གཟའ་པ་སང་ཉིན་ཡུག་རེན་གྱེན་ལོག་ཤོག་ཁག་དང་ཡུག་རེན་གྱི་དམག་དཔུང་བར་དམག་འཐབ་བྱུང་སྟེ་ཡུག་རེན་གྱི་དམག་མི་གཉིས་བསད་ཡོད་འདུག
གཟའ་པ་སང་ཉིན་ཡུག་རེན་དམག་མི་དང་ཨུ་རུ་སུར་རྒྱབ་སྐྱོར་བྱེད་མཁན་ཡུག་རེན་གྱེན་ལོག་ཤོག་ཁག་བར་ཌོ་ཎེ་ཌི་སེ་ཁཱ་ (Donetsk) གྲོང་ཁྱེར་ནང་རྟེན་གཞི་བྱས་པའི་རྒྱལ་སྤྱིའི་གནམ་ཐང་དུ་གདུང་ཐུག་བྱུང་སྟེ། ཡུག་རེན་གྱི་དམག་མི་གཉིས་བསད་ཡོད་པ་དང་གཞན་མི་ ༡༡ ལ་རྨས་སྐྱོན་བཏང་ཡོད་འདུག
འདིའི་ཐད་ཡུག་རེན་དམག་དཔུང་གི་མགྲིན་ཚབ་པ་ཨཱན་ཌེར་ཡཱ་ལེ་སན་ཁཱོ་ (Andriy Lysenko) ཡིས། “ཁ་སང་ཁ་ཉིན་ཡུག་རེན་གྱེན་ལོག་ཤོག་ཁག་གིས་ཌོ་ཎེ་ཌི་སེ་ཁཱ་གྲོང་ཁྱེར་ཉེ་འདབས་ཀྱི་ས་ཁུལ་ཁག་ཅིག་ནང་མེ་མདའ་བརྒྱབ་པ་དང་སྒྱོགས་མདེལ་འཕངས་པ་སོགས་བྱས་ཏེ། དམག་མི་ ༦ བསད་པ་དང་གཞན་མི་ ༡༨ ལ་རྨས་སྐྱོན་བཏང་ཡོད་པ་མ་ཟད། ཡུག་རེན་ཤར་ཕྱོགས་ས་ཁུལ་ལུ་ཧན་སེ་ཁཱ་ཡི་ཧྥ་ཤཱི་ཆེ་ཝ་ཁཱ་ (Fashchevka) གྲོང་བརྡལ་ཐོག་མེ་སྒྱོགས་བརྒྱབ་སྟེ་མི་གཅིག་བསད་འདུག”ཅེས་བརྗོད་འདུག
ཉིན་དེའི་དགོང་མོ་ཡུག་རེན་གྱེན་ལོག་ཤོག་ཁག་གིས་བསྒྲགས་གཏམ་ཞིག་སྤེལ་བའི་ནང་། ཁོ་ཚོས་ཌོ་ཎེ་ཌི་སེ་ཁཱ་གྲོང་ཁྱེར་གྱི་རྒྱལ་སྤྱིའི་གནམ་ཐང་གི་དོ་དམ་ཡོངས་རྫོགས་ཁོ་ཚོའི་ལག་འོག་ཏུ་ཚུད་གྲབས་བྱེད་བཞིན་ཡོད་ཅེས་བསྒྲགས་ཡོད་སྟབས། དེའི་རྗེས་ཡུག་རེན་དམག་དཔུང་གི་མགྲིན་ཚབ་པ་ཨཱན་ཌེར་ཡཱ་ལེ་སན་ཁཱོ་ཡིས་འདས་ པའི་ཟླ་ཤས་རིང་གྱེན་ལོག་ཤོག་ཁག་གིས་གནམ་ཐང་རྩ་མེད་བཟོ་གྲབས་བྱས་ཡོད་ཀྱང་། ད་ལྟ་ང་ཚོའི་དོ་དམ་འོག་བདག་སྐྱོང་བྱེད་བཞིན་ཡོད་ཅེས་བརྗོད་འདུག
