ཁ་སང་རྒྱ་ནག་རྒྱལ་སྲིད་སྤྱི་ཁྱབ་ཁང་གིས་བོད་སྐོར་གྱི་རྒྱབ་ཤ་དཀར་པོའི་དེབ་ཟེར་བ་ཡོངས་བསྒྲགས་བྱས་པ་དེར་དབུས་བོད་མིའི་སྒྲིག་འཛུགས་ནས་ལན་འདེབས་གསལ་བསྒྲགས་ཤིག་གནང་འདུག
ཕྱི་ལོ་ ༡༩༩༠ ལོ་ནས་བཟུང་རྒྱ་གཞུང་གིས་བོད་སྐོར་ལ་རྒྱབ་ཤ་དཀར་པོའི་དེབ་ཅེས་པ་ཞིག་འདོན་མགོ་བརྩམས་ཡོད་པ་ལྟར། ཁ་སང་ཕྱི་ཚེས་ ༡༥ ཉིན་རྒྱ་ནག་རྒྱལ་སྲིད་སྤྱི་ཁྱབ་ཁང་གིས་༼བོད་འཕེལ་རྒྱས་ཀྱི་ལམ་བུའི་ལོ་རྒྱུས་གདམ་ག༽་ཅེས་པའི་ཕྱི་ལོ་ ༢༠༡༥ ལོའི་བོད་ཀྱི་རྒྱབ་ཤ་དཀར་པོའི་དེབ་ཅིག་འགྲེམས་སྤེལ་བྱས་ཡོད་པ་དང་། དེབ་དེའི་ནང་བོད་ཀྱི་ལམ་ལུགས་རྙིང་པ་ལོ་རྒྱུས་ཀྱི་སྡིངས་ཆའི་ཐོག་ནས་ངེས་པར་དུ་མེད་པ་བཟོ་དགོས་ལ། བོད་གསར་པ་ཡང་དག་པའི་འཕེལ་རྒྱས་ཀྱི་ལམ་ཀར་སྐྱོད་ཀྱི་ཡོད་སྐོར་དང་། དེ་བཞིན་དོན་དངོས་ཐོག་དབུ་མའི་ལམ་ནི་རྒྱལ་ཁབ་ཁ་བྲལ་གཏོང་བའི་སྲིད་བྱུས་ཤིག་ཡིན་ལ། ཞི་བདེ་དང་འཚེ་མེད་ཀྱི་རྣམ་པ་རྫུན་མའི་ཐོག་ནས་བོད་རང་བཙན་དང་། ༧གོང་ས་མཆོག་གི་སྔར་གྱི་སྐུ་དབང་བརྩོན་ལེན་བྱེད་ཀྱི་ཡོད་ཀྱང་། རྒྱ་ནག་དབུས་གཞུང་གིས་༧གོང་ས་མཆོག་ལ་བཟུང་བའི་སྲིད་བྱུས་དེར་འགྱུར་བ་མེད་པས། ༧གོང་ས་མཆོག་གིས་བོད་ནི་ལོ་རྒྱུས་ཀྱི་ཐོག་ནས་བཟུང་རྒྱ་ནག་གི་ཆ་ཤས་ཡིན་པ་ཁས་ལེན་གནང་དགོས་པ་དང་འབྲེལ། བོད་རང་བཙན་གྱི་ལངས་ཕྱོགས་དོར་ཏེ་རྒྱལ་ཁབ་ཁ་བྲལ་གཏོང་བའི་སྲིད་བྱུས་མཚམས་འཇོག་གནང་བ་ཡིན་ན། ད་གཟོད་རྒྱ་ནག་དབུས་གཞུང་དང་འབྲེལ་བ་ལེགས་བཅོས་བཏང་བར་བརྗོད་ཆོག་སྐོར་སོགས་བསྒྲགས་ཡོད་སྟབས། ཁ་སང་དབུས་བོད་མིའི་སྒྲིག་འཛུགས་ཀྱིས་དེ་ལ་ལན་འདེབས་གསལ་བསྒྲགས་ཤིག་སྤེལ་ཏེ། རྒྱ་ནག་གཞུང་གིས་བོད་མི་ཚོས་དབུ་མའི་ལམ་གྱི་ཐོག་ནས་བོད་རང་བཙན་རྩོད་བཞིན་ཡོད་སྐོར་ལོག་འགྲེལ་བྱས་དེ་གཞན་མགོ་རྨོངས་ཏུ་འཇུག་བྱེད་ཙམ་དང་། བོད་ནང་གི་དངོས་ཡོད་གནས་སྟངས་འགེབ་སྲུང་བྱེད་པར་ཐབས་ལམ་གཞན་མ་རྙེད་པ་ཞིག་ཡིན་སྐོར་བརྗོད་འདུག
