དམིགས་བསལ་ཚོགས་ཆེན་གྱི་སྙན་ཐོ་ལྟར་བཀའ་ཤག་གིས་བཙན་བྱོལ་བོད་མིའི་སྤྱི་ཚོགས་ནང་གི་ཕྲུ་གུ་གསུམ་ཡན་ཡོད་མཁན་ཚོའི་འཕྲོད་བསྟེན་དང་སློབ་ཡོན་ཐད་དམིགས་བསལ་ལྟ་སྐྱོང་བྱེད་རྒྱུ་ཡིན་པའི་གསལ་བསྒྲགས་སྤེལ་བ་ལྟར། ད་འཆར་ལས་འཆར་དེ་འགྲོ་བཞིན་ཡོད་ཀྱང་སྲིད་བྱུས་ཁ་གསལ་མིན་ཐོག་དཀའ་ངལ་ཏོག་ཙམ་རེ་འཕྲད་བཞིན་ཡོད་འདུག
དྷ་རམ་ས་ལའི་ ༢༠༡༢ ལོའི་དམིགས་བསལ་ཚོགས་ཆེན་ཐེངས་གཉིས་པའི་སྟེང་། “བོད་མི་རིགས་ཀྱི་འཐབ་རྩོད་ལ་འཕྲལ་ཕུགས་གང་ཐད་ནས་མི་འབོར་ཉུང་བའི་དཀའ་ངལ་དངོས་ཡོད་ལ་བརྟེན། ཕྲུ་གུ་མང་པོ་སྐྱེད་གསོ་བྱེད་དགོས་པ་དང་། ཕྲུ་གུ་གསུམ་པ་ཡན་ཡོད་པ་རྣམས་ལ་གཞུང་ངོས་ནས་དམིགས་བསལ་ལྟ་སྐྱོང་དགོས།” ཞེས་གྲོས་ཆོད་བཞག་པ་ལྟར། བཀའ་ཤག་གིས་བཙན་བྱོལ་བོད་མིའི་སྤྱི་ཚོགས་ཁྲོད་ཀྱི་ཕྲུ་གུ་གསུམ་ཡན་ཡོད་མཁན་ཚོར་སློབ་ཡོན་དང་འཕྲོད་བསྟེན་ཐོག་དམིགས་བསལ་ལྟ་སྐྱོང་གནང་རྒྱུའི་སྲིད་བྱུས་དོན་ཚན་ ༥ ཅན་ཞིག་གཏན་འབེབས་གནང་སྟེ། ད་ལོའི་ཕྱི་ཟླ་ ༦ ཚེས་ ༢༦ ཉིན་ས་གནས་གཞིས་ཆགས་ཁག་ལ་བཀོལ་ཁྱབ་བཏང་སྟེ། ད་ལོའི་ཕྱི་ཟླ་ ༧ ཚེས་ ༡ ཉིན་ནས་རྩ་འཛིན་ལག་བསྟར་བྱེད་དགོས་སྐོར་བསྒྲགས་ཡོད།
ཉེ་ཆར་གསར་འགོད་པ་སླར་ཡང་ཤེས་རིག་ལས་ཁུངས་སུ་བཅར་ཏེ། འབྲེལ་ཡོད་ལས་བྱེད་ཟུང་དྲུང་འཆི་མེད་ཚེ་དབྱངས་ལགས་སུ་བཅར་འདྲི་ཞུས་པར། ཁོང་མོས། བཀའ་ཤག་གི་བཀོད་ཁྱབ་དེ་འབྱོར་རྗེས་ང་ཚོས་ས་གནས་གཞིས་ཆགས་ཁག་ཏུ་ཕྲུ་གུ་གསུམ་ཡན་ཡོད་མཁན་ཚོའི་ཐོ་ཞིག་བསྡུས་ཏེ་ད་ལོའི་ཟླ་ ༡༠ ཚེས་ ༣༠ ཉིན་སྔོན་ལ་ཚུར་ཤེས་རིག་ལས་ཁུངས་ལ་སྤྲོད་དགོས་པའི་གསལ་བསྒྲགས་བཏང་བ་རེད། རྒྱ་བལ་འབྲུག་གསུམ་ནང་གི་བོད་མིའི་སྡོད་སྒར་ཁག་ ༤༦ ཡོད་པ་ལས་ད་ཆར་ས་གནས་ ༡༢ མ་གཏོགས་གཞན་ཚང་མའི་ཐོ་འབྱོར་སོང་། ཅེས་བརྗོད་བྱུང་།
