བོད་དོན་ལ་རང་ལུས་མེར་བསྲེགས་གནང་རྗེས་རྒྱ་གཞུང་གིས་འཛིན་བཟུང་བྱས་པའི་འབོ་ར་བརྡར་མདོ་སྡེ་བའི་གཟུངས་འདུས་སྐྱབས་ལགས་ཟླ་སྔོན་མའི་ནང་བཙོན་གྲོལ་བཏང་སྟེ་རང་ཁྱིམ་དུ་འབྱོར་སྐབས་རྐང་པ་གཉིས་བཅད་ཡོད་འདུག
དེ་རིང་རྒྱ་གར་ནང་གནས་སྡོད་ཚུལ་ཁྲིམས་ལགས་ཀྱིས་འདི་གར་གནས་ཚུལ་ཁོ་སྤྲོད་གནང་བ་ལྟར་ན། ༢༠༡༢ ཟླ་ ༡༢ ཚེས་ ༠༢ ཉིན། མདོ་སྨད་བླ་བྲང་འབོ་ར་དགོན་པའི་ཉེ་འགྲམ་གྱི་ལམ་ཆེན་ཨང་ ༢༡༣ པའི་སྟེང་། འབོ་ར་བརྡར་མདོ་སྡེ་བའི་གཟུངས་འདུས་སྐྱབས་ལགས་ཀྱིས་རྒྱ་ནག་གཞུང་ལ་ངོ་རྒོལ་གནང་སྟེ་རང་ལུས་མེར་བསྲེགས་གནང་ཡོད་པ་དང་། སྐབས་དེར་སྐུ་གྲོངས་མེད་པར་རྒྱ་དམག་གིས་བཙན་འཕྲོག་བྱས་ཏེ་འཁྱེར་ཡོད་ཅིང་། རྗེས་སུ་ཁོང་ལ་སྨན་ཁང་དུ་སྨན་བཅོས་བྱེད་བཞིན་པའི་སྐབས་སུ་རྒྱ་གཞུང་གིས་ནང་མི་ཚོ་སྐད་བཏང་སྟེ། ཁོ་རང་གི་རྐང་པ་གཉིས་གཏུབ་དགོས་ཚུལ་བརྗོད་པར་ཕ་མ་གཉིས་ཀྱིས་མོས་མཐུན་བྱས་མེད་ཀྱང་། ཟླ་སྔོན་མའི་ཚེས་ ༢༣ ཉིན་གྱི་མཚན་མོའི་བོད་ནང་གི་ཆུ་ཚོད་ ༡༠།༣༠ ཙམ་ལ། རྒྱ་གཞུང་གིས་ཁོ་ཕྱིར་རང་ཁྱིམ་དུ་བསྐྱལ་སྐབས་རྐང་པ་གཉིས་ཀ་གཏུབས་ཡོད་འདུག
གནས་ཚུལ་མཁོ་སྤྲོད་པས་བརྗོད་པ་ལྟར་ན། རྒྱལ་གཅེས་དཔའ་བོ་གཟུངས་འདུས་སྐྱབས་ལགས་ཀྱིས་རང་ལུས་མེར་བསྲེགས་གནང་རྗེས། རྒྱ་དམག་གིས་བཙན་འཕྲོག་བྱས་ཡོད་པ་དང་། རྗེས་སུ་ལན་ཀྲུག་སྨན་ཁང་ཞིག་ཏུ་སྨན་བཅོས་བྱས་ཏེ་ཟླ་འགའི་རྗེས་ནང་མིར་སྐད་བཏང་སྟེ། ཁོང་གི་ཕ་མ་གཉིས་ལྟ་རུ་ཕྱིན་སྐབས། སྨན་ཁང་གིས་གཟུངས་འདུས་སྐྱབས་ཀྱི་རྐང་པ་གཉིས་ཀ་གཏུབ་དགོས་པ་དང་། གལ་སྲིད་མ་གཏུབ་ཚེ་ཁོའི་སྲོག་ལ་ཉེན་ཁ་ཡོད་ཚུལ་སོགས་བརྗོད་ཡོད་འདུག