རུལ་སུངས་བྲོས་བྱོལ་བ་ཚོ་ཕྱིར་ལོག་ནས་མགོ་བཏགས་ཞུ་བཞིན་འདུག་ཟེར།

རྒྱ་ནག་གི་ལྐོག་ཟ་རུལ་སུངས་བྱེད་མཁན་གྱི་དཔོན་རིགས་མང་པོ་ཞིག་གིས་རྒྱ་སྒོར་ཕོན་ཆེན་འཁྱེར་ཏེ་ཕྱི་རྒྱལ་ཁག་ཏུ་བྲོས་བྱོལ་བྱས་ཡོད་པ་དང་། ཞི་ཅིན་ཕིན་གྱི་རུལ་རྒོལ་ལས་འགུལ་གྱི་དམིགས་འབེན་གཅིག་གནས་ཚུལ་དེར་ཁ་གཏད་གཅོག་རྒྱུ་དེ་ཡིན་ཡང་། ལག་བསྟར་གྱི་གོ་རིམ་ཁྲོད་ནས་བསམ་ཡུལ་ལས་འདས་པའི་གནས་ཚུལ་ཡང་མང་པོ་འབྱུང་བཞིན་ཡོད།

རྒྱ་ནག་གི་སྲིད་འཛིན་ཞི་ཅིན་ཕིན་གྱི་རུལ་སུངས་རྒོལ་རྡུང་ལས་འགུལ་ཁྲོད། ཕྱི་རྒྱལ་ཁག་ཏུ་བྲོས་བྱོལ་དུ་བསྡད་ཡོད་པའི་རྒྱ་ནག་གི་ལྐོག་ཟ་རུལ་སུངས་བྱེད་མཁན་དཔོན་རིགས་ཚོ་ཕྱིར་རྒྱ་ནག་ནང་འགུག་ཐབས་བྱེད་རྒྱུ་དང་། རྒྱལ་ཁབ་ཁག་གི་གཞུང་དང་མཉམ་འབྲེལ་ཐོག་བྲོས་བྱོལ་བ་དེ་དག་འཛིན་བཟུང་བྱེད་ཐབས་སོགས་ལ་ཤུགས་སྣོན་རྒྱག་གི་ཡོད་པ་ལྟར། ཉིན་འདི་འགར་རྒྱ་ནག་གི་གཞུང་འབྲེལ་དང་གཞུང་འབྲེལ་མ་ཡིན་པའི་བརྒྱུད་ལམ་ཁག་ཅིག་ཐོག ཕྱི་རྒྱལ་ཁག་ཏུ་བྲོས་བྱོལ་བྱས་པའི་རུལ་སུངས་དཔོན་རིགས་ཁག་ཅིག་ལ་ཕྱི་རྒྱལ་ནས་དཀའ་ངལ་མང་པོ་འཕྲད་པ་དང་། ཁག་ཅིག་ཕྱིར་རྒྱལ་ནང་དུ་ལོག་སྟེ་སྲིད་གཞུང་ལ་མགོ་བཏགས་ཞུས་ཡོད་ཚུལ་སོགས་བཀོད་འདུག

རྒྱ་ནག་དཔྱད་བརྗོད་པ་ཚོས། གནས་ཚུལ་དེ་རྒྱ་ནག་གཞུང་གིས་རུལ་སུངས་དཔོན་རིགས་ཚོར་ཉེན་བརྡ་དང་། རྒྱ་རིགས་མང་ཚོགས་ལ་མགོ་སྐོར་གཏོང་ཐབས་ཤིག་ཡིན་ཡང་། ཕྱི་རྒྱལ་རང་དབང་ལུང་པའི་འགྲོ་སྟངས་ཅུང་ཤེས་མཁན་ཞིག་དང་། ལྷག་པར་དུ་ཨ་རི་དང་ཡུ་རོབ་སོགས་ཀྱི་སྤྱི་དམངས་ཐོབ་ཐང་སྐོར་ཤེས་མཁན་ཞིག་ཡིན་ན། ད་རེབ་རྒྱ་ནག་གི་བྱེད་ཐབས་དེ་ནི་ཕྲུ་གུ་ལ་གདོན་འདྲེའི་ཞེད་སྣང་སྐུལ་བ་དང་འདྲ་བ་མ་ཟད། རྒྱ་ནག་གི་རུལ་སུངས་བྲོས་བྱོལ་གནས་སྟངས་ཧ་ཅང་ཛ་དྲག་ཡིན་པ་དང་། ཞི་ཅིན་ཕིན་གྱི་རུལ་རྒོལ་ལས་འགུལ་ལ་ཟློག་ཕྱོགས་ནས་ནུས་པ་ཁག་ཅིག་འཐོན་བཞིན་ཡོད་པའི་མཚོན་རྟགས་ཡིན་སྐོར་བརྗོད་འདུག

