ཡིད་སྐྱོའི་གནས་ཚུལ།

༄༅།། དྭང་སློབ་དམག་སྒར་གྱི་དེ་སྔའི་བོད་ཡིག་རིག་གནས་དགེ་རྒན་ཆེན་མོ་རྩེ་དྲུང་སྐུ་ངོ་ཐུབ་བསྟན་བཟོད་པ་མཆོག་ཕྱི་ལོ་ ༢༠༡༤ ཟླ་ ༨ ཚེས་ ༣ ཉིན་སྐུ་གཤེགས་པར་གུས་སློབ་ཕྲུག་རྣམས་ཡིད་ཤིན་ཏུ་སྐྱོ་བའི་གནས་སུ་གྱུར། སྐུ་ངོ་དམ་པ་དེ་ཉིད་ཕྱི་ལོ་ ༡༩༢༠ ལོར་ཡབ་ཀུན་བདེ་གླིང་གཟིམས་ཤག་གསར་པ་ངག་དབང་རིག་འཛིན་ལགས་དང་ཡུམ་ཚྭ་ཁུར་ཕུན་ཚོགས་དབང་མོ་ལགས་གཉིས་ཀྱི་སྲས་སུ་སྐུ་འཁྲུངས། དགུང་ལོ་ཉི་ཤུ་རྩ་གཅིག་ལ་ཕེབས་པ། ཕྱི་ལོ་ ༡༩༤༡ བོད་ལྕག་སྦྲུལ་ལོའི་ལོ་གསར་ཚེས་གཉིས་ལ་བོད་གཞུང་དགའ་ལྡན་ཕོ་བྲང་པའི་གཞུང་ཞབས་རྩེ་དྲུང་དུ་བསྐོ་བཞག་བསྩལ་ཞིང་། དེ་ནས་ལྷོད་ཁུལ་འབྲོག་སྡེ་ཚོགས་ཁག་གི་འགོ་འདོམས་འབྲོང་པ་སྤྱི་ཁྱབ་ལས་གནས་གནང་། དེའི་རྗེས་ནོར་གླིང་རྟག་བརྟན་མི་འགྱུར་ཕོ་བྲང་གསར་བཞེངས་ཀྱི་ཨར་ལས་འགོ་འཛིན་གནང་། དེ་ནས་ཀོང་པོ་རྫོང་སྤྱི་གནང་བཞིན་པའི་མུར་ཕྱི་ལོ ༡༩༥༩ ལོར་རྒྱ་གར་བཙན་བྱོལ་དུ་ཕེབས་རྗེས་བཀའ་སྦུག་ཏུ་ཕྱག་ལས་གནང་། དེ་ནས་ལ་དྭགས་ས་གནས་འགོ་འཛིན་དང་། ཤར་ཁུམ་ས་གནས་འགོ་འཛིན་གནང་། ཕྱི་ལོ་ ༡༩༦༤ ལོར་དྭང་སློབ་དམག་སྒར་གྱི་བོད་ཡིག་སློབ་དགེ་རུ་བསྐོ་བཞག་བསྩལ། དེ་རྗེས་སྐུ་སྒེར་ཡིག་ཚང་གི་བསྔོ་རྟེན་སྐྱབས་ཞུའི་དོ་དམ་གནང་སྟེ་ཕྱི་ལོ་ ༡༩༨༤ ལོར་བགྲེས་ཡོལ་དུས་ཕེབས་རྗེས་རིགས་ལམ་སློབ་གཉེར་ཁང་དུ་ལོ་བཅུ་བདུན་གྱི་རིང་ཕྱག་ལས་གནང་བཞུགས།