སྐབས་དེར་ཕ་མ་གཉིས་ཀྱི་མཐོང་ཚུལ་ལ་རྐང་པ་ཡ་གཅིག་མེར་འཚིག་པ་ཚབ་ཆེ་ཡང་། རྐང་པ་གཞན་དེར་སྐྱོན་ཆེན་པོ་མེད་སྟབས། ཕ་མ་གཉིས་ཀྱིས་གལ་སྲིད་ཁོའི་ཚེ་སྲོག་ལ་ཉེན་ཁ་ཡོད་པ་དེ་འདྲའི་གནས་སྟངས་ཚབས་ཆེན་ཡིན་པ་བདེན་ན། རྐང་པ་ཡ་གཅིག་གཏུབ་ཆོག་ཀྱང་། རྐང་པ་གཉིས་ཀ་གཏུབ་དགོས་ཚེ་ནང་མི་ཚོར་གྲོས་བྱེད་དགོས་ཚུལ་བརྗོད་ཡོད་འདུག འོན་ཀྱང་སྨན་ཁང་གི་འབྲེལ་ཡོད་མི་སྣས། རྨས་མའི་ཕ་མ་ཁྱོད་རང་གཉིས་རེད། ཁྱོད་གཉིས་ལས་ཐག་གཅོད་མཁན་གཞན་ཞིག་ཡོད་པ་མ་རེད། ཅེས་ཕ་མ་གཉིས་ཀྱི་སྐད་ཆ་དེར་ཉན་འཇོག་མི་བྱེད་པར། རྨས་མའི་རྐང་པ་གཏུབ་རྒྱུ་ཡིན་པ་དང་། དེར་ཕ་མ་གཉིས་ལ་ཆོག་མཆན་ཞུས་ཚར་ཡོད་པའི་རྣམ་འགྱུར་བསྟན་ཡོད་འདུག
དུས་དེ་ནས་བཟུང་རྒྱུན་རིང་པོ་ཞིག་ལ་ཁོང་གི་གནས་སྟངས་གང་ཡང་མ་ཤེས་པར་ལྷག་ཡོད་པ་དང་། ད་ལོའི་ལོ་མགོ་ཙམ་ལ་གཟུངས་འདུས་སྐྱབས་བླ་བྲང་བསང་ཆུ་རྫོང་གི་ལྟ་སྲུང་ཁང་དུ་བསྐྱལ་ཡོད་པ་ཐོས་ཏེ། ཁོང་གི་ནང་མི་ཚོས་ཟ་མ་དང་ཉལ་ཆས་འཁྱེར་ནས་ལྟ་རུ་ཕྱིན་སྐབས། རྒྱ་གཞུང་གིས་ཁོ་ལ་ཐུག་འཕྲད་བྱེད་བཅུག་མེད་པ་མ་ཟད། ད་དུང་གཟུངས་འདུས་སྐྱབས་བསང་ཆུ་རྫོང་གི་ལྟ་སྲུང་ཁང་དུ་ཡོད་པ་གསང་བ་བྱེད་དགོས་ཚུལ་དང་། གལ་སྲིད་མི་གཞན་གྱིས་ཤེས་རྟོགས་བྱུང་ཚེ་དེའི་འགན་ནང་མི་ཚོས་འཁྱེར་དགོས་སྐོར་སོགས་ཀྱི་འཇིགས་སྐུལ་བྱས་ཡོད་འདུག