དེ་ཡང་དབུས་བོད་མིའི་སྒྲིག་འཛུགས་ཀྱི་གསལ་བསྒྲགས་ནང་། ཕྱི་ལོ་ ༡༩༩༠ མགོ་སྟོད་ནས་བཟུང་ད་བར་རྒྱ་ནག་གཞུང་གིས་བོད་ལྗོངས་ཀྱི་རྒྱབ་ཤ་དཀར་པོའི་དེབ་ཟེར་བ་ཐེངས་ ༡༣ བཏོན་ཡོད། དེ་ནི་པེ་ཅིང་གཞུང་གིས་ཕྱི་ལོ་ ༡༩༩༠ ནས་ད་བར་ལོ་གཉིས་རེའི་མཚམས་སུ་བོད་ཐོག་རྒྱབ་ཤ་དཀར་པོའི་དེབ་ཐེངས་རེ་བཏོན་པ་ལྟ་བུ་ཆགས་ཡོད། སྤྱིར་རྒྱབ་ཤ་དཀར་པོའི་དེབ་ཅེས་པའི་གོ་དོན་ནི། ཆེས་རྙོག་གཞི་ཅན་གྱི་གནད་དོན་ལ་གཞུང་གི་དབང་ཚད་ལྡན་པའི་ལམ་སྟོན་ཡིག་ཆའམ། དངོས་ཟོག་ཚོང་རྒྱུའི་དྲིལ་བསྒྲགས་ཡིག་ཆ་ཞིག་ལ་ཟེར་བ་ཡིན། བོད་ཐོག་རྒྱ་ནག་གཞུང་གིས་དབང་བསྒྱུར་བྱ་རྒྱུའི་ཐོབ་དབང་ཡོད་ཚུལ་བཤད་པ་དེར་ངོས་ལེན་བྱེད་མཁན་ཡོང་རྒྱུར་ཧ་ཅང་དཀའ་ངལ་འཕྲད་བཞིན་ཡོད་སྟབས། རྒྱ་ནག་གཞུང་གིས་བོད་ཐོག་རྒྱབ་ཤ་དཀར་པོའི་དེབ་ཟེར་བ་ཐེངས་ ༡༣ པ་དེ་འདོན་སྤེལ་བྱེད་དགོས་ཐུག་ཡོད། བོད་ལྗོངས་རྒྱབ་ཤ་དཀར་པོའི་དེབ་ཟེར་བ་དེ་ད་ཆ་ཧ་ཅང་མང་དྲགས་པ་དང་ཡིད་རྟོན་མི་རུང་ཞིང་། བོད་ནང་གི་གནས་སྟངས་ཇེ་ཞན་ཇེ་སྡུག་ཏུ་འགྲོ་བཞིན་པ་དེ་དག་འགེབས་སྲུང་བྱ་རྒྱུར་ཕྱི་དྲགས་པ་རེད། ཅེས་དང་།
ཐེངས་འདིའི་རྒྱབ་ཤ་དཀར་པོའི་བརྗོད་དོན་སྐོར་ལ། རྒྱ་ནག་གཞུང་གིས་ད་བར་བོད་ཐོག་བོད་ལྗོངས་རྒྱབ་ཤ་དཀར་པོའི་དེབ་ཟེར་བ་ ༡༢ བཏོན་ཟིན་པ་རྣམས་དང་མི་འདྲ་བར་ཐེངས་འདིའི་རྒྱབ་ཤ་དཀར་པོའི་ནང་། སྔ་ལོ་བོད་མིའི་སྒྲིག་འཛུགས་ཀྱིས་རྒྱལ་སྤྱིའི་སྟེང་རྣམ་པ་གསར་པའི་ཐོག་དབུ་མའི་ལམ་གྱི་གོ་རྟོགས་ལས་འགུལ་སྤེལ་ཡོད་པ་དེར་སྐྱོན་བརྗོད་ཤུགས་ཆེ་བྱས་ཡོད། འོན་ཀྱང་དེ་ནི་ཕྱིས་དྲགས་ཡོད། རྒྱ་ནག་གཞུང་གིས་དབུ་མའི་ལམ་གྱི་སྲིད་བྱུས་ཐོག་ནས་བོད་མི་ཚོས་རང་བཙན་རྩོད་བཞིན་ཡོད་སྐོར་ལོག་འགྲེལ་བྱས་ཡོད་པ་དེ་ནི་ཆེད་མངགས་གཞན་དག་མགོ་བོ་རྨོངས་སུ་འཇུག་རྒྱུའི་ཐབས་ལམ་ཞིག་ལས་མ་འདས། འཁྱོག་བཤད་འདི་ལྟ་བུ་བྱ་རྒྱུ་ལས་རྒྱ་ནག་གཞུང་ལ་ཐབས་ལམ་གཞན་རྙེད་མེད། དབུ་མའི་ལམ་གྱི་སྲིད་བྱུས་འདི་ནི་བོད་མི་ཚོར་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ཀྱི་སྒྲོམ་གཞིའི་འོག་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་གི་གནས་བབ་གཅིག་ཐོབ་ཐབས་བྱེད་བཞིན་ཡོད་པ་དེ་ནི་གཉིས་སྨན་གྱི་ཐབས་ལམ་ཞིག་ཡིན། དེར་བརྟེན་སྲིད་གཞུང་མང་པོས་སྲིད་བྱུས་འདིར་བསྔགས་བརྗོད་ཞུ་བཞིན་ཡོད་པ་མ་ཟད། འཛམ་གླིང་ཁྱོན་ཡོངས་ནས་ཐབས་ལམ་འདིར་དགའ་མོས་ཆེན་པོ་བྱེད་བཞིན་ཡོད། ཐེངས་འདིར་དེ་སྔའི་བོད་ལྗོངས་རྒྱབ་ཤ་དཀར་པོའི་དེབ་ཟེར་བ་དེ་དག་དང་མི་འདྲ་བར་༸གོང་ས་མཆོག་ནས་རྒྱ་ནག་གཞུང་དང་ལྷན་འབྲེལ་བ་མཛད་རྒྱུའི་ཀུན་སློང་ལ་ཟུར་ཟ་དང་མཚན་སྨད་བྱས་ཡོད། ༸གོང་ས་༸སྐྱབས་མགོན་ཆེན་པོ་མཆོག་ནི་བོད་མི་ཙམ་མ་ཟད། འཛམ་གླིང་ཁྱོན་ཡོངས་སུ་ཧ་ཅང་གུས་བཀུར་དང་ཆེ་བསྟོད་ཞུ་ཡུལ་གྱི་སྐྱེས་ཆེན་དམ་པ་ཞིག་ཡིན་སྟབས། ༸གོང་ས་མཆོག་གི་ཀུན་སློང་དང་དགོངས་པ་བཞེས་ཕྱོགས་ལ་རྒྱ་ནག་གཞུང་ནས་ངོས་སྦྱོར་གང་ཡང་ཐོབ་དགོས་ཀྱི་མེད། ༸གོང་ས་ཏཱ་ལའི་བླ་མ་མཆོག་ནི་རྩོད་མེད་ཡོངས་གྲགས་ཀྱི་བོད་མིའི་དབུ་ཁྲིད་གཅིག་ཡིན་པ་མ་ཟད། འཛམ་གླིང་ཁྱོན་ཡོངས་ཀྱི་རྒྱ་རིགས་ཚོས་ཀྱང་ཡིད་སྨོན་ཞུ་ཡུལ་ཞིག་ཡིན། ཞེས་བརྗོད་འདུག
