བཀའ་དྲིན་རྗེས་དྲན་ངོ་མ་དེ་བཀའ་ཇི་བཞིན་བསྒྲུབ་རྒྱུ་དེ་རེད།

དེ་རིང་སྤྱི་འཐུས་གྲོས་ཚོགས་ནང་༧གོང་ས་མཆོག་ལ་བཀའ་དྲིན་རྗེས་དྲན་གྱི་གྲོས་འཆར་ཞིག་ལ་སྤྱི་འཐུས་མང་པོ་ཞིག་གིས་ཚོར་ཤུགས་ཆེན་པོས་དགོངས་ཚུལ་གསུངས་པ་དང་འབྲེལ་ཏེ་སྤྱི་མོས་གྲོས་ཆོད་བཞག་སོང་།

དེ་རིང་སྐབས་བཅོ་ལྔ་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དགུ་པའི་ལས་ཉིན་གཉིས་པར། སྤྱི་འཐུས་རྒྱུན་ལས་ཀྱིས་༧གོང་ས་མཆོག་དགུང་གྲངས་ ༨༠ ལ་ཕེབས་པའི་བཀའ་དྲིན་རྗེས་དྲན་གྱི་གྲོས་ཆོད་གྲོས་འཆར་དོན་ཚན་བཞི་ཅན་ཞིག་འཁྱེར་ཡོད་པའི་ཐོག སྤྱི་འཐུས་ ༢༦ གིས་ཆ་ཤས་བླངས་ཏེ་བགྲོ་གླེང་གནང་བ་བརྒྱུད་སྤྱི་མོས་ཐོག་གཏན་འབེབས་གནང་སོང་།

བཀའ་དྲིན་རྗེས་དྲན་གྲོས་ཆོད་དེ་དང་འབྲེལ་ནས་སྤྱི་འཐུས་རྣམ་པ་ཚོས་དགོངས་ཚུལ་གསུངས་སྐབས། སྤྱི་འཐུས་མང་པོ་ཞིག་གིས་༧གོང་ས་མཆོག་གི་བཀའ་དྲན་རྗེས་དྲན་ངོ་མ་དེ་ཁ་ཞེ་གཉིས་མེད་ཐོག་ཁོང་གི་བཀའ་དགོངས་ཚུལ་བཞིན་བསྒྲུབ་རྒྱུ་དེ་ཡིན་སྐོར་བརྗོད་སོང་ལ། ༧གོང་ས་མཆོག་དགུང་གྲངས་ ༨༠ ཕེབས་ཡོད་སྟབས་མཛད་འཕྲིན་ཉུང་དུ་གཏོང་དགོས་ཚུལ་དང་། བུད་མེད་སྤྱི་འཐུས་ཁག་ཅིག་གིས་བཙན་བྱོལ་སྤྱི་ཚོགས་ནང་བུད་མེད་ཀྱི་ཐོབ་ཐང་ཡག་པོ་ཡོད་པ་དང་། ལྷག་པར་དུ་གྲོས་ཚོགས་ནང་བུད་མེད་སྤྱི་འཐུས་མང་པོ་བསླེབས་པ། དེ་བཞིན་བཙུན་མའི་སློབ་གཉེར་ཡར་རྒྱས་ཕྱིན་པ་སོགས་༧གོང་ས་མཆོག་གི་བཀའ་དྲིན་ཉག་ཅིག་ལ་བརྟེན་ཏེ་བྱུང་ཚུལ་གསུངས་སོང་།

