འབར་མིའི་འོས་བསྡུ་དང་དེའི་འཇིག་ཉེན་གླེང་སློང་།

གཟའ་འཁོར་འདིའི་ནང་འབར་མའི་འོས་བསྡུ་ལྷན་ཁང་ནས་གསལ་བསྒྲགས་བྱས་པ་ལྟར་ན། འབར་མ་རྒྱལ་ཡོངས་འོས་བསྡུ་ཆེན་མོ་དེ་ཕྱི་ཟླ་ ༩ ཚེས་ ༨ ཉིན་ལ་གཏེན་འཁེལ་བ་དང་། ད་རེབ་ཀྱི་འོས་བསྡུ་དེ་འབར་མའི་ཞི་དྲག་གཉིས་ལྡན་གྱི་གཞུང་འཛིན་འོག་འཚོགས་རྒྱུ་ཡིན་འདུག

ཉེ་ལམ་ནས་འབར་མ་རྒྱལ་ཁབ་འདི་རྒྱལ་སྤྱིའི་ཟུར་བཅད་དང་སྲིད་དབང་སྒེར་འཛིན་ལམ་ལུགས་འོག་སྐྱོབ་ཐབས་སུ། ༢༠༡༡ ལོ་ནས་བཟུང་འབར་མིའི་སྲིད་གཞུང་གིས་སྲིད་འབྱོར་གཉིས་ཐད་ནས་བཅོས་བསྒྱུར་ལ་བརྩོན་ཏེ། འབར་མ་རྒྱལ་ཡོངས་འོས་བསྡུ་ཆེན་མོ་དེ་ཡང་འདས་པའི་མི་ལོ་བཅུ་ཕྲག་རིང་དུས་ཐོག་མའི་ཤོག་ཁག་སྣ་ཚོགས་འོག་གི་འོས་བསྡུ་དང་མི་འདྲ་བར། རང་དབང་དང་དྲང་བདེན་ཡོང་བར་རེ་ལྟོས་འཆང་གི་ཡོད་པ་དང་། ཐེངས་སྔོན་མའི་འོས་འདེམས་ཁྲོད་ལྕམ་ཨུང་སན་སུ་ཀེའི་དབུ་ཁྲིད་འོག་གི་རྒྱལ་ཡོངས་དམངས་གཙོ་ཚོགས་པར་ (NLD) རྒྱལ་ཁ་ཐོབ་ནའང་། འབར་མའི་དམག་གཞུང་གིས་དེ་ལ་ངོས་ལེན་མ་བྱས་པ་རེད།

 ལྕམ་ཨུང་སན་སུ་ཀེ་སྲིད་འཛིན་འོས་འགྲན་ནང་ཞུགས་སྲིད་དམ།
འབར་མའི་དམངས་གཙོ་ཚོགས་པའི་གཙོ་འཛིན་དང་ནོ་བྷལ་ཞི་བདེ་གཟེངས་རྟགས་བཞེས་མཁན་ལྕམ་ཨུང་སན་སུ་ཀེ་མཆོག་ནི། འབར་མའི་དམག་གཞུང་གི་བཟང་བཙོན་འོག་མི་ལོ་ ༡༥ ཙམ་ཁྲི་མུན་དུ་སྐྱེལ་དགོས་བྱུང་བའི་འབར་མ་མི་རིགས་ཀྱི་དཔའ་མོ་ཞིག་ཡིན་པ་ཙམ་མ་ཟད། ཁོང་མོས་འབར་མའི་མི་མང་གིས་དགའ་མགུ་ཡི་རངས་བྱེད་པའི་འབར་མ་རྒྱལ་ཁབ་ཀྱི་སྲིད་དོན་པ་མང་ཤོས་ཟིལ་གྱིས་གནོན་བཞིན་ཡོད། ཡིན་ན་ཡང་འབར་མའི་དམག་གཞུང་གི་ཁྲིམས་འོག་ཏུ། ཁོང་མོ་འབར་མའི་སྲིད་འཛིན་འོས་བསྡུའི་ནང་ཞུགས་པར་འགོག་རྐྱེན་བཟོ་བཞིན་ཡོད། རྒྱུ་མཚན་ནི། འབར་མ་དམག་གཞུང་གི་རྩ་ཁྲིམས་འོག ཕྱི་གླིང་གི་ཁྱིམ་མིར་འབྲེལ་འདྲེས་ཆེ་བའི་ཆེས་མཐོའི་དཔོན་རིགས་སུ་ཡིན་རུང་། འབར་མའི་སྲིད་འཛིན་འོས་འདེམས་ནང་ཞུགས་པར་བཀག་འགོག་བྱེད་ཀྱི་ཡོད་ལ། ལྕམ་ཨུང་སན་སུ་ཀེའི་སྐུ་ཟླ་རྗེས་མ་དེ་ཨིན་ཇིའི་མི་ཡིན་པ་མ་ཟད། ཁོང་མོའི་བུ་ཕྲུག་གཉིས་ལའང་ཨིན་ཇིའི་མི་སེར་གྱི་ལག་འཁྱེར་ཡོད་པ་རེད།