ད་རེབ་རྒྱ་ནག་གིས་འདིའི་སྐོར་གྱི་གནས་ཚུལ་ཁག་ཅིག་སྤེལ་བའི་ནང་། རྒྱ་ནག་གི་ཀྲུང་གོ་ཝང་ཞེས་པའི་དྲ་ཚིགས་ཐོག ལིའོ་ཉིན་ཞིང་ཆེན་ཧྥིན་ཁྲིན་གྲོང་ཁྱེར་ཨུ་ཡོན་མགོ་གཙོ་ཟུར་བ་ཝང་གོ་ཆིང་ (Wang Guoqiang) ཨ་རིར་བྲོས་བྱོལ་བྱས་ཏེ་འཚོ་བར་དཀའ་ངལ་སྤྲད་པའི་སྐོར་ལ་ཝང་གོ་ཆིང་ཁོ་རང་ཉིད་ཀྱིས་འདི་ལྟར་བརྗོད་འདུག “ བྲོས་བྱོལ་གྱི་འཚོ་བ་རོལ་བཞིན་པའི་རིང་ང་རང་སྡོད་ས་ཀྲུང་གོས་ཧ་གོ་མི་ཡོང་ངམ་སྙམ་པའི་ཞེད་སྣང་སྐྱེས་པ་མ་ཟད། ཨ་རིའི་གཞུང་གིས་འཛིན་བཟུང་བྱ་རྒྱུར་ཡང་ཞེ་སྣང་སྐྱེ་བཞིན་ཡོད། ང་དང་སྐྱེས་དམན་གཉིས་ལ་ཕྱི་སྐྱོད་ལག་འཁྱེར་ཡོད་ཀྱང་བེད་སྤྱོད་མེད་པ་དང་། ན་ཚ་བྱུང་ཡང་སྨན་པར་བསྟན་མི་ཐུབ་པ། ཕ་ཡུལ་གྱི་མི་ཚོ་ལ་འབྲེལ་བ་བྱ་མི་ཐུབ་པའི་གནས་སྟངས་འོག ལོ་གཉིས་དང་ཟླ་བརྒྱད་ལྷག་རིང་ང་དང་སྐྱེས་དམན་གཉིས་མགྲོན་ཁང་ཆུང་ཆུང་ཞིག་གི་ནང་ནས་བསྡད་པ་དང་། ཉིན་རྟག་པར་ཁང་པའི་ཕྱི་ལ་འགྲོ་མ་ཐུབ་པར་བག་ལེབ་རེ་ཟོས་ཏེ་གྲོད་ཁོག་བརྒྱག་ཐབས་བྱས་པ་ཡིན། རྗེས་སུ་ཁཱ་ལེ་ཧྥོ་ཎེ་ཡ་ནས་མི་གཞན་དང་མཉམ་དུ་ཁང་པ་ཞིག་གླས་ཏེ་་བསྡད་པ་ཡིན། སྐབས་དེར་ཁང་པའི་ཆ་རྐྱེན་ཧ་ཅང་སྐྱོ་བོ་ཡིན་པ་མ་ཟད། ཁང་བདག་གཤིས་སྤྱོད་རྩུབ་པོ་དེས་ངའི་དགའ་མ་མཐོང་ན་མིག་གཉིས་ཆགས་སྲེད་ཀྱིས་ཁེངས་ཡོང་བ་དང་། ངའི་དགའ་མ་ཉིན་རྟག་པར་ཁོ་ལ་ཞེད་སྣང་སྐྱེ་བཞིན་ཡོད་པ་མ་ཟད། ཁོས་ངའི་སྟེང་ལའང་ངན་སེམས་འཆང་ནས་འཆར་གཞི་ངན་པ་མང་པོ་འཐེན་པ་རེད། ཅེས་བརྗོད་འདུག པད་ཏོའུ་དྲ་བས་གནས་ཚུལ་བཀོད་པ་ལྟར་ན། ཝང་གོ་ཆིང་ནི་ཕྱི་ལོ་ ༢༠༡༢ ལོའི་ཟླ་ ༨ ཚེས་ ༡༥ ཉིན་རྒྱ་ནག་ནས་བྲོལ་བྱོལ་ཕྱིན་ཡོད་པ་དང་། ༢༠༡༤ ལོའི་ཟླ་ ༡༢ ཚེས་ ༢༢ ཉིན་ཨ་རི་ནས་ཕྱིར་རྒྱ་གཞུང་གི་སྒྲིག་ཁྲིམས་ཞིབ་བཤེར་ཁང་ལ་མགོ་བཏགས་བྱས་ཡོད་འདུག

