ཟླ་ ༥ ཚེས་ ༢༠ ཉིན་ (the guardian)ཞེས་པའི་གསར་ལམ་ཐོག་གནས་ཚུལ་སྤེལ་བ་ལྟར་ན། འབྱུང་འགྱུར་ཕྱི་ཟླ་ ༧ ཚེས་ ༡ ཉིན་ནས་བཟུང་ཧོང་ཀོང་དུ་རང་དབང་གསར་ཤོག་བརྒྱུད་ལམ་ཟེར་བ་ཞིག་འགྲེམ་སྤེལ་བྱེད་འཆར་ཡོད་པ་དེར་ཧོང་ཀོང་གི་མི་མང་པོ་ཞིག་གིས་དགའ་བསུ་ཆེན་པོ་བྱེད་བཞིན་ཡོད་པ་མ་ཟད། ལས་འཆར་དེ་མགོ་འཛུགས་ཐད་མ་དངུལ་ཕོན་ཆེན་པོ་བསྡུ་རུབ་བྱེད་ཐུབ་ཡོད་འདུག
གནས་ཚུལ་དེའི་ནང་བཀོད་དོན། རྒྱ་ནང་གི་གསར་གནས་སྣ་འཛོམས་རང་བཞིན་ཅན་དུ་གཏོང་ཆེད། ཧོང་ཀོང་གྲོང་ཁྱེར་ནང་རང་དབང་གི་གསར་ཤོག་བརྒྱུད་ལམ་འགྲེམ་སྤེལ་གནང་འཆར་ཡོད་པ་དང་། གསར་གནས་དོ་དམ་པས“ རང་དབང་གསར་ཤོག་ནི་རང་དབང་གི་རེ་འབོད་བསྙོན་མེད་ཅིག་ཡིན”ཚུལ་བརྗོད་འདུག
གསར་ལམ་དུ་མུ་མཐུད་བརྗོད་དོན། ཧོང་ཀོང་གྲོང་ཁྱེར་གྱི་དབྱིན་སྐད་རང་དབང་གསར་ཤོག་བརྒྱུད་ལམ་དེ་ད་ལོའི་ཕྱི་ཟླ་ ༦ པ་ནས་མགོ་བཙུགས་ནས་ཕྱི་ཟླ་ ༧ ཚེས་ ༡ ཉིན་ཏེ། རྒྱ་ནག་སྐམ་ས་ཆེན་མོའི་འོག་ཏུ། ཧོང་ཀོང་གྲོང་ཁྱེར་ནི་ཆེས་མཐོའི་རང་སྲིད་རང་སྐྱོང་དུ་ཕྱིར་ལོག་པའི་ལོ་འཁོར་དུས་ཆེན་དང་བསྟུན་ཏེ། དངོས་སུ་འགྲེམ་སྤེལ་གནང་འཆར་ཡོད་འདུག་ལ། རྒྱ་ནག་གི་བརྒྱུད་ལམ་སྟངས་འཛིན་འོག་གི་རང་དབང་གསར་འགོད་པ་ཁག་ཅིག་གིས་དེ་ལྟ་བུའི་རང་དབང་གསར་ཤོག་འགྲེམ་སྤེལ་གནང་བ་ལ་ཀློག་པ་པོ་ཀུན་གྱིས་དགའ་བསུ་དང་ཡི་རངས་འཐོབ་མུས་ཡིན་ཡིན་འདུག
རང་དབང་གསར་འགོད་པ་དང་རྩོམ་པ་པོ། རང་དབང་གསར་ཤོག་བརྒྱུད་ལམ་གྱི་ལས་འཆར་འབྲེལ་མཐུད་པ་སྐུ་ཞབས་ཁྲོམ་གཱི་རོན་ཌེ་ (Tom Grundy) ལགས་ཀྱིས“ང་ཚོས་ཟླ་གཅིག་རིང་ཧོང་ཀོང་གི་ཌོལ་ལོར་ ༡༥༠,༠༠༠ (ཧོང་ཀོང་གི་ཌོལ་ལོར་ ༡ ལ་ཧིན་སྒོར་ ༨ ལྷག་ཡིན།)ལྷག་བསྡུ་རུབ་བྱེད་ཐུབ་པའི་ལས་གཞི་ཞིག་ལག་བསྟར་བྱེད་རྩིས་ཡིན་མོད། འོན་ཀྱང་བསམ་ཡུལ་ལས་འདས་པ་ཞིག་ལ། ང་ཚོས་ཉིན་གཉིས་ནང་གོང་སྨོས་ཀྱི་དངུལ་འབོར་དེ་བསྡུ་རུབ་བྱེད་ཐུབ་སོང་།”ཞེས་དང་། ཡང་ཁོང་གིས“ད་རེབ་ང་ཚོས་རང་དབང་གསར་ཤོག་བརྒྱུད་ལམ་གྱི་འགྲོ་གྲོན་རོགས་དངུལ་དང་དྲ་རྒྱ་ཇུས་འགོད་སོགས་ཀྱི་ལས་གཞི་ལེགས་འགྲུབ་བྱུང་སྟེ། ཟླ་རྗེས་མའི་བར་སླར་ཡང་ཧོང་ཀོང་གི་ཌོལ་ལོར་ ༥༠,༠༠༠ ལྷག་བསྡུ་རུབ་དང་གསར་ཤོག་འགྲེམ་སྤེལ་བྱེད་འཆར་ཡོད”ཅེས་བརྗོད་འདུག
རྗེས་སུ་ཡང་ཁོང་ཚོས་མུ་མཐུད་དུ་རང་དབང་གསར་ཤོག་བརྒྱུད་ལམ་གྱི་ལས་དོན་རྒྱུན་སྐྱོང་དང་ཤར་གཏོང་། གསར་ལམ་ཞིབ་བཤེར་གྱི་ལས་གཞི་བཅས་རྒྱུན་སྐྱོང་བྱེད་རྒྱུ་ཡིན་འདུག རང་དབང་གསར་ཤོག་གི་ལས་འཆར་འབྲེལ་མཐུད་པ་སྐུ་ཞབས་ཁྲོམ་གཱི་རོན་ཌེ་ལགས་ཀྱིས་མུ་མཐུད་གསུངས་དོན། སྤྱིར་ལས་རིགས་འདི་གང་ཟག་སྒེར་བས་ཀྱང་སྒྲུབ་ཀྱི་ཡོད་པ་ང་ཚོས་ཤེས་ཀྱི་ཡོད་ཀྱང་། ང་ཚོས་མི་མང་མཉམ་རུབ་གྱིས་ལས་དོན་མཐའ་འཁྱོལ་བ་ཞིག་བྱ་ཐུབ་པའི་རེ་བ་བྱེད་གི་ཡོད་ཟེར།
སྤྱིར་བཏང་རང་དབང་གསར་ཤོག་གི་ལས་དོན་སྒྲུབ་མཁན་རྒྱུན་ལས་རེ་འགའ་ཞིག་ལས་མེད་ནའང་། རང་དབང་བརྒྱུད་ལམ་གསར་བཟོའི་ལས་དོན་ལ་རྒྱབ་སྐྱོར་དང་ཡིད་རྟོན་གནང་མཁན་ནི་བགྲང་གིས་མི་ལང་བ་ཞིག་ཡོད་སྲིད་ན་ཡང་། ཧོང་ཀོང་གི་རང་དབང་བརྒྱུད་ལམ་གྱི་འགྲོ་གྲོན་དང་གཞི་རིམ་གསར་གནས་འཚོལ་བསྡུ་སོགས་ཀྱི་ལས་གཞི་ལ་སེམས་ཁུར་བྱེད་བཞིན་ཡོད་འདུག