དམ་པ་དེ་ཉིད་ཀྱིས་ཕྱི་ལོ་ ༡༩༦༤ ནས་༡༩༧༦ བར་དྭང་སློབ་དམག་སྒར་དུ་བོད་ཡིག་དགེ་རྒན་ཆེན་མོའི་ཐུགས་འགན་བཞེས་ཏེ་སློབ་ཕྲུག་སྟོང་ཕྲག་ལ་ཉེ་བར་བོད་ཀྱི་སྐད་ཡིག་དང་། སུམ་རྟགས། སྙན་ངག སྡེབ་སྦྱོར་བཅས་ཀྱི་ཐོག་སློབ་ཁྲིད་མཛད་དེ་བོད་ཀྱི་རིག་གནས་ཐོག་སློབ་ཕྲུག་ཚད་ལྡན་གང་འཚམ་བསྐྱེད་བསྲིངས་གནང་ཡོད། དེའི་ཁོངས་ནས་དམག་སྒར་རང་ཉིད་ཀྱི་གོ་གནས་ལ་མཚོན་ན་ Colonel དང་། མདའ་དཔོན། རུ་དཔོན། འགོ་འཛིན། འགོ་འཛིན་ལས་རོགས། བརྒྱ་དཔོན། ལྡིང་དཔོན་བཅས་ཀྱི་གོ་གནས་ཁྱོན་སློབ་མ་སུམ་བརྒྱ་ནས་བཞི་བརྒྱ་ཙམ་གྱིས་བཞེས་ཐུབ་པ་བྱུང་ཡོད། དེ་དབྱིངས་རྣམས་དང་བཅས་སློབ་ཕྲུག་རྣམས་ཕྱི་ལོ་ ༡༩༧༣ ནས་ ༢༠༠༩ བར་དམག་སྒར་དེའི་རྐང་འགན་འཛིན་ལྟ་བུར་གྱུར་ཡོད། དེ་ནི་དམ་པ་དེ་ཉིད་ཀྱི་བཀའ་དྲིན་དང་ཁ་བྲལ་དུ་མེད་པ་ཡིན་ངེས་ལ་བརྟེན། དམ་པ་དེ་ཉིད་ཀྱི་བཀའ་དྲིན་གྱི་ཆ་ཤས་ཙམ་གསབ་ཆེད་དྷ་སར་གནས་སྡོད་སློབ་ཕྲུག་རྣམས་ནས་འཁྲུངས་རྟགས་སུ་འཇམ་དཔལ་དབྱངས་ཀྱི་སྐུ་བཞེངས་རྒྱུ་ཐག་ཆོད་བྱུང་བ་དང་། ཞབས་འཇུག་མཆོད་འབུལ་ཞུ་དགོས་ཆེད་རྒྱ་གར་དང་། བལ་ཡུལ་དང་འབྲུག་སོགས་ཕྱི་རྒྱལ་ཡུལ་གྲུ་ཁག་ཏུ་བཞུགས་པའི་སློབ་ཕྲུག་རྣམས་ནས་རང་རང་བློས་བཅད་མཆོད་འབུལ་ཆེད་གནང་སོན་བྱུང་ཚེ་དམིགས་བསལ་དམ་པ་དེ་ཉིད་ཀྱི་མཆོད་འབུལ་ཆེད་དུ་རྒྱ་གར་དངུལ་ཁང་ (TSHERING GYURMAY SBI SAVING A/C NO. 34029774753) བརྒྱུད་གནང་སྐྱོང་ཡོང་བ་ཞུ། འདི་ལོ་གཅིག་རྗེས་སྒོ་རྒྱག་རྒྱུ་ཡིན། མཆོད་འབུལ་ཆེད་དངུལ་གྲངས་ཇི་ཕུལ་མཆོད་འབུལ་ཁག་གྲུབ་མཚམས་གསར་ཤོག་ཐོག་འཐོན་རྒྱུ་ལགས་ན་དེ་དོན་དགོངས་པར་མངའ་བ་མཁྱེན།

དམ་པ་དེ་ཉིད་ཀྱི་སྐུ་ཚེ་ཧྲིལ་པོར་བོད་རྒྱལ་ཁབ་ཀྱི་བསྟན་སྲིད་མི་རིགས་དང་བཅས་པའི་སྲི་ཞུ་ཞབས་འདེགས་ལྷག་བསམ་རྣམ་དག་གིས་ཞུ་གནང་བའི་མཛད་རྗེས་ལ་ཡི་རང་ཞུ་བ་དང་། དགེ་ཚོགས་བྱང་ཆུབ་ཆེན་པོའི་རྒྱུ་རུ་འགྱུར་བ་དང་། འཕགས་མཆོག་ཕྱག་ན་པད་མོས་ཚེ་རབས་ཀུན་ཏུ་མཉེས་བཞིན་རྗེས་སུ་འཛིན་པའི་ཐུགས་རྗེ་བརྩེ་བས་གཟིགས་པའི་གསོལ་འདེབས་ཞུ་རྒྱུ་དང་དམ་པ་དེ་ཉིད་ཀྱི་མཛད་རྣམ་མདོར་བསྡུས་བཅས། དྷ་སའི་སློབ་ཕྲུག་ཚོགས་ཆུང་ཐུན་མོང་ནས་ཕྱི་ལོ་ ༢༠༡༤ ཟླ་ ༨ ཚེས་ ༡༢ ལ་ཕུལ།

ཚོགས་ཆུང་ཚོགས་མི།

འགོ་འཛིན་ཟུར་པ་ཚུལ་ཁྲིམས་ཆོས་འཕེལ། འགོ་འཛིན་ཟུར་པ་ཚེ་རིང་འགྱུར་མེད། བརྒྱ་དཔོན་ཟུར་པ་ཀརྨ་ཚེ་རིང་། ལྡིང་དཔོན་ཟུར་པ་ཉི་མ་བཀྲ་ཤིས། ལྡིང་དཔོན་ཟུར་པ་ཕུར་བུ་ཚེ་རིང་། ལྡིང་དཔོན་ཟུར་པ་ཚེ་བརྟན་རྡོ་རྗེ། བཅུ་དཔོན་ཟུར་པ་བྱང་ཆུབ། བཅུ་དཔོན་ཟུར་པ་ཆོས་དར། དྭང་ཟུར་ཚུལ་ཁྲིམས་རྡོ་རྗེ།

འབྲེལ་མཐུད་ཁ་པར་ཨང་། ༩༤༡༨༢༥༢༧༩༢ དང་ ༩༤༡༨༧༩༥༥༥༧ ཡིན།