སྲིད་བྱུས་དེ་ས་གནས་ཁག་ཏུ་ལག་བསྟར་བྱེད་ཕྱོགས་ཐོག་དཀའ་ངལ་ཡོད་མེད་དྲིས་པར། སྲིད་བྱུས་རང་ངོས་ནས་དཀའ་ངལ་འདི་རེད་ཟེར་ནས་ངས་བཤད་ཤེས་ཀྱི་མེད། ཡིན་ནའང་ཐོ་བསྡུ་ཕྱོགས་ཐོག་དཀའ་ངལ་ཏོག་ཙམ་འདུག ས་གནས་མ་འདྲ་བ་ནས་ཐོ་བསྡུ་སྟངས་ཀྱང་མ་འདྲ་བ་ཡིན་སྟབས། ང་ཚོས་རེ་རེ་བཞིན་ཞིབ་འཇུག་བྱེད་དགོས་པ་ཡོང་གི་འདུག དཔེར་ན། ས་གནས་ཁག་ཅིག་ལ་གཞན་ནང་བཞིན་མཐུན་རྐྱེན་ཡོད་མེད་དང་། དེའི་ནང་ལོགས་ནས་ཀྱང་སོ་སོའི་ཕྲུ་གུ་ཡིན་མིན་སོགས་ལ་ལྟ་དགོས་ཀྱི་འདུག ཅེས་བརྗོད་བྱུང་།
ཁོ་མོས་མུ་མཐུད་དུ། སྦྱིར་བཏར་གསལ་བསྒྲགས་གནང་བའི་ནང་ད་ལོའི་ ༡༠ ཚེས་ ༣༠ ཉིན་སྔོན་དུ་ཐོ་བསྡུ་ཚར་དགོས་པ་དང་། ༢༠༡༥ ལོའི་ཟླ་ ༣ ཚེས་ ༣༠ ཉིན་གྱི་སྔོན་ལ་ཐོ་གཙང་སེལ་བཟོས་ཏེ་ཟླ་ ༤ པའི་ནང་ལས་གཞི་འདི་ལག་བསྟར་མགོ་འཛུགས་གནང་དགོས་ཀྱི་ཡོད་པ་རེད། ད་ལྟའི་ཆར་ཐོ་ཞིག་བསྡུ་ཤོག་ཟེར་དུས་ཚང་མར་ཐོབ་ཐང་འདྲ་བོ་ཆགས་ཏེ་ཚང་མ་བསྡུས་ཡོད་པ་རེད། དངོས་གནས་བྱས་ན། བུ་ཕྲུག་ཆང་ས་བརྒྱབ་ཚར་བ་དང་ཕྱི་རྒྱལ་དུ་ཡོད་པ་ཚང་མས་ཞུ་དགོས་པ་ཆགས་ཀྱི་ཡོད་པ་མ་རེད། དངོས་ཡོད་གནས་སྟངས་སློབ་གྲྭ་དང་མཐོ་རིམ་སློབ་གྲྭ་འགྲོ་མཁན་ཚོ་ཆགས་ཡོད། ཅེས་བརྗོད་བྱུང་།
དྷ་རམ་ས་ལ་ས་གནས་མགོ་འཛིན་བསོད་ནམས་རྡོ་རྗེ་ལགས་སུ། བཀའ་ཤག་བཀོད་ཁྱབ་དེ་ལག་བསྟར་གང་འདྲ་གནང་གི་ཡོད་མེད་དྲིས་པར། ཁོང་གིས། ད་ལོ་བཀའ་ཤག་གིས་ཕྲུ་གུ་གསུམ་ཡན་ཡོད་མཁན་ཚོར་དམིགས་བསལ་མཐུན་སྦྱོར་གནང་བའི་སྲིད་བྱུས་གཏན་འབེབས་གནང་བ་དེ་ཧ་ཅང་དགོས་ངེས་ཤིག་རེད། ཕྲུ་གུ་མང་པོ་ཡོད་པའི་མི་མང་དཀྱུས་མ་མང་པོ་ཞིག་ལ་ཕན་ཐོགས་གང་འཚམ་ཡོད་པ་རེད་བསམ་གྱི་འདུག