ལ་དྭགས་དབུས་གཞུང་ནང་པའི་རིག་གནས་མཐོ་སློབ་དུ་༧གོང་ས་མཆོག་གིས་བཀའ་སློབ་གནང་སྟེ། སྔོན་མ་རྒྱ་གར་ནང་གསང་སྔགས་ཀྱི་ཆོས་ཚུལ་བཞིན་མ་སྲུང་བའི་དབང་གིས་བསྟན་པ་ཉམས་རྒུད་ཕྱིན་པ་ལྟར་ད་ལྟ་བོད་པར་གནས་སྟངས་དེ་འབྱུང་གི་ཡོད་སྐོར་གསུངས་འདུག
ཁ་སང་ཚེས་ ༡༦ ཉིན་གྱི་སྔ་དྲོར། ༧གོང་ས་མཆོག་ལ་དྭགས་ལྕོག་ལ་སར་ཡོད་པའི་ལ་དྭགས་དབུས་གཞུང་ནང་པའི་རིག་གནས་མཐོ་སློབ་ཁང་དུ་ཆིབས་བསྒྱུར་བསྐྱངས་ཏེ། མཐོ་སློབ་གནང་གསར་བཞེངས་མཛད་པའི་འཁོར་ལྔ་སྡེ་བཟང་པོའི་སྐུ་བརྙན་དབུ་འབྱེད་རབ་གནས་གནང་རྗེས། སློབ་གྲྭ་ཚོགས་ཁང་དུ་དགེ་ལས་སློབ་ཕྲུག་དང་དགོན་སྡེ་ཁག་གི་གྲྭ་བཙུན་ཚོར་བཀའ་སློབ་གནང་འདུག
༧གོང་ས་མཆོག་གི་བཀའ་སློབ་ལས་དུམ་ཚན་ཞིག་འདིར་བཀོད་ཡོད། དེ་སྔ་རྒྱ་གར་ནང་དུ་ནང་པའི་དགེ་འདུན་པ་ཚོས་རྒྱུ་ནོར་ལ་ཆགས་ཞེན་དང་གསང་སྔགས་ཀྱི་ཆོས་ཚུལ་བཞིན་མ་སྲུང་བའི་དབང་གིས་ནང་པའི་བསྟན་པ་ཉམས་རྒུད་ཕྱིན་ཡོད། རྒྱུ་རྐྱེན་དེ་དག་ང་ཚོ་བོད་པར་ཏག་ཏག་ཚང་གི་ཡོད་པ་ལྟ་བུ་འདུག དེ་སྔ་ངོས་ཀྱིས་གྲོགས་པོ་ཁག་གཅིག་ལ་བླ་མ་ལོག་ན་གསང་ཡུམ་བཞེས་པ་རེད། གྲྭ་པ་དཀྱུས་མ་ཞིག་ལོག་ནས་གྲྭ་ལོག་ཅེས་དགོན་པ་ནས་ཕྱིར་འཕུད་གཏོང་རྒྱུ་དེ་ནི་ནོར་འཁྲུལ་རེད། གྲྭ་ལོག་གཅིག་མཚུངས་རེད། ཅེས་བརྗོད་ཀྱི་ཡོད། མདོར་ན། གསང་ཡུམ་བཞེས་ཏེ་མི་འདྲ་བ་ཞིག་དགོས་པ་རེད་མ་གཏོགས་ཕག་ཕྲུག་ལྟར་ཁྲིད་ཡོང་ན་ཆོ་རྩ་བ་ནས་མེད། ང་ཚོས་གསང་སྔགས་ལ་བསྙད་འདོགས་བྱས་པ་དང་སྤྱི་ཚོགས་ནས་ཀྱང་བླ་མས་གསང་ཡུམ་བཞེས་འདུག