ཟླ་སྔོན་མར། རྒྱལ་ཡོངས་གྲོས་ཚོགས་ནས་ལྕམ་ཨུང་སན་སུ་ཀེ་སྲིད་འཛིན་འོས་གཞི་ལས་ཕྱིར་འཐེན་དགོས་པའི་གྲོས་འཆར་བཏོན་རུང་། གལ་ཏེ་ཁོང་མོ་སྲིད་འཛིན་འོས་མིར་ལངས་བ་ཡིན་ན། ལྕམ་ཨུང་སན་སུ་ཀེ་ཡང་བསྐྱར་འབར་མའི་སྲིད་འཛིན་འོས་གཞིར་ཁྱབ་བསྒྲགས་སྲིད་ཅིང་། ད་རེབ་ཀྱི་སྲིད་འཛིན་འོས་བསྡུ་དེ་མི་དམངས་མང་ཚོགས་ཀྱིས་ཐད་ཀར་འོས་ཤོག་ལྡུག་རྒྱུ་མ་ཡིན་པར། རྒྱལ་ཡོངས་གྲོས་ཚོགས་ངོས་ནས་གཤམ་གསལ་ལྟར་འདེམས་བསྐོ་བྱེད་རྒྱུ་ཡིན་འདུག  འབར་མའི་གསར་དེབ་ (The Irrawaddy) ཀྱི་རྩོམ་སྒྲིག་པ་ཨུང་ཛོ་ (Aung Zaw) ཟེར་བ་ཞིག་གིས་སི་ཨན་ཨན་གསར་ཁང་ལ། “རྒྱལ་ཡོངས་དམངས་གཙོ་ཚོགས་པས་ལྕམ་ཨུང་སན་སུ་ཀེ་ད་རེབ་ཀྱི་སྲིད་འཛིན་འོས་འགྲན་ནང་ཞུགས་ཐུབ་པའི་རེ་འདུན་དེ་མངོན་འགྱུར་འབྱུང་གི་འཇུག་མི་སྲིད” ཅེས་ཟེར།

 དེས་ན། རྒྱལ་ཡོངས་དམངས་གཙོ་ཚོགས་པས་དམིགས་བྱ་དེ་ཅི་ལྟར་ལག་བསྟར་བྱེད་དམ།
 ༢༠༡༠ ལོར་རྒྱལ་ཡོངས་དམངས་གཙོ་ཚོགས་པས་ལྕམ་ཨུང་སན་སུ་ཀེ་ (སྐབས་དེར་ཁོང་མོ་བཟང་བཙོན་དུ་ཚུད་ཡོད།) འོས་གཞི་ནས་ཕྱིར་འཐེན་སྲིད་ཇུས་ལ་ངོ་རྒོལ་བྱས་ནའང་། འབར་མའི་དམག་གཞུང་གིས་ཕྱིས་ཀྱི་ ༢༠༡༢ ལོའི་སྲིད་འཛིན་འོས་འདེམས་ལ་དམ་དྲགས་ཤུགས་ཆེར་བྱས་པ་རེད།

གོང་ཞུས་རྩོམ་སྒྲིག་པ་ཨུང་ཛོ་ལགས་ཀྱིས། “གལ་ཏེ་འབར་མའི་སྲིད་འཛིན་འོས་བསྡུ་དེ་དྲང་བདེན་དང་རང་དབང་ཡོང་ཚེ། རྒྱལ་ཡོངས་དམངས་གཙོ་ཚོགས་པར་མང་མོས་ཀྱི་འོས་ཤོག་འཐོབ་ངེས་རེད། ཡིན་ནའང་། རྒྱལ་ཡོངས་དམངས་གཙོ་ཚོགས་པས་འབར་མ་རྒྱལ་གཞུང་གི་ངོ་བོ་མཚོན་ཐུབ་མིན་དེ་དོགས་གཞི་ཞིག་རེད” ཅེས་བརྗོད་བྱུང་།

