རྔ་བ་བློ་གྲོས་རབ་བརྟན།
“ང་ལ་ནག་ཉེས་མེད”འདི་ནི་རིན་པོ་ཆེའི་གསུང་རེད།
ཉིན་འདི་དག་ལ་མཚོན་ན་༧གོང་ས་མཆོག་དགུང་གྲངས་༨༠ བཞེས་པའི་དུས་ཆེན་ལ་རོལ་བའི་སྐབས་འདིར། བསམ་བཞིན་དུ་འམ་ཆེད་དུ་དུས་ཚོད་འདི་ལ་རྒྱ་གཞུང་གིས་སྤྲུལ་སྐུ་བསྟན་འཛིན་བདེ་ལེགས་དམར་བསད་བཏང་སོང་། འདིས་རྒྱ་གཞུང་གིས་བོད་མི་ཚོ་ལ་ཅི་ཞིག་བྱེད་ཀྱིན་ཡོད་པ་གསལ་བོ་བསྟན་ཡོད།
ངས་དེ་རིང་ཆེད་དུ་སྐུ་གྲོངས་སོང་ཟེར་བ་ལྟ་བུའི་མིང་ཚིག་དེ་བེད་སྤྱོད་གཏོང་གི་མེད་ཅིང་། བསད་སོང་ཟེར་བའི་བྱ་ཚིག་འདི་ཆེད་དུ་བཀོལ་ཡོད། རྒྱུ་མཚན་ནི། སྤྲུལ་སྐུ་བསྟན་འཛིན་བདེ་ལེགས་ལ་མཚོན་ན་མགོ་མཇུག་བར་གསུམ་དུ་རྒྱ་གཞུང་གིས་མ་ཉེས་ཁ་གཡོག་དང་ཉེས་མེད་ཉེས་ཅན་པར་བཟོས་ཏེ། ལོ་ངོ་ ༡༣ རིང་བཙོན་དུ་བཅུག་མཐར་རིན་པོ་ཆེ་འཇིག་རྟེན་འདི་དང་ཁ་གྱེས་པ་རེད། འདི་ནི་རྒྱ་གཞུང་གི་མི་གསོད་སྟངས་ཤིག་རེད་ལ། ལྷག་པར་དུ་མི་དཀར་པོ་དང་གྲགས་ཅན་ཚོ་གསོད་སྟངས་ཤིག་རེད། འདི་ཤེས་པའི་ཐོག་ནས་བྱ་ཚིག་གང་གནད་ལ་འཁེལ་བ་དེ་སྤྱོད་རྒྱུ་གལ་ཆེ་སྟབས། འདིར་རིན་པོ་ཆེ་ཆེད་དུ་བསད་པ་རང་ཡིན་དུས་བསད་ཅེས་པའི་བྱ་ཚིག་དེ་བཀོལ་ཡོད།
རིན་པོ་ཆེ་ལ་མཚོན་ན། དགོན་པ་མང་པོ་དང་ལྷ་སྡེ་མི་སྡེ་མང་པོ་ཅན་དེ་འདྲ་མིན་ཚོད་རེད་ལ། ས་གནས་ས་ཐོག་གི་རིན་པོ་ཆེ་དཀྱུས་མ་ཞིག་རེད། འོན་ཀྱང་རིན་པོ་ཆེའི་ཕྱག་ལས་ལ་མཚོན་ན། ཁོར་ཡུག་སྲུང་སྐྱོབ་དང་ས་གནས་ཀྱི་ཉམ་ཐག་བུ་གུ་ཚོར་ཤེས་ཡོན་སྤྲོད་པ། མི་མང་ཕན་ཚུན་མཐུན་སྒྲིལ་བྱེད་དགོས་པའི་ཕྱག་ལས་གནང་བ་ལྟ་བུ་རེད། འདི་དག་ནི་གཞུང་དང་ཚོགས་སྡེ། མི་སྒེར་སུ་ཞིག་ཡིན་ཡང་དགའ་དགོས་པ་ཤ་སྟག་རེད། རེད་དེ། རྒྱ་ནག་གཞུང་གིས་རིན་པོ་ཆེའི་ཕྱག་ལས་དེ་དག་གི་རྐྱེན་གྱིས་བཙོན་དུ་བཅུག་སྟེ་དམར་བསད་བཏང་བ་རེད།
