དོལ་རྒྱལ་བསྟེན་མཁན་ཚོའི་དགོན་པའི་ནང་ངོས་རང་འགྲོ་ཐབས་རྩ་བ་ནས་མེད།

༧གོང་ས་མཆོག་གིས་རྒྱ་གར་ལྷོ་ཕྱོགས་དགའ་ལྡན་བྱང་རྩེ་གྲྭ་ཚང་དུ་བྱང་ཆུབ་ལམ་རིམ་ཆེན་མོའི་བཀའ་ཆོས་འཕྲོར་སྐྱོང་གནང་གི་ཡོད་པ་དང་བསྟུན་ཏེ། ཕྱི་ཚེས་ ༢༦ ཉིན་གྱི་སྔ་དྲོར་བྲག་གཡབ་རིན་པོ་ཆེ་བློ་ལྡན་ཤེས་རབ་མཆོག་གིས་དབུ་ཁྲིད་དེ་བྲག་གཡབ་སེར་སྐྱ་མང་ཚོགས་ཀྱིས་བརྟན་བཞུགས་འབུལ་སྐབས་༸གོང་ས་མཆོག་གིས་དོལ་རྒྱལ་སྐོར་ལ་གསུང་བཤད་གནང་བ་ཞིག་འདིར་བསྡུ་སྒྲིག་བྱས་ཡོད།

༧གོང་ས་མཆོག་གིས་བཀའ་གནང་དོན། བྲག་གཡབ་རིན་པོ་ཆེ་ཆུང་ཆུང་སྐབས་ནས་ལྷ་སའི་སྨོན་ལམ་གྱི་ཚོགས་མི་ཡིན་པ་ཡོད། སྐབས་དེ་དུས་ནས་ངོ་ཤེས་ཀྱི་ཡོད། འདིར་རྒྱ་གར་དུ་བསླེབས་ནས་རིན་པོ་ཆེས་ལས་འགན་རིམ་པར་འཁྱེར་ནས་ཧུར་ཐག་འབད་ཐག་བྱས་སོང་། བར་སྐབས་རིན་པོ་ཆེ་ཇར་མན་དུ་བཞུགས་ནས་གང་ཐུབ་ཀྱིས་བོད་ཀྱི་ཆོས་དང་རིག་གཞུང་ལ་དོ་སྣང་བྱེད་མཁན་ཚོར་ཁོང་ཚོའི་རེ་འདོད་བཀོང་རྒྱུ་དང་། བར་སྐབས་བོད་ཁང་གཅིག་བཙུགས་ནས་ཁ་སེང་ངོས་རང་དེར་ཕྱིན་པ་ཡིན། ཧུར་ཐག་འབད་ཐག་བྱས་པ་རེད། རྙོག་གྲ་གཅིག་རིན་པོ་ཆེ་ཐོག་མ་དོལ་རྒྱལ་བསྟེན་གྱི་ཡོད། ངོས་ནས་ཀྱང་བསྟེན་པ་རེད། ཕྱིས་སུ་ངོས་ཀྱིས་དེར་སྲེག་བཅད་བརྡར་གསུམ་གྱི་དཔྱད་པ་ཧ་ཅང་ཞིབ་ཚགས་པོ་བྱས་པ་ཡིན། ང་ཚོའི་དཔྱད་པ་གསུམ་གྱིས་དག་པ་ཟེར་བ་དེའི་ཐོག་ནས་བརྟག་དཔྱད་བྱས་རྗེས་དངོས་གནས་ཡིན་ལུགས་གང་འདྲ་ཡིན་མིན་ངོས་ཀྱིས་མར་གསལ་པོ་ཆགས་ཡོང་དུས་རིན་པོ་ཆེས་ཐེ་ཚོམ་སོམ་གཉིས་མེ་པར་ངོས་ཀྱིས་རྒྱུ་མཚན་ལྡན་པའི་སྒོ་ནས་རྒྱལ་བའི་དགོངས་པ་སྤྱི་དང་འཇམ་མགོན་བླ་མ་ཡབ་སྲས་ཀྱི་དགོངས་པ་དང་མཐུན་པའི་ལམ་སྟོན་བྱས་པ་དེར་རིན་པོ་ཆེས་ཤར་བསྐྱོད་གནང་ནས་ཧུར་ཐག་འབད་ཐག་གནང་སོང་། དེར་བརྟེན་རིན་པོ་ཆེར་དམིགས་བསལ་གྱི་ལྟ་སྐྱོང་བྱེད་དགོས་རྒྱུའི་འགན་ཞིག་ངོས་ལ་ཡོད། ཚུར་བརྒྱ་ཆ་བརྒྱ་ཐམ་པ་བློ་འགེལ་བྱས་ན་དེ་ལ་དཔགས་པ་ཕར་ལྟ་སྐྱོང་བྱེད་དགོས་ཀྱི་རེད། ཅེས་དང་། ཁྱེད་རང་ཚོ་བྲག་གཡབ་པ་བྱེས་དང་བོད་ནང་དུ་ཡོད་མཁན་ཚོ་ཡིན་ནའང་འདྲ། དེ་ཚོའི་གྲས་བློ་གཟུ་བོར་གནས་པའི་ཐོག་ནས་དཔྱད་དགོས། རྨོངས་དད་དང་ལྐུག་པ་དེ་འདྲ་བྱ་རྒྱུ་མེད། ཤེས་སོང་ངམ། དངོས་གནས་དྲང་གནས་ཀྱི་རྒྱུ་མཚན་གང་འདུག་དེར་བསམ་བློ་གཏོང་དགོས། ཞེས་གསུངས་འདུག