སྤྱིར་རང་དབང་བརྒྱུད་ལམ་གསར་བཟོའི་འཆར་གཞི་དེ་ལོ་སྔོན་མའི་ནང་ཧོང་ཀོང་རྒྱལ་ཡོངས་འོས་བསྡུའི་རང་དབང་རྩོད་ལེན་ལས་འགུལ་མ་བྱུང་སྔོན་ནས་མགོ་བཙུགས་ཡོད་ནའང་། ཕྱི་ལོ་ ༢༠༡༤ ལོའི་གསར་བརྗེ་འོས་ལངས་ཆེན་མོའི་རྗེས་སུ་མ་གཏོགས་མགོ་འཛུགས་བྱེད་ཐུབ་ཡོད་པ་མ་རེད་ལ། ཉིས་སྟོང་བཞི་ལོའི་ཧོང་ཀོང་གི་གསར་བརྗེ་འོས་ལངས་ཆེན་མོ་དེ་ནི་རྒྱ་ནང་གི་བརྒྱུད་ལམ་ཁག་དང་། ལྷག་དོན་གང་ཟག་སྒེར་བའི་རང་དབང་ཞིབ་བཤེར་བརྒྱུད་ལམ་སོགས་ལ་རྒྱ་ནག་གཞུང་གིས་སྟངས་འཛིན་དང་བཀག་སྡོམ་ཤུགས་ཆེན་བྱས་སྟབས། ཧོང་ཀོང་གི་ཡུལ་མི་ཁྲི་སྟོང་མང་པོ་འདུ་འཛོམས་ཀྱིས་དེ་ལ་ངོ་རྒོལ་ཁྲོམ་སྐོར་བྱས་ཡོད་པ་རེད།
ཧོང་ཀོང་གི་དབྱིན་ཡིག་རང་དབང་གསར་ཤོག་དང་བརྒྱུད་ལམ་ཁག་ལ་རྒྱ་ནག་གཞུང་གིས་དུས་ཡུན་རིང་པོར་སྟངས་འཛིན་དང་བཀག་སྡོམ། དེ་ལ་ཁ་རྡུང་བཅས་གཏོང་གི་ཡོད་ནའང་། གཞི་རིམ་གྱི་རྒྱ་ཡིག་གསར་ཤོག་དང་བརྒྱུད་ལམ་ཁག་ལ་ནི་བཀག་སྡོམ་སྟངས་འཛིན་བྱེད་ཀྱི་མེད་ཚོད་རེད་དེ། སྐུ་ཞབས་ཁྲོམ་གཱི་རོན་ཌེ་ལགས་ཀྱིས”སྤྱིར་དབྱིན་ཡིག་ནི་རྒྱལ་སྤྱིའི་མི་དམངས་བར་གྱི་འབྲེལ་ཟམ་ལྟ་བུའི་སྐད་ཡིག་ཅིག་ཡིན་པའི་ཆ་ནས། ངས་ཚོས་སྣ་འཛོམས་རང་བཞིན་ལྡན་པའི་དབྱིན་ཡིག་གི་རང་དབང་གསར་ཤོག་དང་བརྒྱུད་ལམ་མཁོ་བསྐྲུན་གནང་རྒྱུ་དེ་ཧ་ཅང་གལ་ཆེན་པོ་ཡིན་པར་སེམས་ཤིང་། སྤྱིར་བཏང་དུས་ཚོད་དྲུག་རིང་གི་དབྱིན་ཡིག་གི་གསར་གནས་ཤིག་རྒྱ་ཡིག་གི་གསར་འགྱུར་སྟེང་ཐོན་པ་ལ་ཧ་ལམ་ཉིན་གཉིས་ལྷག་གི་དུས་ཡུན་འགོར་ཀྱིན་ཡོད་སྟབས། ང་ཚོས་དུས་ཚོད་ཀྱི་བར་སྟོང་དེ་སྐོང་འདོད་པ་ཡིན་ལ། ཐ་ན་ཧོང་ཀོང་མི་མང་གིས་རྒྱ་ནག་གཞུང་གི་དམ་དྲག་ལ་ངོ་རྒོལ་སྐད་འབོད་སྐབས་སུའང་། རྒྱ་ནག་ལ་ད་དུང་ཡང་འཕོ་འགྱུར་ཅི་ཡང་མེད་པའི་གནད་དོན་དེ་ནི་ངོ་མ་ཚོད་དཔག་དཀའ་བ་ཞིག་རེད”ཅེས་དང་། ཡང་ཁོང་གིས”ད་རེབ་ཀྱི་རང་དབང་གསར་ཤོག་བརྒྱུད་ལམ་གསར་འཛུགས་བྱེད་དགོས་པའི་དམིགས་བྱ་གཙོ་བོ་ཡང་ཧོང་ཀོང་གི་གནས་བབ་དངོས་ལ་རྟོག་ཞིབ་དང་གཞི་རིམ་གྱི་གནས་ཚུལ་དངོས་འཚོལ་བསྡུ་གནང་རྒྱུ་དེ་ཡིན”ཟེར།