སྤྱི་འཐུས་ཨ་ཀྲུག་ཚེ་བརྟན་ལགས་ཀྱིས། རྗེ་མི་ལ་རས་པས་རྒྱུ་འབྱོར་བའི་འབུལ་བ་བདག་ལ་མེད། ཕ་བླ་མའི་ཞབས་ཏོག་བསྒྲུབ་པའི་འཇལ་གསུངས་པ་ལྟར། ༧གོང་ས་མཆོག་གི་བཀའ་དྲིན་དྲན་པའི་ཐོག་ནས་ཁོང་གི་བཀའ་བཞིན་བསྒྲུབ་དགོས་པ་དེ་ཧ་ཅང་གལ་ཆེན་པོ་རེད། བཀའ་བསྒྲུབ་སྟངས་དེ་ཡང་སོ་སོའི་འདོད་མོས་དང་མཐུན་པའི་བཀའ་ཞིག་གནང་ན། ལམ་སང་དེ་བསྒྲུབས་པ་དང་། སོ་སོའི་བསམ་བློ་དང་ལྟ་བ་མི་མཐུན་པ་ཞིག་ཡིན་ན། མ་གོ་མདོག་མདོག་བྱས་ན་དེ་བཀའ་བསྒྲུབ་པ་ཞིག་མ་རེད། སོ་སོའི་དོན་བསྒྲུབས་པ་རེད། དེར་བརྟེན། མ་འོངས་པར་ཚང་མས་རྒྱལ་བའི་བཀའ་བཞིན་བསྒྲུབ་དགོས་པ་དེ་དུས་དེ་འདི་ནས་བཟུང་མགོ་འཛུགས་དགོས་པ་དང་། ལྷག་པར་དུ་གྲོས་ཚོགས་འདིའི་ནང་ཡོད་པ་ཚང་མས་དཔེ་སྟོན་དགོས་པ་གལ་ཆེན་པོ་རེད། ཅེས་བརྗོད་སོང་།

སྤྱི་འཐུས་སྨོན་ལམ་མཐར་ཕྱིན་ལགས་ཀྱིས། བོད་ནང་རྒྱ་ནག་གཞུང་གིས་ཆོས་བརྒྱུད་སྤྱི་མཚུངས་ལྟར་བོན་གྱི་ཆོས་སྡེ་ཁག་རྩ་མེད་བཏང་སྟེ་གཡུང་དྲུང་བོན་གྱི་བསྟན་པ་ཉག་ཕྲ་བའི་སྐབས་ལ། བཙན་བྱོལ་ནང་རྒྱལ་བ་སྨན་རི་བའི་ཡོངས་འཛིན་བསྟན་འཛིན་རྣམ་དག་རིན་པོ་ཆེ་མཆོག་༡༩༦༡ ལོར་༧གོང་ས་མཆོག་ལ་ཐོག་མར་མཇལ་སྐབས། ཁྱེད་ཅག་གིས་བོན་གྱི་བསྟན་པ་འཛིན་སྐྱོང་སྤེལ་གསུམ་གནང་དགོས་པ་རེད། དེ་ལ་མཐུན་རྐྱེན་གྱི་ཕྱོགས་ནས་ཆ་ཚང་ངས་གནང་དགོས་གསུངས་ཏེ། བོད་པའི་སྤྱི་ཚོགས་ནང་བོན་པོར་ལྟ་སྟངས་འདྲ་མིན་ཞིག་ཡོད་པ་དེ་རྩ་མེད་ཕྱིན་ཏེ། འཛམ་གླིང་འདིའི་ཐོག་བོན་པོ་དེ་ཚོ་མགོ་འཕང་མཐོན་པོ་བྱས་ཏེ་འགྲོ་ཐུབ་པའི་གནས་སྟངས་ཤིག་ཆགས་ཡོད། ཅེས་བརྗོད་སོང་།

ཡང་སྤྱི་འཐུས་ཁག་ཅིག་གིས་བཙན་བྱོལ་སྤྱི་ཚོགས་ནང་༧གོང་ས་མཆོག་གི་བཀའ་དགོངས་སྒྲུབ་ཀྱི་ཡོད་པའི་མིང་ཐོག་ནས་བྱ་བ་སྣ་ཚོགས་སྒྲུབ་བཞིན་ཡོད་པ་དང་། ཡང་ཁག་ཅིག་གིས་རྒྱལ་བའི་བཀའ་ཁ་ལ་འཁྱེར་ཏེ་ལྐོག་ནས་བཤད་སྤྱོད་ངན་པ་སྒྲུབ་ཀྱི་ཡོད་ཚུལ་བརྗོད་སོང་ལ། སྤྱི་འཐུས་ཁག་ཅིག་གིས་མ་འོངས་པར་གང་ཐུབ་ཀྱིས་༧གོང་ས་མཆོག་གི་བཀའ་བཞིན་བསྒྲུབ་རྒྱུ་དང་། བོད་སྤྱི་དོན་ཐོག་འབད་བརྩོན་གནང་རྒྱུའི་དམ་བཅའ་ཡང་བཞག་སོང་།

