༧སྐུའི་གྱ་སྟོན་གྱི་མཛད་རིམ་ཁག་ལ་སྤྱིར་བཏང་འགྱུར་བ་ཆེན་པོ་ཕྱིན་མེད་ཀྱང་ཉིན་དང་པོའི་མཛད་རིམ་ཁག་ཅིག་ཉིན་གཉིས་པར་ཕྱིར་འཐེན་བྱས་ཡོད་འདུག
༧གོང་ས་མཆོག་ཕྱི་ལུགས་ཀྱི་དགུང་གྲངས་ ༨༠ ཕེབས་པའི་སྐལ་བཟང་དང་བསྟུན། ཟླ་འདིའི་ཕྱི་ཚེས་ ༢༡ ནས་ ༢༣ བར་གྱི་ཉིན་༣ རིང་བཞུགས་སྒར་དྷ་རམ་ས་ལར་གྱ་སྟོན་སྲུང་གཙི་ཞུ་རྒྱུ་ཡིན་པ་ལྟར། བོད་ཕྱི་ནང་གཉིས་ཀྱིས་གཙོས་འཛམ་གླིང་གི་ཡུལ་ལུང་གང་ས་ནས་མི་མང་པོས་དོ་སྣང་ཆེན་པོ་བྱེད་ཀྱི་ཡོད་སྟབས། ཁ་སང་གྱ་སྟོན་གོ་སྒྲིག་ཚོགས་ཆུང་གི་ངོས་ནས་མཛད་རིམ་ལ་འགྱུར་བ་ཅུང་ཙམ་ཐེབས་ཡོད་པའི་སྐོར་གྱི་གསར་འགོད་གསལ་བསྒྲགས་ཤིག་སྤེལ་ཡོད་སྟབས། དེ་རིང་འདི་གའི་གསར་འགོད་པས་གྱ་སྟོན་གོ་སྒྲིག་ཚོགས་ཆུང་གི་ཚོགས་གཙོ་སྤྱི་འཐུས་སྨན་པ་མཁྱེན་རབ་རྒྱ་མཚོ་ལགས་ལ་བཅར་འདྲི་ཞུས་པ་དང་འབྲེལ། གཤམ་དུ་ཉིན་གྲངས་ ༣ རིང་གི་གྱ་སྟོན་གྱི་མཛད་རིམ་རྣམས་ཞིབ་གསལ་གྱིས་བཀོད་ཡོད།
ཕྱི་ཚེས་ ༢༡ ཉིན།
ཉིན་དེའི་ཞོགས་པའི་ཆུ་ཚོད་ ༦ ཐོག བོད་ཀྱི་ཆོས་བརྒྱུད་ཆེན་པོ་བཞི་དང་གཡུང་དྲུང་བོན་བཅས་ཀྱི་དབུ་ཁྲིད་བླ་ཆེན་རྣམ་པ་དབུ་བཞུགས་ཐོག་སྐུའི་ཚེ་སྒྲུབ་གསུང་ཆོག་གནང་རྒྱུ་དང་། ཆུ་ཚོད་ ༨ པ་ཐོག་དྷ་ས་ཐེག་ཆེན་གཙུག་ལག་ཁང་དུ། དབུས་བོད་མིའི་སྒྲིག་འཛུགས་དང་མདོ་སྨད་ཆོལ་ཁ། རི་བོ་དགེ་ལུགས་པའི་བརྟན་བཞུགས་གོ་སྒྲིག་ཚོགས་ཆུང་བཅས་མཉམ་འབྲེལ་གྱི་ཐོག་ནས་བརྟན་བཞུགས་རྒྱས་པ་ཞིག་བསྟར་འབུལ་ཞུ་རྒྱུ་ཡིན་པ་དང་། དེའི་རྗེས་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་དང་དགུང་ལོ་ ༨༠ ཡན་གྱི་མཁན་ཟུར་རྣམ་པ། དེ་བཞིན་དགུང་གྲངས་ ༨༠ ཡན་གྱི་མདོ་སྨད་ཆོལ་ཁའི་བགྲེས་སོང་རྣམ་པ་བཅས་ལ་མཇལ་ཁ་གནང་རྒྱུ་ཡིན་པ་དང་། ཉིན་རྒྱབ་ཏུ་མདོ་སྨད་གྱ་སྟོན་གོ་སྒྲིག་ཚོགས་ཆུང་གིས་ཆེད་དུ་བཞེངས་བའི་༧གོང་ས་མཆོག་གི་མཛད་ཐང་ ༡༥ དང་། གལ་ཆེའི་གསུང་འབུམ་ཁག་ཅིག་བཅས་འགྲེམས་སྟོན་གནང་རྒྱུ་ཡིན་འདུག
ཕྱི་ཚེས་ ༢༢ ཉིན།
མདོ་སྨད་གྱ་སྟོན་གོ་སྒྲིག་ཚོགས་ཆུང་གི་གོ་སྒྲིག་འོག ཉིན་དེའི་སྔ་དྲོའི་ཆུ་ཚོད་༨།༤༥ ཙམ་ལ་༧གོང་ས་མཆོག་དབུ་བཞུགས་ཐོག་༧སྐུའི་གྱ་སྟོན་མཛད་སྒོ་དབུ་འཛུགས་གནང་རྒྱུ་ཡིན་པ་དང་། མཛད་སྒོའི་ཐོག་བོད་ཀྱི་ཆོས་བརྒྱུད་ཁག་གི་བླ་ཆེན་རྣམ་པའི་དབུས་སྐུ་མགྲོན་གཙོ་བོར་ཧི་མ་ཅལ་མངའ་སྡེའི་བློན་ཆེན་ཝིར་བྷ་ཌི་ར་སིན་(Virbhadra Singh)མཆོག་ཕེབས་རྒྱུ་ཡིན་པ་དང་། མཛད་སྒོའི་སྐབས་མདོ་སྨད་དབུས་རྒྱུན་ཚོགས་གཙོ་བསྟན་པའི་དངོས་གྲུབ་ལགས་ཀྱིས་༧སྐུའི་གྱ་སྟོན་གོ་སྒྲིག་ཞུ་དགོས་པའི་བརྒྱུད་རིམ་སོགས་སྙན་སྒྲོན་ཞུ་རྒྱུ་དང་། གྱ་སྟོན་གོ་སྒྲིག་ཚོགས་ཆུང་གི་ཚོགས་གཙོ་སྤྱི་འཐུས་སྨན་པ་མཁྱེན་རབ་རྒྱ་མཚོ་ལགས་ཀྱིས་ཚོགས་ཆུང་གི་ལས་བསྡོམས་སྙིང་བསྡུས་སྙན་སྒྲོན་ཞུས་རྗེས། སྐུ་མགྲོན་གཙོ་བོ་མཆོག་གི་དབུས་སྐུ་མགྲོན་རྣམ་པས་༧རྒྱལ་དབང་སྐུ་ཕྲེང་དང་པོ་ནས་བཅུ་བཞི་བར་གྱི་མཛད་རྣམ་འཁྲུངས་རབས་དེབ་ཐེར་ནོར་བུའི་ཕྲེང་བ་ཁག་དང་། ༧ཀུན་གཟིགས་པཎ་ཆེན་རིན་པོ་ཆེ་སྐུ་ཕྲེང་བཅུ་པའི་མཛད་རྣམ་བརྙན་དེབ་པཎ་ཆེན་སྣང་བ་མཐའ་ཡས། དེ་བཞིན་མཛད་བརྒྱ་མཐོང་བ་དོན་ལྡན་གྱི་བརྙན་དེབ་དང་། སྐུའི་གྱ་སྟོན་དྲན་རྟེན་གསེར་གྱི་རྟགས་མ་བཅས་དབུ་འབྱེད་གནང་བ་དང་སྦྲགས། ༧གོང་ས་མཆོག་ལ་དྲན་རྟེན་གསེར་གྱི་རྟགས་མ་འབུལ་རྒྱུ་ཡིན་འདུག