མཇུག་ཏུ། གསར་འགོད་ཚན་པ་ཁག་གིས་ཡང་ཡང་འགྲེལ་བརྗོད་བྱས་པ་ལྟར་ན། གསར་འགོད་པ་རྣམས་བྱང་ཀོ་རི་ཡ་ལས་བོད་ནང་དུ་འགྲོ་རྒྱུར་དམ་བསྒྲགས་ཆེ་བ་ཡོད་སྐོར་བརྗོད་བཞིན་ཡོད། བྱང་ཀོ་རི་ཡ་ནི་རྒྱ་ནག་གི་མཐུན་ཕྱོགས་རྒྱལ་ཁབ་གཅིག་ཡིན། བོད་ཐོག་རྒྱབ་ཤ་དཀར་པོའི་དེབ་འདོན་རྒྱུའི་ཚབ་ཏུ་རྒྱ་ནག་གཞུང་གིས་བོད་ནང་རྒྱལ་སྤྱིའི་འགྲོ་བ་མིའི་ཐོབ་ཐང་རྟོག་ཞིབ་ཚོགས་པ་དང་གསར་འགོད་པ་འགྲོ་རྒྱུའི་ཐོབ་ཐང་སྤྲད་དེ། ཁོང་རྣམ་པས་འཛམ་གླིང་མི་མང་ཚོར་བོད་ནང་གི་དངོས་ཡོད་གནས་སྟངས་ཇི་ཡིན་གྱི་སྙན་ཐོ་དང་དཔང་པོ་བྱེད་འཇུག་དགོས། ཞེས་འབོད་སྐུལ་གནང་འདུག
གསར་འགོད་པ། པདྨ་མཚོ།
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
ཚང་མ་ལོས་བསམ་བློ་ཡག་པོ་ཐོངས། འདི་འདྲའི་གསལ་བསྒྲགས་ནི་སོ་སོས་སོ་སོ་མགོ་བསྐོར་བཏང་ཡག་རང་རེད། རྒྱ་མིའི་གཞུང་གིས་ག་རེ་ལབ་འདུག་པ་གཤམ་དུ་བཀོད་ཡོད། མ་གོ་མཐོས་མ་ཡོད་པ་གནང་རོགས། ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་རྒྱལ་སྲིད་སྤྱི་ཁྱབ་ཁང་ཟེར་བ་ནི་༼དབུས་སྲིད་གཞུང༽ཞེས་འབོད་ཀྱིན་པ་དེ་རེད།
༢༠༡༥ ལོའི་བོད་ལྗོངས་ཀྱི་རྒྱབ་ཤ་དཀར་པོའི་དེབ། བོད་ལྗོངས་འཕེལ་རྒྱས་བགྲོད་ལམ་གྱི་ལོ་རྒྱུས་ཀྱི་གདམ་ག
2015-03-27 16:22:00 | རྩོམ་པ་པོ།: | ཡོང་ཁུངས།: ཀྲུང་གོའི་སྲིད་གཞུང་དྲ་བ།(༢༠༡༥ ལོའི་ཟླ ༤ པ)
ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་རྒྱལ་སྲིད་སྤྱི་ཁྱབ་ཁང་གི་གསར་འགྱུར་གཞུང་ལས་ཁང་།
དཀར་ཆག
སྔོན་འགྲོའི་གཏམ།
དང་པོ། ལམ་ལུགས་རྙིང་པ་བོད་ལྗོངས་ཀྱི་ལོ་རྒྱུས་ཀྱི་གར་སྟེགས་ནས་ཕྱིར་འཐེན་ངེས།་ཅན་ཡིན།
གཉིས། བོད་གསར་པ་ཡང་དག་པའི་འཕེལ་རྒྱས་ཀྱི་ལམ་དུ་བསྐྱོད།
གསུམ། “དབུ་མའི་ལམ” གྱི་ངོ་བོ་ནི་ཀྲུང་གོ་ཁ་ཕྲལ་ཡིན།
བཞི། “ཞི་བདེ་” དང་། “འཚེ་མེད་ཞི་བདའི་ལམ་” གྱི་འཕྲུལ་སྣང་།
ལྔ། ཀྲུང་དབྱང་སྲིད་གཞུང་གིས་ཏཱ་ལ་སྐྱེ་ཕྲེང་བཅུ་བཞི་པར་འཛིན་པའི་སྲིད་ཇུས།
མཇུག་བསྡུའི་གཏམ།
སྔོན་འགྲོའི་གཏམ།
ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ནི་ཀྲུང་གོའི་མི་རིགས་ཁག་གི་མི་དམངས་ཀྱིས་ཐུན་མོང་ཐོག་གསར་དུ་བསྐྲུན་པའི་གཅིག་གྱུར་གྱི་མི་རིགས་མང་བའི་རྒྱལ་ཁབ་ཅིག་ཡིན། ལོ་རྒྱུས་འཕེལ་རྒྱས་ཀྱི་དུས་ཡུན་རིང་པོའི་ནང་། ཀྲུང་གོའི་མི་རིགས་ཁག་སྐྱིད་སྡུག་མཉམ་མྱོང་གི་ཀྲུང་ཧྭ་མི་རིགས་ཀྱི་ལས་དབང་གི་ཚོགས་པ་ཞིག་ཆགས་པ་རེད། བོད་འདི་ཉིད་གནའ་སྔ་མོ་ནས་བཟུང་ཀྲུང་གོའི་ཆ་ཤས་ཤིག་དང་། བོད་རིགས་ནི་ཀྲུང་ཧྭ་མི་རིགས་ཀྱི་ལས་དབང་གི་ཐུན་མོང་ཚོགས་པའི་ཁོངས་མི་ཞིག་ཡིན། བོད་ལྗོངས་ཀྱི་ལས་དབང་ནི་ཐོག་མཐའ་བར་གསུམ་དུ་མེས་རྒྱལ་རླབས་པོ་ཆེ་དང་ཀྲུང་ཧྭ་མི་རིགས་ཀྱི་ལས་དབང་དང་འབྲེལ་བ་དམ་པོ་ཡོད།
བོད་རིགས་མི་དམངས་ཀྱིས་ལོ་རྒྱུས་སྟེང་། འོད་སྟོང་འཕྲོ་བའི་ལོ་རྒྱུས་དང་རིག་གནས་བསྐྲུན་ཡོད་ལ། ཀྲུང་གོའི་ལོ་རྒྱུས་དང་ཀྲུང་ཧྭའི་རིག་གནས་ཕུན་སུམ་ཇེ་ཚོགས་དང་གོང་དུ་འཕེལ་བར་བྱས་རྗེས་བཞག་ཡོད། འོན་ཀྱང་། དུས་རབས 20 པའི་དུས་དཀྱིལ་བར། བོད་ལྗོངས་ནི་སྔར་བཞིན་ཆོས་སྲིད་ཟུང་འབྲེལ་གྱི་བཀས་བཀོད་རྒྱུད་འཛིན་ཞིང་བྲན་ལམ་ལུགས་ཀྱི་དབང་སྒྱུར་འོག་ཏུ། ཐོན་སྐྱེད་ནུས་ཤུགས་ཀྱི་ཆུ་ཚད་ཧ་ཅང་དམའ་བ་དང་། སྤྱི་ཚོགས་རྙིང་ཞེན་བག་འཁུམས་དང་ཕྱི་བཀག་ནང་སྡོམ། ཉམས་རྒུད་རྗེས་ལུས་ཐེབས་ཡོད།