རྒྱལ་ཡོངས་གྲོས་ཚོགས་ཀྱི་རྐུབ་སྟེགས་ ༦༦༤ ཁྲོད་ཀྱི་བཞི་ཆའི་གཅིག་འབར་མའི་དམག་གཞུང་གིས་བཟུང་ཡོད་པ་མ་ཟད། གྲོས་མི་ཚོར་འབར་མའི་དམག་གཞུང་གི་རྩ་ཁྲིམས་བསྒྱུར་བཅོས་ཀྱིས། དམངས་གཙོའི་གཞུང་གསར་བ་འཛུགས་རྒྱུར་དངོས་བཤུག་བརྒྱུད་གསུམ་ནས་ཐལ་དྲགས་པའི་གནོན་ཤུགས་སྤྲོད་མུས་ཡིན་ཞིང་། ཟླ་སྔོན་མར་རྒྱལ་ཡོངས་གྲོས་ཚོགས་ནས་རྩ་ཁྲིམས་བསྒྱུར་བཅོས་ཐད་འབར་མ་དམག་གཞུང་གི་བཀག་སྡོམ་དབང་ཆ་ཕྱིར་འཐེན་གྱི་གྲོས་གཞི་བཏོན་པ་དང་། ཉེ་བའི་ཆར་གྱི་སྒྲིག་རིམ་འོག གྲོས་ཚོགས་ཀྱི་རྐུབ་སྟེགས་བཞི་ཆའི་གཅིག་བཟུང་བའི་འབར་མའི་དམག་གཞུང་ལ་བྱེད་ནུས་ལྡན་པའི་རྩ་ཁྲིམས་བཅོས་བསྒྱུར་བཀག་སྡོམ་དབང་ཆ་མ་སྤྲད་སྔོན་ལ། གྲོས་ཚོགས་གོང་འོག་གི་རྐུབ་སྟེགས་བརྒྱ་ཆའི་ ༧༥ ལྷག་ཟིན་པའི་རྩ་ཁྲིམས་ལ་བསྒྱུར་བཅོས་གཏོང་གི་ཡོད་པ་དང་། རྩོམ་སྒྲིག་པ་ཨུང་ཛོ་ལགས་ཀྱིས། “ང་ཚོས་འོས་བསྡུའི་རྗེས་ཀྱི་ཆབ་སྲིད་གནས་བབ་ལ་གཞིག་དགོས་ཏེ། ཤོག་ཁག་ཕན་ཚུན་དབར་ཚབས་ཆེ་བའི་ཆབ་སྲིད་ཀྱི་གྲོས་ཆོད་འཇོག་སྲིད་པ་མ་ཟད། འབར་མ་རྒྱལ་ཁབ་ཀྱིས་ངོས་ཟིན་དཀའ་བའི་འཇིག་ཉེན་ཞིག་ལ་གདོང་ལེན་དགོས་ཀྱང་སྲིད་པ་རེད” ཅེས་ཟེར།

 ད་རེབ་ཀྱི་སྲིད་འཛིན་འོས་འགྲན་ནང་གཞན་སུ་ཞིག་མཉམ་ཞུགས་བྱེད་སྲིད་དམ།
སྤྱིར་འབར་མའི་སྲིད་ཚོགས་ཁག་མང་པོ་ཞིག་ད་རེབ་ཀྱི་སྲིད་འཛིན་འོས་འགྲན་ནང་ཞུགས་འདུན་ཡོད་ནའང་། གཙོ་བོ་འབར་མའི་སྲིད་འཛིན་ཐེན་སེན་ (Thein Sein) གཞུང་གི་ཕྱོགས་གཏོགས་འབར་མའི་ཆིག་སྒྲིལ་ཡར་རྒྱས་མཐུན་ཚོགས་ (USDP) དང་འབར་མའི་དམངས་གཙོ་ཚོགས་པ་གཉིས་ཡིན་ཞིང་། འབར་མའི་ཆིག་སྒྲིལ་ཡར་རྒྱས་མཐུན་ཚོགས་ཀྱི་འོས་གཞི་ཐག་ཆོད་བྱུང་ཡོད་པ་རེད། ཡིན་ན་ཡང་སྐུ་ཞབས་ཨུང་ཛོ་ལགས་ཀྱིས་བརྗོད་དོན་ལྟར་ན། འབར་མའི་དམག་སྤྱི་ཆེན་མོ་ཟུར་བ་དང་སྲིད་འཛིན་ཐེན་སེན་ཟེར་བ་དེ་ཐེངས་གཉིས་པའི་སྲིད་འཛིན་འོས་འགྲན་ནང་ཞུགས་པར་གྲ་སྒྲིག་བྱེད་ཀྱི་ཡོད་པ་དེས། ཤོག་སྡེ་ཁག་ (སྲིད་འཛིན་ཤོག་ཁག་དང་གྲོས་ཚོགས་ཤོག་ཁག དེ་བཞིན་ཆིག་སྒྲིལ་ཡར་རྒྱས་མཐུན་ཚོགས་བཅས་ཀྱི་བར) གི་དབང་ཤེད་ལ་འགོག་རྐྱེན་ཐེབས་ཀྱི་ཡོད་འདུག 