རྒྱ་ནག་གི་བུད་མེད་རུལ་སུངས་པ་དང་པོ་ཀྲེ་ཅང་ཞིང་ཆེན་འཛུགས་བསྐྲུན་ལས་ཁུངས་ཀྱི་འགན་འཛིན་གཞོན་པ་ཡཱང་ཞོ་ཀྲོ་ (Yang Xiuzhu) སེང་གྷ་པུར་དང་ཨ་རི། ནེ་ཐར་ལན་ཌི་སོགས་རྒྱལ་ཁབ་མང་པོ་ཞིག་ཏུ་བྲོས་བྱོལ་བྱས་མཐར། ནེ་ཐར་ལན་ཌིའི་ Rotterdam གྲོང་ཁྱེར་ཏུ། ཧ་ཅང་ནག་ཁུང་བརླན་གཤེར་ཡོད་པའི་ས་འོག་ཁང་ཆུང་ཞིག་ཏུ་བསྡད་ཡོད་པ་དང་། ཁོ་མོ་འཛིན་བཟུང་མ་བྱས་བར་རྒྱུན་པར་ངུ་འབོད་བྱེད་བཞིན་ཡོད་ཀྱང་། ནེ་ཐར་ལན་ཌིས་ཉེན་རྟོག་པས་འཛིན་བཟུང་བྱས་རྗེས་ཞི་འཇམ་དུ་གྱུར་ཡོད་འདུག

པད་ཏོའུ་དྲ་བས་གནས་ཚུལ་བཀོད་པར། ༢༠༠༣ ལོའི་ཟླ་ ༤ ཚེས་ ༢༠ ཉིན་ཡཱང་ཞོ་ཀྲོ་ཡིས་རང་གི་བུ་མོ་བཟའ་མི་གཉིས་དང་ཚ་བོ་བཅས་ཧྲང་ཧེ་གནམ་ཐང་ནས་སེང་གྷ་པུར་བརྒྱུད་དེ་ཨ་རིར་བྲོས་བྱོལ་བྱས་ཡོད་པ་དང་། ༢༠༠༤ ལོའི་ཟླ་ ༢ པའི་ནང་ཀྲེ་ཅང་ཞིང་ཆེན་སྒྲིག་ཁྲིམས་ཞིབ་བཤེར་ཁང་གིས་རྒྱལ་སྤྱིའི་ཉེས་དོན་ཉེན་རྟོག་པར་ཁོ་མོ་འཇུ་བཟུང་བྱེད་དགོས་པའི་བཀའ་རྒྱ་བཏང་བ་ལྟར། ༢༠༠༥ ལོའི་ཟླ་ ༥ ཚེས་ ༣༡ ཉིན་ནེ་ཐར་ལན་ཌི་ནས་འཛིན་བཟུང་བྱས་ཡོད་པ་དང་། ༢༠༡༡ ལོའི་ཟླ་ ༨ ཚེས་ ༢ ཉིན་ཡཱང་ཞོ་ཀྲོ་ཡི་གྱོད་དོན་ལ་འབྲེལ་ཡོད་མི་སྣ་དག་ཀྱང་ཕྱིར་རྒྱ་ནག་ཏུ་ལོག་ནས་མགོ་བཏགས་ཡོད་སྐོར་བཀོད་འདུག  

