དེ་རིང་ཆོ་འཕྲུལ་དུས་ཆེན་གྱི་སྨོན་ལམ་ཆེན་མོའི་ཐོག་༸གོང་ས་མཆོག་གིས་སེམས་པ་བཟང་པོ་བྱས་ན་ལུས་སེམས་གཉིས་ལ་བདེ་སྐྱིད་ལྡན་པ་མ་ཟད། ཚེ་རིང་ཞིང་གྲོགས་མང་བར་ཕན་ཐོགས་ཡོད་སྐོར་བཀའ་སློབ་གནང་སོང་།
དེ་རིང་བོད་ཟླ་ ༡ ཚེས་ ༡༥ སྟེ་ཆོ་འཕྲུལ་དུས་ཆེན་དང་བསྟུན། སྔ་དྲོའི་ཆུ་ཚོད་ ༨།༣༠ ཙམ་ལ་དྷ་ས་ཐེག་ཆེན་གཙུག་ལག་ཁང་དུ། ༸གོང་ས་མཆོག་གིས་དད་ལྡན་སེར་སྐྱ་མི་མང་ལ་སྐྱེས་རབས་གསུང་ཆོས་གནང་སོང་བ་དང་། སྐབས་དེར་རྣམ་རྒྱལ་གྲྭ་ཚང་གི་གཙོས་དྷ་ས་ཉེ་འཁོར་གྱི་དགོན་སྡེ་ཁག་གི་མཁན་སྤྲུལ་གྲྭ་བཙུན་དང་། བཙན་བྱོལ་བོད་མིའི་སྒྲིག་འཛུགས་ཀྱི་དམངས་གཙོའི་ཀ་བ་གསུམ་གྱི་མཛད་གཙོ་རྣམ་པ་དང་སྲི་ཞུ་ལས་བྱེད། དེ་བཞིན་དྷ་ས་ཁུལ་གྱི་སློབ་གྲྭ་ཁག་གི་དགེ་སློབ་གིས་གཙོས་མི་མང་དང་། ནང་ཆོས་དོན་གཉེར་ཅན་གྱི་ཕྱི་རྒྱལ་བ་བཅས་ཁྱོན་མི་གྲངས་ ༥༠༠༠ ཡས་མས་འཛོམས་འདུག
གསུང་ཆོས་ཀྱི་ཐོག་མར་༸གོང་ས་མཆོག་གིས་ནང་ཆོས་ངོ་སྤྲོད་གནང་སྐབས། བོད་ལ་སངས་རྒྱས་པའི་ཆོས་དེ་ཞེ་དྲགས་དར་ཁྱབ་ཕྱིན་ཡོད་ཀྱང་། སངས་རྒྱས་ཆོས་ག་འདྲ་ཡིན་པ་དེ་ངོ་ཆ་འདྲ་བོ་འཕྲོད་ནས་ཆོས་བྱེད་མཁན་དཀོན་པོ་རེད་འདུག དེ་རིང་ཁ་སང་དུས་རབས་ཉེར་གཅིག་པའི་ནང་བསླེབས་བསྡད་ཡོད་ལ། འཛམ་བུ་གླིང་གི་ས་ཆ་གང་དང་གང་ཡིན་ནའང་དེང་དུས་ཀྱི་ཤེས་ཡོན་ཡར་རྒྱས་འགྲོ་བཞིན་ཡོད་པ་དང་། དེ་རིགས་ལ་དོ་སྣང་ཡང་ཤུགས་ཆེ་རུ་འགྲོ་བཞིན་ཡོད་པ་རེད། མིའི་ཤེས་ཡོན་ཡག་ཏུ་འགྲོ་སྐབས་རང་བཞིན་ལྷན་སྐྱེས་ཀྱིས་སེམས་ནང་ཐེ་ཚོམ་དང་དོགས་པ་བསླེབ་ཡོང་གི་ཡོད་ཀྱང་དེ་དགོས་པ་རེད། སངས་རྒྱས་པའི་ཆོས་ཀྱི་འགྲོ་སྟངས་བརྟག་དཔྱད་བྱས་ཏེ་བསམ་བློ་བཏང་། རྒྱུ་མཚན་མཐོང་བའི་ཐོག་ནས་ངེས་པ་རྙེད་དེ་དེས་དྲངས་པའི་དད་པ་དང་། དེས་དྲངས་པའི་ངེས་འབྱུང་། དེས་དྲངས་པའི་སྙིང་རྗེ་སྐྱེས་པ་ཞིག་དགོས་པ་རེད་མ་གཏོགས། རྒྱུ་མཚན་ལ་བསམ་བློ་མ་བཏང་བར་ནམ་མཁའི་མཁའ་དང་མཉམ་པའི་སེམས་ཅན་ཐམས་ཅད་ལ་སངས་རྒྱས་ཀྱི་གོ་འཕང་ཐོབ་པར་ཤོག་ཅེས་ཚིག་སྐམ་པོ་ཞིག་འདོན་བསྡད་པས་ཁག་པོ་ཞེ་དྲག་རེད། སྐལ་བ་བཟང་དུས་ཟེར་ན་འདྲ་ཡར་རྒྱས་མ་སོང་གོང་གང་ལྟར་དེ་འདྲ་བྱས་ནས་ལོ་དང་ལོ་བསྐྱལ་བ་རེད། ཡིན་ནའང་ད་ལྟ་དེས་ཁོངས་མི་འཁྱོལ་བས་སྤུས་དག་པོ་ཞིག་དགོས་པ་དེ་དཔེ་གལ་ཆེན་པོ་རེད། ཅེས་དང་།
ཡང་ཁོང་གིས། སེམས་པ་བཟང་པོ་བྱས་ན་ལུས་བདེ་བ་དང་གྲོགས་པོ་ཡོད་པ། སྣང་བ་སྐྱིད་པོ་དང་བག་ཕེབས་པོ་ཡོང་གི་རེད། ཁོང་ཁྲོ་དང་ང་རྒྱལ། རང་གཅེས་འཛིན་བྱས་ནས་བསྡད་པ་ཡིན་ན། ལུས་བདེ་བོ་མི་ཡོང་ལ། སེམས་ཡང་སྐྱིད་པོ་ཡོང་གི་མ་རེད། སེམས་སྐྱིད་པོ་མེད་དུས་ལུས་ཡང་བདེ་བོ་ཡོང་གི་མ་རེད་ལ། གྲོགས་པོ་ཡོང་གི་མ་རེད། སུ་ལ་ཡིན་ནའང་མགོ་སྐོར་དང་ཐུབ་ཚོད་གཏོང་བ། གོ་སྐབས་འཛིན་པར་བསམ་བློ་བཏང་བསྡད་པ་ཡིན་ན་གྲོགས་པོ་ག་འདྲ་ཡོང་གི་རེད། དངོས་གནས་རང་དོན་སྒྲུབ་ཤེས་མཁན་ཞིག་ཡིན་ན་བརྩེ་བ་བྱོས་དང་། རང་དོན་འགྲུབ་པའི་ཐབས་ཤེས་ཡག་ཤོས་དེ་རེད། དེ་ཆོས་ཀྱི་སྐད་ཆ་གཅིག་པུ་མིན་པ་མིའི་རང་བཞིན་གྱི་བསམ་བློས་ཤེས་ཐུབ་པ་རེད། རིམ་པ་དང་པོ་དེ་ང་ཚོ་མི་ཞིག་ཡིན་པའི་ངོས་ནས་མི་བཟང་པོ་ཞིག་བྱེད་དགོས་པ་རེད། མི་བཟང་པོ་ཡོད་ན་དྲང་པོ་དྲང་བཞག་ཡོང་གི་རེད་ལ། དྲང་པོ་དྲང་བཞག་ཡོང་ན་གྲོགས་པོ་ཡོང་གི་རེད། ཁྱིམ་ཚང་ཡང་སྐྱིད་པོ་ཡོང་གི་རེད་ལ། སྤྱི་ཚོགས་ཡང་སྐྱིད་པོ་ཡོང་གི་རེད། ཅེས་གསུངས་སོང་།