བོད་ལྗོངས་དེང་རབས་ཤེས་དཔལ་གྱི་ལམ་དུ་འགྲོ་འགོ་དངོས་སུ་ཚུགས་དུས་ནི 1949 ལོར་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་དབུ་བརྙེས་རྗེས་ལ་ཡིན། ཞི་བའི་བཅིངས་འགྲོལ་དང་། དམངས་གཙོའི་བཅོས་སྒྱུར། རང་སྐྱོང་ལྗོངས་དབུ་བརྙེས་པ་དང་། བསྒྱུར་བཅོས་སྒོ་འབྱེད་སོགས་འཕེལ་རྒྱས་ཀྱི་དུས་རིམ་གལ་ཆེན་ཁག་བརྒྱུད་རྗེས། བོད་ལྗོངས་ཀྱིས་སྤྱི་ཚོགས་ལམ་ལུགས་གསར་རྐྱང་ཞིག་བཙུགས་ཡོད་པར་མ་ཟད། དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་ལོ་རྒྱུས་རང་བཞིན་གྱི་མཆོང་སྐྱོད་མངོན་འགྱུར་བྱས་པ་དང་། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་བགྲོད་ལམ་ཐོག་བསྐྱོད་ཐུབ་པ་བྱུང་ཡོད།
བོད་ལྗོངས་དེ་རིང་གི་འཕེལ་རྒྱས་ཀྱི་འགྲོ་ལམ་དུ་བསྐྱོད་པ་ནི། དེང་རབས་ཀྱི་ཤེས་དཔལ་འཕེལ་རྒྱས་ཀྱི་ཕྱི་རོལ་ཡུལ་གྱི་བླང་བྱ་ཞིག་དང་། མིའི་རིགས་ཀྱི་སྤྱི་ཚོགས་ཡར་ཐོན་གྱི་རླབས་རྒྱུན་དང་བསྟུན་པ་ཡིན་ལ། ཀྲུང་གོའི་རྒྱལ་ཁབ་ཀྱི་གནས་ཚུལ་དང་འཕེལ་རྒྱས་ཀྱི་དོན་དངོས་དང་མཐུན་པ་དང་། བོད་ལྗོངས་ཀྱི་མི་རིགས་ཁག་གི་མི་དམངས་ཀྱི་རྩ་བའི་ཁེ་ཕན་དང་མཐུན་ཡོད། ལམ་དེའི་ཐོག་ནས། བོད་ལྗོངས་མི་རིགས་ཁག་གི་མི་དམངས་ཀྱིས་རང་ཁྱིམ་རང་བདག་བྱེད་པ་དང་། རྒྱལ་ཁབ་དང་། སྤྱི་ཚོགས། རང་ཉིད་ཀྱི་ལས་དབང་བཅས་ཀྱི་བདག་པོར་གྱུར་ཡོད། བོད་ལྗོངས་ཀྱིས་དབུལ་ཞིང་ཕོངས་ལ་རྗེས་ལུས་ཡིན་པ་ནས་ཕྱུག་འགྱུར་དང་ཤེས་དཔལ་གྱི་མཆོང་སྐྱོད་མངོན་དུ་བསྒྱུར་ཏེ། ཉམས་འགྱུར་གསར་རྐྱང་གིས་སྐྱེ་བོ་རྣམས་ཀྱི་མདུན་དུ་མངོན། བོད་ལྗོངས་མི་རིགས་ཁག་