གནས་ཚུལ་ཁོ་སྤྲོད་པས་བརྗོད་དོན། “གཟུངས་འདུས་སྐྱབས་བཙོན་གྲོལ་ཐོབ་སྟེ་ཟླ་གཅིག་ཙམ་འགྲོ་བཞིན་ཡོད་ཀྱང་། ད་བར་གནས་ཚུལ་ཕྱི་ལོགས་སུ་གྱར་ཐུབ་མེད་ཅིང་། ང་རང་གིས་གཟུངས་འདུས་སྐྱབས་ཀྱི་པར་ཞིག་རག་ཐབས་ལ་འབད་བརྩོན་མང་པོ་བྱས་ཀྱང་། ད་བར་པར་གཅིག་ཀྱང་མ་རག་པ་མ་ཟད། ཁོའི་སྐོར་གྱི་གནས་ཚུལ་ཡང་ཞིབ་ཚགས་ཤིག་རག་ཐུབ་མ་སོང་། ང་རང་གིས་ཚོད་དཔག་བྱས་ན། རྒྱ་གཞུང་གིས་ཁོང་དང་ཁོང་གི་ནང་མིར་ལྟ་རྟོག་ནན་མོ་བྱས་ཡོད་པ་མ་ཟད། ཕ་མ་གཉེན་འབྲེལ་ཚོར་ཡང་གནས་ཚུལ་དེའི་སྐོར་ཕྱི་གྱར་མི་ཆོག་པའི་འཇིགས་སྐུལ་དྲག་པོ་བྱེད་ཀྱིན་ཡོད་པ་ཤེས་ཐུབ་ཀྱི་འདུག” ཅེས་སོགས་བརྗོད་སོང་།
གཟུངས་འདུས་སྐྱབས་ལགས་ཀྱིས་ཐོག་མ་ ༢༠༡༢ ལོར་རང་ལུས་མེར་བསྲེགས་གནང་རྗེས། སྐབས་དེའི་གསར་འགྱུར་ཁག་གི་ནང་དེའི་སྐོར་གྱི་གནས་ཚུལ་བཀོད་པའི་ནང་། “རྒྱལ་གཅེས་དཔའ་བོ་གཟུངས་འདུས་སྐྱབས་ལགས་ཀྱི་ཨ་ཕའི་མིང་ལ་ཚེ་བྷ་དང་ཨ་མའི་མིང་ལ་བན་ཏེ་མཚོ། གཟའ་ཟླའི་མིང་ལ་གདུགས་དཀར་སྐྱིད། ཁོང་གཟའ་མི་གཉིས་ལ་ཕྲུ་གུ་ལོ་གཉིས་མ་ཟིན་ཙམ་ཞིག་ཡོད་པའི་མིང་ལ་སྐལ་བཟང་ཚེ་རིང་བཅས་ཞུ་བཞིན་ཡོད་འདུག” ཞེས་སོགས་འཁོད་འདུག
རང་ལུས་མེར་བསྲེགས་བཏང་སྟེ་སྐུ་མ་གྲོངས་བར་རྒྱ་ནག་ཏུ་ཤོར་བ་རྣམས་ལས་གཟུངས་འདུས་སྐྱབས་ལགས་ནི། རྒྱའི་བཙོན་འོག་ནས་ཕྱིར་རང་ཁྱིམ་དུ་ལོག་པའི་རྒྱལ་གཅེས་དཔའ་བོ་ཐོག་མ་ཟེར་ན་འདྲ། གང་ལྟར་བོད་བསྟན་དོན་ལ་རང་ལུས་མེར་བསྲེགས་གནང་མཁན་འཚོ་བཞུགས་གནང་མཁན་དག་གི་ཁྲོད་ནས་ཁོ་རང་ཡོངས་ཁྱབ་ཀྱིས་གནས་ཚུལ་གསལ་བོ་བྱུང་བ་དང་པོ་དེ་རེད། གཞན་པ་རང་ལུས་མེར་བསྲེགས་གནང་མཁན་སྐུ་གྲོངས་མེད་མཁན་མང་པོ་ཞིག་ཡོད་པ་དག་གི་གནས་སྟངས་གང་འདྲ་ཆགས་ཡོད་མེད་རྩད་གཅོད་གནང་དགོས་པ་ཧ་ཅང་གལ་ཅེན་པོ་རེད་བམས་གྱི་འདུག