དེའི་རྗེས་ཆོས་བརྒྱུད་ཁག་གི་བླ་ཆེན་རྣམ་པ་དང་སྐུ་མགྲོན་གཙོ་བོ་བཅས་ནས་༧སྐུའི་གྱ་སྟོན་དང་འབྲེལ་བའི་བཀའ་སློབ་གསུང་བཤད་གནང་རྒྱུ་དང་། དེ་ནས་༧གོང་ས་མཆོག་ནས་བླང་དོར་གྱི་བཀའ་སློབ་བཀའ་དྲིན་བསྐྱང་རྒྱུ་ཡིན་འདུག
ཉིན་རྒྱབ་དྷ་སྟེང་བོད་ཁྱིམ་གྱི་ཚོགས་ཁང་དུ་འདུ་འཛོམས་གནང་རྒྱུ་ཡིན་པ་དང་། སྐབས་དེར་སྐུ་མགྲོན་གཙོ་བོ་ཧི་མ་ཅལ་མངའ་སྡེའི་བློན་ཆེན་ཝིར་བྷ་ཌི་ར་སིན་མཆོག་ཕེབས་རྒྱུ་ཡིན་ལ། མངའ་སྡེའི་བློན་ཆེན་མཆོག་གི་སྐུ་ཚེའི་དངོས་བྱུང་ལོ་རྒྱུས་གློག་བརྙན་དེ་གཟིགས་འབུལ་ཞུ་རྒྱུ་དང་། དེ་ནས་ཀིརྟི་རིན་པོ་ཆེ་མཆོག་དང་ལྕང་སྐྱ་རིན་པོ་ཆེ། ཨ་ཀྱ་རིན་པོ་ཆེ། དེ་བཞིན་འབྲས་སྤུངས་ཁྲི་བ་བློ་བཟང་བསྟན་པ་མཆོག ཀ་ཐོགཿ་དགེ་རྩེ་རིན་པོ་ཆེ། འབྲས་སྤུངས་སྒོ་མང་མཁན་པོ་ཡོན་ཏན་དམ་ཆོས་མཆོག དེ་བཞིན་སྲད་རྒྱུད་མཁན་པོ་ཨ་ལགས་ཡོངས་འཛིན་མཆོག་དང་གཙོས་གསེར་ཁྲི་རིན་པོ་ཆེ། ཇོ་ནང་མ་དགོན་མཁན་རིན་པོ་ཆེ་ཀུན་དགའ་ཚམས་ཆུང་མཆོག་བཅས་ནས་གསུང་བཤད་གནང་རྒྱུ་དང་། ཕྱི་དྲོའི་ཆུ་ཚོད་ ༦ པ་ཐོག་༧སྐུའི་གྱ་སྟོན་དགོང་ཚོགས་མགོ་འཛུགས་གནང་སྟེ། བཙན་བྱོལ་ནང་གི་གཞས་པ་གྲགས་ཅན་ཚེ་རིང་འགྱུར་མེད་དང་ཕུར་བུ་རྣམ་རྒྱལ་སོགས་ཀྱིས་གཙོས་གཞས་པ་གཞས་མ་ཁག་ཅིག་གིས་གཞས་སྣ་འབུལ་རྒྱུ་དང་། མདོ་སྨད་ཀྱི་དམངས་ཁྲོད་གླུ་གར་བཅས་གཟིགས་འབུལ་ཞུ་རྒྱུ་ཡིན་འདུག
ཕྱི་ཚེས་ ༢༣ ཉིན།
ཉིན་དེའི་སྔ་དྲོའི་ཆུ་ཚོད་ ༨ པ་ཐོག མདོ་སྨད་ཀྱི་བླ་སྤྲུལ་དགེ་འདུན་རྣམ་པ་དང་མི་མང་བཅས་ལྷ་རྒྱལ་རིར་ཚང་འཛོམས་ཀྱིས་བསང་གསོལ་གཏོང་རྒྱུ་དང་། དེ་ནས་ཀིརྟིའི་བྱེས་པ་གྲྭ་ཚང་དུ་འཛོམས་ཏེ་ཞོགས་ཇ་བཏུང་རྗེས། མདོ་སྨད་དབུས་རྒྱུན་ཚོགས་གཙོ་བསྟན་པའི་དངོས་གྲུབ་ལགས་ཀྱིས་༧སྐུའི་གྱ་སྟོན་གྱི་མདོ་སྨད་དགྱེས་འཛོམས་ཆེན་མོ་དབུ་འཛུགས་དང་འབྲེལ་བའི་གཏམ་བཤད་གནང་རྒྱུ་དང་། ཁྲི་ཟུར་རྒྱལ་ལོ་དོན་འགྲུབ་མཆོག་དང་བཀའ་ཟུར་རྗེ་བཙུན་པདྨ་མཆོག དགེ་བཤེས་བློ་བཟང་སྨོན་ལམ་ལགས་བཅས་ལ་མདོ་སྨད་དབུས་རྒྱུན་ནས་མཛད་རྗེས་གཟེངས་རྟགས་འབུལ་རྒྱུ། དེ་ནས་ཡབ་གཞིས་ནང་མི་ ༦ ལྷག་ནས་སྔ་རྗེས་སུ་གསུང་བཤད་སྐར་མ་ ༡༠ རེ་གནང་རྒྱུ་ཡིན་འདུག ཉིན་རྒྱབ་ཏུ་གཞས་སྣ་གཟིགས་འབུལ་དང་འབྲེལ་བཀའ་ཟུར་ཐུབ་བསྟན་ལུང་རིགས་མཆོག་དང་བཀའ་བློན་བདེ་སྐྱིད་ཆོས་དབྱངས་མཆོག་རྣམ་གཉིས་ནས་གསུང་བཤད་གནང་རྒྱུ་དང་། དེ་ནས་མདོ་སྨད་དབུས་རྒྱུན་གྱི་ངོས་ནས་༧སྐུའི་གྱ་སྟོན་གོ་སྒྲིག་ཚོགས་ཆུང་གི་སློབ་སྟོན་པ་རྣམ་པ་དང་། གོ་སྒྲིག་ཚོགས་ཆུང་གི་ཚོགས་མི། ཀིརྟིའི་བྱེས་པ་གྲྭ་ཚང་དང་ཀིརྟིའི་དགེ་རྩ་ཚོགས་པ། ལྷ་བྲིས་དང་མཛད་རྣམ་རྩོམ་པ་པོ། སྦྱིན་བདག་ཁག་ཅིག་བཅས་ལ་ཐུགས་རྗེ་ཆེ་ཞུའི་ཕྱག་རྟགས་འབུལ་རྒྱུ་དང་། བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་ནས་གསུང་བཤད་བཅས་གནང་གྲུབ་རྗེས། ༧སྐུའི་གྱ་སྟོན་གོ་སྒྲིག་ཚོགས་ཆུང་གི་ཚོགས་གཙོ་སྤྱི་འཐུས་སྨན་པ་མཁྱེན་རབ་རྒྱ་མཚོ་ལགས་ནས་གྱ་སྟོན་མཇུག་བསྡོམས་ཀྱི་གཏམ་བཤད་གནང་རྒྱུ་ཡིན་འདུག