ཁྲཱེང་ཧྲ་གྲོང་ཁྱེར་རྒྱལ་ཡོངས་ས་ཞིང་ལས་ཁུངས་ཀྱི་མགོ་གཙོ་ཙའོ་ཐན་ཀྲུའོ་ (Zuo Tianzhu) ཨ་རིར་བྲོས་བྱོལ་བྱས་ཏེ་འཚོ་བར་དཀའ་ངལ་འཕྲད་ཡོད་པ་དང་། ཕྱི་རྒྱལ་གྱི་སྐད་མ་ཤེས་པའི་རྐྱེན་གྱིས་ལས་ཀའང་ཡག་པོ་རག་མེད་པ་མ་ཟད། རྗེས་སུ་ཁོའི་ཟུར་བསྟན་མ་ཡང་ཁོ་དང་ཁ་བྲལ་ཡོད་འདུག དེའི་རྗེས་ཙའོ་ཐན་ཀྲུའོ་མཐོང་མྱོང་མཁན་ཚོས་བརྗོད་པ་ལྟར་ན་ཁོས་རོ་ཁང་ཞིག་ཏུ་མིའི་ཕུང་བོ་སྐྱེན་འདྲེན་གྱི་ལས་ལ་ཞིག་བྱེད་ཀྱིན་ཡོད་སྐོར་བརྗོད་འདུག་ཟེར།  

ཡུའུ་ནན་ཞིང་ཆེན་འགྲིམ་འགྲུལ་ལས་ཁུངས་ཀྱི་མགོ་གཙོ་ཧོའུ་ཞེན་ (Hu Xing) སེང་གྷ་པུར་དུ་བྲོས་བྱོལ་བྱས་ཏེ། ཁོས་སེང་གྷ་པུར་ནས་མགྲོན་ཁང་གསུམ་བརྗེས་ཡོད་པ་དང་། ཁོ་ཕྱི་རྒྱལ་དུ་ཡོད་ཀྱང་སེམས་ནང་དུས་རྒྱུན་རྒྱ་ནག་ནས་ཐར་ཐུབ་མེད་པའི་དངངས་སྐྲག་སྐྱེས་བཞིན་ཡོད་པ་དང་། ཁོས་རྒྱུན་པར། ཁོ་རང་གི་རྗེས་འདེད་གཏོང་མཁན་དེ་སེང་གྷ་པུར་གྱི་ཉེན་རྟོག་པ་ཡིན་ནམ་རྒྱ་ནག་གི་ཉེན་རྟོག་པ་ཡིན། ཡང་ན་ནག་ཚོགས་ཤིག་གིས་ཁོ་གསོད་བརྩིས་བྱེད་ཀྱིན་ཡོད་དམ་ཞེས་དྲི་བ་དང་དོགས་པའི་ཀླུང་ནས་འཚོ་སྐྱེལ་དགོས་བྱུང་ཡོད་འདུག པད་ཏའོ་དྲ་བས་གནས་ཚུལ་བཀོད་པ་ལྟར་ན། ཧོའུ་ཞེན་གྱིས་ ༢༠༠༧ ལོའི་ཟླ་ ༡ ཚེས་ ༡༩ ཉིན་ལག་འཁྱེར་རྫུན་མ་བཟོས་ཏེ་ཕྱི་རྒྱལ་དུ་བྲོས་རྗེས། རྒྱ་ནག་རྒྱལ་ཡོངས་འཛིན་བཟུང་ཉེན་རྟོག་པས་ཁ་ཏ་བསླབ་བྱ་བྱས་མཐར་ཁོས་ཕྱིར་རྒྱ་ནག་ནང་ལོག་རྒྱུ་ཁས་ལེན་བྱས་ཏེ་རང་སྐྱོན་ངོས་ལེན་བྱས་ཡོད་འདུག  

