ཁེ་ལས་འགན་འཛིན་ ༢༠ ཙམ་གྱིས་ལྐོག་ཟ་བྱས།

དེ་རིང་རྒྱ་ནག་གི་ཉིན་རེའི་ཚགས་ཤོག་གི་དབྱིན་ཡིག་དྲ་ཚིགས་ཐོག་གནས་ཚུལ་སྤེལ་དོན་ལྟར་ན། འདི་ལོ་རྒྱ་ནག་དབུས་སྒྲིག་ཁྲིམས་ཞིབ་བཤེར་ཚོགས་ཆུང་གིས་གཞུང་གཉེར་ཁེ་ལས་ཀྱི་སྤྱི་ཁྱབ་འགན་འཛིན་ ༢༦ ལ་ཞིབ་བཤེར་བྱས་པ་བརྒྱུད། སྤྱི་ཁྱབ་འགན་འཛིན་ ༢༠ ཡི་ལྐོག་ཟ་རུལ་སུངས་བྱས་ཡོད་པ་ར་འཕྲོད་བྱུང་སྟེ་བཀག་བསྐྱིལ་བྱས་ཡོད་འདུག

རྒྱ་ནག་རྒྱལ་ཡོངས་རྡོ་སྣུམ་ཁེ་ལས་ཁག་ཏུ་ལྐོག་ཟ་རུལ་སུངས་ཀྱི་གནས་ཚུལ་བྱུང་ཡོད་མེད་ཐད་རྟོག་ཞིབ་བྱེད་མཁན་གྱི་མགོ་གཙོ་ལི་ཝུ་སི་ (Li Wusi) ཡིས། ད་ལྟ་ང་ཚོས་གཞུང་གཉེར་རྡོ་སྣུམ་ཁེ་ལས་ཁག་ཏུ་ལྐོག་ཟ་རུལ་སུངས་བྱེད་མཁན་ལ་ཁ་གཏད་གཅོག་རྒྱུར་དཀའ་ངལ་མུ་མཐུད་འཕྲད་བཞིན་འདུག རྡོ་སྣུམ་ཁེ་ལས་ཁག་ཏུ་ལྐོག་ཟ་རུལ་སུངས་བྱེད་མཁན་མང་ཆེ་བར་གནོན་ཤུགས་ཆེ་བའི་རྒྱབ་རོགས་མགོ་ཁྲིད་ཡོད་སྟབས། ང་ཚོས་ཁོ་ཚོ་ཁྲིམས་ཐོག་ལ་ག་དུས་བསྐྱལ་ཡང་ཁྲིམས་ཀྱི་རྙི་ནང་ཚུད་ཀྱི་མེད་པ་མ་ཟད་གོ་གནས་འཕར་གྱི་འདུག དེ་བཞིན། གཞུང་གཉེར་ཁེ་ལས་ཀྱི་འགན་འཛིན་འགས་ཕྱི་ཕྱོགས་རྒྱལ་ཁབ་ཁག་ཏུ་མ་འཇོག་བྱས་ནས་སྒེར་གྱི་ཁེ་ཕན་སྒྲུབ་མཁན་གྱི་ནང་མི་སྤུན་མཆེད་དང་གྲོགས་པོ་ཚོར་གཞུང་གི་ལས་གྲྭ་སྤྲོད་ཀྱིན་ཡོད་པ་མ་ཟད། གཞུང་དངུལ་སྤྱད་ནས་ཡུལ་སྐོར་སྤྲོ་འཆམ་ལ་འགྲོ་བ་དང་ཅ་དངོས་ཉོ་བ་སོགས་ར་ལང་ཆ་ལང་བྱེད་ཀྱི་འདུག ཅེས་བརྗོད་འདུག

རྒྱ་ནག་གི་ཏར་འཕྲིན་ཁེ་ལས་ཁག་ལ་རྟོག་ཞིབ་བྱེད་མཁན་གྱི་མགོ་གཙོ་ཏུང་ཀོང་ (Dong Hong) གིས། གཞུང་གི་ཏར་འཕྲིན་ཁེ་ལས་ཁག་གི་འགན་འཛིན་འགས་འབྱོར་ལྡན་དང་གནོན་ཤུགས་ཅན་གྱི་མི་སྒེར་དང་འབྲེལ་བ་དམ་པོ་བཟུང་སྟེ། ཁོ་ཚོ་དང་མཉམ་དུ་གཞུང་རྒྱུ་ཧམ་བཟུང་བྱས་ཡོད་པ་མ་ཟད། ཁེ་ལས་གཞན་དང་གན་རྒྱ་བཞག་ནས་ལྐོག་རྔན་ལེན་གྱི་འདུག ༢༠༡༢ ལོ་ནས་བཟུང་རྒྱལ་ཡོངས་ནང་ལྐོག་ཟ་རུལ་སུངས་ལ་རྡུང་རྡེག་གཏོང་རྒྱུའི་ལས་འགུལ་སྤེལ་མགོ་བཙུགས་ཡོད་ཀྱང་། ད་དུང་ལྐོག་ཟ་རུལ་སུངས་ཀྱི་གནད་དོན་མུ་མཐུད་ལྷག་གི་འདུག ཅེས་བརྗོད་འདུག