བདུན་ཕྲག་སྔོན་མ་ནས་བཟུང་ཡུག་རེན་དཔུང་དམག་དང་གྱེན་ལོག་ཤོག་ཁག་བར་སླར་དམག་འཁྲུག་བྱུང་སྟེ། ཟླ་འདིའི་ཚེས་ ༡༣ ཉིན་ཡུག་རེན་གྱེན་ལོག་ཤོག་ཁག་གིས་ཌོ་ཎེ་ཌི་སེ་ཁཱ་གྲོང་ཁྱེར་གྱི་ལྷོ་ངོས་སུ་འགྲོ་བཞིན་ཡོད་པའི་སྤྱི་སྤྱོད་རླངས་འཁོར་ཞིག་ལ་སྒྱོགས་མདེལ་འཕངས་ཏེ་མི་ ༡༣ བསད་པ་མ་ཟད། ཚེས་ ༡༤ ཉིན་ཡུག་རེན་གྱི་དམག་སར་མེ་སྒྱོགས་བརྒྱབ་ནས་དམག་མི་ ༢ བསད་ཡོད་པ་དང་། གཞན་མི་ ༤ ལ་རྨས་སྐྱོན་བཏང་བ་སོགས་བྱས་ཏེ། ད་བར་ཡུག་རེན་དམག་འཁྲུག་ཁྲོད་ཉེས་མེད་མི་སེར་ ༤༨༠༠ ལྷག་བསད་ཡོད་འདུག ཡུག་རེན་གཞུང་དང་ཡུ་རོབ་མཐུན་ཚོགས་གཙོས་ནུབ་ཕྱོགས་རྒྱལ་ཁག་གིས་དོན་རྐྱེན་དེ་དང་ཨུ་རུ་སུ་འབྲེལ་བ་ཡོད་སྐོར་ཐེངས་མང་བརྗོད་ཡོད་ཀྱང་ཨུ་རུ་སུ་ཕྱོགས་ནས་ཁས་ལེན་བྱས་མི་འདུག
གཟའ་ཕུར་བའི་ཉིན་ཡུག་རེན་གཞུང་དམངས་གཉིས་ཀྱིས་ཟླ་འདིའི་ཚེས་ ༡༣ ཉིན་ཡུག་རེན་གྱེན་ལོག་ཤོག་ཁག་གིས་སྒྱོགས་མདེལ་འཕངས་ཏེ་རྐྱེན་ལམ་ཕྱིན་པ་དག་ལ་གཞུང་འབྲེལ་མྱ་ངན་ཞུས་རྗེས། ཡུག་རེན་ཕྱི་སྲིད་ལྷན་ཁང་གི་དྲུང་ཆེ་ཨོ་ལེག་སན་ཌར་(Oleksander Turchynov) གྱིས་གྲོས་ཚོགས་ནང་ཨུ་རུ་སུས་ཡུག་རེན་ལ་མུ་མཐུད་བཙན་འཛུལ་བྱེད་བཞིན་ཡོད་པ་མ་ཟད། ཡུག་རེན་ཤར་ཕྱོགས་ས་ཁུལ་དུ་དམག་མི་ ༨༥༠༠ ཙམ་འགྲེམས་འཇོག་བྱས་ཏེ། རྒྱལ་ཁབ་ཀྱི་བརྟན་ལྷིང་སྲུང་སྐྱོབ་ལ་གཏོར་རྒོལ་དང་བདག་དབང་གནད་དོན་ལ་ཐེ་ཇུས་བྱེད་བཞིན་ཡོད་སྐོར་བརྗོད་པ་དང་འབྲེལ། གཞུང་ཕྱོགས་ནས་དམག་དོན་འཕེལ་རྒྱས་གཏོང་ཆེད་གྲོས་ཆོད་ཅིག་འཇོག་དགོས་པའི་དགོས་འདུན་བཏོན་ཡོད་སྟབས། གྲོས་ཚོགས་ངོས་ནས་དམག་དོན་སྔོན་རྩིས་མང་དུ་གཏོང་རྒྱུའི་གྲོས་ཆོད་ཅིག་དང་། དེ་བཞིན། ཡུ་རོབ་གྲོས་ཚོགས་ཀྱིས་ཨུ་རུ་སུའི་བྱ་སྤྱོད་དེ་ནི་རྒྱ་སྐྱེད་རིང་ལུགས་པ་དང་དྲག་སྤྱོད་པའི་བྱེད་སྟངས་ཤིག་ཡིན་ཡིན་སྐོར་གྱི་སྐྱོན་འཛུགས་གྲོས་ཆོད་ཅིག་བཅས་བཞག་ཡོད་འདུག
