ཁ་སང་རྒྱ་གར་གྱི་དཔལ་འབྱོར་གསར་ལམ་ཐོག་གནས་ཚུལ་སྤེལ་བ་ལྟར་ན། ཉེ་ཆར་ཨ་རྒྱ་གཉིས་བར་རྩོད་གླེང་དུ་གྱུར་བའི་རྒྱ་ནག་གི་ལྷོ་རྒྱུད་མཚོ་ཁུལ་དུ། རྒྱ་ནག་གི་མཐའ་སྲུང་དམག་དཔུང་གི་རྐང་རྗེ་ཇེ་མང་དུ་འགྲོ་བཞིན་ཡོད་པའི་བློ་འཚབ་འོག ཐེ་ཝན་གྱིས་རང་གི་རྒྱ་མཚོའི་མངའ་ཁུལ་བརྟན་སྲུང་བྱེད་ཆེད། རྡོ་སྣུམ་ཏུན་ ༣༠༠༠ ལྷག་སྐྱེལ་འདྲེན་བྱེད་པའི་གྲུ་གཟིངས་ཤིག་མངགས་གཏོང་བྱས་ཡོད་འདུག
སྐྱེལ་འདྲེན་གྲུ་གཟིངས་དེས། གསར་དུ་རྩིག་གིན་པའི་ཐེ་པེ་གླིང་ཕྲན་གྱི་གྲུ་ཁ་གསར་བར་ཨར་ལས་དངོས་ཟོག་དབོར་འདྲེན་བྱས་ཏེ། ད་ལོའི་ལོ་མཇུག་བར་གྲུ་ཁ་གསར་བསྐྲུན་གྱི་ལས་གཞི་ཡོངས་སུ་མཇུག་བསྒྲིལ་འཆར་ཡོད་འདུག་ལ། སྤྱིའི་རྒྱ་ཁྱོན་དུ་སྨི་ ༡༢༠༠ ཟིན་པའི་ཐེ་པེ་གྲོང་ཁྱེར་གྱི་མཚོ་ཐོག་གནམ་ཐང་དང་གྲུ་ཁ་གསར་བསྐྲུན་ལས་འཆར་གཙོས། དེང་སྐབས་ཐེ་པེ་གྲོང་ཁྱེར་གྱིས་ཉེ་ལམ་རྒྱ་ནག་གཞུང་གིས་ལྷོ་རྒྱུད་མཚོ་ཁུལ་དུ་བསླངས་པའི་རྩོད་གླེང་དང་དེའི་དངངས་འཚབ་འོག་རང་གི་རྒྱ་མཚོའི་མངའ་ཁུལ་བརྟན་སྲུང་གི་སྟོབས་ཤུགས་མཐོར་འདེགས་གཏོང་གི་ཡོད་འདུག
ལོ་རེ་བཞིན་མཚོ་ཁུལ་དེ་བརྒྱུད་ནས་ཨ་སྒོར་ཁྲག་ཁྲིག་ ༥ ལྷག་གི་ཚོང་ཟོག་སྐྱེལ་འདྲེན་བྱེད་ཀྱི་ཡོད་སྟབས། ཧྥེ་ལེ་ཕིན་དང་ཝེ་ཋི་ནམ་གཉིས་དང་མི་འདྲ་བར། ཐེ་ཝན་གཞུང་གིས་རྒྱ་ནག་དང་ལྷན་དུ། ལྷོ་རྒྱུད་གྱི་མཚོ་ཁུལ་རྩོད་གླེང་བྱེད་འདོད་མེད་ཅིང་། པེ་ཅིན་གཞུང་གིས་ཞི་བདེ་རྒྱ་མཚོའི་ལྷོ་རྒྱུད་མངའ་ཁུལ་རྩོད་གླེང་བྱེད་ཀྱིན་པའི་སྐབས་འདིར། ཧྥི་ལེ་ཕིན་དང་བྷུར་ནེ། མ་ལེ་ཞེ་ཡ། ཐེ་ཝན། ཝེ་ཋི་ནམ་སོགས་ཀྱིས་ཀྱང་མཚོ་ཁུལ་དེ་རྩོད་གླེང་བྱེད་ཀྱི་ཡོད་པ་རེད།