སྤྱི་འཐུས་ཚོས་དགོངས་ཚུལ་གསུངས་པའི་མཇུག་ཏུ། སྲིད་སྐྱོང་བློ་བཟང་སེང་གེ་མཆོག་གིས་གསུང་བཤད་གནང་དོན། བཀའ་ཤག་སྐབས་ ༡༤ པས་བཀའ་དྲིན་ཆེན་པོ་ཡིན་པ་ངོས་འཛིན་བྱས་པའི་ཐོག་ནས་ ༢༠༡༤ དེ་སྐུ་ཕྲེང་བཅུ་བཞི་པ་ཆེན་མོ་མཆོག་ལ་བཀའ་དྲིན་རྗེས་དྲན་གྱི་ལོར་སྲུང་གཙི་ཞུས་ཡོད། ང་ཚོ་ཐོག་མར་རྒྱ་གར་ལ་འབྱོར་སྐབས་སྲིད་བློན་ནེ་རུ་གཙོས་གཞུང་དམངས་སྤྱི་ ཡོངས་ནས་བོད་མི་ཚོར་སྐྱབས་བཅོལ་སྤྲོད་དགོས་དོན་གཙོ་བོ་ནི་༧གོང་ས་མཆོག་གི་བཀའ་དྲིན་ལ་རྟེན་ནས་བྱུང་བ་ཞིག་ཡིན་ལ། བཙན་བྱོལ་སྒྲིག་འཛུགས་འདི་ཡང་དམངས་གཙོའི་ལམ་ལུགས་ཐོག་ཧྲ་ཏག་ཏག་ཅིག་འགྲོ་ཐུབ་པ་དེ་ཡང་། གཙོ་བོ་༧གོང་ས་མཆོག་གི་བཀའ་དྲིན་ལ་རྟེན་ནས་བྱུང་བ་ཞིག་ཆགས་ཡོད། ཉེ་ཆར་བཀའ་ཤག་གིས་རྒྱལ་སྤྱིའི་སྡིངས་ཆ་ག་པར་བཅར་ཡང་། ང་ཚོས་འཚེ་མེད་ཞི་བའི་ལམ་ནས་རྩ་དོན་རྩོད་ཀྱི་ཡོད་པ་གསལ་བཤད་བྱེད་ཀྱི་ཡོད་པ་མ་ཟད། འཇིགས་སྐུལ་རིང་ལུགས་པ་དང་ལྟ་བ་མཁྲེགས་འཛིན་ཅན་གྱིས་འཛམ་གླིང་ཐོག་རྙོག་གླེང་མང་པོ་ཞིག་བཟོ་བཞིན་ཡོད་པ་དག་དང་བསྡུར་ན།  འཛམ་གླིང་སྤྱི་ཡོངས་ཀྱིས་ང་ཚོར་མིག་དཔེ་ལྟ་ས་ཞིག་ཆགས་ཡོད་ཅེས་སྤོབས་པ་ཆེན་པོའི་ཐོག་ནས་ཞུ་ཐུབ་པ་དེ་དང་། ཉེ་བའི་ལོ་རྒྱུས་ནང་བོད་ཕྱི་ནང་གཉིས་ཀྱི་བོད་མིའི་རྡོག་རྩ་གཅིག་སྒྲིལ་དང་ མི་རིགས་ཀྱི་ལ་རྒྱ། རྒྱལ་ཞེན་སོགས་ཚད་མཐོ་ཤོས་ཆགས་པ་དེ་ཡང་༧གོང་ས་མཆོག་གི་ཐུགས་རྗེའི་བཀའ་དྲིན་ལ་རྟེན་ནས་བྱུང་བ་ཞིག་ཡིན་པར་ངོས་འཛིན་ཞུ་བཞིན་ཡོད། ཉེ་ཆར་དྲ་ཐོག་ཉམས་ཞིབ་ཁང་ཞིག་གིས་རྒྱལ་སྤྱིའི་རྒྱལ་ཁབ་མང་པོ་ཞིག་གི་མང་ཚོགས་ལ་རྒྱལ་སྤྱིའི་ཐོག་ཆོས་དང་རིག་གཞུང་། ཆབ་སྲིད་དང་མི་རིགས། འཛམ་གླིང་ཞི་བདེ་དང་ཆོས་ལུགས་མཐུན་སྒྲིལ་སོགས་ལ་མཛད་རྗེས་འཇོག་མཁན་གྱི་དབུ་ཁྲིད་ཁག་ལ་དྲ་ཐོག་བསམ་ཤོག་བསྡུས་པ་བརྒྱུད། ༧གོང་ས་མཆོག་འཛམ་གླིང་ནང་གི་སྙན་གྲགས་ཆེ་ཤོས་གྲས་སུ་འདེམས་ཐོན་བྱུང་བ་མ་ཟད། མི་མང་པོ་ཞིག་གིས་ང་ཚོའི་རྒྱལ་པོ་དང་རྒྱལ་ཁབ་ཀྱི་སྲིད་འཛིན་ལས་ལྷག་པ་དགའ་སྣང་བྱེད་དགོས་པའི་མགོ་ཁྲིད་དེ་ཁྱེད་རང་ཚོར་ཡོད་རེད་ཅེས་བརྗོད་ཀྱི་འདུག ཅེས་གསུངས་སོང་།

