རེས་གཟའ་མིག་དམར་ཉིན་བལ་ཡུལ་གྱི་གྷ་དྷི་མཱི་ལྷ་ཁང་ཐེབས་རྩ་ཚོགས་པས་ (Gadhimai Temple Trust) བལ་ཡུལ་ནང་ལོ་ངོ་བརྒྱ་ཕྲག་དུ་མའི་སྲོལ་རྒྱུན་གྷ་དྷི་མཱི་ཡི་དུས་ཆེན་ལ་སེམས་ཅན་འབུམ་ཕྲག་མང་པོ་དམར་མཆོད་གཏོང་རྒྱུའི་ལམ་སྲོལ་དེ་མཚམས་འཇོག་བྱ་རྒྱུ་ཡིན་པ་གསལ་བསྒྲགས་བྱས་འདུག
ཁ་སང་བལ་ཡུལ་སྤྱི་མཐུན་ (myrepublica) ཞེས་པའི་དྲ་ཚིགས་སྟེང་། བལ་ཡུལ་གྱི་གྷ་དྷི་མཱི་ལྷ་ཁང་ཐེབས་རྩ་ཚོགས་པའི་སྤྱི་ཁྱབ་འགན་འཛིན་རམ་ཆན་ཌར་སཱ་ (Ram Chandra Sah)ཡིས། “ང་ཚོས་དུས་སྟོན་སྐབས་ཀྱི་དུད་འགྲོ་དམར་མཆོད་མཚམས་འཇོག་བྱ་རྒྱའི་ཁྱབ་བསྒྲགས་བྱས་མེད།” ཅེས་དེ་གའི་གསར་ཁང་ལ་བརྗོད་འདུག
འོན་ཀྱང་། རེས་གཟའ་མིག་དམར་ཉིན་རྒྱ་གར་དུས་བབ་ཀྱིས་རམ་ཆན་ཌར་སཱའི་སྐད་ཆ་ལུང་འདྲེན་བྱས་ཏེ། གྷ་དྷི་མཱི་ལྷ་ཁང་ཐེབས་རྩ་ཚོགས་པས་དུད་འགྲོ་དམར་མཆོད་མཚམས་འཇག་བྱ་རྒྱུ་ཡོངས་ཁྱབ་གསལ་བསྒྲགས་བྱས་འདུག ཅེས་འཁོད་འདུག དེ་བཞིན། ཧྥ་རན་སིའི་གསར་ཁང་ (AFP) གིས། གྷ་དྷི་མཱི་ལྷ་ཁང་ཐེབས་རྩ་ཚོགས་པའི་དྲུང་ཆེ་མཱོ་ཌིལ་ལི་ཁུ་ཞི་ཝ་ (Motilal Kushwaha) སྐད་ཆ་ལུང་འདྲེན་བྱས་པའི་ནང་། “ཐེབས་རྩ་ཚོགས་པའི་འཛིན་སྐྱོང་ལྷན་ཚོགས་ཀྱིས་དུད་འགྲོ་དམར་མཆོད་རྩ་བ་ནས་མཚམས་འཇོག་བྱ་རྒྱུ་ཐག་གཅོད་བྱས་ཡོད།” ཅེས་འཁོད་འདུག
ཐེངས་རྩ་ཁང་གི་སྤྱི་ཁྱབ་འགན་འཛིན་རམ་ཆན་ཌར་སཱ་ཡིས་བརྒྱུད་ལམ་ཁག་གི་གསར་འགྱུར་ལ་ཧང་སང་ཏེ་ཁོས་གསལ་བཤད་བྱས་དོན། ཐེབས་རྩ་ཚོགས་པས་ཆོས་དད་བྱེད་མཁན་རྣམས་ལ་མཛད་སྒོ་གོ་སྒྲིག་བྱས་པ་ལས་དམར་ མཆོད་བྱ་དགོས་པའི་སྐུལ་མ་བཏང་མྱོང་མེད་ཅེས་སྤྱི་མཐུན་གསར་ཁང་ལ་བརྗོད་ཡོད་པ་འཁོད་འདུག
