། སངས་རྒྱས་ཀྱིས་དགེ་སློང་ཚོར་སངས་རྒྱས་ཀྱིས་གསུང་བ་རེད་ཟེར་ནས་བཞག་པ་མ་ཡིན་པར་ཁྱེད་རང་ཚོས་བརྟག་དཔྱད་བྱོས་གསུངས་ཡོད་སྟབས། བསམ་བློ་རིག་པའི་རྗེས་འབྲང་བྱས་ཏེ་རང་རང་སོ་སོས་བླང་དོར་མ་ནོར་བར་འབྱེད་ཤེས་དགོས་ཀྱི་ཡོད། གསུམ་པ། སོ་སོའི་འཚོ་ཐབས་ཡང་དག་པ་ཞིག་དགོས་ཀྱི་ཡོད། འཚོ་ཐབས་འཚེ་བ་དང་མི་གཞན་ལ་བཤུ་གཞོག་བྱས་པ་སོགས་ལས་བྱུང་བ་མ་ཡིན་པར། འཚོ་ཐབས་རང་ཉིད་ཀྱི་དགོས་མཁོ་དང་འཚམ་པ་ཞིག་དགོས་པ་གལ་ཆེན་པོ་རེད། བཞི་པ། ནང་མི་མཐུན་སྒྲིལ་དགོས་ཀྱི་ཡོད། རྒན་པ་ཚོར་གུས་ཞབས་དང་ཆུང་བ་ཚོར་བྱམས་སྐྱོང་། མཉམ་པ་ཚོར་མཉམ་གཤིབ་ཡག་པོ་དགོས་ཀྱི་ཡོད། ནང་མི་ཡག་པོ་ཞིག་བྱུང་ཚེ་སྤྱི་ཚོགས་ཡག་པོ་ཡོང་གི་ཡོད། དེ་ཚོ་བྱུང་བ་ཡིན་ན་མི་ཚེའི་གཅིག་གི་མདུན་ལམ་འགྲིག་པ་དང་མི་ཚེ་སྐྱིད་པོ་སྐྱེལ་ཐུབ་ཀྱིན་ཡོད། ཡིན་ནའང་དེ་ཙམ་གྱིས་མི་ཚེ་དོན་དང་ལྡན་པ་ཞིག་ཆགས་ཀྱི་ཡོད་པ་མ་རེད། མི་ཚེ་དོན་དང་ལྡན་པ་ཞིག་ཆགས་པར་གོང་གི་བཞི་བོའི་སྒང་ལ་ནང་དོན་རིག་པའི་ཐོག་ལ་ཉམས་ལེན་བྱེད་དགོས་པ་རེད། ཆོས་ལུགས་ག་རེ་ཡིན་ནའང་འགྲིག་གི་རེད། ནང་དོན་རིག་པ་ཉམས་ལེན་བྱས་ཚེ་འདི་ཕྱི་གཉིས་ཀ་དོན་དང་ལྡན་པ་ཞིག་ཡོང་གི་རེད། ཅེས་གསུངས་སོང་།

ཁོང་གིས་མུ་མཐུད་དུ། གྲྭ་བ་འཇམ་དབྱངས་ལགས་མི་གཅིག་གིས་དཀའ་ལས་བརྒྱབ་ནས་རྒྱ་གར་གྱི་གནས་སྟངས་སྐྱོ་བོ་འོག་ཡོད་པའི་བྱིས་པ་མང་པོའི་མི་ཚེའི་མདུན་ལམ་ཡག་པོ་བཟོ་ཐུབ་པ་དེ་དངོས་གནས་དྲང་གནས་ཆོས་ཀྱི་ཉམས་ལེན་མཐོང་རྒྱུ་ཡོད་དང་། དེ་ཡང་གཏོང་ལེན་ཟེར་བ་བདག་གཞན་སྙིང་རྗེ་ཉམས་ལེན་བྱེད་སྐབས་གལ་ཆེན་པོ་ཆགས་ཀྱི་ཡོད་སྟབས། ངས་བསྔགས་བརྗོད་དང་རྗེས་སུ་ཡི་རངས་བྱེད་ཀྱིན་ཡོད་ཅེས་སོགས་གསུངས་སོང་།