གྱ་སྟོན་གོ་སྒྲིག་ཚོགས་ཆུང་གི་ཚོགས་གཙོ་ལགས་ཀྱིས་ཐེངས་འདིའི་གསར་འགོད་གསལ་བསྒྲགས་ཀྱི་དགོས་དམིགས་སྐོར་ལ་བརྗོད་དོན། གྱ་སྟོན་གྱི་ཉིན་དང་པོའི་མཛད་རིམ་ཁག་ཅིག་ཉིན་གཉིས་པར་ཕྱིར་འཐེན་བྱེད་དགོས་བྱུང་ཡོད་སྟབས། ཁ་སང་གསར་འགོད་གསལ་བསྒྲགས་ཤིག་སྤེལ་བ་དེ་གཙོ་བོ་ཉིན་གཉིས་པའི་མཛད་རིམ་རྣམས་ངོ་སྤྲོད་བྱེད་པའི་ཆེད་དུ་ཡིན། ཉིན་དང་པོའི་མཛད་རིམ་རྣམས་ཕྱིར་འཐེན་དགོས་པའི་རྒྱུ་མཚན་ག་རེ་རེད་ཟེར་ན། དབུས་བོད་མིའི་སྒྲིག་འཛུགས་ནས་ཉིན་དང་པོར་མཛད་སྒོ་ཞིག་ཚོགས་རྒྱུ་ཡིན་གསུངས་བ་ལྟར། གཞུང་འབྲེལ་གྱི་མཛད་སྒོ་དེ་གལ་ཆེན་པོར་མཐོང་ནས་མདོ་སྨད་གྱ་སྟོན་གོ་སྒྲིག་ཚོགས་ཆུང་གི་མཛད་རིམ་ཁག་ཅིག་ཉིན་གཉིས་པར་འཐེན་པ་རེད། མཛད་རིམ་ཕྱིར་འཐེན་བྱས་པར་བརྟེན་སྤྱི་ཚོགས་ནང་མཛད་རིམ་གྱི་གནས་སྟངས་སྐོར་ལ་སྐད་ཆ་མང་པོ་ཤོད་ཀྱི་ཡོད་སྟབས། དེ་ཚོ་གསལ་བོ་བཟོ་བའི་ཆེད་དུ་གསལ་བསྒྲགས་འདི་སྤེལ་བ་ཡིན། ཞེས་བརྗོད་བྱུང་།
བསླེབ་ལ་ཉེ་བའི་གྱ་སྟོན་དང་འབྲེལ་ཏེ་འབོད་སྐུལ་གནང་དགོས་པ་ཅི་ཡོད་དྲིས་པར་ཁོང་གིས། གྱ་སྟོན་སྲུང་གཙིའི་དགོས་པ་དང་རྒྱུ་མཚན་གཙོ་བོ་༧གོང་ས་མཆོག་གི་བཀའ་དྲིན་རྗེས་དྲན་ཞུ་རྒྱུ་དང་སྐུ་ཚེ་ཡུན་རིང་བརྟན་པའི་ཆེད་དུ་ཡིན་པས། གྱ་སྟོན་སྲུང་གཙི་བྱེད་པར་གཙོ་བོ་སྡིགས་སྤོང་དགེ་སྒྲུབ་ཀྱི་ལས་ལ་བརྟེན་ནས་སྲུང་གཙི་ཞུ་རྒྱུ་ཡིན་ཞེས་ཡར་སྐྱབས་འཇུག་ཞུས་པ་ལྟར་ཞལ་བཞེས་གནང་ཡོད་སྟབས། གལ་སྲིད་སྒེར་སོ་སོའི་ངོས་ནས་སྡིགས་སྤོང་དགེ་སྒྲུབ་བྱས་པའི་གྲངས་གསོག་གི་ཐོ་དེ་འདྲ་ཡོད་པ་ཡིན་ན། ཟླ་འདིའི་ཕྱི་ཚེས་ ༡༠ ཡས་མས་ནང་གང་མགྱོགས་ཀྱིས་གོ་སྒྲིག་ཚོགས་ཆུང་ལ་གཏོང་རྒྱུ་གལ་ཆེན་པོ་རེད། གང་ཡིན་ཟེར་ན། བརྟན་བཞུགས་སྐབས་ང་ཚོས་སྡིགས་སྤོང་དགེ་སྒྲུབ་ཀྱི་གྲངས་ཐོ་བསྡོམས་ནས་༧གོང་ས་མཆོག་ལ་སྙན་གསེང་ཞུ་དགོས་ཀྱི་ཡོད་པས། སྔ་ཙམ་ནས་དེ་ཚོ་གྲ་སྒྲིག་བྱེད་ཚར་དགོས་པ་རེད། ཅེས་དང་།
མདོ་སྨད་མི་མང་གིས་གྱ་སྟོན་དང་འབྲེལ་བའི་གྲ་སྒྲིག་ཅི་དགོས་དྲིས་པར། སྤྱིར་བཏང་གྱ་སྟོན་གྱི་ཉིན་དང་པོ་དང་གཉིས་པར་བོད་ཆོལ་ཁ་གསུམ་གྱིས་གཙོས་ཕྱི་རྒྱལ་བ་སོགས་ཚང་མ་འདུ་འཛོམས་གནང་རྒྱུ་དང་། ཉིན་གསུམ་པ་དེ་མདོ་སྨད་མི་མང་ནང་ཁུལ་གྱི་འདུ་འཛོམས་ཡིན་པས། མདོ་སྨད་དབུས་རྒྱུན་ནས་མདོ་སྨད་ཀྱི་ལག་ཁྱེར་ཞིག་བཟོ་བཞིན་ཡོད་སྟབས། སྐབས་དེར་ལག་ཁྱེར་དེ་འཁྱེར་ཡོང་ཐུབ་ན་ཡག་པོ་འདུག གལ་སྲིད་ལག་ཁྱེར་དེ་མེད་པ་ཡིན་ན་དཔྱ་ཁྲལ་ལག་དེབ་དང་སོ་སོའི་’འདྲ་པར་རེ་མཉམ་དུ་འཁྱེར་ཡོང་ན། གྱ་སྟོན་སྐབས་མདོ་སྨད་ལག་ཁྱེར་ལམ་སང་བཟོ་ཐུབ་ཀྱི་ཡོད་པ་རེད། ཅེས་བརྗོད་བྱུང་།
གསར་འགོད་པ། པདྨ་མཚོ།
