བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༦༤༧ སྟེང་གི་རྩོམ་སྒྲིག་པའི་གཏམ།
ཉེ་ལམ་དྷ་རམ་ས་ལའི་རྒྱུད་སྟོད་གྲྭ་ཚང་དུ་རྗེ་ཙོང་ཁ་པས་དཔལ་གསང་བ་འདུས་པའི་འགྲེལ་པ་བཞི་སྦྲགས་བརྩམས་ཏེ་ལོ་ངོ་ ༦༠༠ འཁོར་བའི་རྗེས་དྲན་དང་བསྟུན་ཏེ་སྔགས་ཀྱི་བགྲོ་གླེང་ཞིག་ཚོགས་སོང་། བགྲོ་གླེང་དེའི་སྟེང་དགའ་ལྡན་ཁྲི་རིན་པོ་ཆེ་མཆོག་དང་ཤར་བྱང་ཆོས་རྗེ་རྣམ་གཉིས། གདན་ས་ཁག་དང་། རྒྱུད་གྲྭ་སྟོད་སྨད། བཀྲ་ཤིས་ལྷུན་པོ་སོགས་དགེ་ལུགས་པའི་དགོན་པ་གྲྭ་ཚང་ཁག་གི་མཁན་པོ་དང་དགེ་བཤེས་མང་པོ་འཛོམས་ཏེ་ཆེ་མཐོང་དང་ལོ་རྒྱུས་རང་བཞིན་གྱི་བགྲོ་གླེང་ཞིག་གནང་སོང་།
དེ་བཞིན་ཉེ་ཆར་གདན་ས་སེར་བྱེས་མཁས་སྙན་གྲྭ་ཚང་དུའང་དགའ་ལྡན་ཁྲི་རིན་པོ་ཆེ་དབུ་བཞུགས་ཐོག་བྱེ་བྲག་སྨྲ་བའི་སྡེ་བ་ཁག་ལས་ཐེ་ལན་ཌི་དང་། སིང་ག་ལ། རྒྱ་གར། ཐེ་ཝན། བོད་བཅས་ཀྱི་དགེ་སློང་ལྷན་བཞུགས་ཐོག་དམ་ཆོས་འདུལ་བའི་བགྲོ་གླེང་ཞིག་ཚོགས་ཡོད། འདི་ནི་ལོ་རྒྱུས་ཀྱི་དོན་སྙིང་ཆེན་པོ་ལྡན་པའི་རྒྱལ་སྤྱི་རང་བཞིན་གྱི་ཚོགས་འདུ་ཞིག་ཆགས་ཡོད། འདི་དང་འདི་འདྲའི་ནང་ཆོས་ཀྱི་བགྲོ་གླེང་གལ་ཆེན་འགའ་རེ་བོད་པའི་དགོན་པ་གྲྭ་ཚང་ཁག་ནང་གསར་དུ་བྱུང་དང་འབྱུང་བཞིན་འདུག
འདི་རིགས་མགོ་འཛུགས་ཚད་འཕྱི་མ་དྲགས་ན་སྔ་དྲགས་མེད། འདི་རི་བོ་དགེ་ལྡན་པ་ཙམ་མིན་པར་ས་སྐྱ་བཀའ་བརྒྱུད་རྙིང་མ། བོན་དང་ཇོ་ནང་སོགས་བོད་པའི་ཆོས་ལུགས་ཆོས་བརྒྱུད་ཁག་ཚང་མས་དེང་རབས་ཀྱི་འགྲོ་སྟངས་ལྟར། རང་རང་གི་ལྟ་གྲུབ་དང་། རང་རང་གི་བཞེད་ཚུལ་ཐོག་རྒྱ་ཁྱབ་རང་བཞིན་གྱི་བགྲོ་གླེང་དང་། རྩོམ་ཡིག་འགྲན་བསྡུར། རིགས་གཅིག་རྐང་འཛིན་པ་སྐྱེད་སྲིང་བཅས་ཀྱི་ཐོག་ཤུགས་སྣོན་རྒྱུ་ཧ་ཅང་གལ་ཆེ།