ཁོང་གིས་མུ་མཐུད་དུ། སྔོན་མ་ཡུ་གུར་མི་རིགས་ཚོས་ང་ཚོར་མི་ཡོད་ཀྱང་མགོ་ཁྲིད་མེད། བོད་པ་ཚོར་མགོ་ཁྲིད་ཡོད་རེད་ཅེས་གསུངས་ཡོད། ང་རང་སྲིད་སྐྱོང་དང་ཕྱག་རོགས་བཀའ་བློན་རྣམ་པར། རྒྱལ་སྤྱིའི་སྡིངས་ཆ་དང་གཞུང་གི་གནད་ཡོད་མི་སྣ་སུ་ལ་མཇལ་འཕྲད་ཞུས་ཀྱང་། ཁོ་ཚོས་༧གོང་ས་མཆོག་ལ་གུས་བཀུར་བརྩི་བཀུར་ཞུ་གི་ཡོད་ཅེས་གསུང་མཁན་ཤ་སྟག་ཡིན་པ་མ་ཟད། ཁོ་ཚོ་དང་མཇལ་རྒྱུ་བྱུང་བ་དང་འབྲེལ་བ་བཟོ་ཐུབ་པ་དེ་ཡང་༧གོང་ས་མཆོག་གི་བཀའ་དྲིན་ལ་རྟེན་ནས་བྱུང་བ་ཞིག་ཡིན་པ་ཚང་མས་མཁྱེན་གསལ་རེད། སྲིད་འཛིན་ཨོ་བྷ་མས་༧གོང་ས་མཆོག་དང་ཐེངས་དང་པོ་མཇལ་རྗེས། ཁོང་གི་ཨེ་ཤ་ཡའི་སློབ་སྟོན་པས་ཁོང་ལ་དེ་རིང་ཚོར་བ་གང་འདྲ་བྱུང་ཞེས་དྲིས་པར། ཁོང་གིས་ངའི་མི་ཚེའི་ནང་ང་རང་གིས་བརྩི་འཇོག་བྱེད་ས་རྩ་ཆེ་ཤོས་དེ་ནཱེལ་སལ་མན་ཌ་ལཱ་བརྩི་གི་ཡོད། དེ་རིང་༧གོང་ས་མཆོག་མཇལ་བ་དེས་ངའི་ཚོར་བར་ནཱེལ་སལ་མན་ཌ་ལཱ་མཇལ་བ་ལྟར་བྱུང་སོང་ཞེས་གསུངས་ཡོད། མི་རིགས་ནག་པོ་ཞིག་གིས་དེ་ལྟར་གསུངས་ཡོང་སྐབས། འཛམ་གླིང་གི་མགོ་ཁྲིད་ཚོས་༧གོང་ས་མཆོག་རླབས་ཆེན་གྱི་མི་སྣ་ཞིག་དང་མཛད་འཕྲིན་ཆེན་པོ་ཞིག་ཡིན་པ་བརྩི་གི་ཡོད་པ་ཚང་མས་མཁྱེན་གསལ་ཡིན་སྟབས། བཀའ་ཤག་ངོས་ནས་ཐེངས་འདིའི་གྲོས་ཆོད་ཀྱི་སྔོན་གླེང་དང་དོན་ཚན་བཞིར་རྒྱབ་སྐྱོར་ཡོད་ཅེས་ཞུ་རྒྱུ་དང་འབྲེལ། ༧གོང་ས་མཆོག་གི་བཀའ་དྲིན་རྗེས་དྲན་དང་བསྟུན་ཏེ། ཕྱི་དྲིལ་ལས་ཁུངས་ངོས་ནས་ལོ་ ༥༠ ནང་དམངས་གཙོ་དང་འབྲེལ་བའི་ཐོག་ནས་ག་རེ་གནང་ཡོད་མེད་སྐོར་གྱི་དེབ་གཅིག་དང་། བོད་ཀྱི་གྲོས་ཚོགས་དང་སྲིད་ཇུས་ཉམས་ཞིབ་ཁང་གིས་ད་བར་༧གོང་ས་མཆོག་གི་གསུང་བཤད་གནང་བ་དག་ཕྱོགས་བསྒྲིགས་བྱས་པའི་དེབ་ཕྲེང་བཅས་དཔར་བསྐྲུན་ཞུས་ཡོད། ཅེས་གསུངས་སོང་།

