ན་གོར་མོ་སོགས་སུ་བྱེ་རླུང་དྲག་པོ་ཐེངས་འགར་འཚུབ་སྟེ་མཁའ་དབུགས་ལ་འབག་བཙོག་ཆེན་པོ་བཟོས་ཡོད་འདུག
ཟླ་འདིའི་ཕྱི་ཚེས་ ༢ ཉིན་གྱི་ཕྱི་དྲོར་མཚོ་སྔོན་ཞིང་ཆེན་ན་གོར་མོ་གྲོང་ཁྱེར་དུ་ཡང་བསྐྱར་བྱེ་རླུང་དྲག་པོ་འཚུབ་སྟེ། གྲོང་ཁྱེར་ཡོངས་སུ་བྱེ་རྡུལ་གྱིས་ཁེངས་ཡོད་པ་དང་། ཉིན་དེར་གྲོང་ཁྱེར་དེའི་ནང་ཡོད་པའི་འཛམ་གླིང་ཤུལ་བཞག་རིག་དངོས་བཤམས་སྟོན་ཁང་སོགས་སྒོ་རྒྱག་དགོས་ཁེལ་ཡོད་པ་མ་ཟད། ན་གོར་མོ་གནམ་གཤིས་བརྟག་དཔྱད་ཁང་གིས་ཁ་པར་དང་དྲ་རྒྱ་སོགས་ཀྱི་ནང་ད་དུང་རིམ་པ་མི་འདྲ་བའི་བྱེ་རླུང་འཚུབ་སྲིད་པའི་ཉེན་བརྡ་བཏང་ཡོད་འདུག
ཕྱི་ཟླ་ ༣ ཚེས་ ༣༡ ཉིན་ནས་བཟུང་ན་གོར་མོ་གྲོང་ཁྱེར་དང་ཀན་ལྷོ་སོགས་སུ་རིམ་པ་འདྲ་མིན་གྱི་བྱེ་རླུང་ཐེངས་འགར་འཚུབ་ཡོད་པ་དང་། ཁ་སང་ཕྱི་ཚེས་ ༣ ཉིན་ཤིན་ཅང་ཏཱ་ལི་མོ་བྱང་ཐང་དུའང་བྱེ་རླུང་ཤུགས་ཆེན་འཚུབ་སྟེ། ཞིང་ལས་ཐོན་སྐྱེད་དང་འགྲིམ་འགྲུལ་འགྲོ་འོང་སོགས་ལ་གནོད་སྐྱོན་ཐེབས་པའི་གནས་ཚུལ་ཐོན་ཡོད་ཀྱང་། རྒྱ་ནག་གཞུང་ཕྱོགས་ཀྱི་བརྒྱུད་ལམ་ཁག་ནས་ཐེངས་འདིའི་བྱེ་རླུང་གིས་མི་རྒྱུ་གཉིས་ལ་གནོད་སྐྱོན་བཟོས་མེད་ལུགས་བསྒྲགས་འདུག
མཚོ་སྔོན་བརྙན་འཕྲིན་ཁང་གི་གསར་འགོད་པས་ཞིང་ཆེན་གནམ་གཤིས་བརྟག་དཔྱད་ཁང་གི་འགན་འཛིན་ཀྲང་ཅེ་ལུང་ལ། ཉེ་བའི་ལོ་ཤས་ནང་མཚོ་སྔོན་ཞིང་ཆེན་ཁུལ་དུ་བྱེ་རླུང་ཐེངས་མང་འཚུབ་པའི་རྒྱུ་རྐྱེན་དང་དེའི་གནོད་སྐྱོན་ཐད་བཅར་འདྲི་བྱས་པར་ཁོང་གིས། སྤྱིར་བཏང་དྲག་རླུང་དང་ཆར་རླུང་འཚུབ་པའི་ཤུགས་རྐྱེན་འོག བྱེ་རླུང་འཚུབ་མ་ལྡང་བའི་ངང་ཚུལ་བྱུང་གི་ཡོད་པ་དང་། ད་རེས་གོར་མོ་སོགས་སུ་བྱུང་བའི་བྱེ་རླུང་དེ་ཆར་རླུང་ལྡང་ཞིང་ས་གཞིར་སྐམ་གཤིས་ཆེ་བའི་རྐྱེན་གྱིས་བྱུང་ཡོད་ལ། བྱེ་རླུང་དེས་གྲོང་ཁྱེར་ཡོངས་ཀྱི་འགྲིམ་འགྲུལ་དང་འཛུགས་སྐྲུན་དངོས་པོའི་བརྡ་ཁྱབ་སོགས་ལ་གནོད་སྐྱོན་བཟོས་ཡོད་པ་མ་ཟད། མཁའ་དབུགས་ལ་འབག་བཙོག་ཆེན་པོ་ཐེབས་ཡོད་སྟབས། མིའི་ལུས་ཁམས་ལའང་གནོད་པ་ངེས་ཅན་ཐེབས་བཞིན་ཡོད་སྐོར་བརྗོད་འདུག
གསར་འགོད་པ། པདྨ་མཚོ།
ཤིང་སྡོང་འཛུགས་དགོས་རེད། ཅེས་ས་བདག་གཞིས་བདག་ཙམ་མ་ཟད། ས་གཞི་སྐམ་པོ་རང་གི་ངུ་སྐད་ཡིན་པ་ཧ་གོ་ནས། ད་ནས་བཟུང་ཤིང་སྣ་འདྲ་མིན་འཛུགས་གལ་ཆེ་བར་སྣང་ངོ་།།