ཁོང་གིས་མུ་མཐུད་དུ་གསུངས་དོན། སྔ་མོ་འདིར་ཤར་རྩེ་གྲྭ་ཚང་གིས་དོལ་རྒྱལ་བསྟེན་སྐབས་ཤར་རྩེ་གྲྭ་ཚང་གི་ཚོགས་ཁང་རྙིང་པའི་ནང་ངོས་ཀྱིས་འདི་ལྟར་བརྗོད་རྒྱུ་བྱུང་། ཁྱེད་ཚོ་བགྲེས་པ་ཚོས་ཕལ་ཆེར་དྲན་གྱི་ཡོད་ངེས་རེད། ཁྱེད་ཚོས་དོལ་རྒྱལ་བསྟེན་གསོལ་མཚམས་བཞག་ནས་གཙང་མ་བྱས་ན་འགྲིག་པ་རེད། འོན་ཀྱང་ཁྱེད་ཚོས་དོལ་རྒྱལ་བསྟེན་གསོལ་མཚམས་འཇོག་མ་བྱས་པར་དེ་མུར་བསྡད་པ་ཡིན་ན། ངོས་རང་ཕྱིན་ཆད་ཤར་རྩེ་གྲྭ་ཚང་དུ་གོམ་པ་སྤོ་རྒྱུ་མིན། ཞེས་ངོས་ཀྱིས་བརྗོད་པ་དེ་དྲན་གྱི་འདུག་གམ། ཤར་རྩེ་མཁན་པོས་དྲན་གྱི་འདུག་གམ། དེ་རིང་འདིར་ཡང་དེ་མཚུངས་བརྗོད་རྒྱུ་ཡིན། ཁྱེད་ཚོས་ངོས་ལ་ཡོང་རོགས་བརྗོད་ཀྱི་ཡོད་ཀྱང་༸རྒྱལ་བ་རིན་པོ་ཆེའི་སྲོག་ལ་ཉེན་ཁ་བརྩི་དགོས་རྒྱུ་གཅིག་ལ་ངོས་རང་ག་རེ་བྱས་ནས་འགྲོ་དགོས་སམ། འགྲོ་ཤེས་ཀྱི་མ་རེད། རྒྱ་གར་གཞུང་ལ་ཆ་མཚོན་ནའང་སྲུང་སྐྱོབ་དེ་དག་ཧ་ཅང་ཤུགས་ཆེ་རུ་གཏོང་གི་འདུག ངོས་རང་ཕྱི་རྒྱལ་གང་དུ་བསྐྱོད་ཀྱང་དོལ་རྒྱལ་ཚོགས་པའི་ཐོག་ནས་རྒྱལ་བ་རིན་པོ་ཆེའི་སྲོག་ལ་ཉེན་ཁ་ཡོད་པ་ཞིག་ཏུ་བརྩི་བཞིན་འདུག དེར་བརྟེན། དེ་འདྲ་ཞིག་ལ་ངོས་རང་ག་རེ་བྱས་ནས་འགྲོ་དགོས་པ་རེད། ཁྱེད་ཚོས་ངོས་སྐད་གཏོང་གི་ཡོད་ཀྱང་འགྲོ་དང་མི་འགྲོ་འདི་ངོས་ཀྱི་རང་དབང་རེད། འགྲོ་བ་ལ་འགྲོ་སྟངས་ཡོད། དངོས་གནས་ཁ་ལ་ཉན་མཁན་ཞིག་དང་དད་པ་དམ་ཚིག་ཡོད་པ་ཞིག་ཡིན་ན་བླ་མ་ཕྱིན་ན་དགོས་པ་ཡོད། དད་པ་དམ་ཚིག་མེད་ན་ངོས་རང་ཅིའི་ཕྱིར་འགྲོ་དགོས་པ་རེད། ཅེས་དང་།

