ཟླ་འདིའི་ཚེས་ ༡༨ ཉིན་རྒྱ་གཞུང་ལ་ཞི་བའི་ངོ་རྒོལ་གནང་མཁན་བློ་བཟང་ཐུབ་བསྟན་ལགས་ད་ལྟ་ལི་ཐང་རྫོང་དུ་བཀག་ཉར་བྱས་ཡོད་འདུག
ད་ལྟ་རང་དགེ་བཤེས་སེར་སྨད་བློ་དགའ་ལགས་ཀྱིས་འདི་གར་གནས་ཚུལ་མཁོ་སྤྲོད་གནང་བ་ལྟར་ན། ཕྱི་ལོ་ ༢༠༡༥ ཕྱི་ཟླ་ ༨ ཚེས་ ༡༨ རེས་གཟའ་མིག་དམར་ཉིན། ལི་ཐང་གི་ཁྲོམ་གཞུང་དུ་ཐོན་ནས་༧གོང་ས་མཆོག་གི་སྐུ་ཐང་ཆེན་པོ་ཞིག་གནམ་ལ་འཕྱར་ཏེ། བོད་ལ་རང་དབང་དགོས། ༧རྒྱལ་བ་རིན་པོ་ཆེ་བོད་ལ་གདན་འདྲེན་ཞུ་དགོས། ཞེས་རྒྱ་ནག་གཞུང་ལ་ཞི་བའི་ངོ་རྒོལ་གནང་མཁན་གཞོན་སྐྱེས་རྒྱལ་གཅེས་པ་ཁོང་གི་མཚན་ལ་བློ་བཟང་ཐུབ་བསྟན་ནམ་ཐུབ་སྦེ་ཞུ་གི་ཡོད་པ་མ་ཟད། ད་ལྟ་ཁོང་ལི་ཐང་རྫོང་དུ་བཀག་ཉར་བྱས་ཡོད་འདུག
ཡང་གནས་ཚུལ་མཁོ་སྤྲོད་པས་རྒྱལ་གཅེས་པ་བློ་བཟང་ཐུབ་བསྟན་ནམ་ཐུབ་སྦེ་ལགས་ནི། ད་ལྟ་རང་ལོ་ ༡༧ ཡིན་ཞིང་། ཁོང་གི་ཕ་མིང་ལ་བྱིས་འཕག་མིས་མིས་དང་མ་མིང་ལ་བསྟན་ལོ་ཟེར་གྱི་ཡོད་འདུག བྱིས་འཕག་ཅེས་པ་ནི་མི་བརྒྱུད་ཅིག་གི་མིང་ཡིན་པ་དང་མི་བརྒྱུད་དེ་ལི་ཐང་གི་རོང་འབྲོག་གཉིས་ཀའི་སྡེ་ཚོ་མང་པོའི་ནང་གནས་ཡོད་པའི་མི་བརྒྱུད་ཅིག་རེད། རྒྱལ་གཅེས་པ་ཁོང་ནི་ལི་ཐང་གཡོན་རུའི་འབྲོག་སྡེ་ལ་སྡེ་ཁག་མང་པོ་ཡོད་པའི་ནང་ནས་དཔོན་སྐོར་སྡེ་པ་ནས་ཡིན་པ་དང་། དཔོན་སྐོར་སྡེ་པ་ལ་མཉམ་ལས་སྡེ་ཁག་བརྒྱད་ཡོད་པའི་ནང་ནས་སྡེ་པ་དང་པོ་འཐོར་རུག་སྡེ་པ་ནས་ཡིན་འདུག་ཅིང་། མི་ཚང་དེར་ཁྱིམ་མི་ ༡༡ ཡོད་པ་དང་ཁྱིམ་ཚང་གི་འཚོ་བའི་གནས་སྟངས་ཉེ་སྐོར་གྱི་འབྲོག་པའི་ནང་ནས་ཡག་གྲས་ཤིག་ཡིན་འདུག དེ་སྔོན་ཁོང་ལི་ཐང་དགོན་པའི་ནང་སློབ་གཉེར་གནང་མྱོང་ཡོད་པ་མ་ཟད། དུས་རྒྱུན་བོད་མི་རིགས་ཀྱི་སྐད་དང་རིག་གནས་ལ་འགན་ཁུར་གྱི་བསམ་བློ་ཆེན་པོ་ཡོད་མཁན་ཞིག་ཡིན་འདུག ཅེས་དང་།
ཁོང་གིས་མུ་མཐུད་དུ་རྒྱལ་གཅེས་པ་ཐུབ་སྦེ་ལགས་འཇུ་བཟུང་བྱེད་མ་ཐག་ནས། ས་ཚུགས་གལ་ཆེ་བར་ལྐོག་མིག་གྲངས་ལས་འདས་པ་ཡོད་མུས་ལ། ལི་ཐང་གི་ས་ཁུལ་ཁྱོན་ཡོངས་སུ་རྒྱ་ནག་གི་ཞི་བའི་ཉུལ་ཞིབ་རུ་ཁག་གི་མི་སྣ་རྣམས་མངོན་གསལ་དོད་དུ་ཕྱིན་པ་དང་། དྲག་པོའི་དམག་མིས་དམ་དྲག་གི་རྣམ་འགྱུར་ཤུགས་ཆེ་རུ་བཏང་བ་བཅས་ཀྱི་གནས་ཚུལ་ཐོན་ཡོད་སྟབས། ས་གནས་བོད་མི་མང་ཆེ་བས་རྒྱལ་གཅེས་པ་ཐུབ་སྦེ་ལགས་ནས་རྒྱ་ནག་གཞུང་ལ་ངོ་རྒོལ་སྐད་འབོད་བྱས་པ་དངོས་སུ་མཐོང་མེད་ཀྱང་དུས་ཚོད་ཐུང་ཐུང་ནང་། རྒྱ་ནག་གཞུང་གིས་ས་གནས་སུ་ཞི་དྲག་གི་ལས་དོན་སྒྲུབ་པའི་བྱེད་བབ་ཀྱི་རྣམ་འགྱུར་ལ་བརྟེན་ནས། བོད་དོན་སྐད་འབོད་བྱས་པ་དང་འཇུ་བཟུང་བྱས་པའི་གནས་ཚུལ་ཐོན་ཡོད་པ་ལས་སླ་པོར་ཤེས་ཡོད། སྐབས་དེ་དུས་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་སྐུ་བཀྲོངས་པ་དང་བརྒྱད་གཅིག་དམག་གི་དུས་ཆེན་སྲུང་བརྩི། རྒྱལ་གཅེས་དཔའ་བོ་རུང་རྒྱས་ཨ་གྲགས་ལགས་བཙོན་གྲོལ་བཏང་ནས་ཉིན་མང་པོ་ཕྱིན་མེད་པ་བཅས་ཀྱི་གནས་ཚུལ་ལ་བརྟེན་ནས། སྐབས་དེར་དམ་དྲག་ཡོད་བཞིན་པ་དེ་རྣམས་དམ་དྲག་ཤུགས་ཆེ་རུ་བཏང་ཡོད་པ་རེད། ཅེས་བརྗོད་བྱུང་།
