དྲག་སྤྱོད་པས་གྲོས་མོལ་བྱེད་རྒྱུ་མིན་ཟེར།

དེ་རིང་ཧྥ་རན་སིའི་ཉེན་རྟོག་པས་རྒྱལ་སར་གཏོར་རྒོལ་གཏོང་མཁན་གྱི་འཇིགས་སྐུལ་དྲག་སྤྱོད་པ་གཉིས་ཀྱི་མཐའ་བསྐོར་ནས་གྲོས་མོལ་བྱེད་རྒྱུའི་དགོས་འདུན་བཏོན་ཡོད་ཀྱང་ཁོ་གཉིས་ཀྱིས་དང་ལེན་བྱས་མི་འདུག

ཟླ་འདིའི་ཚེས་ ༧ ཉིན་ཧྥ་རན་སིའི་རྒྱལ་སར་བརྟེན་གཞི་བྱས་པའི་ཆར་ལི་ཧབ་ཏོ་ཟེར་བའི་གསར་ཁང་དུ་གློ་བུར་དུ་ལག་ཏུ་མེ་མདའ་བཟུང་པའི་འཇིགས་སྐུལ་དྲག་སྤྱོད་པ་གཉིས་འཛུལ་ཏེ། ཆར་ལི་ཧབ་དོ་(Charlie Hebdo)ཟེར་པའི་ཟུར་ཟའི་ཚགས་དེབ་རྩོམ་སྒྲིག་པ་དང་གསར་འགོད་པ་བཅུ་དང་། སྐོར་སྲུང་བ་གཉིས་བཅས་མི་ ༡༢ སྡེབ་གསོད་བྱས་རྗེས་བྲོས་ཡོད་འདུག

ཧྥ་རན་སི་གཞུང་དམངས་གཉིས་ཀྱིས་འདས་པོ་དེ་དག་ལ་མྱ་ངན་དང་། དྲག་སྤྱོད་པ་ཚོས་ག་རེ་བྱས་ཀྱང་ཧྥ་རན་སིའི་གསར་འགོད་རང་དབང་འགོད་ཐབས་མེད་བརྗོད་ཡོད་དང་། དེ་རིང་ཧྥ་རན་སིའི་མི་མང་སྟོང་ཕྲག་མང་པོ་རྒྱལ་སའི་མདུན་ཐད་དུ་འཛོམས་ཏེ་གསར་ཁང་དེར་གདུང་སེམས་མཉམ་སྐྱེད་དང་ཁ་ཆེ་འཇིགས་སྐུལ་དྲག་སྤྱོད་པ་ཚོ་རྩ་མེད་བཟོ་དགོས་པའི་རྔམ་སྟོན་བྱས་ཡོད་འདུག

ཁ་སང་ཧྥ་རན་སིའི་གཞུང་གིས་འཇིགས་སྐུལ་དྲག་སྤྱོད་པར་དོགས་པ་ཡོད་པའི་མི་ ༧ འཛིན་བཟུང་བྱས་ཡོད་ཀྱང་། ད་དུང་གསར་ཁང་ལ་དྲག་སྤྱོད་སྤེལ་མཁན་རང་ལོ་ ༣༤ ཡིན་པའི་ཤེ་རིབ་ཁཱོ་ཝ་ཆཱི་(Cherif Kouachi)དང་། རང་ལོ་ ༣༣ ཡིན་པའི་ས་ཡི་ཌཱ་ཁཱོ་ཝ་ཆཱི་(Said Kouachi)ཕུ་ནུ་གཉིས་འཛིན་བཟུང་བྱེད་ཐུབ་མེད་སྟབས། ཧྥ་རན་སི་གཞུང་གིས་ཉེན་རྟོག་པ་དང་དམག་མི་ ༨༠༠༠༠ བཏང་སྟེ་རྒྱལ་ས་དང་རྒྱལ་སའི་ཉེ་འདབས་ས་ཁུལ་ཁག་ཡོངས་རྫོགས་བརྟན་སྲུང་བྱས་ཡོད་འདུག

འཇིགས་སྐུལ་བ་དེ་གཉིས་ཀྱིས་དྲག་སྤྱོད་ལས་དོན་དེ་སྤེལ་རྗེས་བྲོས་ཡོད་པ་དང་། ཁོ་གཉིས་ཀྱིས་མི་གཞན་ ༥ ཙམ་བཙན་འཁྲིད་བྱས་ཏེ། གྲོང་འཁྱེར་དཀྱིལ་གྱི་ཌམ་མར་ཊེན་གྷེལ་()ཞེས་པའི་ཁང་རྩེག་ནང་འཛུལ་ཡོད་སྟབས། དེ་རིང་ཧྥ་རན་སིའི་ཉེན་རྟོག་པས་དྲག་སྤྱོད་པ་དེ་གཉིས་ཡིབ་སྡོད་བྱེད་སའི་མཐའ་བསྐོར་ཏེ། གྲོས་མོལ་བྱེད་རྒྱུའི་དགོས་འདུན་བཏོན་ཡོད་ཀྱང་། དྲག་སྤྱོད་པ་དེ་གཉིས་ཀྱིས་ཀྱིས་སོ་སོའི་རང་སྲོག་གཅོད་རྒྱུ་ལས་གྲོས་མོལ་བྱེད་རྒྱུ་མིན་སྐོར་བརྡ་ལན་སྤྲད་ཡོད་འདུག