ཧྥོ་ཀྲོའུ་གྲོང་ཁྱེར་སྤྱི་བདེ་ལས་ཁུངས་ཀྱི་འགན་འཛིན་གཞོན་པ་ཟུར་བ་ཝང་ཀྲིན་ཀྲོན་ (Wang zhenzhong) ༢༠༠༢ ལོའི་ཟླ་ ༥ ཚེས་ ༢༢ ཉིན་ཨ་རིར་བྲོས་བྱོལ་བྱས་ཏེ། ཁཱ་ལི་ཧྥོ་ཎེ་ཡ་ནས་ཨ་སྒོར་ཁྲི་ ༡༠༠ ལྷག་གི་ཁང་པ་ཞིག་དང་(buick) རྟགས་ཅན་གྱི་རླངས་འཁོར་ཞིག་ཉོས་ནས་བསྡད་ཡོད་ཀྱང་། རྗེས་སུ་ཨ་རིའི་ནག་ཚོགས་ཤིག་གིས་ཁོ་ལ་བུ་ལོན་སྤྲོད་དགོས་པ་དང་། གལ་སྲིད་བུ་ལོན་མ་སྤྲད་ཚེ་རྐང་ལག་གཅོད་རྒྱུ་ཡིན་པ་སོགས་ཀྱི་འཇིགས་སྐུལ་བྱས་ཡོད་པ་མ་ཟད། རིམ་གྱིས་ཁོའི་དགའ་རོགས་ཀྱིས་ཀྱང་ཁོ་རང་གཡུགས་ཏེ་ཕྱིན་པ་བཅས་ལ་བརྟེན་ཏེ་ཁོ་ལ་ནད་གཞི་ཞིག་བྱུང་ནས་ ༢༠༠༧ ལོར་འདས་གྲོངས་སུ་ཕྱིན་ཡོད་འདུག

རྒྱ་ནག་དངུལ་ཁང་ཀོང་ཏོན་ཞིང་ཆེན་ཁཱེ་ཕིན་ཡན་ལག་གི་འགན་འཛིན་ཟུར་བ་ཡོའུ་ཀྲིན་ཏོན་ (Yu Zhendong) ཨ་རིར་བྲོས་བྱོལ་བྱས་ཏེ། དཀའ་ངལ་དང་འཇིགས་སྣང་མང་པོ་བྱུང་མཐར། ༢༠༠༢ ལོའི་ཟླ་ ༡༢ པའི་ནང་ཨ་རིའི་ཁྲིམས་འཛིན་ལྷན་ཚོགས་ཀྱིས་འཛིན་བཟུང་བྱས་ཡོད་པ་དང་། ༢༠༠༤ ལོའི་ཟླ་ ༢ བའི་ནང་ཁོ་ལ་ནག་ཉེས་གསུམ་བགྲང་ནས་ཉེས་ཆད་བཅད་ཡོད་འདུག ༢༠༠༤ ལའི་ཟླ་ ༤ ཚེས་ ༡༦ ཉིན་ཨ་རིའི་གཞུང་གིས་རྒྱ་ནག་ལ་བརྩིས་སྤྲོད་བྱས་ཡོད་འདུག

རྒྱ་ནག་དངུལ་ཁང་ཀོང་ཏོན་ཞིང་ཆེན་ཁཱེ་ཕིན་ཡན་ལག་དངུལ་ཁང་གི་འགན་འཛིན་ཞོའུ་ཀོ་ཅོན་ (Xu Guojun) ༢༠༠༡ ལོར་ཐོག་མར་ཁེ་ན་ཌར་བྲོས་བྱོལ་ཕྱིན་པ་དང་། རྗེས་སུ་ཨ་རིར་ཕྱིན་ཏེ་བཟའ་མི་གཉིས་ལ་དཔལ་འབྱོར་གྱི་དཀའ་ངལ་འཕྲད་ཡོད་སྟབས། ཞོའུ་ཀོ་ཅོན་གྱིས་ཟ་ཁང་ཞིག་ཏུ་གཟའ་འཁོར་གཅིག་གི་ཉི་མ་བདུན་དང་། ཉི་མ་གཅིག་ལ་ཆུ་ཚོད་ ༡༠ ནས་ ༡༥ བར་ལས་ཀ་བྱས་ཡོད་འདུག ༢༠༠༤ ལོའི་ཟླ་ ༩ བའི་ནང་། ཨ་རིའི་གཞུང་གིས་ཁོ་བཟའ་མི་གཉིས་འཛིན་བཟུང་བྱས་ཡོད་པ་དང་། ༢༠༠༩ ལོའི་ཟླ་ ༥ པའི་ནང་ཨ་རིའི་ལ་སི་ཝེ་གྷེ་སུའི་ཁྲིམས་ཁང་གིས་ཞོའུ་ཀོ་ཅོན་གྱིས་དངུལ་གཙང་འཁྲུད་བྱེད་ཐབས་དང་། དངུལ་དབོར་འདྲེན་བྱས་པ་བཅས་ནག་ཉེས་འོག་ལོ་ ༢༢ ཡི་ཁྲིམས་ཐག་བཅད་ཡོད་འདུག

