བོད་པའི་ཆབ་སྲིད་བཙོན་པ་སྙན་གྲགས་ཅན་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་གཟའ་ཉི་མའི་ཉིན་རྒྱ་ནག་གི་བཙོན་འོག་ནས་སྐུ་གྲོངས་པའི་གནས་ཚུལ་དེར་རྒྱལ་སྤྱིའི་ཐོག་དོ་སྣང་དང་རྒྱ་ནག་གཞུང་ལ་སྐྱོན་བརྗོད་ཤུགས་ཆེན་བྱེད་ཀྱིན་འདུག
ཟླ་འདིའི་ཚེས་ ༡༢ ཉིན་རྒྱ་ནག་གི་བཙོན་འོག་ཏུ་ཡོད་པའི་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་རྒྱ་ནག་ཁྲིན་ཏུའུ་རུ་རྒྱ་ནག་གི་བཙོན་ཁང་ཞིག་ནས་སྐུ་གཤེགས་པའི་གནས་ཚུལ་ཐོན་མ་ཐག བྷེ་བྷེ་སི་སོགས་རྒྱལ་སྤྱིའི་གསར་ལམ་ཆེ་ཁག་ཏུ་སྔ་རྗེས་སུ་ཐོན་ཡོད་པ་དང་། ཨ་རི་དང་དབྱིན་ཡུལ་གྱི་ཕྱི་སྲིད་ལྷན་ཁང་དང་། བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་དང་བོད་མི་མང་སྤྱི་འཐུས་ལྷན་ཚོགས་བཅས་ཀྱིས་ཐུགས་ཕམ་གྱི་གསུང་བཤད་དང་རྒྱ་ནག་གཞུང་ལ་ཁ་རྡུང་བཏང་འདུག
གནས་ཚུལ་འབྱོར་གསལ་ལྟར་ན། རྒྱ་གཞུང་གིས་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེའི་སྐུ་གཟུགས་གནས་སྟངས་ཛ་དྲག་ཡིན་པའི་བརྡ་ལན་འབྱོར་མ་ཐག ཚེས་ ༡༢ ཉིན་ཁོང་གི་སྐུ་ཚ་སོགས་ནང་མི་ཁག་ཅིག་ཐུག་འཕྲད་དུ་སྐྱོད་སྐབས་སྐུ་གྲོངས་ཟིན་སྐོར་བརྗོད་ཡོད་ཀྱང་སྐུ་ཕུང་ལ་ལྟ་རུ་བཅུག་མེད་པ་དང་། ཚེས་ ༡༣ ཉིན་ལི་ཐང་ནས་རིན་པོ་ཆེ་མཆོག་གི་སྐུ་སྲིང་དང་ཁོང་མོའི་ཁྱོ་ག་གཉིས་ཀྱིས་སྐུ་ཕུང་ལ་མཇལ་རྒྱུའི་རེ་འདུན་བཏོན་པར་ཉེན་རྟོག་པས་འཛིན་བཟུང་བྱས་ཡོད་འདུག
རིན་པོ་ཆེ་མཆོག་སྐུ་གཤེགས་པའི་གནས་ཚུལ་དེ་ཐོས་མ་ཐག ཚེས་ ༡༣ ཉིན་ལི་ཐང་དང་ཉག་ཆུ། དཀར་མཛེས་སོགས་ཀྱི་དགོན་གྲོང་གཉིས་ཀྱི་སྐྱ་སེར་མང་པོ་རྒྱ་གཞུང་ལས་ཁུངས་ཁག་ཏུ་བསྐྱོད་དེ། རིན་པོ་ཆེ་མཆོག་གི་གྲོངས་རྐྱེན་གསལ་བཤད་དགོས་པ་དང་སྐུ་ཕུང་རྩིས་སྤྲོད་དགོས་པའི་རེ་འདུན་བཏོན་ཡོད་པར། རྒྱ་ནག་གི་ཉེན་རྟོག་པ་དང་མང་ཚོགས་བར་འཁྲུག་འཛིང་ཤོར་ཏེ། ཉེན་རྟོག་པས་མང་ཚོགས་ནང་མེ་མདའ་བརྒྱབ་སྟེ་མི་རེ་ཟུང་ལ་རྨས་སྐྱོན་ཕོག་སྟེ་སྨན་ཁང་དུ་བསྐྱལ་དགོས་བྱུང་ཡོད་པ་དང་། དེའི་རྗེས་ཉེན་རྟོག་པ་དང་དམག་མིས་མང་ཚོགས་ནང་དུག་རླངས་གཏོར་ཏེ་ཞི་འཇགས་ཡོང་ཐུབ་བྱས་ཡོད་པ་མ་ཟད། ད་ཆར་ལི་ཐང་དང་ནག་ཆུ་རྫོང་བར་མི་མང་གི་འགྲོ་འོང་བཀག་སྡོམ་བྱས་ཡོད་པ་དང་། ལི་ཐང་རྫོང་ཐོག་ཏུའང་དམག་མི་འགྲེམས་འཇོག་བྱས་ཏེ་ཛ་དྲག་གི་གནས་སྟངས་ཆགས་ཡོད་འདུག