རྩོམ་སྒྲིག་པ་ཨུང་ཛོ་ལགས་ཀྱི་བརྗོད་དོན། “གྲོས་ཚོགས་ཤོག་གི་སྟོབས་ཤུགས་ཇེ་ཆེར་རྒྱས་ཀྱི་ཡོད་པ་དང་དུས་ཀུན་ཆབ་སྲིད་ཀྱི་རྩེད་མོར་རོལ་བའི་དམག་གཞུང་གི་ཤོག་ཁག་སྔར་བས་ཀྱང་སྲིད་འཛིན་ཤོག་ཁག་དང་མཐུན་ སྒྲིལ་འབྱུང་སྲིད་པར་སྣང་ཞིང་། འབར་མའི་དམག་གཞུང་གི་དམག་སྤྱི་ཚོར་སྲིད་འབྱོར་གཉིས་ཀྱི་དབང་སྟོབས་ཆེ་གཤིས། ད་རེབ་ཀྱི་སྲིད་འཛིན་འོས་བསྡུའི་ནང་ཁོ་ཚོར་མགོ་འདོགས་ཞུ་རྒྱུ་མ་གཏོགས། ཁོ་ཚོ་ཕམ་ཉེས་སུ་གཏོང་རྒྱུ་དེ་རེ་དོགས་སྐྱེས་པ་ཞིག་རེད” ཅེས་ཟེར།

 ཐེངས་འདིའི་སྲིད་འཛིན་འོས་བསྡུ་དེ་འཇིག་ཉེན་ཅི་ཞིག་ལ་འཕྲད་སྲིད་དམ།
འདས་པའི་མི་ལོ་བཅུ་ཕྲག་རིང་རྒྱལ་སྤྱི་དང་འབྲེལ་ལམ་རྩ་ནས་ཆད་པའི་འབར་མ་རྒྱལ་ཁབ་གློ་བུར་དུ་དམངས་གཙོའི་ལམ་ཕྱོགས་སུ་བསྐྱོད་པར། རྒྱལ་སྤྱིའི་སྤྱི་ཚོགས་ངོས་ནས་དགའ་བསུ་ཡི་རངས་ཞུ་ཡི་ཡོད་ནའང་། ཉེ་བའི་ལོ་ངོ་འགའ་ཞིག་ནང་། མི་འབོར་ས་ཡ་ ༥༡ གིས་གྲུབ་པའི་འབར་མའི་རྒྱལ་ཁབ་ཆབ་སྲིད་བཅོས་བསྒྱུར་གྱི་ཐད་ནས་ལོག་ལམ་དུ་ཚུད་སྲིད་ཀྱང་པའི་འཇིག་ཉེན་ཞིག་ལ་རང་ཤུགས་ཀྱིས་འཕྲད་ཡོད།
འབྱུང་འགྱུར་དམངས་གཙོའི་སྲིད་གཞུང་གསར་བ་ཞིག་ཆགས་པའི་མཐུན་འགྱུར་དེས། འབར་མ་རྒྱལ་ཁབ་ཀྱི་དུས་ཡུན་རིང་བའི་དཀའ་རྙོག་མང་པོ་སེལ་བ་དང་། ཡུན་གྱིས་ཆབ་སྲིད་བཅོས་བསྒྱུར་གྱི་གྲོས་གཞི་ལག་ལེན་དུ་བསྟར་གི་རེད།