ཞི་བདེ་རྒྱ་མཚོའི་མངའ་ཁུལ་རྩོད་གླེང་གི་ཐད་ནས། ཐེ་ཝན་དང་རྒྱ་ནག་གཞུང་གཉིས་ཕན་ཚུན་ཁ་གཏད་དུ་ལངས་ཡོད་པ་དེ་ཡང་། ཕྱི་ལོ་ ༡༩༤༩ ལོའི་དོན་རྐྱེན་ཁྲོད་རྒྱ་ནག་དམར་ཤོག་ཚོགས་པར་རྒྱལ་ཁ་ཐོབ་པ་དང་། ཕམ་ཉེས་བྱུང་བའི་གོ་མུན་ཏང་གི་རྒྱལ་ཞེན་རིང་ལུགས་ཚོ་དེང་གི་ཐེ་ཝན་མཚོ་འགག་ལ་བྲོས་བྱོལ་དུ་ཕྱིན་པའི་ལོ་རྒྱུས་རིང་བཞིན་གྱི་རྩོད་རྙོག་ཅིག་ལ་ཐུག་ཡོད་ཅིང་། པེ་ཅིན་གཞུང་གིས་དེང་སྐབས་རང་སྲིད་རང་སྐྱོང་འོག་འཚོ་སྡོད་བྱེད་པའི་ཐེ་ཝན་མཚོ་གླིང་ནི་རང་རྒྱལ་ལ་ངོ་ལོག་པའི་ཞིང་ཆེན་གཅིག་ཏུ་བལྟས་ཏེ། ནམ་ཞིག་ལ་ཕྱིར་རང་གི་རྒྱལ་ཁོངས་སུ་བསྡུ་རྩིས་ཡོད་པ་མ་ཟད། ཐེ་ཝན་མཚོ་གླིང་གིས་བཏོན་པའི་ཚད་མཐོའི་རང་སྲིད་རང་སྐྱོང་གི་ཞི་གྲོས་དང་ལེན་བྱེད་ཀྱི་མེད་ལ། དེ་བཞིན། ད་རེབ་ཀྱི་ཞི་བདེ་རྒྱ་མཚོའི་མངའ་ཁུལ་རྩོད་གླེང་གི་ཐད་ལའང་གྲོས་མོལ་བྱེད་འཆར་མེད།
དེ་བས། ཁ་སང་རེ་གཟའ་སྤེན་པའི་ཉིན། ཐེ་ཝན་གྱི་སྲིད་འཛིན་མ་ཡུན་ཅུག། ཐེ་ཝན་ལྷོ་རྒྱུད་ཀྱི་གྲུ་ཁར་བསྐྱོད་ནས་རྒྱལ་སྲུང་བདེ་འཇགས་ལ་རྟོག་ཞིབ་དང་གཟིགས་སྐོར་བྱས་ཡོད་པ་དང་། མི་འགྱང་བར་ཐེ་ཝན་གྱི་གྲུ་གཟིངས་ཤིག་རྒྱ་ནག་གི་ལྷོ་རྒྱུད་མཚོ་ཁུལ་དུ་མངགས་པ་དང་ལྷན་དུ། གྲུ་གཟིངས་གཞན་ཞིག་དེང་སྐབས་ཉི་ཧོང་གིས་རང་གི་མངའ་ཁོངས་སུ་གླེང་གིན་པའི་ཐེ་ཝན་ནུབ་རྒྱུད་མཚོ་ཁུལ་དུ་གཏོང་འཆར་ཡོད་འདུག
ཁ་སང་ཉི་ཧོང་གི་ཡོ་མའུ་རེ་གསར་ཤོག་སྟེང་སྤེལ་བའི་གནས་ཚུལ་ལྟར་ན། འཇར་མན་ནང་རྒྱལ་ཁབ་བདུན་གྱི་སྲིད་འཛིན་གྲོས་མོལ་ཚོགས་ཆེན་སྟེང་། རྒྱ་ནག་གི་ལྷོ་ཤར་མཚོ་ཁུལ་གྱི་རྩོད་གླེང་དང་དེས་བསླངས་པའི་བློ་འཚབ་ཐད་ལ་ཞི་གྲོས་བྱེད་འཆར་ཡོད་ལུགས་བཀོད་འདུག ཡང་གཟའ་པ་སངས་ཉིན། ཨ་རི་གཞུང་གིས་བརྗོད་པ་ལྟར་ན། པེ་ཅིན་གཞུང་གིས་རྒྱལ་ཁབ་གཉིས་བར་རྩོད་གླེང་དུ་གྱུར་བའི་རྒྱ་ནག་གི་ལྷོ་རྒྱུད་མཚོ་ཁུལ་དུ་དྲག་ཆས་དམག་དཔུང་དང་ཁྲབ་ལྡན་འཁོར་ལོ་འགྲེམ་འཇོག་བྱེད་ཀྱི་ ཡོད་སྐོར་བརྗོད་འདུག