སྤྱིར་ལུང་པ་རེ་ལ་དཔེ་རེ་དང་། སྣོད་ཆས་རེ་ལ་ལོང་རེ་ཟེར་བ་ལྟར། བརྒྱད་ཅུའི་གྱ་སྟོན་ཟེར་བ་དེ་མདོ་སྨད་པ་ཁོ་ན་མ་གཏོགས་ས་གནས་གཞན་ལ་མིང་ཙམ་ཡང་གོ་རྒྱུ་མེད་པ་ཞིག་ཡིན་པས། ༧གོང་ས་རྒྱལ་བའི་དབང་པོ་མཆོག་གི་སྐུའི་གྱ་སྟོན་འདི་ཡང་ཐོག་མར་མདོ་སྨད་ལས་གཞན་ན་གྲག་འགུལ་མེད་པའང་དེའི་རྐྱེན་ཙམ་ལས། ཕན་ཚུན་ཀུན་གྱིས་མཉམ་འབྲེལ་མ་བྱེས་པ་སོགས་ཡེ་ནས་མ་རེད་འདོད། ལོ་གཉིས་ཙམ་གྱི་རིང་ལ་གྱ་སྟོན་གོ་སྒྲིག་ཚོགས་ཆུང་དབུས་མདོ་སྨད་གཞི་བྱེས་གཉིས་ཀྱིས་རྒྱུ་ཚེགས་ཉེན་གསུམ་ལ་མ་འཛེམས་པར་ཤུགས་བརྒྱབས་ཡོད་པའང་སྙོན་དུ་མེད་ན་ཡང་། འཇིག་རྟེན་འདིར་ང་ཚོ་ལ་སེམས་གཏད་སའི་རང་གཞུང་གཅིག་ཡོད་པ་ནི་བཙན་བྱོལ་བོད་ཀྱི་སྒྲིག་འཛུགས་འདི་ཉག་གཅིག་ཡིན་པས། དེ་ལ་བསྟུན་ཤེས་དང་གུས་ཞབས། དང་ལེན་སོགས་བྱས་པ་ནི་མདོ་སྨད་ཤེས་ཡོན་པའི་སྡེ་ཚོགས་ཀྱི་གཟི་བརྗིད་ཡིན་པ་ལས་མ་འཇོན་པ་དང་བློ་ཁོག་མ་ཡོད་པར་ནམ་ཡང་མཐོང་གིན་མེད། དཔལ་ལྡན་རང་གཞུང་གིས་ཀྱང་མདོ་སྨད་མི་མང་ལ་བསམ་ཤེས་ཀྱི་ཁོག་རྒྱ། འཇུག་ལྡོག་གི་རྣམ་དཔྱོད། ཕུགས་རྒྱང་གི་བསམ་བློ་བཅས་ཡོད་པའི་ཡིད་ཆེས་ཐོག་ནས་སྐབས་དང་དུས་སུ་འཛེམ་དོགས་མེད་པར་བཀའ་གནང་རྐྱང་མཛད་བཞིན་པ་ལས། གཞན་གོ་ལ་མ་གོ་བ་ཙམ་ནས་རྙོག་གྲ་བཟོ་རྐྱང་ཡིན་པའི་སྤྱི་ཚོགས་ཤིག་ཡིན་ན་ཐུགས་གཟབ་མི་གནང་རང་གནང་ཆགས་ངེས། མདོར་ན་ཐེངས་འདིར་རྙོག་གྲ་གང་ཡང་མེད་པར་དམངས་ཀྱིས་གཞུང་ལ་བསྟུན་པ་ནི་ཤིན་ཏུ་ནས་ཀྱང་བཀྲ་ཤིས་པ་ཞིག་རེད་ལ། དམངས་ལ་རྡབ་གསིགས་ཐེབས་པའི་འགྱུར་བའང་གང་ཡང་བྱུང་མི་འདུག་པས་དགའ་སྤྲོ་འབུམ་གྱིས་བལྟས་ཡོད། ཞར་ཞུ། གཞས་བ་ཚེ་རིང་འགྱུར་མེད་དང་ཕུར་བུ་རྣམ་རྒྱལ་རྣམ་པ་གཉིས་ལ་དམིགས་བསལ་གྱིས་མིང་གྲགས་ཅན་གསུང་ཡོད་པ་ནི་དོན་དངོས་རེད་འདུག་ལ། མི་འབུམ་ལྷག་གིས་བསྟོད་བསྔགས་ཀྱི་མེ་ཏོག་འཐོར་ཡུལ་རེད་འདུག་མི་འབུམ་ལྷག་ཉུང་ཉུང་མ་རེད་ཡ།
ད་གནས་ཚུལ་འདིའི་མགོ་མཇུག་མང་པོ་གླེང་འདོད་མི་འདུག གང་ལྟར་གྱ་སྟོན་ཚོགས་པའི་ངོས་ནས་བསམ་ཤེས་དང་གུ་ཡངས་ཆེན་པོ་གནང་བར་ཐུགས་རྗེ་ཆེ། ལོ་ངོ་ ༢ ལྷག་རིང་ཡར་རྒྱུག་མར་རྒྱུག་བྱས་ནས་སློང་མོ་བྱས་ཤིང་། ཚོགས་ཆུང་ཟུར་དུ་བཙུགས་པའི་མི་རྒྱུ་གཉིས་ཀྱི་འགྲོ་སོང་དང་དཀའ་ལས་མང་པོ་བརྒྱབ་པར་བཀའ་ཤིག་གིས་བསམ་ཤེས་དགོས་པ་ཧ་ཅང་གལ་ཆེན་པོ་རེད། མི་མང་གི་གཞུང་ཞིག་ཡིན་པའི་ཆ་ནས་མི་མང་གི་སེམས་སུ། ང་ཚོར་བཙན་པོ་དབང་ཡོད་བྱས་སོང་ཨ་་་་བསམ་པའི་ཚོང་སྣང་ཞིག་མི་བསྐྲུན་ཆེད། གྱ་སྟོན་གྱི་མགོ་མཇུག་བར་གསུམ་དུ་གྱ་སྟོན་ཚོགས་པར་རོགས་རམ་དང་རྒྱབ་སྐྱོར་གང་ལེགས་གནང་རྒྱུ་དེ་བཀའ་ཤག་གི་འོས་འགན་ཡིན་ལ། གྱ་སྟོན་ལ་ཡུན་རིང་སྒུག་ཅིང་གང་ཡོད་ཅི་ཡོད་ཀྱིས་ཞལ་འདེབས་འབུལ་མཁན་ང་ཚོའི་རེ་བ་དང་འབོད་སྐུལ་ཡིན། སྐུ་མཁྱེན་་་་་་་་།