ཨ་རིའི་ཕྱི་སྲིད་ལྷན་ཁང་གི་མགྲིན་ཚབ་པ་སྐུ་ཞབས་ཇོན་ཀེར་བྷེ་ John Kirby མཆོག་གིས་གསར་འགོད་གསལ་བསྒྲགས་སྤེལ་བའི་ནང་། ༢༠༠༢ ལོ་ནས་བཟུང་ཆབ་སྲིད་བཙོན་པའི་ཉེ་ཆད་ཕོག་པ་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་རྒྱ་ནག་གི་བཙོན་ཁང་ནང་དུ་སྐུ་གཤེགས་པའི་གནས་ཚུལ་ཐོན་པ་དེར་ང་ཚོ་བློ་འགྱོད་ཆེན་པོ་བྱུང་། ང་ཚོས་རིན་པོ་ཆེ་མཆོག་གི་ནང་མི་འཁོར་དང་བཅས་པར་སེམས་གསོ་ཞུ་བཞིན་ཡོད། ཨ་རིའི་གཞུང་གིས་རྒྱ་ནག་གཞུང་ལ་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་གློད་ཀྲོལ་གཏོང་དགོས་པའི་རེ་འདུན་ཤུགས་ཆེན་བཏོན་ཡོད་པ་མ་ཟད། ཉེ་ལམ་ཁོང་གི་སྐུ་གཟུགས་བདེ་མིན་ལ་གཞིགས་ཏེ་དམིགས་བསལ་རྒྱ་ནག་གཞུང་ལ་ཁོང་གློད་ཀྲོལ་བྱེད་དགོས་པའི་རེ་འདུན་བཏོན་པ་ཡིན། རྒྱ་ནག་གཞུང་གིས་རིན་པོ་ཆེ་མཆོག་གྲོངས་ལུགས་ཐད་ཞིབ་འཇུག་མཐིལ་ཕྱིན་བྱས་ཏེ་མང་ཚོགས་ལ་གསལ་བསྒྲགས་བྱ་རྒྱུར་ང་ཚོས་རེ་བ་བྱེད་བཞིན་ཡོད་ལ། རིན་པོ་ཆེ་མཆོག་གི་སྐུ་ཕུང་ཁོང་གི་ནང་མིར་རྩིས་སྤྲོད་དགོས་པའི་རེ་འདུན་ཤུགས་ཆེན་ཞུ་རྒྱུ་ཡིན། ཞེས་སོགས་བཀོད་འདུག
དབྱན་ཡུལ་གྱི་ཕྱི་སྲིད་ལྷན་ཁང་གིས་ཀྱང་། སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་རྒྱ་ནག་གི་བཙོན་ཁང་ནས་སྐུ་གྲོངས་པའི་གནས་ཚུལ་དེར་བློ་ཕམ་ཆེན་པོ་བྱུང་། ད་ལོའི་ཕྱི་ཟླ་ ༤ པའི་ནང་དབྱིན་ཡུལ་དང་རྒྱ་ནག་བར་འགྲོ་བ་མིའི་ཐོབ་ཐང་གི་ཚོགས་འདུའི་སྐབས་དང་། རྒྱ་ནག་གི་མགོ་ཁྲིད་ཚོར་ཐུག་འཕྲད་སྐབས་སུ་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེའི་སྐུ་གཟུགས་བདེ་བོ་མེད་སྟབས། ཁོང་སྨན་བཅོས་ཆེད་ཀློད་གྲོལ་གཏོང་དགོས་པའི་འབོད་སྐུལ་ལན་མང་ཞུས་ཀྱང་། རྒྱ་ནག་གཞུང་གིས་ཉན་འཇོག་མ་བྱས་པར་ཁོང་བཙོན་ཁང་དུ་སྐུ་གྲོངས་པ་དེ་ཧ་ཅང་ཡིད་སྐྱོ་དགོས་པའི་གནས་ཚུལ་ཞིག་རེད། ཅེས་སོགས་བརྗོད་འདུག
