ཁ་སང་པ་ཀི་སི་ཐན་ཁྲིམས་ཁང་གིས་སྲིད་བློན་ཟུར་པ་དང་ཚོང་དོན་བློན་ཆེན་ཟུར་པ་རྣམ་གཉིས་འཛིན་བཟུང་བྱེད་དགོས་པའི་བཀའ་རྒྱ་བཀྲམ་འདུག
ཁ་སང་པ་ཀི་སི་ཐན་གཞུང་གི་ལྐོག་ཟ་རུལ་སུངས་ལ་རྒོལ་རྡུང་གཏོང་མཁན་གྱི་ཁྲིམས་ཁང་གིས། སྲིད་བློན་ཟུར་པ་ཡུ་སེབ་ར་ཛ་གྷེ་ལཱ་ཎི་(Yusuf Raza Gilani)དང་། ཚོང་དོན་བློན་ཆེན་ཟུར་པ་མཱ་ཁཱ་དྷོམ་ཨཱ་མེན་ཧྥ་ཧེམ་(Makhdoom Amin Fahim) གཉིས་ཀྱིས་གཞུང་དངུལ་ས་ཡ་མང་པོ་ལྐོག་ཟ་བྱས་ཡོད་པ་ཕྱིར་བསྒྲགས་བྱས་པ་དང་འབྲེལ། འཇུ་བཟུང་བཀའ་རྒྱ་བཀྲམ་ཡོད་པ་མ་ཟད། ཟླ་རྗེས་མའི་ཚེས་ ༡༠ ཉིན་ཁྲིམས་རྭ་ནས་གྱོད་དོན་ཞིབ་བཤེར་བྱ་རྒྱུ་ཡིན་པ་བསྒྲགས་འདུག
པ་ཀི་སི་ཐན་གྱི་བརྒྱུད་ལམ་སྐྱ་རེངས་ཀྱིས་པ་ཀི་སི་ཐན་གཞུང་གི་ལྐོག་ཟ་རུལ་སུངས་ལ་རྒོལ་རྡུང་གཏོང་མཁན་གྱི་ཁྲིམས་ཁང་གི་སྐད་ཆ་ལུང་འདྲེན་བྱས་པའི་ནང་། པ་ཀི་སི་ཐན་དབུས་སྒྲིག་ཁྲིམས་ཞིབ་བཤེར་ཁང་གིས་སྲིད་བློན་ཟུར་པ་ཡུ་སེབ་ར་ཛ་གྷེ་ལཱ་ཎི་དང་ཚོང་དོན་བློན་ཆེན་ཟུར་པ་མཱ་ཁཱ་དྷོམ་ཨཱ་མེན་ཧྥ་ཧེམ་རྣམ་གཉིས་ཀྱི་གཙོས། ཚོང་དོན་འཕེལ་རྒྱས་ལྷན་ཁང་གི་མཐོ་རིམ་ལས་བྱེད་ཁག་གཅིག་གིས་རྒྱལ་ཁྲིམས་དང་འགལ་བའི་ནག་ཉེས་གྲངས་ ༡༢ བསགས་ཡོད་པ་མ་ཟད། ལྷག་པར་དུ་སྲིད་བློན་ཟུར་པ་དང་ཚོང་དོན་བློན་ཆེན་ཟུར་པས་ཚོང་དོན་འཕེལ་རྒྱས་ལྷན་ཁང་གི་ལས་འཆར་འོག ཁེ་ལས་རྫུན་མ་དེ་འདྲར་རོགས་སྐྱོར་བྱ་ཁུལ་གྱིས་གཞུང་དངུལ་ས་ཡ་མང་པོ་ལྐོག་ཟ་བྱས་ཡོད་པའི་བརྟག་དཔྱད་སྙན་ཐོ་ཕུལ་བ་ལྟར། ཁྲིམས་ཁང་གིས་ཞིབ་འཇུག་བྱས་ནས་ར་འཕྲོད་བྱུང་སྟེ་ཁོ་གཉིས་འཇུ་བཟུང་དགོས་པའི་བཀའ་ཁྱབ་བཏང་འདུག ཅེས་བརྗོད་འདུག
ཕྱི་ལོ་ ༢༠༠༨ ནས་ ༢༠༡༣ ལོ་བར་ཡུ་སེབ་ར་ཛ་གྷེ་ལཱ་ཎི་ཡིས་པ་ཀི་སི་ཐན་གྱི་སྲིད་བློན་བྱེད་སྐབས། པ་ཀི་སི་ཐན་ཆེས་མཐོའི་ཁྲིམས་ཁང་གིས་ཁོང་ལ་སུད་སི་གཞུང་ལ་ཡི་གེ་བཏང་སྟེ། སྐབས་དེའི་སྲིད་འཛིན་ཨཱ་སེབ་ཨཱ་ལི་ཛར་ཌ་རི་ (Asif Ali