འདས་ལོར་བོར་བརླག་ཏུ་ཕྱིན་པའི་མཱ་ལེ་ཞི་ཡའི་འགྲུལ་སྐྱེལ་གནམ་གྲུ་དེ་ད་རུང་རྙེད་མེད་སྟབས་འདི་ལོའི་ཕྱི་ཟླ་ ༥ པའི་ཟླ་མཇུག་ནས་བཟུང་འཚོལ་ཞིབ་ཀྱི་ས་ཁྱོན་ལྡབ་གཅིག་གིས་ཆེ་རུ་གཏོང་རྒྱུ་ཡིན་ལུགས་བརྗོད་འདུག
ཁ་སང་མཱ་ལེ་ཞི་ཡའི་རྒྱལ་ས་ཇེ་ལུང་པོ་རུ་བསྡུས་པའི་གསར་འགོད་ལྷན་ཚོགས་ཤིག་གི་ཐོག མཱ་ལེ་ཞི་ཡའི་འགྲིམ་འགྲུལ་ལས་ཁུངས་ཀྱི་འགན་འཛིན་ལོ་ཀྲུང་ལེ་དང་ཨོ་སི་ཊོ་ལི་ཡའི་སྲིད་བློན་གཞོན་པ་ཝཱ་རིན་ཊིར་སི་(Warren Truss)། རྒྱ་ནག་གི་འགྲིམ་འགྲུལ་སྐྱེལ་འདྲེན་ལས་ཁུངས་ཀྱི་འགན་འཛིན་ཡཱང་ཁྲན་ཐཱང་བཅས་ཀྱིས། འདས་ལོའི་ཕྱི་ཟླ་ ༣ ཚེས་ ༨ ཉིན་གར་སོང་ཆ་མེད་དུ་གྱུར་བའི་མཱ་ལེ་ཞི་ཡའི་འགྲུལ་སྐྱེལ་གནམ་གྲུ་ཨང་རྟགས་(MH370)ཅན་དེ་མུ་མཐུད་འཚོལ་ཞིབ་བྱེད་བཞིན་ཡོད་ལ། གལ་སྲིད་ཟླ་རྗེས་མའི་བར་རྙེད་སོན་མ་བྱུང་ཚེ། འཚོལ་ཞིབ་ཀྱི་ས་ཁྱོན་ལྡབ་གཅིག་གིས་ཆེ་རུ་བཏང་སྟེ་འཚོལ་རྒྱུ་ཡིན་སྐོར་བསྒྲགས་འདུག
གནམ་གྲུ་འཕུར་སྐྱོད་རྟོག་ཞིབ་མ་ལག་གི་མཁོ་འདོན་གྲངས་གནས་ལྟར་ན། ས་ཁྱོན་སྤྱི་ལེ་གྲུ་བཞི་མ་ཁྲི་ ༦ ཙམ་གྱི་ནང་ནས་གནམ་གྲུ་དེ་རྙེད་སོན་བྱུང་སྲིད་ལ། ད་ལྟའི་བར་ཨོ་སི་ཊོ་ལི་ཡའི་རྒྱ་མཚོའི་ཁུལ་གྱི་རྟོག་ཞིབ་ལས་ཁུངས་ཤིག་གིས་ས་ཁོངས་དེའི་བརྒྱ་ཆ་ ༦༠ ཙམ་ལ་འཚོལ་ཞིབ་བྱས་ཚར་བ་དང་། ཟླ་རྗེས་མའི་ཟླ་མཇུག་བར་ས་ཁུལ་དེའི་འཚོལ་ཞིབ་ལས་གཞི་ཡོངས་སུ་མཇུག་སྒྲིལ་ཐུབ་པའི་ཚོད་དཔག་བྱེད་བཞིན་ཡོད་སྐོར་བརྗོད་འདུག
གསར་འགོད་ལྷན་ཚོགས་ཐོག ཨོ་སི་ཊོ་ལི་ཡའི་སྲིད་བློན་གཞོན་པ་ཝཱ་རིན་ཊིར་སི་ལགས་ཀྱིས། གལ་སྲིད་ཕྱི་ཟླ་ ༥ པའི་ཟླ་མཇུག་བར་འགྲུལ་སྐྱེལ་གནམ་གྲུ་དེ་མ་རྙེད་པ་ཡིན་ན། ད་ལྟའི་འཚོལ་ཞིབ་ཀྱི་ས་ཁྱོན་ལྡབ་གཅིག་གིས་ཆེ་རུ་བཏང་སྟེ་འདི་ལོའི་ལོ་མཇུག་བར་མུ་མཐུད་འཚོལ་ཞིབ་བྱ་རྒྱུ་ཡིན་ལ། འཚོལ་ཞིབ་ཀྱི་ས་ཁྱོན་ཆེ་རུ་གཏོང་བར་ཁྱོན་ཨ་སྒོར་ཁྲི་ ༣༥༠༠ ཡས་མས་འགྲོ་རྒྱུ་ཡིན་སྟབས། ཨོ་སི་ཊོ་ལི་ཡ་དང་མཱ་ལེ་ཞི་ཡ་མཉམ་འབྲེལ་གྱིས་འགན་ལེན་དགོས་པ་དང་། རྒྱལ་ཁབ་དེ་གཉིས་ནས་ད་ལྟའི་བར་འཚོལ་ཞིབ་ཆེད་ཨ་སྒོར་ཁྲི་ ༨༦༠༠ བཏང་ཡོད་སྐོར་བརྗོད་འདུག
ཉེ་སྔོན་ཨོ་སི་ཊོ་ལི་ཡའི་སྲིད་བློན་ཊོ་ནི་ཨ་བྷོ་ཊི་(Tony Abbott)ལགས་ཀྱིས་གྲོས་ཚོགས་ནང་། གནམ་གྲུ་འཚོལ་ཞིབ་ཀྱི་ནུས་ཚད་འདི་འདྲ་ཞིག་གི་ཐོག་ནས་མུ་མཐུད་དུ་འཚོལ་བྱེད་པར་ཁག་ཐེག་བྱེད་མི་ཐུབ་ཀྱང་། ང་ཚོས་མུ་མཐུད་དུ་གནད་དོན་འདིའི་གསང་གནས་བརྟོལ་ཏེ་ལན་ཞིག་རག་པར་འབད་བརྩོན་ཆེན་པོ་བྱ་རྒྱུ་ཡིན། ཞེས་བརྗོད་འདུག
བོར་བརླག་ཏུ་ཕྱིན་པའི་འགྲུལ་སྐྱེལ་གནམ་གྲུ་དེའི་ནང་ཁྱོན་འགྲུལ་བ་ ༢༣༩ ཡོད་པ་དང་། དེའི་ནང་རྒྱ་ནག་གི་འགྲུལ་བ་ ༡༥༣ ཡོད་འདུག དང་ཐོག་མཱ་ལེ་ཞི་ཡ་དང་རྒྱ་ནག ཨོ་སི་ཊོ་ལི་ཡ་བཅས་ཀྱིས་གཙོས་རྒྱལ་ཁབ་མང་པོས་མཉམ་ལས་འཚོལ་ཞིབ་བྱས་ཡོད་པ་མ་ཟད། ཆེད་མཁས་པས་གནམ་གྲུའི་འཁོར་སྐར་རྟོག་ཞིབ་འཕྲུལ་ཆས་ལ་ཞིབ་འཇུག་བྱས་པ་བརྒྱུད། གནམ་གྲུ་དེས་ཅི་ཡིན་འདི་ཡིན་མེད་པར་ཁ་ཕྱོགས་བསྒྱུར་ཏེ། མཱ་ལེ་ཞི་ཡའི་ནུབ་ངོས་བརྒྱུད་ཧིན་རྡུ་རྒྱ་མཚོའི་ལྷོ་ཕྱོགས་སུ་འཕུར་སྐྱོད་བྱས་ཡོད་སྐོར་གྱི་བསྡོམས་ཚིག་བརྒྱབ་ཡོད་པ་རེད།
དཔྱད་ཞིབ་པ་འགའ་རེས་གནམ་གྲུ་དེ་པཱ་ཀི་སི་ཐན་དང་ཡང་ན་ཤིན་ཅང་གི་མཐའ་འཁོབ་ཅིག་ཏུ་ཛ་དྲག་ངང་འབབ་དགོས་བྱུང་སྟེ། འཇིགས་སྐུལ་དྲག་སྤྱོད་པས་བཙན་ཁྲིད་སྦས་སྐོང་བྱས་ཡོད་ལུགས་དང་། ཡང་འགའ་རེས་ཧིན་རྡུ་རྒྱ་མཚོའི་ནང་ཟགས་པའམ་ཡང་ན་མི་མེད་ས་སྟོང་ཞིག་ཏུ་བརྡབ་སྐྱོན་བྱུང་བ་སོགས་ཀྱི་ཚོད་དཔག་བྱེད་ཀྱི་ཡོད་འདུག
གསར་འགོད་པ། པདྨ་མཚོ།
