ད་ལྟ་རང་འདི་གར་རྔ་བ་ནས་ཡིན་པ་འཇམ་དབྱངས་ལགས་ཀྱིས་གནས་ཚུལ་མཁོ་སྤྲོད་གནང་བ་ལྟར་ན། དེ་རིང་རྔ་བ་ཁུལ་རྔ་བ་རྫོང་རྨེའུ་རུ་མ་ཡུལ་ཚོའི་སྟེང་དུ། བོད་རིགས་བུད་མེད་ཅིག་གིས་རྒྱ་གཞུང་གི་བཙན་གནོན་ལ་ངོ་རྒོལ་བྱས་ཏེ་རང་ལུས་མེར་བསྲེགས་གནང་ཡོད་འདུག ད་ལྟའི་ཆར་ཁོང་མོ་འདས་གྲོངས་སུ་ཕྱིན་ཡོད་མེད་དང་མཚན་སོགས་གནས་ཚུལ་ཞིབ་ཕྲ་ཤེས་རྟོགས་ཐུབ་ཀྱི་མི་འདུག་པས་ཐོན་རིམ་བཞིན་དུ་འགོད་ངེས་ཡིན།
གནས་ཚུལ་ཐོན་རིམ་གཉིས་པ། རང་ལུས་མེར་བསྲེགས་གནང་མཁན་དེའི་མཚན་ལ་ཚེ་པེ་ཞུ་བ་དང་། ད་ལྟ་རང་ལོ་ ༢༠ ཡིན་ཞིང་རྨེའུ་རུ་མ་ཡུལ་ཚོའི་རུ་ཆེན་བཞི་པ་ནས་ཡིན་ལ། ཕ་མིང་ལ་ཆུ་རྡོ་རིན་ཆེན་དང་མ་མིང་ལ་ཅན་དཔའ་ཟེར་གྱི་ཡོད་འདུག ཁོང་མོ་ཡུལ་དངོས་སུ་འདས་གྲོངས་ཏུ་ཕྱིན་ཡོད་པ་དང་། ཅུང་ཙམ་ལས་མ་འགོར་བར་ཉེན་རྟོག་པ་བསླེབས་ཏེ་སྐུ་ཕུང་ཁྱེར་ཡོད་འདུག
གནས་ཚུལ་ཐོན་རིམ་གསུམ་པ། ཕ་ཆུ་རྡོར་དང་མ་ཅན་དཔའ་གཉིས་ལ་བུ་མོ་དྲུག་ཡོད་པ་ལས་རང་ལུས་མེར་བསྲེགས་གནང་མཁན་ཚེ་པེ་ནི་བཞི་བ་དེ་ཡིན་པ་དང་། ཆུང་དུས་སློབ་གྲྭ་སོགས་ལ་འགྲོ་མྱོང་མེད་པར་ཕ་མ་དང་མཉམ་དུ་འབྲོག་པའི་འཚོ་བ་བསྐྱལ་ནས་འཚར་ལོངས་བྱུང་བ་དང་། གཞན་གྱིས་བསྔགས་བརྗོད་བྱེད་ཡུལ་གྱི་བུ་མོ་གཞུང་དྲང་གཤིས་འཇམ་ཞིག་ཡིན་འདུག
མེར་བསྲེགས་གནས་ཚུལ་དེ་བྱུང་མ་ཐག་ལོ་ན་ལྔ་ཅུ་ནས་དྲུག་ཅུ་བརྒལ་བའི་ཁོང་མོའི་ཕ་མ་གཉིས་ཀྱང་རྒྱ་གཞུང་ཉེན་རྟོག་པས་བཙན་འཁྲིད་བྱས་ཡོད་ཀྱང་། ད་ཆར་མུ་མཐུད་བཀག་བསྐྱིལ་བྱས་ཡོད་མེད་ཤེས་རྟོགས་ཐུབ་མི་འདུག གནས་ཚུལ་གཏོང་མཁན་བཞུགས་སྒར་ཀིརྟིའི་བྱེས་པ་གྲ་ཚང་གི་བོད་ནས་འབྲེལ་མཐུད་པ་བློ་བཟང་ཡེ་ཤེས་དང་ཀ་ཉག་ཚེ་རིང་།
གསར་འགོད་པ། པདྨ་མཚོ།
རང་ལུས་མེར་བསྲེག་གི་ངོ་རྒོལ་བྱ་ཐབས་དེ་ནི་གཞན་ལ་གནོད་འཚེ་མི་ཕོག་པའི་ཚད་མཐོ་བའི་ངོ་རྒོལ་བྱ་ཐབས་ཤིག་རེད། བྱ་ཐབས་དེའི་ཁ་གཏད་ནི་ལོ་ངོ་དྲུག་ཅུ་ལྷག་གི་རིང་རྒྱ་ནག་གི་བོད་ཐོག་འཛིན་པའི་དྲང་བདེན་མ་ཡིན་པའི་སྲིད་ཇུས་དེ་ཡིན།
རང་ལུས་མེར་སྲེག་མ་གཏོང་།།
གཞན་ལུས་གནོད་པ་མ་བསྐྱལ།།
རང་ཉིད་འཚོ་བཞུགས་ཐོག་ནས།།
གཞན་གྱི་དབང་ལས་རྒྱལ་དགོས།།
བོད་པས་བོད་མིའི་སྲོག་སྐྱོབས་དགོས།།
བོད་པས་རྒྱ་མིར་གནོད་མ་བསྐྱལ།།
རང་ས་རང་གིས་བཟུང་བའི་ཐོག།
རང་ཐག་རང་གཅོད་ལ་བརྩོན་དགོས།།