སྤྱིར་བཏང་མདོ་སྨད་གྱ་སྟོན་དེ་བོད་གཞུང་གིས་འཕྲོག་ཏུ་བཅུག་པ་དེ་གྱ་སྟོན་གོ་སྒྲིག་ཚོགས་ཆུང་གིས་ཅི་གང་མ་འཇོན་པ་རེད། གང་ཡིན་ཟེར་ན་མ་གཞི་ནས་ཆོལ་ཁ་གསུམ་མཉམ་རུབ་ཀྱིས་གྱ་སྟོན་གོ་སྒྲིག་གནང་ཐུབ་ན་དེ་ཡག་པོ་ཞེ་དྲག་རེད། ལྷག་པར་དུ་བོད་མིའི་སྒྲིག་འཛུགས་ཀྱིས་གཞུང་འབྲེལ་ཐོག་ནས་གནང་ཐུབ་ན་དེ་ལས་ཀྱང་ཕུན་སུམ་ཚོགས་པའི་ཡན་ལག་རེད། ཡིན་ནའང་ཐོག་མ་ཆོལ་ཁ་གཞན་ལ་གྲགས་འགུལ་མེད་པ་མ་ཟད་བོད་མིའི་སྒྲིག་འཛུགས་ལའང་ཅི་གང་བཤད་རྒྱུ་ཡོད་པ་མ་རེད། འདས་པའི་ལོ་ངོ་གཅིག་ལྷག་རིང་གཞིས་བྱེས་མདོ་སྨད་མི་ལ་ཞལ་འདེབས་ཧ་ཅང་ཕོན་ཆེན་པོ་ཞིག་བསྡུས་པ་མ་ཟད། བོད་ཕྱི་ནང་གཉིས་ཀྱི་མི་མང་པོ་ཞིག་གིས་འདིའི་སྔ་ཕྱིའི་ཐོག་ཕྱག་ལས་མང་པོ་ཞིག་གནང་སྟེ་གྲུབ་ཚར་ཡོད་པའི་ཁ་ཐུག་ལ་གཞུང་གིས་འཁྱེར་འགྲོ་བ་དེ་གོ་སྒྲིག་ཚོགས་ཆུང་ཟེར་ན་རེད་མདོ་སྨད་ཀྱི་ལས་ཀྱི་སྣེ་མ་བ་ཚས་མ་འཇོན་པ་རེད།
མཐའ་མ་དེ་ལ་ཞུ་རྒྱུ་ཞིག་ཡོད་པ་ནི་གྱ་སྟོན་ཁ་བྲོ་བཀྲ་ཤིས་ཡོང་ཆེད་རྙོག་དྲ་མང་པོ་མི་བཤད། གོ་སྒྲིག་ཚོགས་ཆུང་དང་ལས་ཀྱི་སྣེ་མོ་ཚོས་མི་མང་ལ་ཞལ་འདེབས་འདུས་པ་དང་གྱ་སྟོན་སྐོར་གྱི་རྩིས་ཁྲ་གསལ་གསལ་ཐང་ཐང་ཞིག་བཟོ་དགོས་པ་མ་ཟད། ཕར་འགྲོ་སོང་བཏང་བ་དང་ཅ་ལག་ཉོས་པ་སོགས་ཀྱིང་འཛིན་ཡིག་ཡོད་པ་ཙམ་མ་ཡིན་པར་ཚད་ཚད་རན་རན་གྱི་གོང་ཚད་ཅིག་ཡིན་དགོས། གང་ཡིན་ཟེར་ན་ག་གེ་མོ་ལ་དངུལ་འདི་ཙམ་ཕྱིན་སོང་། ཆེ་གེ་མོ་ལ་འགྲོ་སོང་དེ་ཙམ་བཏང་ཡིན་ཟེར་རྒྱུའི་ཡིག་ཆ་བཟོ་རྒྱུ་དང་དངུལ་འཛིན་རྫུན་མ་བཟོ་རྒྱུ་ཁ་སང་དེ་རིང་ལས་བསླ་ཤོས་ཡིན་པ་ཚང་མས་ཤེས་ཀྱི་ཡོད་པ་རེད། དེ་ནས་བྱུང་སོང་གི་དངུལ་ལྷག་མ་རྣམས་ཀྱང་ཚོགས་པ་བྱེ་བྲག་པ་ཙམ་མ་ཟད་མདོ་སྨད་དབུས་རྒྱུན་གྱིས་ཀྱང་སྒེར་ཉར་བྱས་མ་མི་ཆོག་པར་ཏཱ་ལའི་བླ་མའི་ཐེབས་རྩ་ལྟ་བུ་ཞིག་ལ་ཁམས་གཙང་འབུལ་དགོས་པ་འདི་མདོ་སྨད་མི་མང་གིས་ཞལ་འདེབས་ཕུལ་བའི་རེ་བའང་ཡིན། གནས་སྐབས་རིང་དེ་ཙམ་ཞུ་འདོད་བྱུང་སོང་།
བལ་ཡུལ་ནས་ ༢༠༡༥།༦།༦།
སྐུའི་གྱ་སྟོན་སླེབས་ལ་ཉེ་བའི་དུས་འདིར་སྤྱི་ཚོགས་
ནང་རྣ་ལ་མི་སྙན་པ་དང་ཕྱོགས་རིས་ཀྱི་སྐད་ཆ་འདི་འདྲ་སྤེལ་
བསྡད་ན་ཆིག་སྒྲིལ་ལ་གནོད་པ་མ་ཟད། ད་དུང་རིན་པོ་ཆེ་ཐུགས་ཕམས་པའི་རྒྱུ་རུ་འགྲོ་བས་ན་ཡིད་གཟབ་གནང་རོགས།
མཐར་ཐུག་གི་དམིགས་ཡུལ་ནི་༸གོང་ས་མཆོག་སྐུ་ཚེ་སྐལ་བརྒྱར་བརྟན་པའི་ཆེད་ཡིན་པ་ནི་གཅིག་མཚུངས་རེད།༼བོད་ལ་ཞེན་པའི་མི་ཞིག་ཡིན་ན༽
༧གྱ་སྟོན་གྱི་མཛད་རིམ་འདི་ལོ་གཉིས་ལྷག་གི་གོང་ནས་མདོ་སྨད་ཆོལ་ཁའི་ངོས་ནས་སྲོལ་རྒྱུན་ཞིག་ཡོད་པ་ལྟར་འཚོགས་འདུ་དང་བགྲོ་གླེང་།དེ་བཞིན་༧སྐུའི་གྱ་སྟོན་གྱི་མཛད་རིམ་འདི་བཏང་བ་རེད།མ་གཞི་བྱས་ན་བོད་མིའི་སྒྲིག་འཛུགས་ཀྱི་ངོས་ནས་གྲ་སྒྲིག་དང་འགན་གཙོ་བོ་འཁུར་དགོས་པ་ཞིག་ཡིན་མོད།ཡིན་ན་ཡང་མདོ་སྨད་ཆོལ་ཁ་ལས་གཞན་པ་དག་གིས་སྲོལ་རྒྱུན་དེ་འདྲ་ཞིག་ལག་བསྟར་བྱེད་རྒྱུ་ཕར་ཟད།ཐ་ན་རྣ་བས་ཀྱང་གོ་ཐོས་མེད་ཚོད་རེད།རྒྱུ་མཚན་དེ་འདྲའི་དབང་གིས་མདོ་སྨད་ལས་གཞན་པ་གང་གིས་ཅིང་ལབ་གླེང་མེད་པ་དང་།བོད་མིའི་སྒྲིག་འཛུགས་དང་བཀའ་ཤག་ནི་དེ་ལས་ཀྱང་ལབ་གླེང་མེད་གཤིས།མདོ་སྨད་ངོས་ནས་ལོ་གཉིས་ལྷག་ལ་༧གྱ་སྟོན་གྱི་མཛད་རིམ་ཐོག་ཧུར་ཐག་འབད་ཐག་བྱས་ཏེ།༧གྱ་སྟོན་ལ་ཉེ་བའི་ཟླ་བ་ཁ་ཤས་སྔོན་ནས་འཚང་ཁ་དང་བདག་དབང་བེད་སྤྱོད་བྱས་ནའང་མདོ་སྨད་གྱ་སྟོན་གོ་སྒྲིག་འཚོགས་ཆུང་ངོས་ནས་༧བླ་མའི་བཀའ་དང་བོད་ཀྱི་རྩ་དོན་གཞི་ལ་བཞག་ནས་བསྟུན