གི་མི་དམངས་ཀྱིས་རྒྱལ་ཡོངས་མི་དམངས་དང་འཆམ་མཐུན་མཉམ་གནས་དང་། ཕྱར་བ་གྲུ་འདེགས། མཉམ་དུ་བདེ་སྐྱིད་དང་མཛེས་སྡུག་ལྡན་པའི་འཚོ་བ་གསར་པ་བཏོད་པ་དང་། བོད་འཛམ་གླིང་ལ་ཁ་ཕྱོགས་པའི་སྒོ་འབྱེད་ཀྱི་ཉམས་དང་། མིའི་རིགས་ཀྱི་ཤེས་དཔལ་ཕུལ་བྱུང་གྲུབ་འབྲས་བསྡུ་ལེན་ཧུར་ཐག་བྱས་ཡོད།
བོད་ལྗོངས་ཀྱི་འཕེལ་རྒྱས་ལ་གྲུབ་འབྲས་ཧ་ཅང་ཆེན་པོ་ཐོབ་པ་དེས་བོད་ལྗོངས་ཡང་དག་པའི་འཕེལ་རྒྱས་ཀྱི་ལམ་བུར་བསྐྱོད་པ་གསལ་བཤད་གང་ལེགས་བྱ་ཐུབ་ཀྱི་ཡོད། ཡིན་ནའང་། དུས་ཡུན་རིང་པོར་ཕྱི་རྒྱལ་དུ་ཡུལ་གྱར་ཕྱིན་པའི་བཀས་བཀོད་རྒྱུད་འཛིན་གྱི་ཞིང་བྲན་བདག་པོའི་གྲལ་རིམ་གྱིས་སྟོབས་ཤུགས་ལྷག་འཕྲོའི་འཐུས་ཚབ་ཡིན་པའི་ཏཱ་ལའི་སྐུ་ཕྲེང་བཅུ་བཞི་པའི་རུ་ཚོགས་ཀྱིས། “བོད་རང་བཙན”བཅས་ཀྱི་ཆབ་སྲིད་ཀྱི་དམིགས་ཡུལ་དང་བོད་རྙིང་པའི་ཆོས་སྲིད་ཟུང་འབྲེལ་གྱི་བཀས་བཀོད་རྒྱུད་འཛིན་ཞིང་བྲན་ལམ་ལུགས་ལ་ཞེན་ཐག་མ་ཆོད་པར། དུས་ཡུན་རིང་པོའི་ནང་གཏུམ་དྲག་གིས”བོད་རང་བཙན”གྱི་ལམ་ཕྱོགས་སྤེལ་བར་ཕམ་ཁ་བྱུང་རྗེས། ལོ་འདི་དག་ལ་ཡང”དབུ་མའི་ལམ”ཞེས་འཆལ་གཏམ་ཞིག་ཆེ་ཆེར་སྒྲོག་གི་ཡོད། “དབུ་མའི་ལམ”ནི“འོས་མེད་འགྲིག་ཐབས”དང་། “བཏང་སྙོམས”དང་། “ཞི་བདེ”དང་། “འཚེ་མེད་ཞི་བའི་ལམ་”དང་འདྲ་བར། དོན་ལ་ཀྲུང་གོ་གསར་པ་དབུ་བརྙེས་པ་ནས་བཟུང་བོད་ལྗོངས་བསྐྱོད་པའི་འཕེལ་རྒྱས་ཀྱི་བགྲོད་ལམ་ཡང་དག་ཁས་མ་བླངས་པ་དང་། ཀྲུང་གོའི་མངའ་ཁོངས་སུ་ཏཱ་ལ་སྐྱེ་ཕྲེང་བཅུ་བཞི་པའི་ཚོགས་ཁག་གིས་དབང་སྒྱུར་བྱེད་པའི“རྒྱལ་ཁབ་ནང་གི་རྒྱལ་ཁབ” འཛུགས་རྒྱུའི་རེ་ངན་བཅངས་ཏེ། གོམ་རིམ་དབྱེ་ནས “བོད་རང་བཙན” གྱི་དམིགས་ཡུལ་མངོན་དུ་བྱ་འདོད་པ་ཡིན།