རྒྱ་ནག་དབུས་སྒྲིག་ཁྲིམས་ཞིབ་བཤེར་ལྷན་ཁང་གིས་འདི་ལོའི་ཕྱི་ཟླ་ ༡ པོའི་ནང་ཁྱོན་ཉེས་དོན་ ༡༦༥༠ རྩད་ཆོད་དེ་ཏང་ཡོན་ལས་བྱེད་པ་ ༡༤༠༦ ཏང་ནང་ནས་ཕྱིར་འབུད་བཏང་ཡོད་ཟེར།
ཁ་སང་རྒྱ་ནག་དབུས་སྒྲིག་ཁྲིམས་ཞིབ་བཤེར་ལྷན་ཁང་གི་དྲ་བའི་ཐོག་གནས་ཚུལ་སྤེལ་བ་ལྟར་ན། རྒྱ་ནག་རྒྱལ་ཡོངས་ནང་རྟོག་ཞིབ་བྱས་པ་བརྒྱུད་འདི་ལོའི་ཕྱི་ཟླ་ ༡ པོའི་ནང་གཅིག་པུར་དབུས་ཀྱི་གཏན་འབེབས་དོན་ཚན་ ༨ དང་འགལ་བའི་ཉེས་དོན་ ༡༦༥༠ རྩད་ཆོད་དེ། འབྲེལ་ཡོད་ཉེས་ཅན་ ༢༡༣༣ ལ་རིམ་པ་འདྲ་མིན་གྱི་ཐག་གཅོད་བྱས་ཡོད་པ་དང་། དེའི་ནང་ནས་ཏང་ཡོན་ལས་བྱེད་པ་ ༡༤༠༦ ཏང་ནང་ནས་ཕྱིར་འབུད་བཏང་ཡོད་འདུག
ཐེངས་འདིར་རྩད་ཆོད་བྱུང་བའི་ཉེས་དོན་ཁྲོད་གཞུང་གི་རླངས་འཁོར་སྒེར་སྤྱོད་བྱས་པའི་གནད་དོན་ ༥༦༥ དང་། མང་ཕན་རོགས་སྐྱོབ་དངུལ་རྒྱུ་བགོ་འགྲེམས་ཐད་ཀྱི་གནད་དོན་ ༢༧༢། རྒྱས་སྤྲོས་ཆེ་བའི་གཉེན་སྟོན་དུས་སྟོན་ལ་རོལ་བ་ ༢༤༨། ལྐོག་རྔན་བླངས་པ་ ༡༨༨། གཞུང་དངུལ་བེད་སྤྱད་དེ་ཡུལ་སྐོར་སྤྲོ་འཆམ་དུ་ཕྱིན་པ་ ༡༣༧། དེ་བཞིན། མགོ་ཁྲིད་ཚོའི་སྡོད་ཁང་གནད་དོན་ ༡༢༨ བཅས་ཚུད་ཡོད་འདུག
འདི་ལོའི་ཕྱི་ཟླ་ ༡ པོའི་ནང་ནས་བཟུང་རྒོལ་རྡུང་གཏོང་བའི་ལྐོག་ཟ་རུལ་སུངས་ཀྱི་གནད་དོན་ཁག་ཅིག་ལ་བཅོས་སྒྲིག་བྱས་ཡོད་པའི་ནང་། བྱ་བའི་སྒྲིག་ཁྲིམས་དང་འགལ་བ་ཞེས་པ་མེད་པར་བཟོས་ཏེ་མང་ཕན་རོགས་སྐྱོབ་དངུལ་དངོས་བགོ་འགྲེམས་ཁྲིམས་འགལ་ཞེས་པ་གསར་སྣོན་བྱས་ཡོད་པ་མ་ཟད། གཞུང་དངུལ་གྱིས་རྒྱས་ཟ་རྒྱས་འཐུང་ཞེས་པ་དེ་གཞུང་དངུལ་གྱི་ཟ་འཐུང་ཁྲིམས་འགལ་དང་། རྔན་པ་སྤྲོད་ལེན་ཟེར་བ་དེ་དངུལ་དངོས་ཀྱི་རྔན་པ་སྤྲོད་ལེན་ཁྲིམས་འགལ་ཞེས་པར་བསྒྱུར་བཅོས་བཏང་ཡོད་པ་དང་། དེ་མིན་གྱི་གནད་དོན་ཁག་གི་ཁྱབ་ཁོངས་སུ་ཚད་བརྒལ་གྱིས་མགྲོན་པོ་སྣེ་ལེན་དང་གཞུང་དངུལ་ཕོན་ཆེན་གྱིས་དགའ་སྐྱིད་ལ་རོལ་བ། སྒེར་གྱི་འདུ་འཛོམས་ལ་མཉམ་ཞུགས་དང་། མགོ་ཁྲིད་ལས་བྱེད་པའི་སྡོད་ཁང་གནད་དོན་བཅས་དམིགས་ཚད་དུ་བཟུང་ཡོད་འདུག
གཞན་ཡང་དབུས་སྒྲིག་ཁྲིམས་ཞིབ་བཤེར་ཁང་གིས། འདས་ལོར་རྒྱ་ནག་རྒྱལ་ཡོངས་ནང་དབུས་ཀྱི་གཏན་འབེབས་དོན་ཚན་ ༨ དང་འགལ་བའི་ཁྱོན་གནད་དོན་ ༥༣༠༨༥ རྩད་ཆོད་དེ། འབྲེལ་ཡོད་ཉེས་ཅན་ ༧༡༧༤༨ ལ་ཐག་གཅོད་བྱས་ཡོད་པ་མ་ཟད། ཏང་ཡོན་ལས་བྱེད་པ་ ༢༣༦༤༦ ཏང་ནང་ནས་ཕྱིར་འབུད་བཏང་ཡོད་ལུགས་ཕྱིར་བསྒྲགས་བྱས་འདུག
གསར་འགོད་པ། པདྨ་མཚོ།