༸གོང་ས་མཆོག་གིས་ཞོར་འཕྲོས་སུ་དུས་རབས་བདུན་པ་བརྒྱད་པའི་སྐབས་བོད་མི་ས་ཡ་མང་པོ་ཡོད་པ་དང་། ཕྱིས་སུ་འབྲོམ་སྟོན་པའི་སྐབས་མི་འབོར་ཞིབ་བཤེར་བྱེད་དུས་བོད་མི་ས་ཡ་ ༡༠ ཡོད་པ་གསུངས་ཡོད་ཀྱང་། དེང་སྐབས་ས་ཡ་དྲུག་བདུན་ཟེར་གྱི་ཡོད་སྟབས། འབྲོམ་སྟོན་པ་བྱུང་ནས་ལོ་ངོ་ ༡༠༠༠ ཡས་མས་ཙམ་གྱི་ནང་བོད་མི་ས་ཡ་བཅུ་ནས་ས་ཡ་དྲུག་ཏུ་མར་ཆགས་ཡོད་པ་དང་། དེའི་རྒྱུ་རྐྱེན་གཙོ་བོ་འཕྲོད་བསྟེན་དང་དཔལ་འབྱོར་གྱི་ཆ་རྐྱེན་ཡག་པོ་མེད་པར་མི་མང་པོ་ནད་མནར་གྱིས་གྲོངས་བ་དང་། དེ་བཞིན་རབ་བྱུང་ཕོ་མོ་མང་དྲགས་ནས་སྐྱེས་སྒོ་བཀག་པ་ལྟ་བུ་ཆགས་པའི་སྐྱོན་ཡང་ཡོད། སྤྱིར་བཏང་རབ་བྱུང་ཕོ་མོ་ངེས་པར་དུ་དགོས་ཀྱང་སྤུས་དག་ལ་མ་དག་ལ་མང་པོ་ཞིག་ཡོད་ན་སྐྱེས་སྒོ་བཀག་པ་ལྟ་བུ་ཞིག་མ་གཏོགས་ཕན་ཐོགས་མེད་པ་དང་། ཡང་བོད་ས་ཁུལ་མང་པོའི་ནང་བུ་སྤུན་གཉིས་གསུམ་ལ་མནའ་མ་གཅིག་ལེན་པའི་ལུགས་སྲོལ་དེས་ཀྱང་མི་འབོར་འཕེལ་རྒྱས་ལ་གནོད་ཀྱི་ཡོད་སྟབས། མི་སྒེར་རེ་རེར་མཚོན་ན་མི་ལུས་དེ་གལ་ཆེན་པོ་ཡིན་ལ། ད་ལྟ་བོད་གཞིས་བྱེས་གཉིས་སུ་མི་འབོར་ཉུང་དྲགས་ཡོད་པས། བོད་སྤྱི་ཡོངས་ཀྱི་ཐོག་ནས་བཤད་ནའང་མི་འབོར་དེ་གལ་ཆེན་པོ་ཆགས་ཡོད་སྐོར་དང་། བོད་ནང་ཆོས་སྒོ་ཕྱེས་པའི་གོ་སྐབས་དང་བསྟུན་ཏེ་དེང་སང་བོད་ནང་དགོན་པ་གསར་རྒྱག་སོགས་བྱེད་སྐབས། དགོན་པ་དང་བླ་མ་གྲྭ་ཚང་ནས་དངུལ་འདུ་འགོད་སོགས་ལོག་འཚོ་རིགས་བྱུང་མི་སྲིད་པ་མིན་སྟབས། དེ་ཚོར་ངེས་པར་དུ་གཟབ་གཟབ་བྱེད་དགོས་སྐོར་སོགས་གསུངས་སོང་།
གསར་འགོད་པ། པདྨ་མཚོ།
ཆེས་བཀུར་བར་འོས་པའི་གསར་འགོད་མ་ལགས་ལ་འཚམས་འདྲི་ཞུ་བ་དང་། དེ་ནས་༼དགོན་པ་དང་བླ་མ་གྲྭ་ཚང་ནས་དངུལ་དངོས་འདུ་འགོད་སོགས་ལོག་ཚོགས་རིགས་བྱུང་མི་སྲིད་པ་མིན་སྟབས།༽ ཞེས་པའི་ནང་གི་ལོག་ཚོགས་ཞེས་པ་དེ་ལོག་འཚོ་ལོས་ཡིན་སྙམ། ལོག་ཚོགས་ལབ་ན་གོང་གི་དེ་དག་དང་དེ་ཙམ་འབྲེལ་མེད་འདོད་དོ།།