བོད་བརྒྱུད་ནང་བསྟན་རིག་གནས་འདི་དེང་རབས་ཅན་དང་སྤྱི་ཚོགས་ཅན་དུ་ཁ་ཕྱོགས་ཏེ། ནང་པའི་གཞུང་ཆེན་ཁག་གི་དཀའ་གནད་ཐོག་དེང་རབས་ཀྱི་འགྲོ་སྟངས་ལྟར། བགྲོ་གླེང་དང་རྩོམ་ཡིག་འགྲན་བསྡུར། དེ་བཞིན་རི་མོར་འབྲི་བ་དང་རེའུ་མིག་ཏུ་འགོད་པ། དབྱིབས་རྩིས་དང་ཐིག་ཚད་འདེབས་པ། གཟུགས་དབྱིབས་བཟོ་བ་དང་། ཚོན་མདོག་འདྲ་མིན་བྱུག་པ་སོགས་ཀྱི་ལམ་ནས་སློབ་སྦྱོང་དང་ལག་ལེན། ཚོད་ལྟ་དང་སྦྱོང་བརྡར་སོགས་བྱ་རྒྱུ་ཧ་ཅང་གལ་ཆེ།
དེ་བཞིན་བོད་པའི་དགོན་སྡེ་ཁག་ནང་གཞུང་ཆེན་སློབ་ཁྲིད་བྱེད་སྟངས་དེ་ཡང་། དགེ་བཤེས་ཤིག་གོང་དུ་གདན་སྟེང་ལ་དཀྱིལ་དཀྲུང་དུ་བསྡད་ཅིང་། དེའི་གཤམ་འོག་ཏུ་དགེ་ཕྲུག་མང་པོ་ཞིག་མགོ་བོ་སྒུར་སྒུར་གྱིས་ཙོག་པུར་བསྡད་རྗེས། རྒན་ལགས་དེས་གླེགས་བམ་སྣ་རིང་ཞིག་གི་སྟེང་ནས་ཆུ་ཚོད་གཅིག་གཉིས་རིང་ཤར་ཤར་གསུང་རྐྱང་བྱེད་པ་དང་། དགེ་ཕྲུག་ཚོས་ཀྱང་ནང་དོན་གོ་ཡི་ཡོད་མེད་གང་ལྟར་ཡང་། དྲི་བ་དྲིས་ལན་དང་དོགས་སློང་རྩོད་སྤོང་སོགས་གང་ཡང་མེད་པར་ཆུ་ཚོད་གཅིག་གཉིས་རིང་ཁུ་སིམ་སིམ་ཉན་རྐྱང་བྱེད་པའི་ལམ་སྲོལ་འདིར་ཡང་ལེགས་བཅོས་འདྲ་དགོས་སམ།
སྤྱིར་དགོན་པའི་སློབ་གསོ་དང་སློབ་གྲྭའི་སློབ་གསོ་ཁ་ཁ་ཡིན་པ་གང་ཞིག་ལ། དེ་གཉིས་ཀྱི་ཕན་ནུས་ཁྱད་ཆོས་ཀྱང་སོ་སོར་ཡོད་པའི་སྒྲུབ་བྱེད་འགོད་སྟངས་ཡོད་ཀྱང་། ད་ལྟའི་མི་ཚང་མ་དུས་རབས་ཀྱི་ཤིང་རྟ་ཆེན་མོའི་འཁོར་སྐྱོད་ནང་ཞུགས་ཡོད་པ་གཅིག་མཚུངས་ཡིན་པ་ལྟར། བོད་པའི་དགོན་སྡེའི་སློབ་ཁྲིད་བྱེད་ཐབས་འདི་ཡང་དེང་རབས་སློབ་གྲྭ་དང་ཇེ་ཉེར་གཏོང་དགོས་པ་དང་། བོད་པའི་སློབ་གྲྭ་ཁག་ཏུ་དགོན་སྡེའི་སློབ་གསོ་དང་སློབ་ཁྲིད་བྱེད་ཐབས། ནང་བསྟན་གཞུང་ལུགས་སོགས་མི་རིགས་རིག་གཞུང་གི་ངོ་བོར་ཁྲིད་སྤེལ་བྱས་ཏེ། དགོན་པའི་སློབ་གསོ་དང་སློབ་གྲྭའི་སློབ་གསོ་ཟུང་དུ་སྦྲེལ་ནས་རིག་གཞུང་དར་སྤེལ་དང་། སྤྱི་ཚོགས་ལག་ལེན་ལ་འཁྱོལ་ཐུབ་པའི་དབུ་མའི་ལམ་ཞིག་འཚོལ་དགོས་སོ།