མཇུག་ཏུ་འགན་འཛིན་བློ་བཟང་འཇམ་དབྱངས་ལགས་ཀྱིས་བརྗོད་དོན། གཏོང་ལེན་དགེ་རྩ་ཚོགས་པ་བཙུགས་ནས་ལོ་བཅུ་ཕྱིན་པའི་རིང་གྲུབ་འབྲས་གང་འཚམ་ཐོན་པར་དགའ་ཚོར་བྱེད་ཀྱི་ཡོད། གཏོང་ལེན་གྱི་དམིགས་ཡུལ་གཙོ་བོ་དྷ་རམ་ས་ལའི་གཡས་གཡོན་གྱི་རྒྱ་གར་ཉམ་ཐག་སྐྱོ་བོའི་རིགས་ལ་ཤེས་ཡོན་དང་འཕྲོད་བསྟེན་ཐོག་རོགས་རམ་བྱེད་རྒྱུ་དེ་ཡིན་སྟབས། ད་ལྟའི་བར་ང་ཚོས་བྱིས་པ་ ༢༥༠ ཙམ་ལ་ཤེས་ཡོན་གྱི་མཐུན་སྦྱོར་གནང་སྟེ། སློབ་མ་དྷེ་པཱ་ (Deepak) ཡིས་ཧི་མ་ཅལ་མངའ་སྡེ་འཕྲུལ་ལས་མཐོ་སློབ་ནང་གློག་ཀླད་ཚན་རིག་སློབ་སྦྱོང་བྱེད་ཀྱིན་ཡོད་ལ། དེ་མིན་སློབ་མ་གཉིས་ཀྱིས་བཟོ་ལས་འཆར་འགོད་དང་སྨན་པར་ཡིག་རྒྱུགས་གཏོང་རྒྱུར་གྲ་སྒྲིག་བྱེད་ཀྱིན་ཡོད། གཞན་ང་ཚོས་རྒྱ་གར་ཉམ་ཐག་མི་ ༣༨༠༠ ལྷག་ལ་འཕྲོད་བསྟེན་རོགས་སྐྱོར་བྱས་ཡོད། ང་ཚོ་བོད་པ་ཞིག་ཡིན་པའི་ངོས་ནས་རྒྱ་གར་གཞུང་དང་མི་མང་གཉིས་ཀར་བཀའ་དྲིན་ཆེན་པོ་ཡིན་པ་ཁ་ཞེ་གཉིས་མེད་ཀྱིས་ཐུགས་རྗེ་ལེགས་གསོལ་ཞུ་བཞིན་ཡོད་པ་མཚོན་གྱི་ཡོད། ཞེས་བརྗོད་སོང་།

ཐེངས་འདིར་གཏོང་ལེན་དགེ་རྩ་ཚོགས་པས་༧གོང་ས་མཆོག་གིས་འཛམ་གླིང་ཞི་བདེ་དང་འགྲོ་བ་མིའི་བདེ་སྡུག བྱམས་སྙིང་རྗེ་ཐད་ལ་ཞབས་འདེགས་གནང་དང་གནང་མུས་ཡོད་པ་དང་། དེ་བཞིན་སྐུ་ཞབས་ཨཱ་ཇེད་ལགས་དང་ལྕམ་གྷ་རེ་ཐི་ (Gareth Owen) ལགས་བཅས་ཀྱིས་འགྲོ་བ་མིའི་བདེ་རྩའི་ཐོག་མི་ཚེ་གང་བོ་ཕྱག་ལས་གནང་བཅས་ལ་བསྔགས་བརྗོད་ཆེད་གཟེངས་རྟགས་རེ་རེ་བཅས་ཕུལ་སོང་།

གསར་འགོད་པ། ལྷ་སྐྱབས་རྒྱལ།