ཁ་སང་ (Indiarealtime) གསར་ཁང་གིས་གནས་ཚུལ་སྤེལ་བའི་ནང་གྷ་དྷི་མཱི་ལྷ་ཁང་ཐེབས་རྩ་ཚོགས་པའི་སྤྱི་ཁྱབ་འགན་འཛིན་རམ་ཆན་ཌར་སཱ་ཡི་བསྒྲགས་གཏམ་སྤེལ་པའི་ནང་། “མི་རབས་ཁ་ཤས་ལ་གནས་སྐོར་བ་མང་པོ་ཞིག་གིས་རང་ཉིད་ཀྱི་འཚོ་བ་ཡར་རྒྱས་ཡོང་བའི་རེ་བ་བཟུང་ནས་སེམས་ཅན་མང་པོ་དམར་མཆོད་བཏང་ནས་གྷ་དྷི་མཱི་ལྷ་མོར་མཆོད་པ་བྱས་ཡོད་པ་རེད། ད་ལྟ་དམར་གསོད་དང་འཚེ་བ་དེ་དག་སྤངས་ནས་ཞི་བདེ་ཡི་ཕྱག་མཆོད་དང་དགའ་སྤྲོ་ཡི་དུས་སྟོན་ལ་འགྱུར་དགོས་པའི་དུས་ལ་བསླེབས་པ་རེད།” ཅེས་བརྗོད་པ་འཁོད་ཡོད་འདུག
བལ་ཡུལ་གྱི་དུད་འགྲོ་སྲུང་སྐྱོབ་དྲ་རྒྱ་གསར་གཏོད་མཁན་མཱ་ནའོ་ཇི་གྷོ་ཊམ་ (Manoj Gautam) གྱིས། “ང་ཚོས་ལྷ་ཁང་ཐེབས་རྩ་ཚོགས་པས་ཉམས་ཆུང་དུད་འགྲོ་དམར་གསོད་གཏོང་རྒྱུ་མཚམས་འཇོག་བྱེད་པར་བསྔགས་བརྗོད་བྱེད་ཀྱི་ཡོད། དེ་ནས་རྗེས་ཕྱོགས་ཁོ་ཚོས་རྒྱལ་ཁབ་འདིའི་དུད་འགྲོ་སྲུང་སྐྱོབ་ལ་རྒྱབ་སྐྱོར་བྱེད་པའི་རེ་བ་ཡོད།” ཅེས་བརྗོད་འདུག
གནས་ཚུལ་དེའི་ནང་དུ། རྒྱ་གར་དང་བལ་ཡུལ་ནས་ཡོང་པའི་ཧིན་དྷི་གནས་མཇལ་བ་ཚོ་ལོ་ལྔ་རེ་མཚམས་ཀྱི་དམར་མཆོད་དུས་སྟོན་དེར་འཛུལ་བཞུགས་བྱེད་ཀྱིན་ཡོད་པ་དང་། ཕྱི་ལོ་ ༢༠༠༩ ལོར་ཆོས་བྱེད་མཁན་ཚོས་རང་ཉིད་དང་ཁྱིམ་ཚང་གི་འཚོ་བ་གོང་འཕེལ་འགྲོ་བར་ཡིད་ཆེས་བྱས་ནས་མ་ཧེ་དང་ར་ལུག ཁྱིམ་བྱ་སོགས་སེམས་ཅན་ ༥༠༠༠༠༠ ལྷག་དམར་མཆོད་བཏང་ཡོད་འདུག ཅེས་བཀོད་འདུག
བལ་ཡུལ་ལྷོ་ཤར་གྱི་བྷ་ར་ (Bara) རྫོངས་ནང་གི་བྷ་རི་ཡཱ་གྲོ་ (Bariyarpur) གྲོང་རྡལ་དུ་ཚོགས་བཞིན་པའི་གྷ་དྷི་མཱི་དམར་མཆོད་དུས་སྟོན་ནི་ཁག་ཅིག་གིས་དེ་ནི་གདོད་མའི་དུས་ནས་བྱུང་བ་ཞིག་ཡིན་ཚུལ་དང་། ཡང་ཁག་གིས་འདི་ནི་ལོ་ངོ་ ༢༦༥ གོང་ནས་བྷ་ཝན་ཆའོ་ཌ་རེ་ (Bhagwan Chowdhary) ལགས་ཀྱིས་ལྷ་མོ་གྷ་དྷི་མཱི་ཡི་ལྟ་བ་གཞིར་བཟུང་བྱས་ནས་གསར་གཏོད་མཛད་ནས་བཟུང་ལོ་རྒྱུས་རིང་བཞིན་གྱི་སྲོལ་རྒྱུན་དུ་གྱུར་ནས་དུས་རབས་གསུམ་ཙམ་ལ་ཉམ་ཆུང་སེམས་ཅན་ས་ཡ་མང་པོ་དམར་གསོད་བྱས་སྐོར་སོགས་གླེང་བཞིན་ཡོད་པ་རེད།
གསར་འགོད་པ། འཇིགས་མེད་རྒྱ་མཚོ།