་ཤེས་དང་ཁོག་ཡངས་ཐོག་ནས་ཁོང་ཚོའི་མངོན་འདོད་ལྟར་བྱས་པ་དེ།ང་ཚོ་མདོ་སྨད་མི་མང་ངོས་ནས་བློ་སྤོབས་སྐྱེས་འོས་པ་ཞིག་རེད།ལྷག་པར་དུ་འདས་ཟིན་པའི་ལོ་རྒྱུས་ནང་༧རྒྱལ་བའི་བཀའ་དང་གཞུང་གི་ལངས་ཕྱོགས་འོག་ཤར་སྐྱོད་བྱེད་མཁན་གྱི་ཆོལ་ཁ་ཞིག་ཡུན་དུས་མི་རབས་རྗེས་མ་ཚོའི་མིག་དཔེར་ངོས་འཛིན་བྱེད་ཆོག་པ་ཞིག་རེད།བོད་མའི་སྤྱི་ཚོགས་འདི་ལ་མཚོན་ན་གཞན་གྱིས་ལུས་སེམས་ཀྱིས་འབད་རྩོན་བྱས་པའི་གྲུབ་འབྲས་ཐོག་ལ་འབྲེལ་མེད་ཀྱི་མི་ཞིག་གིས་སོ་སོའི་མཚན་སྙན་རྒྱས་ཐབས་དང་མ་འོངས་པའི་ཆབ་སྲིད་ཀྱི་གར་སྟེགས་བཟོ་རྒྱུ་དེ་ནམ་ཡང་འདོར་དཀའ་བའི་ལུས་ཀྱི་གྲིབ་མ་བཞིན་ཆགས་པ་རེད།བྱེད་སྟངས་དེ་དག་ནི་སྙིང་རྗེའི་ཡུལ་དུ་འཛིན་རྒྱུ་ནི་ཧ་ཅང་གལ་ཆེ།སྤྱི་ཚོགས་སུ་དཀྲོག་གཏམ་ཅི་ཙམ་བཤད་ཀྱང་༧གྱ་སྟོན་གོ་སྒྲིག་ཚོགས་ཆུང་ལ་ཤུགས་སྐྱེན་ཐེབ་མི་ཐུབ་པ་ནི་ང་ལ་ཡིད་ཆེས་དང་གདེང་ཚོད་ཡོད།
ང་རང་ཐོག་མ་ནས་༧གོང་ས་མཆོག་སྐུའི་གྱ་སྟོན་དེ་བོད་ཆོལ་ཁ་གསུམ་དང་། ཡང་ན་བོད་མིའི་སྒྲིག་འཛུགས་ཀྱིས་གཞུང་འབྲེལ་རང་གི་ཐོག་ནས་བཀོད་སྒྲིག་ཞུ་དགོས་པ་ཞིག་ཏུ་མཐོང་ཡང་། མི་ཁ་ཤས་ཀྱིས་མི་འཇོན་འཇོན་མདོག་གིས་ད་ལྟའི་ལབ་གླེང་འདིའི་ནང་ཟེགས་པ་རེད། ཐོག་མ་གྱ་སྟོན་སྐབས་རི་བོ་དགེ་ལུགས་སྤྱི་ཐོག་དང་མཉམ་འབྲེལ་གྱིས་བརྟེན་བཞུགས་འབུལ་རྒྱུ་དང་གྱ་སྟོན་དེའང་བོད་མིའི་སྒྲིག་འཛུགས་དང་མཉམ་འབྲེལ་བྱ་རྒྱུར་ནས་འདོད་པ་ཡོད་པ་མ་རེད་ཟེར་བ་ཞིག་གོ་སོང་། སྤྱི་ཚོགས་ནང་གི་ལབ་གླེང་དེ་དག་བདེན་པ་ཡིན་ན་དངོས་ནས་དྲང་གནས་ཐབས་སྐྱོ་བོ་རེད། གྱ་སྟོན་དེ་སྐུ་མདུན་ལ་གུས་བཀུར་དང་བཀའ་དྲིན་རྗེས་དྲིན་གྱི་ཚབ་ཏུ་སྡུག་ཅག་ཆགས་པ་རེད།
བོད་གཞུང་ངམ་བོད་མིའི་སྒྲིག་འཛུགས་ཀྱི་མིང་བེད་སྤྱོད་བཏང་ན་གནས་ལུགས་དང་མཐུན་པ་ཞིག་མ་རེད།དོན་དངོས་དཔལ་ལྡན་སྲིད་སྐྱོང་མཆོག་གིས་ཐད་ཀར་བདག་དབང་བེད་སྤྱོད་བྱས་པ་ལས།དེ་ལ་འགྲེལ་བཤད་ལྷག་མ་ཞིག་ཧ་ལམ་ལྷག་མི་འདུག གང་ལྟར་ང་ཚོའི་དམིགས་ཡུལ་ནི་༧བླ་མས་ཐུགས་དགྱེས་པའི་ཕྱིར་ཡིན་གཤིས།འགྱུར་བ་བཏང་བར་འགྲིག་དང་མ་འགྲིག ཡང་ན་རེད་མ་རེད་ཅེས་པའི་སྐད་ཆ་མཚམས་འཇོག་བྱས་ན་ཕྱོགས་གང་ནས་བལྟས་ཅིང་དགེ་མཚན་ཆེ་བ་འདུག
ཕྱོགས་རིས་མེད་པའི་གྱ་སྟོན་ནམ་འཁྲུངས་སྐར་ཞི་བསུ་འདོད་པ་དང་། ཁྱབ་ཆེ་བ་དང་རིན་ཐང་ཅན་ཆེ་བའི་འཁྲུངས་སྐར་ཞིག་བསུ་འདོད་ན་གཞུང་འབྲེལ་ལས་ལྷག་པ་ཞིག་ཡོད་མི་སྲིད།
སྐུའི་གྱ་སྟོན་བསླེབ་ལ་ཉེ་བའི་སྐབས་འདིར་ཕྱོགས་རིས་ཅན་གྱི་སྐད་ཆ་མ་བཤད་ན་བཟང་གི དེ་ནི་རང་གི་བསོད་ནམས་ཉམས་པའི་རྒྱུ་ཁོ་ན་ལས་མ་འདས། དེ་ལས་སྐུའི་གྱ་སྟོན་གྱི་གོ་སྒྲིག་ཚོགས་ཆུང་དང་། ལས་བྱེད་འགན་ཁུར་མི་སྣ་བཅས་ཀྱི་ལྷག་བསམ་དང་སྙིང་སྟོབས་ལ་རྗེས་སུ་ཡི་རང་ཞུས་ན་འགྲིག་གི ལྷག་པར་དུ་དབུས་བོད་མིའི་སྒྲིག་འཛུགས་དང་མདོ་སྨད་ཆོལ་ཁ། རི་བོ་དགེ་ལུགས་པའི་བརྟན་བཞུགས་གོ་སྒྲིག་ཚོགས་ཆུང་བཅས་མཉམ་འབྲེལ་གྱི་ཐོག་ནས་སྐུའི་གྱ་སྟོན་སྲུང་གཙི་བྱེད་ཀྱི་ཡིན་པ་ཤིན་ཏུ་ནས་བཟང་ངོ་།།