ཡང་ཁོང་གིས་མུ་མཐུད་དུ། དེང་སང་ཆབ་མདོར་དོལ་རྒྱལ་ཤུགས་ཆེན་པོ་གང་འཚམ་བསྟེན་བཞིན་འདུག ཡག་པོ་ཞེ་དྲག་རེད། ཁོ་པ་ཚོས་ཤུགས་ལྡན་བསྟེན་ནས་ཕན་ཐོགས་འདུག་ན་རྗེས་སུ་ཡི་རངས་ཡོད་ཁྱད་གང་ཡང་མེད། འོན་ཀྱང་ངོས་རང་འགྲོ་རྒྱུ་ནམ་ཡང་ཡོང་གི་མ་རེད། གཞིས་བྱེས་མཉམ་འཛོམས་ཤིག་ཡོང་མདོག་ཁ་པོ་རེད། དེ་བྱུང་མཚམས་དོལ་རྒྱལ་བསྟེན་མཁན་ཚོའི་དགོན་པའི་ནང་ངོས་རང་འགྲོ་ཐབས་རྩ་བ་ནས་མེད། ངོས་རང་སྐད་བཏང་ཡང་ངོས་ཀྱི་ཁ་ལ་མ་ཉན་ན་ཆོད་གང་ཡང་མེད། ཁྲི་བྱང་རིན་པོ་ཆེའི་ཡང་སྲིད་མཆོག་སྤྲུལ་རིན་པོ་ཆེ་སྔ་མོ་ནས་ཁྱེད་ཚོས་ཤེས་ཀྱི་རེད། ངོས་ཀྱིས་རིན་པོ་ཆེའི་སྐོར་ལ་ཁུར་ཧ་ཅང་བླངས་པ་ཡིན། ཁྲི་བྱང་རིན་པོ་ཆེ་ཉེ་ལམ་སོག་ཡུལ་ལ་ཕེབས་འདུག སོག་ཡུལ་ལ་ཕེབས་སྐབས་རྒྱལ་བའི་ཡོངས་འཛིན་གྱི་ཡང་སྲིད་ཡིན། ཞེས་༸རྒྱལ་བ་རིན་པོ་ཆེའི་མིང་དེ་འཁྱེར་དགོས་ཀྱི་ཡོད་པ་དང་། ཡང་ཨ་རིའི་ནང་ངོས་རང་རྒྱལ་དབང་རྫུན་མ་རེད། ཅེས་བརྗོད་ཀྱི་ཡོད་པ་རེད། ངོས་རང་རྫུན་མ་ཡིན་ན་འགྲིག་འདུག ངོས་རང་རྒྱལ་དབང་རྫུན་མ་རེད། ཅེས་རྒྱལ་དབང་གི་ཁྲི་འདི་ནས་དགོངས་པ་ཞུ་རྒྱུ་ཞིག་རག་རོགས་བྱས་ནས་ཧ་ཅང་ཡག་པོ་འདུག དེ་འདྲ་བྱུང་ན་ངོས་རང་ཁ་འདོན་དགེ་སྦྱོང་འདྲ་བྱས་ནས་སྡོད་རྒྱུ་བྱུང་ན་ཧ་ཅང་ཡག་པོ་འདུག ཅེས་སོགས་གསུངས་འདུག

པདྨ་མཚོས་བསྡུ་སྒྲིག་བྱས།