ཉེ་ལམ་ཤེས་རིག་ལས་ཁུངས་ཀྱིས་ཕྲུ་གུ་གསུམ་ལས་མང་བ་ཡོད་མཁན་ཚོའི་ཆེད་དུ་འགེང་ཤོག་ཅིག་བཀྲམས་པ་བཞིན་ང་ཚོས་མང་ཚོགས་ལ་གསལ་བསྒྲགས་སྤེལ་བ་ཡིན། དྷ་རམ་ས་ལར་ཕྲུ་གུ་གསུམ་ཡན་ཡོད་པའི་འགེང་ཤོག་སྐོང་མཁན་ཁྱིམ་ཚང་ཁྱོན་ ༡༤༠ ལྷག་ཡོད་པ་ཤེས་རིག་ལས་ཁུངས་སུ་ཕུལ་ཚར་ཡོད། རྩ་བའི་ཤེས་རིག་ལས་ཁུངས་ཀྱིས་དུས་ཚོད་ཅིག་སྤྲད་ཡོད་ཀྱང་དྷ་རམ་ས་ལར་ཆ་བཞག་ན། མི་མང་ས་གནས་སུ་ཡོད་མེད་དབང་གིས་ང་ཚོས་ཇི་ལྟར་འབད་བརྩོན་བྱས་ཀྱང་། གསལ་བསྒྲགས་དེ་མི་མང་ཚང་མས་གོ་ཡོད་མེད་དང་། སྲིད་བྱུས་འདིས་མི་མང་ལ་སྙོབ་ཐུབ་ཀྱི་ཡོད་མེད་ལ་དོགས་པ་ཞིག་ཡོད། ཅེས་བརྗོད་བྱུང་།
གསར་འགོད་པས་སྲིད་བྱུས་འདི་ལྟར་ལག་བསྟར་ཐོག་དཀའ་ངལ་འདྲ་ཡོད་མེད་དྲིས་པར། བཀའ་ཤག་གི་བཀོད་ཁྱབ་ནང་ཁ་གསལ་མིན་པའི་དབང་གིས་དཀའ་ངལ་རེ་ཟུང་འཕྲད་ཀྱི་འདུག དཔེར་ན། ཕ་མ་ལ་ལ་ཞིག་གིས་གཞན་གྱི་བུ་ཕྲུག་ཉར་ཡོད་པ་ཚོ་དམིགས་བསལ་ལྟ་སྐྱོང་དེ་རག་གི་ཡོད་མེད་དོགས་འདྲི་ཡོང་གི་འདུག ལྷག་པར་དུ་མི་མང་པོ་ཞིག་གིས་ཕྲུ་གུ་གསུམ་ཡན་གྱི་འགེང་ཤོག་བསྐོངས་རྗེས་འཚོ་སྣོན་དང་ཤེས་ཡོན་གྱི་ཐོབ་ཐང་ག་རེ་རག་གི་ཡོད་མེད་འདྲི་མཁན་མང་པོ་འདུག དེ་དག་ཐད་མི་མང་ལ་ལན་གསལ་བོ་ཞིག་སྤྲོད་ཐུབ་ཀྱི་མི་འདུག ཅེས་བརྗོད་བྱུང་།
བོད་ཀྱི་བུད་མེད་ལྷན་ཚོགས་ཀྱི་ཚོགས་གཙོ་བཀྲ་ཤིས་སྒྲོལ་མ་ལགས་སུ། བཀའ་ཤག་གི་བྱུས་དེའི་ཐད་དགོངས་ཚུལ་གང་ཡོད་དྲིས་པར་ཁོ་མོས། བོད་མིའི་སྒྲིག་འཛུགས་ཀྱིས་ཕྲུ་གུ་གསུམ་ཡན་ཆད་ལ་རོགས་སྐྱོར་གནང་བའི་སྲིད་བྱུས་དེ་ཧ་ཅང་ཡག་པོ་རེད་བསམ་གྱི་ཡོད། ཡིན་ནའང་ང་རང་གིས་ཤེས་ཚོད་བྱས་ན་སྲིད་བྱུས་དེ་ཐོག་མ་ ༢༠༡༢ ལོར་གཏན་འབེབས་གནང་བ་རེད། རྩ་བའི་བརྒྱུད་རིམ་མང་པོ་ཞིག་དགོས་དུས་སྐུ་ངལ་ཏོག་ཙམ་ཡོད་སྲིད་ཀྱང་། གྲོས་ཆོད་བཞག་ཚར་རྗེས་གང་མགྱོགས་ཕྱག་བསྟར་གནང་དགོས་པ་གལ་ཆེན་པོ་རེད། ད་བར་ཧ་ལམ་ལོ་ ༣ ཙམ་འགྲོ་གྲབས་ཡོད་པ་རེད། ད་ལྟའི་བར་ཕྱག་བསྟར་གནང་མ་ཐུབ་པར་དེ་འཐུས་ཤོར་ཆེན་པོ་རེད་བསམ་གྱི་འདུག དེ་ནས་ད་བར་ཤེས་རིག་ལས་ཁུངས་ཀྱིས་འཛིན་རིམ་བཅུ་བ་དང་བཅུ་གཉིས་ནང་ཡིག་རྒྱུགས་བཏང་སྟེ་བརྒྱ་ཆ་རག་མཁན་ཚོར་སློབ་ཡོན་ཞིག་རག་བསྡད་ཡོད་པ་རེད། ད་ལྟ་ཕྲུ་གུ་གསུམ་ཡན་ཡོད་མཁན་ཚོར་སློབ་ཡོན་ཞིག་སྤྲོད་རྒྱུ་ཡིན་ཟེར་བ་དེ་ག་འདྲ་ཞིག་ལ་ཟེར་གྱི་ཡོད་མེད་གསལ་ཁ་མི་འདུག ཅེས་བརྗོད་བྱུང་།
བཀའ་ཤག་གིས་ས་གནས་ཁག་ལ་བཀོད་ཁྱབ་བཏང་བའི་ནང་དོན་ཚན་ ༥ འཁོད་ཡོད་པ་དག་ནི། ༡། ཕྲུ་གུ་གསུམ་ཡན་ཡོད་པའི་ཁྱིམ་ཚང་རྣམས་ཀྱི་ཕྲུ་གུ་གསུམ་པ་ཡན་ཚང་མར་ཤེས་རིག་ལས་ཁུངས་ནས་དམིགས་བསལ་སློབ་ཡོན་རོགས་སྐྱོར་དགོས་རྒྱུ། ༢། ཕྲུ་གུ་གསུམ་ཡན་ཡོད་པའི་ཁྱིམ་ཚང་གི་འཕྲོད་བསྟེན་མཐུན་རྐྱེན་ཐོག་འཕྲོད་བསྟེན་ལས་ཁུངས་ནས་དམིགས་བསལ་རོགས་སྐྱོར་གྱི་ལས་གཞི་གང་དགོས་སྤེལ་རྒྱུ། ༣། ཕྲུ་གུ་གསུམ་ཡན་ཡོད་པའི་སྐྱེད་མ་རྣམས་དང་ཕྲུ་གུ་གསུམ་ཡན་ལ་འཕྲོད་བསྟེན་ལས་ཁུངས་ཀྱི་སྨན་བཅོས་ལྟ་སྐྱོང་ལས་གཞིའི་འོག་ནས་སྨན་བཅོས་རིན་མེད་གནང་རྒྱུའི་ཆ་རྐྱེན་གཏོང་རྒྱུ། ༤། ཕྲུ་གུ་གསུམ་ཡན་མངལ་འཁོར་བྱུང་བའི་སྐྱེད་མ་རྣམས་ལ་སྦྲུམ་མའི་དུས་ཡུན་རིང་དང་ཕྲུ་གུ་བཙའ་དུས་ཀྱི་སྨན་བཅོས་འགྲོ་གྲོན་ཆ་ཚང་འཕྲོད་བསྟེན་ལས་ཁུངས་ནས་གཏོང་རྒྱུ། ༥། བོད་མིའི་སྒྲིག་འཛུགས་ཀྱི་ཁྱབ་ཁོངས་སྡེ་ཚན་ཁག་དང་། བཙན་བྱོལ་བོད་མིའི་སྤྱི་ཚོགས་ཀྱི་རང་སྐྱོང་ཚོགས་སྡེ་ཁག་བཅས་ཀྱི་བུད་མེད་ལས་བྱེད་རྣམས་ལའང་བོད་མིའི་སྒྲིག་འཛུགས་ཀྱི་བུད་མེད་ལས་བྱེད་རྣམས་ལ་ཇི་ཡོད་ལྟར་ཕྲུ་གུ་བཙས་ཤོར་སྐབས་དམིགས་བསལ་ཕོགས་ཡོད་གུང་སེང་གི་ཐོབ་ཐང་དགོས། ཞེས་སོགས་རེད།
གསར་འགོད་པ། ལྷ་སྐྱབས་རྒྱལ།
སྲི་བྱུས་དེ་ཕྱིས་དྲགས་པ་རེད་འདུག
མི་འབོར་གྱི་དཀའ་ངལ་ནི་ཚང་མ་ལ་འཕྲད་དང་། འཕྲད་བཞིན་པ་ཡིན། འདི་དཀའ་ངལ་ནང་ནས་དཀའ་ངལ་ཆེ་ཤོས་ཤིག་ཡིན།
བོད་ལ་ཆད་བཞག་ན་རྒྱ་བོད་མི་འབོར་མང་ཉུང་གིས་རྐྱེན་པས་ད་ཆ་ཁར་ཐུག་ཞུ་ན་རང་བཙན་ནས་དབུ་མའི་ལམ་ལ་གྱུར་ཡོད། དགོན་སྡེ་དང་སློབ་གྲྭ་ཁག་ཀྱང་སྒོ་རྒྱབ་དགོས་པའི་གནས་སྟངས་སུ་འགྱུར་བཞིན་ཡོད། ཀ་རྡོར་སྒང་གསུམ་ཁུལ་ལ་མཚོན་ན་མི་རིགས་གཞན་གྱི་སློབ་ཕྲུག་མེད་ན་བོད་པའི་གཏན་སློབ་རྣམས་སྒོ་རྒྱབ་རྒྱུའི་གནས་སྟངས་བརྒྱ་ཆ་བརྒྱ་ཆགས་ཡོད་པ་མངོན་གསལ་དོད་པོ་རེད། དགོན་ཁག་ནང་ལ་བོད་རིགས་བརྒྱ་ཆ་༡༠ ལས་མེད་པ་ཁ་མཚོན་བཅད་ནས་བཤད་ཐུབ། ཕྱི་རྒྱལ་ཁག་ལ་བོད་པའི་བླ་ཆེན་ཁག་གི་ཕྱག་བཏབ་པའི་དགོན་ཁག་དེ་ཚོའི་ནང་ལའང་བོད་རིགས་གཅིག་ཀྱང་མེད་པའི་གནས་སྟངས་དངོས་སུ་ཆགས་ཡོད་པ་དེ་འདྲ་ཡོད། མི་འབོར་ཉུང་དྲགས་པའི་བོད་ཡིག་ནང་འཐོན་པའི་ཚགས་ཤོག་ཁག་ཀྱང་སྒོ་རྒྱབ་དགོས་པ་ཡང་བྱུང་ཡོད་དཔེར་ན་འབྲས་ལྗོངས་ཀྱི་བྱ་མ་རྟ་ཚགས་ཤོག རྡོར་གླིང་གི་བོད་མའི་རང་དབང་གསར་ཤོག་སོགས། ངས་དྲན་པ་ལ་རྡོར་གླིང་ཁུལ་རང་ལ་སློབ་གྲ་དང་། མཐོ་སློབ་རྩིས་པས་ཁྱོན་སྡོམ་ལྔ་ནང་སྔར་བོད་ཡིག་སློབ་ཀྱི་ཡོད་ཀྱང་དེང་སྐབས་སྒོ་རྒྱབ་ནས་ལོ་མང་ཕྱིན་ཚར་བ་དེ་འདྲ་ཡོད་པ་ཡིན། དེ་འདྲ་ཡིན་དུས་ང་ཚོས་བོད་ཡིག་དར་སྤེལ་ལ་དོ་སྣང་ཤུགས་ཆེ་རྒྱབ་དགོས་འདུག