ཉེ་ལམ་ནས་བཟུང་ད་བར་ཡུག་རེན་གཞུང་གིས་གྱེན་ལོག་ཤོག་ཁག་དང་ཞི་རྒོལ་བརྒྱུད་དཀའ་རྙོག་སེལ་ཐབས་བྱེད་བཞིན་ཡོད་པ་མ་ཟད། ཟླ་འདིའི་ཚེས་ ༡༥ ཉིན་ཡུག་རེན་ཕྱི་སྲིད་ལྷན་ཁང་གིས་བསྒྲགས་གཏམ་ཞིག་སྤེལ་ཏེ། དེ་རིང་ཡུག་རེན་གཞུང་གི་སྐུ་ཚབ་དང་གྱེན་ལོག་ཤོག་ཁག་གི་སྐུ་ཚབ་བར་བྷེ་ལ་རུ་སི་ (Belarus) རྒྱལ་ས་མིན་སེ་ཁཱེ་ (Minsk) རུ་ཐུག་སྟེ་ཞི་མོལ་བྱ་རྒྱུ་ཡིན་སྐོར་བརྗོད་ཡོད་ཀྱང་། ཁ་སང་ཡུག་རེན་གྱི་བརྒྱུད་ལམ་ཨིན་ཌར་ཧྥེག་སི་ (Interfax) ཟེར་བའི་ནང་ཡུག་རེན་དང་གྱེན་ལོག་ཤོག་ཁག དེ་བཞིན། ཡུ་རོབ་བདེ་འཇགས་མཉམ་འབྲེལ་ཚོགས་པའི་འཐུས་མི་ལས་གྲུབ་པའི་༼འབྲེལ་མོལ་ཚོགས་ཆུང་༽ཞེས་པས་གནས་ཚུལ་འགོད་སྤེལ་བྱས་པའི་ནང་། ད་ཐེངས་གྱེན་ལོག་ཤོག་ཁག་གིས་གྲོས་མོལ་བྱེད་བར་མི་གཉིས་བཏང་ཡོད་ཀྱང་། འདས་ལོའི་ཟླ་ ༩ ནང་མིན་སེ་ཁཱེ་ནང་ཡུག་རེན་གཞུང་དང་མེ་འཕེན་མཚམས་འཇོག་གྲོས་མཐུན་འཇོག་མཁན་གྱི་མི་སྣ་གཉིས་བཏང་མེད་སྟབས། ད་ཐེངས་ཀྱི་གྲོས་མོལ་ལ་གྲུབ་འབྲས་གང་ཡང་འཐོན་གྱི་མ་རེད་ཅེས་བརྗོད་འདུག
ཆབ་སྲིད་དབྱེ་ཞིབ་པ་ཚོས། དེ་སྔོན་ཨུ་རུ་སུར་ཡུ་རོབ་མཐུན་ཚོགས་དང་ཨ་རིས་དཔལ་འབྱོར་ཉེས་ཆད་བཅད་དེ། དངུལ་གྱི་ཛ་ཐང་འཛག་ནས་དཔལ་འབྱོར་ཉམས་ཉེས་ཆེན་པོ་བྱུང་བཞིན་ཡོད་ཀྱང་། ད་དུང་ཡུག་རེན་གྱེན་ལོག་ཤོག་ཁག་ལ་རྒྱབ་སྐྱོར་བྱེད་བཞིན་ཡོད་པ་དེ་ནི། སོ་སོའི་ཐོ་བ་སོ་སོའི་རྐང་པར་གཞུས་པ་ཞིག་ཡིན་སྐོར་བརྗོད་འདུག
གསར་འགོད་པ། དོན་གྲུབ།