རྒྱ་གཞུང་གིས་བཤད་ན། ཁྲིན་ཏུའུ་གྲོང་ཁྱེར་དུ་འབར་རྫས་གས་གཏོར་དང་རིན་པོ་ཆེ་འབྲེལ་བ་འདུག་ཚུལ་ བཤད་པ་དེ་རེད། དེ་ནི་མི་དཀར་བོ་ཞིག་ལ་ཆེད་དུ་ཞྭ་མོ་ནག་པོ་གཡོག་དགོས་དུས་ཁག་འཁྲི་ས་ཞིག་དགོས་པ་རེད། གལ་ཏེ་འབར་རྫས་ཤིག་གས་གཏོར་བྱུང་ཡོད་ན། དེ་ནི་རིན་པོ་ཆེ་ཆེད་དུ་ཉེས་ཅན་པར་བཟོ་པར་རྒྱ་གཞུང་རང་གིས་འབར་རྫས་བཀད་མི་སྲིད་པའང་མ་རེད།
རིན་པོ་ཆེ་ལ་མཚོན་ན་ནང་པའི་དགེ་སློང་ཞིག་རེད། རིན་པོ་ཆེ་དང་ལོ་ངོ་དུ་མས་རིང་གཤིབ་ནས་བསྡད་པའི་ས་གནས་མི་མང་གིས་རིན་པོ་ཆེ་ལ་ནག་ཉེས་ཅི་ཡང་མེད་ལ་དཀར་བོ་དཀར་རྐྱང་ཡིན་ཞེས། སྲོག་དམར་པོ་གཏའ་མར་བཞག་སྟེ་ཞུ་གཏུག་བསྟུན་མར་བྱས་པ་དེས། རིན་པོ་ཆེ་ནི་དོན་གྱི་རིན་པོ་ཆེ་ཞིག་ཡིན་པ་བསྟན་ཡོད་ཅིང་། དེ་འདྲའི་མི་མང་གིས་དགའ་བསུ་ཐོབ་པའི་མི་ཞིག་ལ་འབར་རྫས་གས་གཏོར་ལ་འབྲེལ་བ་འདུག་ཟེར་ན། དེ་ནི་ཧམ་པ་དང་ཉེས་འགེལ་རང་ལས་འགྲོ་ས་གཞན་མེད།
“ང་ལ་ནག་ཉེས་མེད་”འདི་ནི་རིན་པོ་ཆེའི་སྐད་ཆ་རེད། བཙོན་དུ་ནག་ཉེས་ཅི་ཞིག་བགྲངས་བ་དང་། སྡུག་དཀའ་ལས་ཅི་ཙམ་མྱངས་ནའང་ང་ལ་ནག་ཉེས་མེད་ཅེས་ལན་བཏབ་ཡོད། རང་ཉིད་དཀར་པོ་ཡིན་པ་དང་རྒྱ་གཞུང་གིས་ཉེས་འཁེལ་དག་ལ་འབྲེལ་བ་ཡེ་ནས་མེད་པ་ཡིན་དུས། དེའི་ལན་དེ་ཡང་ང་ལ་འབྲེལ་བ་མེད་དང་ནག་ཉེས་མེད་ཅེས་དངོས་ཡོད་གང་ཡིན་པ་དེ་མ་བསད་བར་དུ་རིན་པོ་ཆེས་རྒྱུན་སྐྱོང་བྱས་པ་དེས། སྐྱེས་པ་ཕ་རྒོད་ཅིག་གི་བློ་བརྟན་འགྱུར་མེད་ཀྱི་རང་གཤིས་དེ་མངོན་ཡོད་པ་རེད།