དེའི་རྗེས་སྤྱི་འཐུས་ཚོགས་གཙོ་མཆོག་གིས་གྲོས་ཆོད་དེ་འཁྱེར་དགོས་དོན་ཐད་གསུངས་དོན། མང་ཚོགས་ནང་སྤྱི་འཐུས་ལྷན་ཚོགས་ཀྱིས་བཀའ་དྲིན་རྗེས་དྲན་གྱི་གྲོས་འཆར་འཁྱེར་དགོས་དོན་གང་ཡིན་ནམ་དགོངས་སྲིད་པ་ཡིན་སྟབས། གྲོས་ཚོགས་ཀྱིས་༧རྒྱལ་བ་རིན་པོ་ཆེར་ཆེ་བསྟོད་ཞུས་ཏེ་༧གོང་ས་མཆོག་ཆེ་རུ་འགྲོ་རྒྱུ་དང་གྲོས་ཚོགས་ནང་གྲོས་ཆོད་འདི་མ་བཞག་ན་༧གོང་ས་མཆོག་གི་མཚན་མཐོང་དམའ་རུ་འགྲོ་རྒྱུ་གང་ཡང་མེད་ཀྱང་། ང་རང་ཚོ་བོད་པའི་འགྲོ་སྟངས་ཐོག་ནས་རྟེན་བྲེལ་མཚོན་ཆེད་དུ་འཁྱེར་ཡོང་བ་རེད། དེ་རིང་འདིའི་ནང་བགྲོ་གླེང་ཞུགས་སྐབས་གླེང་སྟངས་དང་གླེང་ཚུལ་ཐོག་ནས་སོ་སོའི་སེམས་བག་ཕེབས་པོ་ཡོང་རྒྱུར་ཏན་ཏན་ཕན་ཐོགས་ཀྱི་རེད་བསམ་གྱི་འདུག ཅེས་གསུངས་སོང་།