མི་རིགས་སྣ་ཚོགས་སུ་འཕེལ་ཞིང་རང་བྱུང་གི་ཐོན་ཁུངས་ཅུང་ལེགས་པའི་འབར་མ་རྒྱལ་ཁབ་ཀྱིས་རྩོད་གཞི་མང་པོར་ (དེའི་ནང་མཐའ་མཚམས་ཀྱི་གྲངས་ཉུང་མི་རིགས་ཁག་བར་གྱི་རྒྱུན་མི་ཆད་པའི་རྩོད་རྙོག་ཀྱང་ཚུད་ཡོད) གདོང་ལེན་བྱེད་དགོས་ཤིང་། དེ་ཡང་གཙོ་བོ་ར་ཁི་ཧན་ (Rakhine) ནུབ་ཁུལ་གྱི་རྒྱལ་ཁབ་མེད་པའི་རའོ་ཧེན་གྷ་ཁ་ཆེ་མི་རིགས་ (Rohingya Muslims) ཡིན་པ་དང་། རའོ་ཧེན་གྷ་ཁ་ཆེ་མི་རིགས་ཀྱི་དཀའ་སྡུག་གཙོ་བོ་དེ་ཤར་ལྷོ་ཨེ་ཤེ་ཡའི་ཡུལ་གྱར་གྱི་དཀའ་ཉེན་ལས་འབྱུང་གི་ཡོད།

རའོ་ཧེན་གྷ་དང་ཁ་ཆེ་མི་རིགས་ལ་བཅངས་པའི་ཞེ་འཁོན་དེ་ཡང་མི་རིགས་རིང་ལུགས་པ་ཚོས་འབར་མའི་ནང་པའི་དགེ་འདུན་པའི་སྡེར་བརྒྱུད་སྐུལ་བཏང་བ་ལས་འབྱུང་གི་ཡོད་ཅིང་། རྒྱུ་རྐྱེན་དེ་ལ་བརྟེན་ནས་ཆོས་ལུགས་གྲུབ་མཐའ་མི་གཅིག་པའི་བར་གཉེན་སྒྲིག་མི་ཆོག་པ་དང་འབར་མ་མི་རིགས་ཀྱི་ཆོས་དང་རིག་གཞུང་གི་ངོ་བོ་འགན་སྲུང་བྱེད་ཀྱི་ཡོད་པ་རེད།

དེང་སྐབས་འབར་མ་གཞུང་ངོས་ནས་ཀྱང་རྒྱལ་ནང་གི་ངོ་ལོག་ཟིང་འཁྲུག་ཞི་འཇགས་སུ་གཏོང་བའི་གྲོས་གཞིར་མིང་རྟགས་འགོད་པའི་སྟ་གོན་བྱེད་ཅིང་། རྒྱལ་ནང་གི་གྱེན་ལོག་ཟིང་འཁྲུག་དེ་ཡང་ ༡༩༤༨ ལོར་འབར་མ་རྒྱལ་ཁབ་རང་བཙན་བྱས་ཉིན་ནས་བྱུང་བ་ཞིག་ཡིན། ད་ལོར་ཁོ་ཁན (Kokang) མངའ་ཁུལ་དུ་འབྱུང་གིན་པའི་ཟིང་འཁྲུག་གི་མེ་ལྕེ་དེ་རྒྱ་ནག་དང་འབྲེལ་བའི་འབར་བའི་མཐའ་མཚམས་ཁག་ཏུ་མཆེད་ཀྱི་ཡོད།

སྐུ་ཞབས་ཨུང་ཛོ་ལགས་ཀྱི་བརྗོད་དོན་ལྟར་ན། རེ་འདུན་གྱིས་བརྟས་ཆེ་བའི་གྲངས་ཉུང་མི་རིགས་ཀྱི་ཤོག་ཁག་འདི་དག་ཆབ་སྲིད་གྲོས་མོལ་གཞི་བཟུང་ཐོག དེ་ལོའི་འབར་མིའི་སྲིད་འཛིན་འོས་འགྲན་ནང་མཉམ་ཞུགས་བྱེད་རྒྱུ་ཡིན་འདུག
 
མ་ཡིག་འབྲེལ་ཐག http://edition.cnn.com/2015/07/09/asia/myanmar-elections-date-set-qa/