 ༢༠༡༥ ལོའི་ཟླ་ ༢ ནས་བཟུང་རྒྱ་ནག་དབུས་སྒྲིག་ཁྲིམས་ཞིབ་བཤེར་ཚོགས་ཆུང་གིས་རྒྱ་ནག་རྒྱལ་ཡོངས་རྡོ་སྣུམ་ཁེ་ལས་དང་། རྒྱ་ནག་རྒྱལ་ཡོངས་མཚོ་ཁུལ་རྡོ་སྣུམ་ཁེ་ལས་(China National Offshore Oil)།  རྒྱ་ནག་ཧུའུ་ནན་གློག་ཆས་བཟོ་ཚོགས་ (China Huaneng Group) དང་ལྕགས་ཀྱི་བཟོ་གྲྭ་ (State Grid Corp of China)། དེ་བཞིན་རྒྱ་ནག་ཏར་འཕྲིན་ཁེ་ལས་ (China Mobile Communications) བཅས་སུ་རྟོག་ཞིབ་ཚོགས་ཆུང་ ༡༣ བཏང་སྟེ་བརྟག་དཔྱད་བྱས་པ་བརྒྱུད། རྒྱ་ནག་གི་རྡོ་སྣུམ་དང་ལྕགས་ཀྱི་བཟོ་གྲྭ་མང་ཆེ་བར་ལྐོག་ཟ་རུལ་སུངས་གནས་ཚུལ་ཐོན་ཡོད་སྟབས། རྒྱ་ནག་གི་རྡོ་སྣུམ་ཁེ་ལས་ཆེ་ཁག་གསུམ་གྱི་སྤྱི་ཁྱབ་འགན་འཛིན་གསུམ་ལ་ཁྲིམས་ཐག་བཅད་ཡོད་འདུག

༢༠༡༥ ལོའི་ཟླ་ ༣ ཚེས་ ༡༦ ཉིན་རྒྱ་ནག་དབུས་སྒྲིག་ཁྲིམས་ཞིབ་བཤེར་ཚོགས་ཆུང་གིས་རྒྱ་ནག་རྒྱལ་ཡོངས་རྡོ་ སྣུམ་ཁེ་ལས་ཁང་གི་འགན་འཛིན་གཞོན་པ་ཟུར་པ་ལེའུ་ཡུང་ཡོན་ (Liao Yongyuan) ལ་རྟོག་ཞིབ་བྱེད་མགོ་བཙུགས་ཏེ། ཁོ་ལ་ལྐོག་ཟ་རུལ་སུངས་དང་རྒྱལ་ཁྲིམས་རྡོག་རོལ་བཏང་བའི་ཉེས་མིང་བཀལ་ཏེ། ཟླ་འདིའི་ཚེས་ ༡༥ ཉིན་དམར་ཤོག་ཚོགས་པ་ནས་གནས་དབྱུང་བཏང་ཡོད་པ་དང་། ཚེས་ ༡༧ ཉིན་རྒྱ་ནག་གི་ (China Investment Securities) ཞེས་པའི་ཁེ་ལས་ཀྱི་འགན་འཛིན་ལུང་ (Long Zenglai) གིས། ༢༠༡༣ ལོ་ནས་འདི་ལོའི་ཟླ་ ༥ བར་གཞུང་དངུལ་རྒྱ་སྒོར་ ༤༠༠༠༠༠ སྤྱད་ནས་རྒྱས་སྤྲོས་ཅན་གྱི་ཁ་ལག་བཟས་པ་དང་། རྒྱ་སྒོར་ ༣༥༠༠༠ སྤྱད་ནས་གྷོབ་རྩེད་མོ་ (golf) རྩེད་ཡོད་པ་བཅས་ཀྱི་སྤྱི་རྒྱུ་སྒེར་སྤྱོད་བྱས་པར་བརྟེན་བརྟག་དཔྱད་བྱེད་མགོ་བཙུགས་ཡོད་འདུག

ཆབ་སྲིད་དབྱེ་ཞིབ་པ་ཚོས། ཞི་ཅིན་ཕིན་གྱིས་སྟག་དང་སྦྲང་མ་མཉམ་རྡུང་གི་བྱ་སྤྱོད་སྤེལ་ཏེ། དབང་ཆ་སྒེར་སྤྱོད་པ་དང་ལྐོག་ཟ་རུལ་སུངས་བྱེད་མཁན་ཚོར་ཁ་གཏད་བཅག་ཡོད་ཀྱང་། གཞུང་གིས་ཁྲིམས་ཞིབ་ཁང་དང་འཛིན་སྐྱོང་གཉིས་ལོགས་སུ་དབྱེ་བ་ཕྱེ་མེད་པ་མ་ཟད། གསར་འགྱུར་བརྒྱུད་ལམ་ཁག་གིས་རྒྱ་ནག་ནང་བྱུང་བའི་ལྐོག་ཟ་རུལ་སུངས་ཀྱི་དོན་རྐྱེན་རྣམས་གསལ་གསལ་ཐིང་ཐིང་འདོན་སྤེལ་བྱ་རྒྱུར་བཀག་འགོག་བྱས་དང་བྱེད་བཞིན་ ཡོད་སྟབས། ཞི་ཅིན་ཕིན་གྱིས་ལྐོག་ཟ་རུལ་སུངས་ལ་ཁ་གཡར་ཏེ་ཁོའི་ཆབ་སྲིད་ཀྱི་དགྲ་ཟླ་རྩ་མེད་བཟོ་བའི་ཆབ་སྲིད་ཀྱི་འཁྲབ་སྟོན་ཞིག་ཡིན་ཚུལ་རྗོད་བཞིན་འདུག