གྲོས་ཆོད་དོན་ཚན་ ༤ ནི། ༡ ༽ མགོན་པོ་མཆོག་ཉིད་ཀྱིས་སྐུ་ན་ཤིན་ཏུ་ཕྲ་བའི་དུས་ནས་བོད་བསྟན་སྲིད་ཀྱི་ཐུགས་འགན་བདག་གིར་བཞེས་པ་ནས་ད་ཆ་ཕྱི་ལུགས་དགུང་གྲངས་ ༨༠ བརྒལ་བར་ཕེབས་ཀྱང་སྐྱེ་འགྲོ་སྤྱི་དང་བྱེ་བྲག་བོད་མི་རྣམས་ལ་འཕྲལ་དང་ཡུན་གྱི་བདེ་སྐྱིད་ཕུན་སུམ་ཚོགས་པ་འབྱུང་སླད་སྐུ་ངལ་བརྒྱ་ཕྲག་ལྷུར་བཞེས་ཀྱིས་གསང་གསུམ་མཛད་འཕྲིན་བཟང་པོ་མུ་མཐའ་མེད་པ་བསྐྱངས་དང་སྐྱོང་བཞིན་པ་རྣམས་ལ་གུས་ཅག་བོད་མི་སྤྱི་བོ་གནམ་བསྟན་ཡོངས་ཀྱིས་ཐུགས་རྗེ་དང་བཀའ་དྲིན་བླ་ན་མེད་པ་ཆེ་ཆེ་ཆེ་ཞེས་ཞུ་རྒྱུ་དང་། དེ་ལྟའི་བཀའ་དྲིན་རྣམས་དུས་རྟག་ཏུ་བརྗེད་མེད་སྙིང་བཅངས་ཞུ་རྒྱུ།

༢ ༽ བདག་ཅག་བོད་འབངས་རྣམས་ཀྱི་བདེ་སྐྱིད་དང་། བསྟན་འགྲོའི་དགེ་ལེགས་ཀྱི་ཆ་ཕྲ་མོ་ཚུན་ཆད་མགོན་པོ་མཆོག་ཉིད་ཀྱི་སྐུ་ཡི་གསང་ བ་གསུམ་གྱི་མཛད་འཕྲིན་དང་རྗེས་སུ་འགྲོ་ལྡོག་གྲུབ་པས་གངས་ཅན་ལྷ་མི་ཡོངས་ཀྱི་ བསོད་ནམས་ཀྱི་ཞིང་དུ་གང་སྐུ་བསྐལ་པ་རྒྱ་མཚོར་རྟག་ཏུ་བརྟན་ཅིང་། མཛད་འཕྲིན་མུ་མཐའ་མེད་པ་སྐྱོང་བཞེས་ཡོང་བའི་གསོལ་འདེབས་རྩེ་གཅིག་ཏུ་ཞུ་རྒྱུ།

༣༽ དེང་སྙིགས་ལྔའི་རང་མདངས་ཆེས་ཆེར་བདོ་བའི་དུས་འདིར་མི་ཡི་བསམ་སྤྱོད་གཅུན་མི་ཐུབ་པའི་ངང་ཚུལ་འདི་ལྟར་ལགས་ཀྱང་། ཐུགས་བརྩེ་བ་ཆེན་པོས་དགོངས་ཏེ་སྐྱེ་འགྲོ་སྤྱི་དང་། བྱེ་བྲག་གངས་ཅན་ཁ་བ་རི་པའི་སྐྱེ་འགྲོ་རྣམས་ཚེ་རབས་ནས་ཚེ་རབས་བར་རྗེས་སུ་འཛིན་ཅིང་། བླང་དོར་གྱི་ཕེབས་སྒོ་ནམ་ཡང་གཡེལ་བ་མེད་པར་བཀའ་དྲིན་སྐྱོང་བཞེས་ཡོང་བའི་གསོལ་བ་ཕུར་ཚུགས་སུ་འདེབས་རྒྱུ།

༤ ༽ བདག་ཅག་གཞིས་བྱེས་བོད་མི་ཡོངས་ཀྱིས་དམ་ཚིག་འོ་ཆུ་གཅིག་འདྲེས་ངང་མགོན་པོ་གང་གི་ཐུགས་བརྩེའི་བཀའ་སློབ་ལམ་སྟོན་རྣམས་དུས་རྟག་ཏུ་སྙིང་བཅངས་ཀྱིས་ལག་བསྟར་ཉམས་ལེན་ཞུ་རྒྱུ།

གསར་འགོད་པ། དོན་གྲུབ།