ཁ་སང་ཚེས་ ༡༣ ཉིན་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གི་མཚན་ཐོག་ནས་བསྒྲགས་གཏམ་སྤེལ་དོན། སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་དགོངས་པ་རྫོགས་པའི་ཡིད་སྐྱོའི་གནས་ཚུལ་ཐོན་པར་ཧ་ཅང་བློ་ཕམ་ཆེན་པོ་བྱུང་། རིན་པོ་ཆེ་མཆོག་ལ་སྙུན་གཞི་ཚབས་ཆེ་ཕོགས་ཡོད་སྟབས་ཁོང་གི་སློབ་མ་རྣམས་ཀྱིས་ སྨན་བཅོས་མཐུན་འགྱུར་ཆེད་ཁོང་གློད་བཀྲོལ་གནང་དགོས་པའི་རེ་འདུན་བཏོན་པ་ང་ ཚོས་ཤེས་ཀྱི་ཡོད། རིན་པོ་ཆེ་མཆོག་ལ་རྒྱ་ནག་གཞུང་གིས་སྨན་བཅོས་མཐུན་འགྱུར་ཡང་མ་སྤྲད་པ་མ་ཟད། སློབ་མ་རྣམས་ཀྱིས་ཁོང་བཙོན་ཁང་དུ་ཐེངས་གཅིག་མཇལ་རྒྱུའི་རེ་འདུན་བཏོན་པར་ ཆོག་མཆན་མ་སྤྲད་པའི་བྱ་སྤྱོད་དེས་རྒྱ་ནག་གཞུང་གིས་བོད་མིའི་ཐོག་དམ་བསྒྲགས་ ཅན་གྱི་སྲིད་བྱུས་ཇི་ཙམ་ལག་བསྟར་བྱེད་བཞིན་ཡོད་པ་ཧ་ཅང་གསལ་པོ་མཚོན་ཐུབ། རྒྱ་ནག་གཞུང་གིས་བོད་མིའི་ཐོག་དམ་བསྒྲགས་ཅན་གྱི་སྲིད་བྱུས་འདི་ལྟར་འཛིན་པ་ དེས་བོད་མི་ཚོའི་སེམས་ནང་འཁོན་འཛིན་ཆེ་རུ་གཏོང་རྒྱུ་ཡིན། ཞེས་གསུངས་འདུག
དེ་རིང་བོད་མི་མང་སྤྱི་འཐུས་ལྷན་ཚོགས་ཀྱིས་ཀྱང་གསར་འགོད་བསྒྲགས་གཏམ་ཞིག་སྤེལ་བའི་ནང་དུའང་། རྒྱ་ནག་གཞུང་གིས་ངེས་པར་དུ་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་གི་སྐུ་ཕུང་མི་མང་ལ་རྩིས་སྤྲོད་བྱེད་དགོས་པ་དང་། བོད་ཀྱི་སྲོལ་རྒྱུན་ལྟར་སྐུ་གདུང་ཞུགས་འབུལ་སོགས་ཀྱིི་ལས་རིམ་ཆ་ཚང་བ་ངེས་པར་དུ་འགྲོ་དགོས་པ་ནན་བརྗོད་བྱེད་རྒྱུ་དང་། ཤུལ་ལུས་ནང་མི་ལྟོས་བཅས་དང་རྗེས་འཇུག་ཡོངས་ལ་གདུང་སེམས་མཉམ་སྐྱེད། རྒྱལ་སྤྱིའི་སྲིད་གཞུང་དང་ཚོགས་སྡེ་ཁག་གིས་རིན་པོ་ཆེའི་སྐུ་ཕུང་ཕྱིར་རག་ཐབས་དང་། མི་མང་གི་བདེ་འཇགས་ཆེད་རྒྱ་ནག་སྲིད་གཞུང་ལ་གནོན་ཤུགས་སྤྲོད་དགོས་པ། རྒྱ་ནག་གཞུང་གིས་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་དང་འབྲེལ་བའི་གནད་དོན་ཡོངས་རྫོགས་ཀྱིས་འགན་འཁུར་བྱེད་དགོས་པ་བཅས་ནན་བརྗོད་བྱེད་རྒྱུ་ཡིན། ཞེས་སོགས་བཀོད་འདུག
![FILE - Venezuelan opposition leader Maria Corina Machado gestures at a protest ahead of the Friday inauguration of President Nicolas Maduro for his third term, in Caracas, Venezuela January 9, 2025. [File photo: Reuters/Maxwell Briceno]](https://tibettimes.net/wp-content/uploads/2025/10/Maria-Corina-Machado--360x180.jpg)