དྲང་བདེན་དང་དངོས་ཡོད་ལ་རྒྱབ་གཏད་དེ། དབང་ཤེད་དང་ཉེས་འཁེལ་གྱིས་ཡོད་ཚད་ཐག་གཅོད་ཀྱིན་པའི་རྒྱ་གཞུང་ལ་མཚོན་ན། མི་ཞིག་ལ་ལག་མ་འཁེལ་ན། མཐའ་མར་ཚེ་བཙོན་དང་ཡང་ན་སྲོག་ཐོག་གཏོང་རྒྱུ་དེ་རེད། རིན་པོ་ཆེའི་ཐོག་ལའང་ལག་བསྟར་དེ་རང་བྱས་སོང་། འདིས་རིན་པོ་ཆེ་ནི་རླབས་ཆེན་གྱི་སྐྱེས་བུ་ཞིག་ཡིན་པ་དང་། དངོས་ཡོད་དང་དྲང་བདེན་གཞིར་བཞག་སྟེ་བལྟས་ན། རིན་པོ་ཆེ་ནི་རྒྱ་གཞུང་གི་དབང་འཛིན་པ་ཚོ་ལས་ཧ་ཅང་གི་ཁྱད་དུ་འཕགས་པ་ཞིག་ཡིན་པ་བསྟན་ཡོད་ཅིང་། བོད་མི་རིགས་ལ་མཚོན་ནའང་རིན་པོ་ཆེ་ནི་མི་རབས་འདིའི་མིག་དཔེར་བལྟ་ས་ཞིག་ཏུ་གྱུར་སོང་།
བོད་མི་རིགས་འདི་རྒྱ་འོག་ནས་ཡལ་འགྲོ་བཞིན་པའི་སྐབས་འདིར། རྒྱ་འོག་ནས་ལས་དོན་ཅི་ཞིག་བསྒྲུབ་དགོས་ནའང་། དཀའ་ངལ་ཡོད་བ་ཤེས་བཞིན་དུ་བོད་མི་རིགས་འདིའི་ཆེད་དུ་རིན་པོ་ཆེས་སྡུག་མྱངས་སོང་། གཅེས་པའི་ཚེ་སྲོག་དེ་ཡང་འཕྲོག་སོང་། རིན་པོ་ཆེ་ལྟ་བུའི་ཕོ་རྒོད་ཉུང་ངུ་ཞིག་གི་དྲིན་ལས་བོད་མི་རིགས་འདིའི་དབུགས་རྒྱུན་ད་དུང་ཆད་བཅུག་མེད། འདི་ང་ཚོས་ཤེས་ཡོད་ལ། འདི་ང་ཚོས་མཐོང་ཡོད།
རིན་པོ་ཆེ་ཁྱེད་རང་གི་ཕ་ས་གངས་རིའི་ལྗོངས་དང་ཁ་བྲལ་སོང་། ཁྱེད་ཀྱིས་གནང་བའི་ཕྱག་ལས། ཁྱེད་ཀྱིས་བོད་མི་རིགས་འདིའི་ཆེད་དུ་མྱངས་པའི་སྡུག་བསྔལ། ཁྱེད་ཀྱིས་གངས་རིའི་ལྗོངས་ལ་འཆང་བའི་སླད་མེད་པའི་ལྷག་བསམ་དག་ལ་ང་ཚོས་སློབ་ སྦྱོང་བྱས་ཏེ། ཁྱེད་ཀྱི་ཕུགས་བསམ་གྱི་གངས་ལྗོངས་དེ་མངོན་འགྱུར་བྱ་རྒྱུ་ཡིན། རིན་པོ་ཆེ། ཁྱེད་གངས་རིའི་ལྗོངས་ལ་དགོས་མཁོ་ཡོད། སླར་ཡང་ཕེབས་གནང་རོགས།