Zardari) ཡིས་གཞུང་དངུལ་ལྐོག་ཟ་བྱས་ཡོད་པ་བདེན་དཔང་གནང་རོགས་ཞུ་དགོས་པའི་བཀའ་རྒྱ་བཏང་ཡང་། ཁོས་བཀའ་རྒྱ་རྩིས་མེད་བཏང་བ་མ་ཟད་འགོག་རྒོལ་བྱས་ཡོད་སྟབས། ཆེས་མཐོའི་ཁྲིམས་ཁང་གིས་ཁོ་གནས་དབྱུང་བཏང་ཡོད། ༢༠༡༥ ལོའི་ལོ་མགོ་ནས་བཟུང་པ་ཀི་སི་ཐན་དབུས་སྒྲིག་ཁྲིམས་ཞིབ་བཤེར་ལས་ཁང་གིས་སྲིད་འཛིན་ཟུར་བ་ཨཱ་སེབ་ཨཱ་ལི་ཛར་ཌ་རིས་སྣེ་ཁྲིད་པའི་པ་ཀི་སི་ཐན་གྱི་ཆབ་སྲིད་ཚོགས་པ་མི་མང་ཤོག་ཁག་ (PPP) གི་དཔོན་རིགས་རྒན་གྲས་དང་སྲིད་བློན་ཟུར་བ་ཡུ་སེབ་ར་ཛ་གྷེ་ལཱ་ཎི་དང་། ཚོང་དོན་བློན་ཆེན་ཟུར་བ་མཱ་ཁཱ་དྷོམ་ཨཱ་མེན་ཧྥ་ཧེམ་རྣམ་གཉིས་ལ་དབང་ཆ་ཡོད་སྟབས། ཁོ་གཉིས་ཀྱིས་ཁེ་ལས་རྫུན་མའི་མིང་ཐོག་ནས་ཚོང་དོན་དཔྱ་ཁྲལ་ཆག་ཡང་དང་ཡིག་ཆ་རྫུན་བཟོ་སོགས་བྱས་ཏེ། གཞུང་དངུལ་སྒེར་སྤྱོད་དང་སྤྱི་རྒྱུ་སྒེར་བདག་གི་བྱ་ངན་བརྩམས་ནས། པ་ཀི་སི་ཐན་གྱི་དངུལ་ལོར་ས་ཡ་མང་པོ་ལྐོག་ཟ་བྱས་ཡོད་པ་ར་འཕྲོད་བྱུང་ཡོད་སྟབས་འཇུ་བཟུང་བཀའ་རྒྱ་བཀྲམ་ཡོད་པ་མ་ཟད། ཁ་ཉིན་ཆེས་མཐོའི་ཁྲིམས་ཁང་གིས་ལྐོག་ཟ་སུལ་སུངས་ཀྱི་དོན་རྐྱེན་དང་འབྲེལ་བའི་ཐོག་ཀཱ་ར་ཆི་གྲོང་ཁྱེར་ནས་སྲིད་འཛིན་ཟུར་བ་ཡུ་སེབ་ར་ཛ་གྷེ་ལཱ་ཎི་ཡི་ཐུགས་སྲས་པ་ཀི་སི་ཐན་གྱི་རྡོ་སྣུམ་བློན་ཆེན་ཟུར་པ་ཨཱ་སེམ་ཧུ་སན་ (Asim Hussain ) འཛིན་བཟུང་བྱས་ཡོད།
དེ་རིང་པ་ཀི་སི་ཐན་གྱི་རེས་གཟའ་པ་སངས་ཀྱི་དུས་བབ་ (The Friday Times) ཀྱིས། ཉེ་ལམ་ཆེས་མཐོའི་ཁྲིམས་ཁང་གིས་སྲིད་བློན་ཟུར་པ་དང་ཚོང་དོན་བློན་ཆེན་ཟུར་པས་གཞུང་དངུལ་ལྐོག་ཟ་བྱས་ཡོད་པ་ར་འཕྲོད་དེ། ཁྲིམས་ཁང་ལ་ནག་ཉེས་ངོས་ལེན་བྱེད་བར་ཡོང་དགོས་པའི་བཀོད་ཁྱབ་བཏང་ཀྱང་། ཁོ་གཉིས་ཀྱིས་ངོ་བཅར་ཞུས་མེད་པ་མ་ཟད་ད་དུང་སྐྱོན་འཛུགས་བྱས་ཡོད་སྟབས། ཁྲིམས་ཁང་གིས་འཇུ་བཟུང་བཀའ་རྒྱ་བཀྲམ་དགོས་བྱུང་ཡོད། ད་ལྟ་གྱོད་དོན་འདིའི་ནང་གཞུང་གི་ཆབ་སྲིད་པ་དང་གནད་ཡོད་མི་སྣ་མང་དག་ཅིག་ཚུད་ཡོད་སྟབས། གཞུང་གིས་རིམ་པས་ཁོ་ཚོའི་བྱ་ངན་འཚང་བརྟོལ་གྱིས་སྟག་སྦྲང་མཉམ་རྡུང་གི་བྱ་སྤྱོད་སྤེལ་གྱི་རེད། ཅེས་བརྗོད་འདུག
གསར་འགོད་པ། དོན་གྲུབ།