འདིའི་ཐད་ཧྥ་རན་སིའི་སྲིད་འཛིན་ཧོ་ལན་ཌི་མཆོག་གིས། “ད་ལྟ་ཉེན་རྟོག་པས་འཇིགས་སྐུལ་རིང་ལུགས་པ་གཉིས་ཡིབ་སྡོད་བྱེད་སར་མཐའ་བསྐོར་ནས་མགོ་བཏགས་ཞུ་དགོས་སྐོར་བརྗོད་ཀྱང་། ཁོ་གཉིས་ཀྱིས་མགོ་བཏགས་ཞུས་པ་ལས་སྤོབས་པ་ཆེན་པོའི་ཐོག་ནས་རང་སྲོག་གཅོད་རྒྱུ་ཡིན་སྐོར་ཚུར་བརྡ་ལན་སྤྲོད་བཞིན་ཡོད་སྟབས། ང་ཚོས་ཆུ་ཚོད་གཉིས་ནང་ཚུད་དུ་གང་བྱེད་དགོས་མིན་ཐག་གཅོད་བྱེད་རྒྱུ་ཡིན”ཞེས་བརྗོད་འདུག 

ཧྥ་རན་སིའི་རྒྱལ་སའི་དོན་རྐྱེན་དེ་བྱུང་རྗེས་ཨ་རིའི་སྲིད་འཛིན་ཨོ་བྷ་མ་དང་། དབྱིན་ཡུལ་གྱི་སྲིད་བློན་ཀེམ་རོན་སོགས་རྒྱལ་ཁབ་ ༢༥ ཙམ་གྱིས་གདུང་སེམས་མཉམ་སྐྱེད་ཀྱི་ཞུ་ཡིག་ཕུལ་ཏེ། འཇིགས་སྐུལ་དྲག་སྤྱོད་པར་ཁ་གཏད་ལྕོག་རྒྱུར་རོགས་རམ་གང་དགོས་གནང་རྒྱུ་ཡིན་པའི་ཁས་ལེན་བྱས་ཡོད་འདུག

དེ་རིང་བོད་མིའི་སྒྲིག་འཛུགས་ཀྱིས་ཀྱང་ཧྥ་རན་སི་གཞུང་ལ་ཧྥ་རན་སིའི་རྒྱལ་སར་མི་གསོད་དོན་རྐྱེན་བྱུང་བར་སེམས་ཚོར་ཆེན་པོས་སེམས་གསོ་ཞུ་བཞིན་ཡོད་པ་དང་། ལྷག་པར་དུ་གོད་ཆག་དེའི་འོག་འདས་གྲོངས་སུ་གྱུར་བ་དང་རྨས་སྐྱོན་ཕོག་པའི་ཉེ་འབྲེལ་ནང་མི་སྤུན་མཆེད་རྣམས་ལ་སེམས་གསོ་དང་སྨོན་ལམ་ཞུ་རྒྱུ། སྨྲ་བརྗོད་རང་དབང་ནི་འཇིག་རྟེན་ཀུན་ལ་ཁྱབ་པ་ཞིག་ཡིན་སྟབས། དེར་འཚེ་བའི་ལམ་ནས་འགོག་ཐབས་བྱས་པ་ནི་ཐབས་སྡུག་གི་གནས་ཚུལ་ཞིག་ཡིན་སྐོར་སོགས་བརྗོད་འདུག

གནད་དོན་དབྱེ་ཞིབ་པ་ཚོས། འཇིགས་དྲག་སྤྱོད་པ་དེ་གཉིས་ཀྱིས་མི་མང་པོ་བསད་ཡོད་སྟབས། གཞུང་གིས་གྲོས་མོལ་བྱེད་པ་ལས། ཐད་ཀར་དམར་གསོད་བཏང་སྟེ་འདས་པོ་ཚོའི་ནང་མིར་སེམས་གསོ་གཏོང་ཐབས་བྱེད་དགོས་པ་དང་། ཡང་ཁག་ཅིག་གིས་ད་ལྟ་འཇིགས་སྐུལ་རིང་ལུགས་པའི་ལག་པར་མི་ཁག་ཅིག་ཉར་ཡོད་སྟབས། གྲོས་མོལ་བརྒྱུད་མི་དེ་དག་གི་ཚེ་སྲོག་ཐར་ཐབས་བྱེད་གལ་ཆེ་སྐོར་སོགས་བརྗོད་འདུག

གསར་འགོད་པ། དོན་གྲུབ།