དེ་རིང་ཚོགས་པ་ཁག་བཅུ་གཅིག་ནས་བརྟན་བཞུགས་འབུལ་སྐབས། ༸གོང་ས་མཆོག་གིས་དཔལ་འབྱོར་རྗེས་ལུས་ཡར་རྒྱས་གཏོང་བར་འབད་བརྩོན་བྱེད་བཞིན་ཡོད་པ་ལྟར་ནང་ཆོས་ཉམས་ལེན་གྱི་རྗེས་ལུས་ཡང་ཡར་རྒྱས་གཏོང་དགོས་སྐོར་གསུངས་སོང་།
དེ་རིང་ཆོས་འཁོར་དུས་ཆེན་དང་སྟབས་བསྟུན་ཏེ་སྔ་དྲོའི་ཆུ་ཚོད་ ༨ པ་ཙམ་ལ་དྷ་ས་ཐེག་ཆེན་གཙུག་ལག་ཁང་དུ། ཧི་མ་ལ་ཡའི་ནང་ཆོས་རིག་གཞུང་ཚོགས་པ་དང་བལ་ཡུལ་དགེ་ལྡན་ལྷན་ཚོགས། བལ་ཡུལ་སྦོག་ར་གློ་སྒྲིག སྟག་ལུང་གི་ཆོས་བརྒྱུད་འཛིན་པ། བྱང་དགའ་ལྡན་ཆོས་འཁོར་གླིང་། དབུས་གཙང་ཆོལ་ཁ། བོད་ཀྱི་གཞོན་ནུ་ལྷན་ཚོགས། བུད་མེད་ལྷན་ཚོགས། མངའ་རིས་སྤྱི་མཐུན་ཚོགས་པ། དགུ་བཅུ་གསུམ་ལས་འགུལ་ཚོགས་པ། དབུ་མའི་ལམ་ལས་འགུལ་ཁང་བཅས་ཚོགས་པ་ཁག་ ༡༡ མཉམ་འབྲེལ་ཐོག ༸གོང་ས་མཆོག་ཕྱི་ལུགས་ཀྱི་དགུང་གྲངས་ ༨༠ ཕེབས་པའི་དགའ་སྟོན་དང་འབྲེལ་བརྟན་བཞུགས་རྒྱས་པ་ཞིག་བསྟར་འབུལ་ཞུས་སོང་བ་དང་། སྐབས་དེར་རྒྱུད་སྨད་གྲྭ་ཚང་གི་མཁན་ཟུར་སྒོ་སོག་རིན་པོ་ཆེ་མཆོག་དང་སྟག་ལུང་ཞབས་དྲུང་རིན་པོ་ཆེ། སྟག་ལུང་མ་སྤྲུལ་རིན་པོ་ཆེ་བཅས་ཀྱི་དབུས་མཁན་སྤྲུལ་རྣམ་པ་དང་། བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་དང་སྲི་ཞུ་ལས་བྱེད། དེ་བཞིན་དྷ་ས་ཁུལ་གཙོ་བོར་གྱུར་བའི་ཕྱོགས་མཐའ་ཁག་ནས་ཡོང་བའི་སེར་སྐྱ་མི་མང་བཅས་ཁྱོན་མི་གྲངས་ ༦༠༠༠ ཙམ་འཛོམས་འདུག
ཞོགས་པའི་ཆུ་ཚོད་ ༧།༣༠ ཙམ་ལ་ཐེག་ཆེན་གཙུག་ལག་ཁང་གི་ཆོས་རའི་ནང་དུ། ༸གོང་ས་མཆོག་དབུ་བཞུགས་ཐོག་བལ་ཡུལ་དགེ་ལྡན་ལྷན་ཚོགས་ཀྱིས་རྟགས་གསལ་གཟིགས་འབུལ་ཞུས་རྗེས། གཙུག་ལག་ཁང་གི་ལྷ་ཁང་ནང་དུ་༸གོང་ས་མཆོག་གིས་དད་ལྡན་སེར་སྐྱ་མི་མང་ལ་ནང་ཆོས་ངོ་སྤྲོད་དང་བཀའ་དབང་བཀའ་དྲིན་བསྐྱངས་སོང་། དེ་རྗེས་རྒྱུད་སྨད་མཁན་ཟུར་སྒོ་སོག་རིན་པོ་ཆེ་མཆོག་ནས་མནྜལ་རྟེན་གསུམ་འདེགས་འབུལ་ཞུས་བ་དང་སྦྲགས། ཚོགས་པ་བཅུ་གཅིག་གི་དད་ལྡན་སེར་སྐྱ་ཚོས་བརྟན་བཞུགས་བསྟར་འབུལ་ཞུས་སོང་།