པད་ཏོའུ་དྲ་བས་གནས་ཚུལ་སྤེལ་བར། ༢༠༠༡ ལོར་ཞོའུ་ཀོ་ཅོན་དང་དངུལ་ཁང་དེའི་འགན་འཛིན་ཟུར་བ་ཞོའུ་ཁྲའོ་ཧྥན་དང་ཡོའུ་ཀྲིན་ཏོན་གསུམ་གྱིས་ཨ་སྒོར་ས་ཡ་ ༥༠༠ འཁྱེར་ནས་ཧོང་ཀོང་གི་ཕྱི་སྐྱོད་ལག་འཁྱེར་རྫུན་མ་བཟོས་ཏེ་ཨ་རིར་ཐོངས་མཆན་ཞུས་ཡོད་པ་དང་། ༢༠༠༡ ལོའི་ཟླ་ ༥ བའི་ནང་ཁོང་གསུམ་གྱིས་ཨ་རིའི་མི་སེར་ལ་གཉེན་སྒྲིག་རྫུན་མ་བྱས་ཡོད་འདུག  ༢༠༠༤ ལོར་ཨ་རི་གཞུང་གིས་ཁོ་འཛིན་བཟུང་བྱས་ཡོད་པ་དང་། ༢༠༠༩ ལོའི་ཟླ་ ༥ ཚེས་ ༦ ཉིན་ཁོ་ལ་ལོ་ ༢༢ ཡི་བཙོན་འཇུག་ཁྲིམས་ཐག་བཅད་ཡོད་འདུག

རྒྱ་ནག་སྤྱི་ཚོང་དངུལ་ཁང་གི་ཁྲོན་ཆིན་ཅུའི་ལོན་གྱི་ཡན་ལག་དངུལ་ཁང་གི་ལས་བྱེད་ཁྲིན་ཞེན་(Chen Xin) གྱིས་རྒྱ་སྒོར་ཁྲི་ ༤༠༠༠ ལྷག་འཁྱེར་ཏེ་ཁྲིན་ཏུའུ་དང་ཀོང་ཀྲོའུ། ཧེ་ཁོ་སོགས་སུ་བརྒྱུད་དེ་ཝེ་ཋི་ནམ་དང་འབར་མ་སོགས་སུ་བྲོས་བྱོལ་བྱས་སྐབས། ཁོས་ཐོབ་ཐང་ལག་འཁྱེར་ ༢༩ རྫུན་བཟོ་དང་བརྗེ་སྤོར་བྱས་ཡོད་པ་མ་ཟད། ཁྲིན་ཞེན་གྱི་ཉིན་ཐོའི་ནང་དུ་། “ངའི་སེམས་ནང་ལ་དངངས་སྐྲག་གི་ཚོར་བ་ཞིག་ཡོད་པ་དང་། ལས་དབང་གིས་གོ་སྒྲིག་བྱས་པའི་མི་ཚོའི་ཚོར་བ་ད་ལྟ་ངས་མྱོང་ཐུབ་ཀྱི་འདུག ངའི་དྲན་ཤེས་ཡོད་ཚད་རྦད་དེ་ས་རུ་ཟགས་སོང་། ངའི་ལག་ཏུ་ཐོབ་ཐང་ལག་འཁྱེར་དང་དངུལ་བྱང་བཅུ་ཕྲག་ལྷག་ཡོད་ཀྱང་། ང་སྡུག་བསྔལ་གྱི་རྒྱ་མཚོ་ལས་སྐྱོབ་ཐུབ་མཁན་སུ་ཡང་མི་འདུག” ཅེས་སོགས་བྲིས་ཡོད་འདུག

གསར་འགོད་པ། འཇིགས་མེད་རྒྱ་མཚོ།