མདོ་སྨད་ཀྱི་ངོས་ནས་འདས་པའི་ལོ་གཉིས་ཀྱི་གོང་ནས་༧གོང་ས་མཆོག་ལ་གྱ་སྟོན་རྒྱས་པ་ཞིག་གོ་སྒྲིག་ཞུ་རྒྱུའི་ཡོངས་ཁྱབ་གསལ་བསྒྲགས་སྤེལ་བ་རེད། འདི་མི་གཅིག་གཉིས་ཀྱི་འཆར་གཞི་མ་རེད། མདོ་སྨད་ཚོགས་ཆེན་སྟེང་གི་གྲོས་ཆོད་རེད།
ཉེ་ལམ་སྤྱི་ལོ་ ༢༠༡༥ ཟླ་ ༤ ཚེས་ ༢༢ ཉིན་གྱ་སྟོན་གོ་སྒྲིག་ཚོགས་ཆུང་གིས་ཉིན་གསུམ་གྱི་གྱ་སྟོན་སྐོར་གྱི་མཛད་རིམ་ཁྱབ་བསྒྲགས་གནང་ཚར་བ་རེད། དེའི་རྗེས་ཏག་ཏག་ལ་བཀའ་ཤག་གིས་༧གོང་ས་མཆོག་གི་སྐུའི་གྱ་སྟོན་དེ་གཞུང་འབྲེལ་ཐོག་སྲུང་བརྩི་ཞུ་རྒྱུ་ཡིན་པའི་ཕྱག་ཡིག་ཅིག་འབྱོར་བ་རེད། མདོ་སྨད་དབུ་རྒྱུན་དང་གྱ་སྟོན་གོ་སྒྲིག་ཚོགས་ཆུང་ནང་བསམ་ཚུལ་གཉིས་བྱུང་བ་རེད། ཁག་ཅིག་གིས་མདོ་སྨད་ཀྱི་ངོས་ནས་ལོ་གཉིས་གོང་ནས་གྱ་སྟོན་གསལ་བསྒྲགས་གནང་ཟིན་ཡང་སྐབས་དེར་བོད་མིའི་སྒྲིག་འཛུགས་ལ་གྲགས་འགུལ་གང་ཡང་མེད་སྟབས། ད་ལྟ་མདོ་སྨད་ཀྱིས་གྲ་སྒྲིག་ཡོངས་སུ་གྲུབ་ཚར་རྗེས་བོད་མིའི་སྒྲིག་འཛུགས་ཀྱིས་གཞུང་འབྲེལ་ཐོག་མཛད་སྒོ་ཚོགས་རྒྱུ་ཡིན་གསུངས་པ་དེ་འགྲིག་གི་མི་འདུག་ལབ་ནས་དེ་ལྟར་དུ་བཀའ་ཤག་ལ་ཡིག་ལན་ཞིག་ཕུལ་ཡང་། དེ་ལ་ཟློག་ཐབས་མེད་སྐོར་བཀའ་ཕེབས་ཏེ་གྲུབ་འབྲས་མ་ཟོན་པའི་དབང་གིས། གྱ་སྟོན་གྱི་མཛད་རིམ་ལ་བསྐྱར་དུ་ཡར་དཀྲུག་མར་དཀྲུག་བཏང་སྟེ་འགྱུར་བ་བཏང་དགོས་ཐུག་པ་རེད།
འདི་མདོ་སྨད་དབུས་རྒྱུན་དང་གྱ་སྟོན་གོ་སྒྲིག་ཚོགས་ཆུང་གིས་མ་འཇོན་པ་རེད་ལབ་དགོས་རེད་དམ། ཡང་ན་བོད་མིའི་སྒྲིག་འཛུགས་ཀྱིས་གྱ་སྟོན་གོ་སྒྲིག་ཚོགས་ཆུང་ལ་མཐོང་ཆུང་བཏང་བ་རེད་ལབ་དགོས་རེད། འདི་གསལ་བོ་བཟོ་དགོས་པ་གལ་ཆེན་པོ་རེད།
གྱ་སྟོན་གོ་སྒྲིག་ཚོགས་ཆུང་གི་ངོས་ནས་ཉིན་གསུམ་གྱི་མཛད་རིམ་རྣམས་ཁ་གསལ་ཁྱབ་བསྒྲགས་བྱས་པ་ཐུགས་རྗེ་ཆེ། ང་ཚོ་ཕྱི་རྒྱལ་ཁག་ན་ཡོད་པ་ཚོས་གནམ་གྲུའི་འཛིན་བྱང་ཡང་ཉོས་ཚར་བས། མཛད་རིམ་ཁ་གསལ་བྱུང་བར་ཧ་ཅང་དགའ་བྱུང་། གྱ་སྟོན་ཚོགས་པ་དང་དུས་བབ་ལ་ཐུགས་རྗེ་ཆེ།
གྱ་སྟོན་དེ་བོད་མིའི་སྒྲིག་འཛུགས་ཀྱིས་གཞུང་འབྲེལ་ཐོག་སྲུང་བརྩི་ཞུ་རྒྱུའི་ཐག་གཅོད་བྱུང་ཡོད་པ་རེད། ལས་རིམ་ལ་འགྱུར་བ་ཐེབས་ཡོད་ཀྱང་མདོ་སྨད་དྲ་རྒྱའི་སྟེང་ད་དུང་འདི་ལྟར་ལྷག་འདུག
༸སྐུའི་གྱ་སྟོན་གྱི་མཛད་རིམ་རགས་ཟིན།
༢༠༡༥།༦།༢༡ ནས་༢༣ བར།
ཉིན་དང་པོའི་མཛད་རིམ།
(1) 7:30 – ཐེག་ཆེན་གཙུག་ལག་ཁང་དུ་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་ལ་བརྟན་བཞུགས་བསྟར་འབུལ་འགོ་འཛུགས་ཞུ་རྒྱུ།
(2) 11:30 – སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གིས་དུས་འཁོར་ལྷ་ཁང་དུ་༸སྐུའི་གྱ་སྟོན་གྱི་འགྲེམས་སྟོན་སྒོ་འབྱེད་དང་མཛད་ཐང་ལ་རབ་གནས་བཀའ་དྲིན་བསྐྱང་རྒྱུ།
(3) 12:00 – ཐེག་ཆེན་གཙུག་ལག་ཁང་གི་གསུང་ཆོས་རྭ་བར་༸སྐུའི་གྱ་སྟོན་གྱི་དངོས་གཞིའི་མཛད་སྒོ་དབུ་འཛུགས་གནང་རྒྱུ།
(4) 1:30 – གཙུག་ལག་ཁང་དང་རྣམ་གྲྭ་སོགས་སུ་ཆོས་བརྒྱུད་ཁག་གི་བླ་ཆེན་རྣམ་པས་དབུས་སེར་སྐྱ་སྐུ་མགྲོན་མི་མང་དང་བཅས་པར་ཉིན་གུང་གསོལ་ཚིགས་འབུལ་རྒྱུ།
(5) 3:00 – དུས་འཁོར་ལྷ་ཁང་དུ་བླ་སྤྲུལ་སེར་སྐྱ་སྐུ་མགྲོན་རྣམ་པས་དབུས་མི་མང་ཡོངས་ལ་འགྲེམས་སྟོན་སྤྱན་འབུལ་ཞུ་རྒྱུ།