འདས་པའི་ལོ་ངོ་འདི་དག་གི་རིང་ལ། དབྱིན་ཡིག་གི་གསར་ཤོག་དང་བརྒྱུད་ལམ་ཁག་རྩེད་འགྲན་པ་གཅིག་གིས་དབང་བསྒྱུར་བྱས་ཡོད་པ་དང་། དེ་ནི་ཕྱི་ལོ་ ༡༩༠༣ ཚུགས་པའི་རྒྱ་ནག་ལྷོ་རྒྱུད་ཁུལ་གྱི་ནངས་མོའི་གསར་ཤོག་སྟེ། དེང་སང་ཁེ་རེ་ཚད་ཡོད་ཚོང་གཉེར་ཁང་ [Kerry Group Limited] གི་སྟངས་འཛིན་འོག་ཡོད་ཀྱང་། ད་ལྟའི་བར། རྒྱལ་ཡོངས་ཀྱི་ཁེ་ལས་སྒེར་འཛིན་ཚོང་གཉེར་ཁང་ཡོད་ཚད་ཚར་གཅོད་གཏོང་བའི་བྱ་འགུལ་ལ་བརྟེན་ནས། ཡོད་ཚད་ཀྱི་ཡོད་ཚད་དཔལ་འབྱོར་གྱི་གནོན་ཤུགས་འོག་ཏུ་ཚུད་པའི་དབང་གིས། ཁེ་རེ་ཚད་ཡོད་ཚོང་གཉེར་ཁང་ལའང“ཁེ་མེད་ཞབས་ཞུའི་གསར་ཁང”ཞེས་ཀྱང་འབོད་པའི་རྒྱུ་མཚན་དེ་ལ་ཐུག་ཡོད་པ་དང་། དེར་མ་ཟད། ཁེ་ལས་ཚོང་གཉེར་ཁང་ཡོད་དོ་ཅོག་ལ་སྟངས་འཛིན་ཤུགས་ཆེན་ཐེབས་པའི་རྐྱེན་གྱིས། ཚོང་གཉེར་ཁང་དེ་དག་གིས་འགྲེམ་སྤེལ་བྱེད་པའི་དབྱིན་ཡིག་གི་བདུན་རེའི་གསར་ཤོག་གང་མང་ཞིག་རང་བཞིན་གྱིས་ལྟེབ་རྩེག་བརྒྱབ་ནས་བསྐྱུར་དགོས་པ་ཆགས་ཀྱི་ཡོད་ལ། ཕྱི་གསལ་ནང་གསལ་གྱི་དམངས་གཙོའི་འཛིན་སྐྱོང་འོག་ཏུ། ཧོང་ཀོང་གི་དཔེ་སྐྲུན་རང་དབང་ནི་ ༼ཀུ་ཤུ་རྟགས་ཅན་གྱི་རྒྱ་ཡིག་གི་ཉིན་རེའི་གསར་ཤོག༽ དང་འདྲ་བར། འགྲེམ་སྤེལ་གྱི་རང་དབང་མེད་པའི་དཀའ་ངལ་ལ་ཐུག་ཡོད་སྟབས། རྒྱ་ནག་གཞུང་དང་ལྷན་དུ་ཁེ་ལས་གཉེར་འདོད་ཡོད་པའི་ཚོང་གཉེར་ཁང་མང་པོ་ཞིག་གིས་རང་དབང་བརྒྱུད་ལམ་གསར་ཤོག་གི་ཉོ་འཚོང་སྒྲུབ་པའི་བློ་སྤོབས་ཡོད་པ་མ་རེད། ཅེས་སོགས་བཀོད་འདུག