༸གོང་ས་མཆོག་གིས་ནང་ཆོས་ངོ་སྤྲོད་གནང་སྐབས། མི་ཚང་མས་བདེ་བ་འདོད་ཅིང་སྡུག་བསྔལ་མི་འདོད་པ་ལྟར་སོ་སོའི་སེམས་རྒྱུད་ལ་བརྟེན་ནས་བདེ་སྐྱིད་ཐོབ་ཐབས་དགོས་སྐོར་བཀའ་སློབ་ལམ་སྟོན་གནང་དོན། ད་ལྟའི་དུས་ཚོད་ལ་སེམས་ཀྱི་བདེ་སྐྱིད་སྒྲུབ་པར་སེམས་ཀྱི་བདེ་སྐྱིད་གཏོར་བཤིག་གཏོང་མཁན་དང་། སེམས་ཀྱི་བདེ་སྐྱིད་མེད་པ་བཟོ་མཁན་དེ་ག་རེ་ཆགས་འདུག ཕྱི་ཡིས་བཟོས་པ་མ་རེད་གཙོ་བོ་ནང་སེམས་ཀྱི་ཆགས་སྡང་གི་དབང་གིས་སེམས་མ་སྐྱིད་པ་ཡོང་གི་ཡོད་པ་གསལ་བོ་ཞེ་དྲགས་འདུག་གཱ། ཆགས་སྡང་སེལ་བ་ཟེར་བ་དེ་ཕྱི་ལོགས་ནས་ཁབ་བརྒྱབ་ཏེ་སེལ་ཐབས་མེད་ལ། འདོད་ཆགས་མེད་པ་དང་ཞེ་སྡང་མེད་པ། གཏི་མུག་མེད་པ་ཞེས་ཚོང་ཁང་ནང་ནས་ཉོ་རྒྱུ་ཡོད་པ་ཞིག་ཀྱང་མིན་སྟབས། ང་རང་ཚོའི་ནང་ཆོས་ནང་གསུང་བའི་ཉོན་རྨོངས་དུག་གསུམ་ཞེས་རང་ཆས་སུ་ཡོད་པ་དེ་སེལ་བའི་ཐབས་ཤེས་ནི། རང་གི་སེམས་རྒྱུད་ལ་བརྟེན་ནས་ཆགས་སྡང་རྨོངས་གསུམ་སེལ་བ་བྱེད་དགོས་པ་རེད་མ་གཏོགས། གཞན་ཕྱི་ལོགས་ནས་ཐབས་ཤེས་མེད་པ་གསལ་བོ་ཞེ་དྲགས་རེད། ཅེས་གསུངས་སོང་།
སྤྱིར་ནང་པའི་ཆོས་དེ་རྨོངས་དད་ཅིག་མིན་ཡང་མང་ཚོགས་ཀྱིས་ཆོས་བྱེད་སྟངས་དེ་རྨོངས་དད་རང་ཆགས་ཡོད་པས། ནང་ཆོས་ཉམས་ལེན་ཐད་རྗེས་ལུས་ཐེབས་པ་དེ་ཡར་རྒྱས་གཏོང་དགོས་སྐོར་གསུངས་དོན། ང་རང་ཚོ་བོད་ལ་ཡོད་པའི་ཆོས་དེ་ཡག་པོ་ཞིག་ཤེས་པ་ཡིན་ན། དངོས་གནས་ཟབ་ཅིང་རླིང་བ་ཀཀཀཞིག་རེད། ཡིན་ནའང་། ང་རང་ཚོའི་སྤྱི་ཚོགས་ནང་ལོགས་སུ་ཆོས་བྱས་ཟེར་དུས་ཁ་འདོན་འདྲ་བོ་བྱས། དཔེ་ཆ་འདྲ་བོ་ཀློག། དཔེ་ཆ་རྙིང་པ་ཡིན་ན་ཁ་འདོན་ཡག་པོ་བྱས་པ་དང་དཔེ་ཆ་གསར་པ་ཡིན་ན་ཁ་འདོན་ཡག་པོ་བྱས་མེད་པའི་རྟགས་རེད། དེ་ནས་ལག་ཏུ་ཕྲེང་བ་འཁུར་ནས་ཕྲེང་བ་མང་པོ་ཟད་ཡོད་ན་སྔགས་མང་པོ་བགྲེངས་ཡོད་པའི་རྟགས་རེད། ངའི་ཕྲེང་བ་ཞེ་དྲགས་ཟད་མེད་མང་པོ་བགྲང་མེད་པས་རེད། ཆོས་དེ་རྨོངས་དད་མིན་ཡང་ང་ཚོའི་མང་ཚོགས་ཀྱིས་ཆོས