ཁ་སང་རྒྱ་ནག་རྒྱལ་སྲིད་སྤྱི་ཁྱབ་ཁང་གི་རྒྱུན་ལས་ཡཱང་ཇེ་ཁྲི་དང་རྒྱ་གར་གྱི་རྒྱལ་སྲུང་སློབ་སྟོན་པ་ཌོ་ཝལ་ལ་ཐུག་འཕྲད་བྱས་ཏེ་ས་མཚམས་རྩོད་རྙོག་སྐོར་ལ་གྲོས་མོལ་བྱས་ཡོད་འདུག
ཁ་སང་རྒྱ་ནག་ཕྱི་འབྲེལ་ལྷན་ཁང་གི་འགན་འཛིན་དང་རྒྱལ་སྲིད་སྤྱི་ཁྱབ་ཁང་གི་རྒྱུན་ལས་ཡཱང་ཇེ་ཁྲི་ (Yang Jiechi)ནང་སྐོར་སྐྱོད་བྱས་ཏེ། རྒྱ་གར་གྱི་རྒྱལ་སྲུང་སློབ་སྟོན་པ་ཌོ་ཝལ་ (Dr.Ajit Kumar Doval)དང་རྒྱ་གར་བར་གྱི་ས་མཚམས་རྩོད་ཉོག་དང་། འདི་ལོར་རྒྱ་གར་གྱི་སྲིད་བློན་ནཱ་རེན་ཌ་མུ་དྷེ་རྒྱ་ནག་ནང་སྐོར་སྐྱོད་གནང་ཕྱོགས་བཅས་ཀྱི་ཐད་གྲོས་མོལ་བྱས་ཡོད་འདུག
རྒྱ་ནག་ཕྱི་སྲིད་ལྷན་ཁང་གིས་རྒྱལ་སྤྱིའི་བརྒྱུད་ལམ་ཐོག “རྒྱལ་ཁབ་གཉིས་ཀྱིས་འདས་པའི་གྲོས་མོལ་ལ་གཞིགས་ཏེ་མ་འོངས་པར་གཉིས་ཕན་གྱི་ཁ་ཕྱོགས་བཟང་པོ་ཞིག་གཏོད་དགོས་པར་བརྟེན། ཐོག་མར་ས་མཚམས་ཁུལ་དུ་བརྟན་ལྷིང་ཡོང་བ་བྱས་ནས་དཀའ་རྙོག་སེལ་དགོས་སྟབས། ད་ཐེངས་སྐུ་ཚབ་རྣམ་གཉིས་ཀྱིས་ས་མཚམས་ཁུལ་དུ་སིམ་འཛུལ་མི་བྱ་བའི་གྲོས་མཐུན་བཞག་ཡོད”ཅེས་དང་། རྒྱ་གར་གྱི་ཕྱི་སྲིད་ལྷན་ཁང་གིས། “ས་མཚམས་རྩོད་ཉོག་ནི་རྒྱལ་ཁབ་གཉིས་ཀྱི་འབྲེལ་ལམ་སྔར་ལྷག་འཕེལ་རྒྱས་ཡོང་མིན་གྱི་བཀག་རྡོ་དེ་ཆགས་ཡོད་སྟབས། ད་ལྟ་ཕྱོགས་གཉིས་པོས་ཕན་ཚུན་འཁང་ར་བྱེད་རེས་མ་བྱས་པར་མཉམ་རུབ་ཐོག་བཀག་རྡོ་དེ་མེད་པ་བཟོ་དགོས”ཞེས་བསྒྲགས་འདུག
དེ་རིང་རོའུ་ཌར་གསར་ལམ་ཐོག་རྒྱ་དཀར་ནག་གི་ས་མཚམས་རྩོད་ཉོག་སྐོར་འཁོད་དོན། འདི་ནི་ནཱ་རེན་ཌ་མུ་དྷེ་རྒྱ་གར་གྱི་སྲིད་བློན་ཆགས་རྗེས་ཀྱི་རྒྱ་ནག་དང་ས་མཚམས་སྐོར་ལ་གྲོས་མོལ་བྱས་པ་ཐོག་མ་ཡིན་པ་མ་ཟད། ཁོང་འདི་ལོར་པེ་ཅིན་དུ་འགྲོ་སྐྱོད་བྱེད་མིན་གྱི་འགག་རྩ་གལ་ཆེན་ཞིག་ཆགས་ཡོད་སྟབས། རྒྱལ་ཁབ་གཉིས་ཀྱི་སྐུ་ཚབ་ཀྱིས་ས་མཚམས་ཁུལ་དུ་བརྟན་ལྷིང་ཡོང་ཐབས་བྱས་ཏེ། འབྲེལ་ལམ་གྱི་ཁོར་ཡུག་བཟང་པོ་ཞིག་བསྐྲུན་ཡོད་ཀྱང་། དབྱིན་ཡུལ་གྱིས་རྒྱ་གར་བཟུང་སྐབས་རྩོད་ཉོག་འདི་བཟོས་པ་ཞིག་ཡིན་སྟབས། ༡༩༦༢ ལོར་རྒྱ་དཀར་ནག་གཉིས་བར་སྤྱི་ལེ་ ༣༥༠༠ ཙམ་གྱི་ས་མཚམས་རྩོད་རྙོག་བྱུང་སྟེ་དམག་འཐབ་བྱས་ཡོད། དེ་བཞིན། རྒྱ་ནག་གཞུང་གིས་ཨ་རུ་ནཱ་ཅལ་མངའ་སྡེའི་བྱང་ཤར་ཁུལ་གྱི་ཀི་ལོ་མི་ཌར་གྲུ་བཞི་མ་ ༩༠༠༠༠ དང་། ཨག་སེ་ཅེན་ (Aksai Chin) ཁུལ་གྱི་ཀི་ལོ་མི་ཌར་གྲུ་བཞི་མ་ ༣༨༠༠༠ ཙམ་རྒྱ་ཁོངས་ཡིན་ཞེས་བདག་དབང་རྩོད་བཞིན་ཡོད་པ་མ་ཟད། འདས་ལོའི་ཟླ་ ༩ ནང་རྒྱ་ནག་གི་སྲིད་འཛིན་ཞི་ཅིན་ཕིན་རྒྱ་གར་ནང་སྐོར་སྐྱོད་བྱེད་སྐབས། རྒྱ་ནག་མཐའ་སྲུང་དམག་མིས་རྒྱ་གར་བྱང་ཤར་ས་ཁུལ་ཁག་གཅིག་ནང་སིམ་འཛུལ་བྱས་ནས་རྒྱ་གར་ལ་འཇིགས་སྐུལ་བྱས་ཡོད་སྟབས། ཕན་ཚུན་གུ་བཤངས་མ་བྱས་ཚེ་མ་འོངས་པར་གྲོས་མོལ་ག་ཚོད་བྱས་ཀྱང་ཐག་གཅོད་ཡོང་ རྒྱུ་ཁག་པོ་ཆགས་ཡོད་ཅེས་བཀོད་འདུག
རྒྱ་ནག་གི་ཤིན་ཧྭ་གསར་ལམ་ཐོག་ཆེད་བརྗོད་སྤེལ་བ་ཞིག་ནང་། “ད་ཐེངས་རྒྱལ་ཁབ་གཉིས་ཀྱིས་ས་མཚམས་རྩོད་ཉོག་ཞི་འཇགས་མ་བྱུང་བར་ས་མཚམས་ཁུལ་དུ་བརྟན་ལྷིང་དང་། རྒྱལ་སྤྱི་དང་མངའ་ཁུལ་གྱི་གནད་དོན་ཐད་མཉམ་ལས་ཀྱི་ནུས་པ་འདོན་སྤེལ་བྱས་ནས་འཛམ་གླིང་ཞི་བདེ་དང་འཕེལ་རྒྱས་ཡོང་བ་བྱ་རྒྱུ་གཙོས། ཁྱིམ་མཚེས་རྒྱལ་ཁབ་གཉིས་བར་གྱི་ཚོང་དོན་འབྲེལ་ལམ་གོང་མཐོར་གཏོང་རྒྱུ་ནི་ད་ལྟའི་དུས་ཚོད་ཀྱི་དགོས་མཁོ་གལ་ཆེན་ཞིག་ཆགས་ཡོད”ཅེས་བརྗོད་འདུག
ནེ་རུ་གཙུག་ལག་སློབ་ཆེན་གྱི་རྒྱ་ནག་གནད་དོན་ཆེད་མཁས་པ་ཤེར་ཁཱན་ཌི་ (Srikanth Kondapalli ) ཡིས་རྩོམ་ཡིག་ཅིག་སྤེལ་བའི་ནང་། རྒྱ་དཀར་ནག་གཉིས་ཀྱི་ས་མཚམས་གནད་དོན་ནི་ལོ་རྒྱུས་ཐོག་གི་དཀའ་རྙོག་གལ་ཆེན་ཞིག་ཆགས་ཡོད་སྟབས། རྒྱལ་ཁབ་གཉིས་པོས་བསམ་ཤེས་བྱས་ནས་འགྲིག་འཇགས་མ་བྱས་ཚེ། མ་འོངས་པར་རྒྱལ་ཁབ་གཉིས་ཀྱི་འབྲེལ་ལམ་སྡུག་ཏུ་ཕྱིན་ནས་དམག་འཐབ་འབྱུང་སྲིད་པ་ཞིག་ཡིན་སྟབས། ད་ཐེངས་གྲོས་མོལ་འདི་བརྒྱུད་ཆུ་མ་ཤོར་གོང་ནས་ཆུ་རགས་བརྒྱབ་སྟེ། མ་འོངས་པར་དཀའ་རྙོག་འདི་སེལ་ཐུབ་པར་ཡིད་ཆེད་བྱེད་བཞིན་ཡོད་ཅེས་སོགས་བསམ་ཚུལ་སྤེལ་འདུག
དེ་རིང་ཡཱང་ཇེ་ཁྲི་ཡིས་རྒྱ་གར་གྱི་སྲིད་བློན་ནཱ་རེན་ཌ་མུ་དྷེ་མཆོག་ཐུག་སྟེ། ཚོང་དོན་དང་རྒྱལ་སྤྱི་རྒྱལ་ནང་གི་གནད་དོན་ཁག་ལ་རྒྱལ་ཁབ་གཉིས་པོས་མཉམ་ལས་གོང་འཕེལ་གཏོང་ཐབས་དང་། རྒྱ་གར་ལ་ཚོང་འབྲེལ་ཐོག་གྱོང་གུད་རག་ཡོད་པ་བཅས་ཀྱི་ཐད་གྲོས་མོལ་གནང་ཡོད་ འདུག
གསར་འགོད་པ། དོན་གྲུབ།
ཞི་བའི་གྲོས་མོལ་དོན་ལྡན་འོངས་བར་ཤོག
བ་བསྐམ་པོ་ལ་འོ་མ་བཞོས། དོན་རྒྱུ་མེད་པར་འུ་རེ་ཐུག
ཚིག་བསྐམ་པོ་ཡིས་སྐད་ཆ་བཤད། འགྲུབ་རྒྱུ་མེད་པར་རྙོགས་གྲ་མང་།