དེ་རིང་རྒྱ་ནག་དབུས་ཁྲིམས་སྒྲིག་ཞིབ་བཤེར་ཚོགས་ཆུང་གིས། འདི་ལོའི་ཟླ་ ༦ ཚེས་ ༢༥ ཉིན་ནས་བཟུང་རྒྱ་ནག་རྒྱལ་ཡོངས་རྩེད་རིགས་འཛིན་སྐྱོང་ལྷན་ཁང་གི་འགན་འཛིན་གཞོན་པ་དང་རྩེད་རིགས་བློན་ཆེན་གཞོན་པ་གཅིག་ལྕོགས་ཞོ་ཐིན་ (Xiao Tian) ལ་བརྟག་དཔྱད་བྱས་པ་བརྒྱུད། ཁོས་ལྐོག་ཟ་རུལ་སུངས་དང་ཏང་གི་སྒྲིག་ཁྲིམས་ལ་འགལ་བའི་ནག་ཉེས་བྱས་ཡོད་པ་ར་འཕྲོད་ཡོད་སྟབས། ཁོ་ལས་གནས་ནས་གནས་དབྱུང་བཏང་ཡོད་སྐོར་བསྒྲགས་ཡོད་ཀྱང་། ཁོས་ཁྲིམས་འགལ་ནག་ཉེས་གང་དག་བཟོས་ཡོད་མེད་གསལ་བཤད་བྱས་མི་འདུག
རྒྱ་ནག་མི་སྣ་བདག་སྐྱོང་ལྷན་ཁང་གིས་གསལ་བསྒྲགས་སྤེལ་བའི་ནང་། དབུས་སྒྲིག་ཁྲིམས་ཞིབ་བཤེར་ཚོགས་ཆུང་གིས་ཞོ་ཐིན་གྱིས་གཞུང་དངུལ་ལྐོག་ཟ་བྱས་པ་དང་། ཏང་སྒྲིག་ལ་རྡོག་རོལ་བཏང་བའི་བྱ་སྤྱོད་ཁག་ཅིག་ཤེས་རྟོགས་བྱུང་སྟེ། ལས་གནས་ནས་གནས་དབྱུང་བཏང་བ་དངོས་འབྲེལ་ཡིན་སྟབས། ད་ལྟ་ང་ཚོས་ཁོར་ཉེས་པ་ག་རེ་གཏོང་མིན་ཐག་གཅོད་བྱེད་བཞིན་ཡོད། ཅེས་བརྗོད་འདུག
ཟླ་སྔོན་མའི་ནང་རྒྱ་ནག་དབུས་ཁྲིམས་སྒྲིག་ཞིབ་བཤེར་ཚོགས་ཆུང་གིས་ཞོ་ཐིན་གྱིས་ཏང་གི་སྒྲིག་ཁྲིམས་ལ་འགལ་བའི་ཉེས་པ་བསགས་ཡོད་སྟབས་ད་ལྟ་རྟོག་ཞིབ་བྱེད་བཞིན་ཡོད། འོན་ཀྱང་གནས་ཚུལ་འདིས་རྒྱ་ནག་དང་ཁ་ཛག་ཀི་སི་ཐན་གཉིས་བར་ ༢༠༢༢ ལོའི་དགུན་ཁའི་ཨོ་རྩལ་འགྲན་ཚོགས་ཀྱི་མགྲོན་བདག་སུས་བྱེད་ལ་ཤུགས་རྐྱེན་གང་ཡང་ཐེབས་མི་སྲིད་སྐོར་བརྗོད་ཡོད། དེ་བཞིན། རྒྱ་ནག་ཨོ་རྩལ་འགྲན་ཚོགས་ཀྱི་མགྲིན་ཚབ་མ་ཝང་ཧུའུ་ (Wang Hui) ཡིས་ཀྱང་། ཞོ་ཐིན་ལ་ནག་ཉེས་ཕོག་པ་དེས་ ༢༠༢༢ ལོའི་དགུན་ཁའི་ཨོ་རྩལ་རྒྱ་ནག་ནང་འཚོགས་རྒྱུའི་སྙན་ཞུར་དོ་ཕོག་གང་ཡང་འགྲོ་རྒྱུ་མིན་པ་མ་ཟད། དེ་ལས་ལྡོག་སྟེ་རྒྱལ་སྤྱིའི་འགྲན་རྩོད་སྟེང་རྒྱ་ནག་གི་རྩེད་རིགས་ཀྱི་སྒྲིག་སྲོལ་གཙང་མ་ཡིན་པ་གསལ་སྟོན་བྱས་ཡོད་སྟབས། ད་ཐེངས་འགྲན་རྩོད་སྐབས་ང་ཚོར་རྒྱལ་ཁ་འཐོབ་རྒྱུའི་གདེང་ཚོད་ཆེ་རུ་ཕྱིན་ཡོད་ཅེས་སོགས་བརྗོད་འདུག