བཙན་བྱོལ་སྤྱི་ཚོགས་ནང་མི་འབོར་ཉུང་དྲག་པའི་རྐྱེན་གྱིས་ཧི་མ་ལ་ཡའི་རི་བརྒྱུད་དང་བལ་བོད་ས་མཚམས་སོགས་ནས་བོད་པ་མ་ཡིན་པའི་ཕྲུ་གུ་མང་པོ་ཞིག་གསོ་སྐྱོང་བྱས་ནས་སློབ་སྦྱོང་གི་མཐུན་རྐྱེན་བོད་ཕྲུག་དང་གཅིག་མཚུངས་ཐོབ་ཀྱི་ཡོད། འོན་ཀྱང་དེ་དག་གི་མོ་འོངས་པར་བསམ་ཚེ་བོད་པའི་ཆོས་དང་རིག་གཞུང་ལ་ཕན་ཐོགས་ཡོང་དང་མི་ཡོང་བ་ནི་དྲི་བ་ཆེན་པོ་ཞིག་རེད། དེར་བརྟེན་རང་རིགས་ནང་ཁུལ་དུ་སློབ་ཡོན་སྤྲོད་དང་མི་སྤྲོད་པའི་སྐད་ཆ་བཤད་པ་ཙམ་གྱིས་ཡང་དག་པ་ཞིག་མ་རེད་བསམ་གྱི་འདུག མིག་སྔར་བོད་ཕྲུག་མང་པོ་ཞིག་སློབ་ཡོན་རིན་མེད་ཐོག་སློབ་གྲྭར་འཇུག་རྒྱུ་ནི་དཀའ་ངལ་ཆེ་ལ་རྙོགས་རྫིང་ཅན་ཞིག་ཏུ་གྱུར་ཡོད་པ་དེ་སྔ་མོ་ནས་སེལ་ཐབས་མི་བྱེད་པ་གང་ཡིན་ནམ།
དུས་བབ་ཀྱིས་མང་ཚོགས་ལ་གོ་རྟོག་སྤེལ་བ་ཐུགས་རྗེ་ཆེ། བཙན་བྱོལ་བོད་གཞུང་གི་སྲིད་བྱུས་གང་ཞིག་ཡིན་ཡང་མང་ཚོགས་ནང་སླེབས་མ་ཐུབ་པའི་དཀའ་རྙོག་ཡདོ་རེད། འདི་བཞིན་གསར་འགྱུར་བརྒྱུད་ལམ་གྱིས་བདག་པོ་བརྒྱབ་ན་ཧ་ཅང་གསལ་བོ་ཞིག་ཡོངའདུག
བཀའ་ཤག་གི་སྲིད་ཇུས་འདི་ལ་རྒྱབ་སྐྱོར་ཡོད། བཙན་བྱོལ་བོད་མིའི་སྤྱི་ཚོགས་ནང་སྲིད་ཇུས་འདི་ལག་བསྟར་བྱེད་ཚད་འཕྱི་དྲགས་པ་རེད་བསམ་གྱིན་ཡོད། བཀའ་ཤག་གི་བཀོལ་ཁྱབ་ནང་ཁ་གསལ་བོ་མེད་པའི་རྙོག་དྲ་མང་པོ་ཞིག་ཡོད་པ་མ་ཟད། གསར་འགོད་པས་བཅར་འདྲི་བྱས་པའི་ལན་བཀྱོན་སྐབས་ཀྱང་ཁ་གསལ་ལ་མ་གསལ། བཤད་ཐུབ་ལ་མ་ཐུབ་བྱེད་དོན་ག་རེ་ཡིན་ནམ། བཀའ་ཤག་དང་ཤེས་རིག་ལས་ཁུངས་ཀྱིས་སྲིད་ཇུས་འདི་ལ་སྣང་མེད་གཏོང་གི་ཡོད་པ་རེད་དམ། ཡང་ན་ཐོག་མའི་གསལ་བསྒྲགས་སྐབས་ནོར་འཁྲུལ་མང་པོ་ཤོར་ཡོད་ཙང་ཁ་སྐྱེངས་པོ་ཆགས་ཏེ་བཤད་མ་བདེ་བ་རེད། དེ་ནས་མི་མང་གི་སྐུལ་མ་ཞིག་ལོ་གསུམ་རིང་ལག་བསྟར་བྱེད་མ་ཐུབ་པ་འདི་ཧ་ཅང་ཐབས་སྐྱོ་བོ་ཞེ་དྲགས་རེད།