དེ་རིང་སྔ་དྲོར་དྷ་སྟེང་བོད་ཁྱིམ་དུ་སློབ་ཕྲུག་ཚོར་ནང་ཆོས་ངོ་སྤྲོད་ཐེངས་ ༩ པ་དབུ་འཛུགས་ཐོག ༧གོང་ས་མཆོག་གིས་སློབ་ཕྲུག་ཚོས་རང་དབང་ལུང་པའི་ནང་སོ་སོའི་ཆོས་དང་རིག་གཞུང་གཅེས་འཛིན་ཐད་འཁུར་ཆེན་པོ་ལེན་དགོས་སྐོར་གསུངས་སོང་།
དེ་རིང་སྔ་དྲོའི་ཆུ་ཚོད་ ༨།༣༠ ཙམ་ལ་དྷ་སྟེང་བོད་ཁྱིམ་གྱི་ལག་རྩེད་སྤོ་ལོ་ཐང་དུ། བོད་ཁྱིམ་དང་དྷ་ས་ནང་ཆོས་ངོ་སྤྲོད་ཚོགས་ཆུང་གི་གོ་སྒྲིག་འོག ༧གོང་ས་མཆོག་གི་ནང་ཆོས་ངོ་སྤྲོད་ཐེངས་ ༩ པ་དབུ་འཛུགས་གནང་སོང་བ་དང་། གསུང་ཆོས་དབུ་འཛུགས་ཐོག་སྐུ་བཅར་རྣམ་རྒྱལ་གྲྭ་ཚང་གི་མཁན་རིན་པོ་ཆེ་མཆོག་གི་དབུས་རྣམ་རྒྱལ་གྲྭ་ཚང་གི་དགེ་འདུན་པ་རྣམ་པ་དང་། བོད་མིའི་སྒྲིག་འཛུགས་ཀྱི་ཤེས་རིག་བཀའ་བློན་དངོས་གྲུབ་ཚེ་རིང་མཆོག་དང་ཁྲིམས་ཞིབ་པ་ཆེ་བ་ཟུར་པ་ངག་དབང་འཕེལ་རྒྱལ་མཆོག དེ་བཞིན་ལྷན་ཁང་ཁག་ཅིག་གི་དྲུང་ཆེ་ཆུང་འགའ་དང་། བོད་ཁྱིམ་སྤྱི་ཁྱབ་དབུ་འཛིན་རྒན་ཚེ་དབང་ཡེ་ཤེས་ལགས་ཀྱིས་གཙོས་བོད་ཁྱིམ་ཁག་གི་དགེ་ལས་སློབ་ཕྲུག་དང་། ཤེས་རབ་དགའ་ཚལ་གླིང་དང་སྨན་རྩིས་ཁང་མཐོ་སློབ་སོགས་ཀྱི་སློབ་ཕྲུག གཞན། དྷ་ས་ཁུལ་གྱི་སེར་སྐྱ་མི་མང་བཅས་ཁྱོན་མི་གྲངས་ ༤༠༠༠ ཡས་མས་འཛོམས་འདུག་ལ། ནང་ཆོས་ངོ་སྤྲོད་ཀྱི་ཐོག་མར་དྷ་ས་ནང་ཆོས་ངོ་སྤྲོད་ཚོགས་ཆུང་གི་དགེ་བཤེས་བློ་བཟང་གྲགས་པ་ལགས་ཀྱི་སློབ་མ་ཚོས་མཐར་ཕྱིན་ཆོས་རྩོད་སྐར་མ་ ༡༠ དང་། ཤེས་རབ་དགའ་ཚལ་སློབ་གླིང་གི་སློབ་མ་ཁག་ཅིག་གིས་བདེན་པ་བཞིའི་སྐོར་ལ་ཆོས་རྩོད་བཅས་བྱས་རྗེས་ནང་ཆོས་ངོ་སྤྲོད་དབུ་འཛུགས་གནང་སོང་།
༧གོང་ས་མཆོག་གིས་སློབ་ཕྲུག་ཚོས་རང་དབང་ལུང་པའི་ནང་རང་དབང་གི་ཐོག་ནས་བསླབ་པ་སློབ་གཉེར་མཐར་ཕྱིན་པ་གནང་དགོས་པའི་སྐོར་ལ་བཀའ་སློབ་གནང་དོན། བོད་ཀྱི་ཆོས་དང་རིག་གཞུང་བཅས་མི་རིགས་ཀྱི་རྐང་འཛིན་མཁན་དེ་ཁྱེད་རང་ཚོ་ཆགས་བསྡད་ཡོད་པ་དང་། བོད་ནང་གི་བོད་མི་ཚོར་ལྷག་བསམ་དང་སེམས་ཤུགས། མི་རིགས་ཀྱི་ལར་ཞེན་ཧ་ལས་པ་ཡིན་ཡང་། རང་དབང་ཡོད་པ་མ་རེད་ལ་གོ་སྐབས་ཀྱང་ཡོད་པ་མ་རེད། ང་ཚོ་བཙན་བྱོལ་དུ་ཡོང་དགོས་པའི་རྒྱུ་མཚན་ནི་རང་དབང་ལྡན་པ་ཞིག་བྱུང་ན། སོ་སོའི་སྒྲུབ་ཐུབ་པའི་ཆ་རྐྱེན་རྣམས་རང་དབང་གི་ཐོག་ནས་སྒྲུབ་ཐུབ་པ་ཞིག་ཡིན་སྟབས། རང་དབང་ཟེར་བ་དེ་རྩ་ཆེན་པོ་ཞིག་ཏུ་རྩིས་ནས་ང་ཚོ་རང་དབང་ལུང་པའི་ནང་སྐྱབས་བཅོལ་དུ་བསླེབས་པ་རེད། རང་དབང་ལུང་པའི་ནང་སློབ་སྦྱོང་དང་ཚོད་ལྟ་སོགས་གང་དང་གང་ཡིན་ཡང་རང་དབང་གི་ཐོག་ནས་བྱེད་ཐུབ་ཀྱི་ཡོད་པ་རེད། བོད་མི་རིགས་ཟེར་བ་འདི་མི་རབས་ནས་མི་རབས་ཏུ་འདུག་དགོས་པས། ཁྱེད་རང་ཚོའི་མི་རབས་འདི་དཔེ་མི་སྲིད་པའི་གལ་ཆེན་པོ་ཡིན་པས། རྒྱ་ཆེ་ས་དང་ཕུགས་རྒྱང་རིང་ས་ནས་བསམ་བློ་གཏོང་རྒྱུ་དཔེ་གལ་ཆེན་པོ་རེད། ངའི་མི་རབས་འདི་ལྟར་རིམ་གྱིས་རྫོགས་འགྲོ་ངེས་རེད། རྗེས་མ་ཁྱེད་རང་ཚོས་ང་ཚོ་ལོ་གཞོན་པའི་སྐབས་སུ་༧རྒྱལ་བ་རིན་པོ་ཆེས་དེ་འདྲ་དེ་འདྲ་ལབ་ཀྱི་ཡོད་ཟེར་ནས་སེམས་ལ་དྲན་པ་བྱ་རྒྱུ་དང་། ཡང་ཁྱེད་རང་ཚོ་རྒད་པོ་རྒན་མོ་ཆགས་ཡོང་དུས་མི་རབས་གཞོན་པ་ཚོར། ང་ཚོ་བོད་ཀྱི་དངོས་གནས་ཁྱད་ཆོས་ཡོད་པ་དེ་ཚོ་བརྒྱུད་སྤྲོད་བྱས་ཏེ་མི་རབས་ནས་མི་རབས་ཏུ་བདག་པོ་རྒྱག་ཐུབ་པར་བསམ་བློ་གཏོང་རྒྱུ་དེར་ཁྱེད་རང་ཚོར་འགན་ཡོད་པ་རེད། ཅེས་གསུངས་སོང་།
ཡང་ཁོང་གིས་བོད་ཡིག་དང་ནང་ཆོས་ཀྱིས་བོད་མི་ཡོངས་རྫོགས་གཅིག་ཏུ་སྒྲིལ་ཡོད་པའི་སྐོར་ལ་གསུངས་དོན། བོད་པས་ཆབ་སྲིད་ཀྱི་ཐོག་ནས་ཞབས་འདྲེན་ཆ་ཚང་ཞུས་ཚར་བ་རེད། ཡིན་ནའང་། ང་ཚོ་བོད་མི་སྤྱི་བོ་གནམ་བསྟན་ཡོངས་རྫོགས་རྡོག་སྒྲིལ་ནས་དུས་ད་ལྟ་བར་དུ་བསྡད་པ་དེ་སངས་རྒྱས་པའི་ཆོས་དང་བོད་ཡིག་གིས་རེད་འདུག བཀའ་འགྱུར་བསྟན་འགྱུར་པོ་ཏི་དེ་ཚོ་བོད་ཀྱི་ས་ཁུལ་ཡོངས་རྫོགས་དང་ཧི་མ་ལ་ཡའི་རི་རྒྱུད་ཁུལ། དེ་བཞིན་སོག་ཡུལ་དུའང་ཁྱབ་བསྡད་ཡོད་པ་མ་ཟད། ཨུ་རུ་སུའི་ཁོངས་ཀྱི་ས་ཁུལ་ཁ་ཤས་ལའང་བཀའ་འགྱུར་བསྟན་འགྱུར་གྱིས་ཁྱབ་སྟེ་བོད་ཀྱི་ཆོས་དང་བོད་ཡིག་ཁྱབ་བསྡད་ཡོད་པ་རེད། བོད་ལ་ཆབ་སྲིད་ཀྱི་འཕོ་འགྱུར་ཞེ་དྲགས་ཤིག་ཕྱིན་ཡོད་ཀྱང་། དེའི་རིང་བོད་རིགས་སྤྱི་བོ་གནམ་བསྟན་ཡོངས་རྫོགས་ལ་བོད་གངས་ཅན་པ་ཞེས་སངས་རྒྱས་དང་ཆོས། དགེ་འདུན་ངོ་ཤེས་ཀྱི་ཡོད་མེད་ལ་མ་ལྟོས་པར་དཀོན་མཆོག་གསུམ་ཞེས་དད་པ་བྱེད་བཞིན་པ་དེས། ང་ཚོ་ཚང་མ་ཚུར་སྡོམ་བསྡད་རེད་པ་རེད། ཅེས་དང་། མཇུག་ཏུ་ཁོང་བོད་མི་ཞིག་ཡིན་པའི་ཆ་ནས་ལས་འགན་གསུམ་ཡོད་པའི་དང་པོ་དེ་བོད་ཀྱི་ཁོར་ཡུག་དང་ཧི་མ་ལ་ཡའི་རི་རྒྱུད་ཀྱི་ཁོར་ཡུག་གཙང་ཉར་དང་། གཉིས་པ་འཚེ་བ་མེད་པའི་གོམས་གཤིས་བཟང་པོ་བདག་ཉར། གསུམ་པ་སངས་རྒྱས་ཀྱི་ཆོས་སྤུས་དག་པོ་འདི་ཉར་ཚགས་གནང་རྒྱུ་བཅས་ཡིན་སྐོར་གསུངས་སོང་།
སྔ་དྲོའི་ནང་ཆོས་ངོ་སྤྲོད་གྲུབ་རྗེས། ཉིན་རྒྱབ་ཏུ་དགེ་བཤེས་རྣམ་པ་དབུ་བཞུགས་ཐོག་ནང་ཆོས་བསྐྱར་བཤད་དང་དོགས་འདྲི་བགྲོ་གླེང་གནང་རྒྱུ་ཡིན་པ་མ་ཟད། དེ་རིང་ཕྱི་དྲོར་དགའ་ལྡན་ཕོ་བྲང་གི་དྲུང་ཆེ་ཚེ་རྒྱམ་ལགས་ཀྱིས་བོད་རྒྱ་གཉིས་ཀྱི་དཀའ་རྙོག་སེལ་ཐབས་སྐོར་ལ་གཏམ་བཤད་དང་དྲི་བ་དྲིས་ལན་གནང་རྒྱུ་དང་། སང་ཉིན་ཕྱི་དྲོར་བོད་མི་མང་སྤྱི་འཐུས་བཀའ་ཟུར་ཐུབ་བསྟན་ལུང་རིགས་ལགས་ཀྱིས། བོད་རིགས་གཞོན་སྐྱེས་ཚོའི་ལས་འགན་སྐོར་ལ་གཏམ་བཤད་དང་དྲི་བ་དྲིས་ལན་གནང་རྒྱུ་ཡིན་འདུག གནངས་ཉིན་སྔ་དྲོའི་ཆུ་ཚོད་ ༨།༢༠ ཙམ་ལ་༧གོང་ས་མཆོག་གིས་ཐུགས་རྗེ་ཆེན་པོ་ཕྱག་སྟོང་སྤྱན་སྟོང་གི་བཀའ་དབང་བཀའ་དྲིན་བསྐྱང་རྒྱུ་དང་། བཀའ་དབང་གྲུབ་རྗེས་བོད་ཁྱིམ་སྤྱི་ཡོངས་ནས་༧གོང་ས་མཆོག་ལ་བརྟན་བཞུགས་ཤིག་བསྟར་འབུལ་ཞུ་རྒྱུ་ཡིན་འདུག
གསར་འགོད་པ། པདྨ་མཚོ།
༼གོམས་གཤིས་ཡིན་ནའང་། རྗེས་ལུས་ཀྱི་རང་བཞིན་ཡིན་ན། དེ་ང་ཚོས་སེལ་དགོས་པ་རེད། ཡར་རྒྱས་གཏོང་དགོས་པ་རེད།༽
བོད་པས་ཆབ་སྲིད་ཀྱི་ཐོག་ནས་ཞབས་འདྲེན་ཆ་ཚང་ཞུས་ཚར་བ་རེད། ཡིན་ནའང་། ང་ཚོ་བོད་མི་སྤྱི་བོ་གནམ་བསྟན་ཡོངས་རྫོགས་རྡོག་སྒྲིལ་ནས་དུས་ད་ལྟ་བར་དུ་བསྡད་པ་དེ་སངས་རྒྱས་པའི་ཆོས་དང་བོད་ཡིག་གིས་རེད་འདུག
་་་་་་་་་་་ མཇུག་ཏུ་ཁོང་བོད་མི་ཞིག་ཡིན་པའི་ཆ་ནས་ལས་འགན་གསུམ་ཡོད་པའི་དང་པོ་དེ་བོད་ཀྱི་ཁོར་ཡུག་དང་ཧི་མ་ལ་ཡའི་རི་རྒྱུད་ཀྱི་ཁོར་ཡུག་གཙང་ཉར་དང་། གཉིས་པ་འཚེ་བ་མེད་པའི་གོམས་གཤིས་བཟང་པོ་བདག་ཉར། གསུམ་པ་སངས་རྒྱས་ཀྱི་ཆོས་སྤུས་དག་པོ་འདི་ཉར་ཚགས་གནང་རྒྱུ་བཅས་ཡིན་སྐོར་གསུངས་སོང་། ་་་་་་་་་་་་་་་