ཅེས་བརྗོད་ན་འགྲིག་གི་མེད། དཔེར་ན། རྒྱ་གར་ནང་ཨ་ནེ་དགོན་པ་ཞིག་ཡོད། དགོན་པ་དེར་མི་ཁག་གཅིག་གིས་ཁྱེད་རང་ཚོ་བཙུན་མའི་ནང་བསྟན་པར་ཞབས་འདེགས་སྒྲུབ་མཁན་ངོ་མཚར་ཆེ་བའི་ལོ་རྒྱུས་ག་རེ་ག་རེ་ཡོད་དམ་ཞེས་དྲིས་སྐབས། ང་ཚོ་ཨ་ནེའི་ནང་ནས་བླ་མའི་གསང་ཡུམ་བྱེད་མཁན་མང་པོ་ཡོད་ཧ་ཅང་སྐལ་པ་བཟང་པོ་ཡིན། ཞེས་བརྗོད་འདུག བླ་མ་སྡོད་མ་ཚུགས་པ་དང་སྡོམ་པ་སྲུང་མ་ཐུབ་པར་ཨ་ནེའི་སྟེང་གྲྭ་བ་ལོག་པ་རེད། དེར་བརྟེན་རྒྱུ་མཚན་གང་ཡང་མེད་པར་རྨོངས་དད་དབང་གིས་སྐྱབས་སུ་མཆི་ཞེས་པའི་ཐོག་ནས་སྐྱོན་ལྷག་གི་འདུག ངོས་ཀྱིས་དྲང་པོ་དྲང་གཞག་དང་ཁ་རེ་ཁ་ཐུག་ཤོད་ཀྱི་ཡོད། འདི་གར་ཁྱེད་རང་ཚོ་ཨ་ནེ་གང་ཙམ་ཞིག་འདུག གང་ལྟར་གསང་སྔགས་འཆལ་སྤྱོད་ལ་ཕྱིན་ཏེ་ཞབས་འདྲེན་ཞུ་རྒྱུའི་ཉེན་ཁ་འདུག
དེ་བཞིན་དགོན་པ་ཁག་གཅིག་གིས་དགོས་རྒྱུའི་བསླབ་པ་སློབ་གཉེར་མ་བྱས་པར། ཆོ་ག་བཏོན་ནས་སྡོད་རྒྱུ་དེ་བསྟན་པ་འཇིག་རྒྱུའི་སྔ་ལྟས་རེད་མ་གཏོགས་ཡག་པོ་མ་རེད། ནང་ཁུལ་ཕྲག་དོག་གིས་འབྲི་གུང་བཀའ་བརྒྱུད་དང་། དགེ་ལུགས། འབྲུག་པ་བཀའ་བརྒྱུད། ཅེས་ག་ཚོད་འཕག་འཚག་བརྒྱབ་ཀྱང་འཛམ་གླིང་གི་ནང་པ་ཚང་མར་ཁྱབ་ཐུབ་ཀྱི་མ་རེད། དེ་དཔལ་ནཱ་ལེནྡའི་མགོན་པོ་ཀླུ་སྒྲུབ་དང་འཕགས་པ་ཐོགས་མེད་སོགས་ཀྱི་གཞུང་ལ་ཤུགས་རྒྱོབས་དང་། རྒྱ་ནག་ཆ་ཚང་ལ་ཁྱབ་ཐུབ་པ་མ་ཟད། ཉི་ཧོང་དང་། ཀོ་རི་ཡ། ཝི་ཏི་ནམ་སོགས་ལ་ཁྱབ་ཐུབ་ཀྱི་རེད། ང་ཚོས་རིམ་བཞིན་ནཱ་ལེནྡའི་གཞུང་ལ་སློབ་སྦྱོང་ཡག་པོ་དང་ཉམས་ལེན་བྱས་ན། ཕལ་ཆེར་འཛམ་གླིང་ནང་གི་ནང་པའི་ཡུལ་གྲུ་ཡོངས་རྫོགས་ལ་ཁྱབ་ཐུབ་པ་ཞིག་ཆགས་ཀྱི་ རེད། གང་ལྟར་ང་ཚོས་ཕྱོགས་རིས་ཐོག་བསམ་བློ་བཏང་ནས་ཕྱིན་ན་ཡག་པོ་ཡོང་གི་མ་རེད། ཅེས་སོགས་གསུངས་འདུག