་བྱེད་སྟངས་དེ་རྨོངས་དད་རང་ཆགས་བསྡད་ཡོད་ལ། དེ་རྗེས་ལུས་རེད། རྗེས་ལུས་དེར་ཆོག་ཤེས་བྱས་ནས་དེས་འགྲིག་ཅེས་ལབ་བསྡད་ན་གླེན་པ་རེད། རྗེས་ལུས་ཐེབས་པ་ཡར་རྒྱས་གཏོང་དགོས་པ་རེད། དངོས་པོས་རྗེས་ལུས་ཐེབས་པ་དེ་འབད་བརྩོན་བྱས་ནས་ཡར་རྒྱས་གཏོང་བཞིན་ཡོད་པ་ལྟར། ནང་ཆོས་ཀྱི་ཉམས་ལེན་རྗེས་ལུས་ཐེབས་བསྡད་ཡོད་པ་དེ་ཡར་རྒྱས་གཏོང་དགོས་པ་རེད་མ་གཏོགས། ང་ཚོའི་ཕ་མེས་ནས་འདི་འདྲ་བྱེད་ཀྱི་ཡོད་ལབ་བསྡད་ན། ངའི་ཕ་མེས་ཚོ་ལྐུགས་པ་ཡིན། ང་ཡང་ལྐུགས་པ་བྱེད་རྒྱུ་ཡིན་ལབ་ན་ཆོད་ག་རེ་འདུག ཕ་མེས་ནས་ཡིག་རྨོངས་བྱས་ནས་བསྡད་པ་དང་། ང་རང་ཡང་ཡིག་རྨོངས་བྱས་ནས་སྡོད་ཀྱི་ཡོད། ངའི་ཕྲུ་གུ་ཡང་ཡིག་རྨོངས་བྱས་ནས་འཇོག་གི་ཡིན་ལབ་ན། སུས་བལྟས་ནའང་གད་མོ་ཤོར་གྱི་རེད། དེར་བརྟེན་ང་ཚོས་ངེས་པར་དུ་སངས་རྒྱས་པའི་ཆོས་ཁས་ལེན་དང་མ་ལེན་ཟེར་བ་དེ་སོ་སོའི་རང་དབང་རེད། གལ་སྲིད་ཆོས་ཁས་བླངས་བ་ཡིན་ན། སོ་སོས་ཁས་བླངས་བའི་ཆོས་དེ་ག་འདྲ་ཞིག་འདུག་རྩད་གཅོད་དང་བརྟག་དཔྱད་བྱེད་དགོས་པ་རེད། ཅེས་གསུངས་སོང་།
ཡང་ཁོང་གིས། བོད་པ་བཙན་བྱོལ་དུ་འབྱོར་མ་ཐག་གྲྭ་རྒྱུན་དཀོན་པོ་ཡིན་པ་དང་། སྐབས་དེར་ལ་དྭངས་སོགས་ཧི་མ་ལ་ཡའི་རི་རྒྱུད་པ་ཚོས་གྲྭ་རྒྱུན་མང་པོ་སྤེལ་ཏེ་བོད་ཀྱི་ཆོས་དང་རིག་གཞུང་འཛིན་སྐྱོང་སྤེལ་གསུམ་གནང་བ་དེ་བཀའ་དྲིན་ཆེན་པོ་ཡིན། དེང་སྐབས་ཧི་མ་ལ་ཡའི་རི་རྒྱུད་ཁུལ་གྱི་དགོན་པ་ཁག་དང་མང་ཚོགས་ནང་དུ་ནང་ཆོས་བསླབ་པ་སློབ་གཉེར་ཐད་ཡར་རྒྱས་གཏོང་བཞིན་ཡོད་པ་དེ་ཞེ་དྲགས་ཡག་པོ་ཡིན་ལ། མ་འོངས་པར་ཡང་མུ་མཐུད་ནས་ཡར་རྒྱས་ གཏོང་དགོས་སྐོར་གསུངས་བ་དང་འབྲེལ། བར་སྐབས་བལ་ཡུལ་ནང་ས་ཡོམ་གྱིས་གོད་ཆག་ཚབས་ཆེན་ཕོག་སྐབས། བལ་ཡུལ་ནང་དུ་ཡོད་པའི་བོད་ཀྱི་དགོན་པ་ཁག་དང་། མི་མང་གིས་གང་ཡོང་ཅི་ཡོང་གིས་རོགས་རམ་བྱས་པ་དེ་ཧ་ཅང་ཡག་པོ་ཡིན་ལ། ཐུགས་རྗེ་ཆེ་ཞུ་རྒྱུ་ཡིན་ཞེས་སོགས་གསུངས་སོང་།
གསར་འགོད་པ། པདྨ་མཚོ།