(6) 5.30 – དྷ་སྟེང་བོད་ཁྱིམ་ཚོགས་ཁང་དུ་བླ་ཆེན་རྣམ་པས་གཙོས་སྐུ་མགྲོན་རྣམ་པར་ཕེབས་བསུའི་སྣེ་ལེན་ཞུ་རྒྱུ།
(7) 5:45 – བོད་ཁྱིམ་ཚོགས་ཁང་དུ་༸སྐུའི་གྱ་སྟོན་གྱི་དགོང་ཚོགས་ཆེན་མོ་དབུ་འཛུགས་ཞུ་རྒྱུ།
(8) 8:00 – ངྷ་སྟེང་བོད་ཁྱིམ་བདེ་སྐྱིད་ཚེ་རིང་ཚོགས་ཁང་དང་དེའི་མདུན་ཐང་དུ་བླ་ཆེན་རྣམ་པས་གཙོས་སྐུ་མགྲོན་རྣམས་ལ་དགོང་མོའི་གསོལ་ཚིགས་འབུལ་རྒྱུ།
ཉིན་གཉིས་པའི་མཛད་རིམ།
(1) 9:00 ནས་11.00 – ཐེག་ཆེན་གཙུག་ལག་ཁང་གི་གསུང་ཆོས་རྭ་བར་༸གོང་ས་མཆོག་ཆོས་བརྒྱུད་ཁག་ལ་བཀའ་དྲིན་ཆེ་ཚུལ་དང་འབྲེལ་སྤྱི་ཡོངས་མཛད་པའི་སྐོར་ལ་བླ་ཆེན་རྣམ་པས་བཀའ་སློབ་གསུང་བཤད་རེ་གནང་རྒྱུ།
(2) 11.30 – ཀིརྟི་བྱེས་པ་གྲྭ་ཚང་དུ་མདོ་སྨད་བླ་སྤྲུལ་རྣམ་པའི་ངོ་སྤྲོད་དང་གསུང་བཤད་མདོར་བསྡུས་རེ་གནང་རྒྱུ།
(3) 1.00 – ཚོགས་ཕེབས་པ་ཡོངས་ལ་ཉིན་གུང་གསོལ་ཚིགས་འབུལ་རྒྱུ།
(4) 2:00 – མུ་མཐུད་མདོ་སྨད་བླ་སྤྲུལ་རྣམ་པའི་ངོ་སྤྲོད་དང་གསུང་བཤད་མདོར་བསྡུས་རེ་གནང་རྒྱུ།
(5) ཆུ་ཚོད་ངེས་མེད། – ༸སྐུའི་གྱ་སྟོན་ཆེད་བོད་ནས་ཕེབས་མཁན་དང་དམིགས་བསལ་སྐུ་མགྲོན་ཁག་ལ་མཇལ་ཁ་གོ་སྒྲིག་ཞུ་རྒྱུ།
(6) དུས་ངེས་མེད། – བླ་ཆེན་རྣམ་པ་ཕེབས་སྐྱེལ་ཞུ་རྒྱུ།
ཉིན་གསུམ་པའི་མཛད་རིམ།
(1) 6:30 – ཀིརྟི་བྱེས་པ་གྲྭ་ཚང་གི་དགེ་འདུན་པ་རྣམ་པས་དབུས་བླ་སྤྲུལ་སེར་སྐྱ་མི་མང་ཡོངས་ཀྱིས་ལྷ་རྒྱལ་རིར་བསང་གསོལ་རྒྱས་པ་འགོ་འཛུགས་གནང་རྒྱུ།
(2) 8:00 – ཀིརྟི་བྱེས་པ་གྲྭ་ཚང་དུ་མདོ་སྨད་སེར་སྐྱ་མི་མང་ལ་ཞོགས་ཇ་གཏང་རྒྱུ།
(3) 9:30 – ཀིརྟི་བྱེས་པ་གྲྭ་ཚང་དུ་༸སྐུའི་གྱ་སྟོན་གྱི་མདོ་སྨད་དགྱེས་འཛོམས་ཆེན་མོའི་མཛད་སྒོ་དབུ་འཛུགས་གནང་རྒྱུ།
(4) 11:00 – ཀིརྟི་བྱེས་པ་གྲྭ་ཚང་དུ་ས་གནས་སོ་སོའི་སྒྱུ་རྩལ་བ་རྣམས་ཀྱིས་གཞས་སྣ་འགོ་འཛུགས་གནང་རྒྱུ།
(5) 12:30 – ཀིརྟི་བྱེས་པ་གྲྭ་ཚང་དུ་ཉིན་གུང་གསོལ་ཚིགས་གཏང་རྒྱུ།
(6) 2:00 – ཀིརྟི་བྱེས་པ་གྲྭ་ཚང་དུ་ཡབ་གཞིས་ནང་མི་དང་གནད་ཡོད་མི་སྣའི་དགོངས་ཚུལ་གསུང་བཤད་རེ་གནང་རྒྱུ།
(7) 3:00 – ཀིརྟི་བྱེས་པ་གྲྭ་ཚང་དུ་གཞས་སྣ་དང་ཞབས་བྲོ་མུ་མཐུད་གནང་རྒྱུ།
(8) 6:30 – ཀིརྟི་བྱེས་པ་གྲྭ་ཚང་དུ་དགོང་མོའི་གསོལ་ཚིགས་གཏང་རྒྱུ།
(9) 8:00 – བོད་ལྗོངས་མདོ་སྨད་ཆོལ་ཁའི་༸སྐུའི་གྱ་སྟོན་ཆེན་མོ་མཇུག་བསྡོམས་དང་འབྲེལ་རྒྱལ་ཁའི་ངང་གྲོལ་རྒྱུ།
གནས་ཚུལ་ཨ་མ། http://dhomay.com/index.php?option=com_content&view=article&id=503:22-04-2015&catid=27:2012-05-03-16-30-54
གྱ་སྟོན་ཚོགས་པའི་ཚོགས་གཙོ་ཨམ་རྗེ་མཁྱེན་རབ་མཆོག་ལ་དོགས་འདྲི་ཞུ་རྒྱུ་ཞིག་ལ། གོ་ཐོས་སུ་མདོ་སྨད་གྱ་སྟོན་བོད་གཞུང་གིས་འཕྲོག་སོང་བ་རེད་ཟེར་བ་དེ་བདེན་པ་ཡིན་ནམ། ཐེངས་སྔོན་མ་ས་གནས་ཁག་ལ་གྱ་སྟོན་སྐོར་གྱི་ལས་རིམ་ཞིག་བཏང་འབྱོར་བྱུང་བ་དང་དེ་རིང་གོང་དུ་གསར་འགྱུར་སྤེལ་བའི་ནང་དོན་གཉིས་ཁ་ཁ་རེད་འདུག་་། འདི་ལ་གསལ་བཤད་ཅིག་ཡོང་བ་མཁྱེན།