ཞོ་ཐིན་ཨན་ཧུའེ་ཞིང་ཆེན་པིན་ཏུའུ་གྲོང་ཁྱེར་དུ་སྐྱེས་ཤིང་། གྲོང་ཁྱེར་དེའི་སློབ་འབྲིང་ཐོན་རྗེས་ཨན་ཧུའེ་ཞིང་ཆེན་གྱི་གྲི་རྩེད་རུ་ཁག་ནང་ཞུགས་ཡོད་འདུག ༡༩༧༧ ལོར་པེ་ཅིན་རྩེད་རིགས་སློབ་ཆེན་ནང་སློབ་གཉེར་བྱས་ཡོད་པ་དང་། ༡༩༨༡ ལོར་རྒྱ་ནག་རྒྱལ་ཡོངས་རྩེད་རིགས་ཚོགས་ཆུང་གི་ཚོགས་མིར་བསྐོས་ཏེ་ལོ་ ༢༤ ལྷག་ལས་ཀ་བྱས་རྗེས། ༢༠༠༥ ལོར་རྒྱལ་ཡོངས་རྩེད་རིགས་འཛིན་སྐྱོང་ལྷན་ཁང་གི་འགན་འཛིན་གཞོན་པར་བསྐོས་འདུག
༢༠༡༥ ལོའི་ཟླ་ ༥ པའི་ནང་རྒྱ་ནག་གཞུང་གིས་ཁོ་རང་ ༢༠༢༢ ལོའི་དགུན་ཁའི་ཨོ་རྩལ་རྒྱ་ནག་རྒྱལ་ས་པེ་ཅིན་ནང་འཚོགས་ཐུབ་རྒྱུར་རྒྱལ་སྤྱིའི་ཨོ་རྩལ་ལྷན་ཚོགས་ལ་རྒྱུད་སྐུལ་བྱེད་མཁན་གྱི་མི་སྣ་གཙོ་བོར་བསྐོས་ཡོད་ཀྱང་། ཟླ་སྔོན་མའི་ཚེས་ ༢༥ ཉིན་རྒྱ་ནག་དབུས་སྒྲིག་ཁྲིམས་ཞིབ་བཤེར་ཚོགས་ཆུང་གིས་ཁོས་ཏང་སྒྲིག་དང་འགལ་བའི་ཚབས་ཆེའི་ཉེས་པ་བསགས་ཏེ་རྟོག་ཞིབ་བྱེད་བཞིན་ཡོད་ཚུལ་བརྗོད་པ་དང་། དེ་རིང་ལས་གནས་ནས་དངོས་སུ་གནས་དབྱུང་བཏང་ཡོད་པ་ཕྱི་བསྒྲགས་བྱས་ཏེ། ཁོའི་མིང་རྒྱ་ནག་ཨོ་རྩལ་ལྷན་ཚོགས་ཀྱི་དྲ་ཚིགས་ནས་གསུབ་ཡོད་པ་མ་ཟད། ཁོའི་འབྲེལ་གཏུག་བྱེད་ས་ཁག་ཀྱང་བཀག་འགོག་བྱས་ཡོད་འདུག་ལ། ཁོའི་བཟའ་ཟླ་དང་རྒྱ་ནག་རྟ་རྩལ་ཚོགས་པའི་དྲུང་གཞོན་ཐིན་ཡེ་(田桦) བཅས་ལའང་ལྐོག་ཟ་རུལ་སུངས་ཀྱི་དོན་རྐྱེན་དང་འབྲེལ་བའི་ཐོག་ནས་རྟོག་ཞིབ་བྱེད་བཞིན་ཡོད་འདུག
དབྱིན་ཡུལ་ནང་གནས་སྡོད་སྲིད་དོན་དཔྱད་ཞིབ་པ་སྐུ་ཞབས་རོ་བྷར་ཌི་ཇུན་མེན་ལགས་ཀྱིས། ཞི་ཅིན་ཕིན་གྱིས་སྟག་དང་སྦྲང་མ་མཉམ་རྡུང་གི་བྱ་འགུལ་རིམ་པ་འཕེལ་ཏེ། ལངས་ཕྱོགས་མི་མཐུན་པ་དང་རྒྱབ་རྩ་ཆེན་པོ་མེད་པའི་མཐོ་རིམ་དཔོན་རིགས་དང་ལས་བྱེད་དཀྱུས་མ་མང་པོ་ཞིག་ཁྲིམས་ཀྱི་རྙི་ནང་བཅུག་ཡོད་ཀྱང་། རྒྱབ་རྩ་ཡོད་པའི་མཐོ་རིམ་དཔོན་རིགས་ཀྱི་བུ་ཕྲུག་དང་དཔོན་རིགས་ཚོ་ལྐོག་ཟ་རུལ་སུངས་ཀྱི་ཞིབ་བཤེར་འོག་སླེབ་ཀྱི་མེད་སྟབས། འདི་ནི་རང་ཕྱོགས་རྒྱལ་བ་དང་གཞན་ཕྱོགས་ཕམ་པར་བྱེད་མཁན་གྱི་སྲིད་བྱུས་ཤིག་ཡིན་པར་བརྟེན། མ་འོངས་པར་རྒྱ་ནག་དང་དམར་ཤོག་ཚོགས་པའི་བརྟན་བརླིང་ལ་དཀའ་ངལ་འཕྲད་ཀྱི་རེད། ཅེས་བརྗོད་འདུག
